2 Thessalonians 3

Shan

← Chapter 2 Jump to:

1ၵႂၢမ်းဢၼ်ယင်းၵိုတ်းယင်းၵျၢၼ်ႇၸမ်ႉ၊ ပီႈၼွင်ႉၶဝ်ဢိူၺ်း၊ လွင်ႈၼင်ႇႁိုဝ်ၼုၵ်ႈၵပၢတ်ႈတြႃးၸဝ်ႈၽြႃး တၵ်းၸွတ်ႇတူဝ်ႈလႄႈ မုၼ်ၽုင်းထၢင်ႇသႃးၵူႈတီႈၵူႈလႅၼ် မိူၼ်ၸိူဝ်ႉၼင်ႇဢၼ် ၸွတ်ႇတူဝ်ႈၵႃႈၼႂ်းသူလႄႈ မုၼ်ၽုင်းထၢင်ႇသႃးၼၼ်ႉ၊-

2ဢိၵ်ႇတင်းလွင်ႈၼင်ႇႁိုဝ် မၼ်းၸဝ်ႈတၵ်းၵႄႇၶျွတ်ႈဢဝ်ႁဝ်း ၵႃႈၼႂ်းမိုဝ်းၶဝ်ၸိူဝ်းဢၼ်ဢမ်ႇႁူႉဢမ်ႇမၢတ်ႈလွင်ႈဢၵျူဝ်းလႄႈႁၢႆႉမိူၵ်ႈ ၼၼ်ႉၸိုင်၊ သူးတွင်းပုၼ်ႈႁဝ်းတႃႉ။-

3ၵူၺ်းၵႃႈၸဝ်ႈၽြႃးပျေႉၸုမ်ႇတင်းသဵတ်ႈၸႃႇယူႇဢေႃႈ။ မၼ်းၸဝ်ႈတၵ်းႁႂ်ႈသူမၼ်ႈၶိူင်ႇလႄႈပႂ်ႉသူယူႇ ႁႂ်ႈသူလႆႈၵၢင်းလွတ်ႈတင်း လွင်ႈတၢင်းဢၼ်ဢမ်ႇလီဢမ်ႇငၢမ်းၼၼ်ႉဢေႃႈ။-

4ႁဝ်းဢိင်ၸဝ်ႈၽြႃးသေလႄႈ ယုမ်ႇလွင်ႈဢၼ်တေႃႈလဵဝ်ၼႆႉ သူၵမ်ၵျၢင်ႉၸွမ်းၵႃႈၼင်ႇဢၼ်ႁဝ်းပိင်းၺၢပ်ႈဝႆႉၼၼ်ႉယူႇလႄႈ ၵမ်းလိုၼ်းၵေႃႈ တၵ်းၵမ်ၵျၢင်ႉၼၼ်ႉယူႇဢေႃႈ။-

5ႁႂ်ႈၸဝ်ႈၽြႃးမႄးပၼ် ႁူဝ်ၸႂ်သူ ႁႂ်ႈသူႁၵ်ႉၽြႃးပဵၼ်ၸဝ်ႈ ဢိၵ်ႇတင်းႁႂ်ႈသူလႆႈယိူၼ်ႉၶၢမ်ႇ ၸိူဝ်ႉၼင်ႇၸဝ်ႈၶရိၸ်ႈၼၼ်ႉသေၵမ်းလူၺ်ႈ။

6ၼႄးၼိုင်ႈၸမ်ႉ၊ပီႈၼွင်ႉၶဝ်ဢိူၺ်း၊ ဝႄႈပႅတ်ႈသေပီႈၼွင်ႉၵႃႈဢၼ်ႁဵတ်းဢမ်ႇတြႃးလႄႈ ဢမ်ႇၵမ်ၵျၢင်ႉၸွမ်းၼင်ႇၼႄးဢူႉပတေႇဢၼ်ၶဝ်ၶၢမ်ႇဢဝ်တီႈႁဝ်း တင်းသဵင်ႈတင်းလူင်ၼၼ်ႉတႃႉဝႃႈၼႆ၊ ႁဝ်းဢိင်ၼႃႇမႃႉၸိုဝ်ႈသဵင်ၸဝ်ႈႁဝ်း ယေႇသူႉၶရိၸ်ႈ သေလႄႈပိင်းၺၢပ်ႈဝႆႉဢေႃႈ။-

7လွင်ႈမၼ်းၸမ်ႉ တူဝ်သူႁူႉလွင်ႈဢၼ် သူတၵ်းလႆႈၸွမ်းပုင်ႇသၢၵ်ႈသေႇ ဢၼ်ႁဝ်းပၼ်ၼၼ်ႉလႄႈ ၵမ်ၵျၢင်ႉၸိူဝ်ႉၼင်ႇႁိုဝ် ၼၼ်ႉယူႇ ဢေႃႈ။-

8ႁဝ်းႁဵတ်းဢၼ်ဢမ်ႇတြႃးၼႂ်းသူဢမ်ႇၸႂ်ႈ။ ႁဝ်းဢမ်ႇၵိၼ်ၶွင်လၢႆၽူႈလႂ်။ ၼင်ႇႁိုဝ်ႁဝ်းတၵ်းဢမ်ႇလႆႈယႃႉယူၵ်ႉသေၵေႃႉသေၵူၼ်း ၵႃႈၼႂ်း သူၸိုင် ႁဝ်းၶၢမ်ႇတၢင်းဢၼ်ယၢပ်ႇၽိုတ်ႇၵႆႉၵျူဝ်းၸႃးလႄႈ ႁဵတ်းတၢင်းႁဵတ်းယူႇၵူႈဝၼ်းၵူႈၶိုၼ်းဢေႃႈ။-

9ႁဵတ်းၸိူဝ်ႉၼင်ႇၼၼ်သေၵေႃႈ၊ ၵွပ်ႈပိူဝ်ႈဢၼ်ႁဝ်းဢမ်ႇထိူၵ်ႈပိူင်ႇ လွင်ႈတၢင်းဢၼ်ၶၢမ်ႇဢဝ်ၼၼ်ႉလႄႈ ႁဵတ်းဢမ်ႇၸႂ်ႈ။ ႁဵတ်းႁႂ်ႈလႆႈပဵၼ်ပုင်ႇသၢၵ်ႈသေႇပုၼ်ႈဢၼ်သူတၵ်းၸွမ်းဢေႃႈ။-

10ပဵၼ်ၸိူဝ်ႉၼင်ႇႁိုဝ်ဝႃႈၼႆၸမ်ႉ၊ မိူဝ်ႈဢၼ်ႁဝ်းမီးယူႇလူၺ်ႈၵၼ်တင်းသူၼၼ်ႉၸိုင်၊ ႁဝ်းဝႆႉပိင်းၺၢပ်ႈလႄႈဝႃႈ၊ ၵေႃႉဢၼ်ဢမ်ႇၶႂ်ႈႁဵတ်းတၢင်းႁဵတ်းၼၼ်ႉၸမ်ႉ၊ ယႃႇပေႁႂ်ႈၵိၼ်၊ ဝႃႈၼင်ႇၼႆဝႆႉယဝ်ႉ။-

11လွင်ႈမၼ်းၸမ်ႉ ႁဝ်းလႆႈငိၼ်းလွင်ႈဢၼ် ၵူၼ်းၵမ်ႈၽွင်ႈဢၼ်ႁဵတ်းဢမ်ႇတြႃးလႄႈ ယင်းဢမ်ႇႁဵတ်းတၢင်းႁဵတ်းၵႃႈသင်၊ လေႃလႄယူႇၵႃႈၼႂ်းလွင်ႈတၢင်းဢၼ်ဢမ်ႇၸၢပ်ႈသႅင်ႇၵၼ်တင်းတူဝ်ၸဝ်ႈၵဝ်ႇၼၼ်ႉ မီးၼႂ်းသူၼၼ်ႉဢေႃႈ။-

12ၼင်ႇႁိုဝ်ၶဝ်ၸိူဝ်ႉၼင်ႇၼၼ်ၼၼ်ႉ တၵ်းလႆႈႁဵတ်းတၢင်းႁဵတ်းၼိမ်ၼိမ်လီလီလႄႈ ၵိၼ်တၢင်းၵိၼ်တူဝ်ၸဝ်ႈၵဝ်ႇၸိုင်၊ ႁဝ်းဢိင်ၸဝ်ႈ ယေႇသူႉၶရိၸ်ႈ သေလႄႈ ပိင်းၺၢပ်ႈဝႆႉလႄႈတိုၵ်းယူင်းၸူဝ်းဢဝ်ၶဝ်ဢေႃႈ။

13ပီႈၼွင်ႉၶဝ်ဢိူၺ်း၊ ႁႅင်းယင်းဢမ်ႇဢူၼ်ႈၸႂ်ယင်းဢမ်ႇလူႉလႄႈ ၵမ်ၵျၢင်ႉတၢင်းၵမ်တၢင်းၵျၢင်ႉ ဢၼ်လီဢၼ်ငၢမ်းယူႇတႃႉ။-

14ပေႃးသေၵေႃႉသေၵူၼ်း ယင်းဢမ်ႇထွမ်ႇဢဝ်ၵႂၢမ်းပိင်းၺၢပ်ႈဢၼ်ႁဝ်းတႅမ်ႈဝႆႉ ၵႃႈၼႂ်းလိၵ်ႈၼႆႉလႄႈယူႇၸိုင်၊ မၢတ်ႈတွင်းၵေႃႉၼၼ်ႉဝႆႉတႃႉ။ လွင်ႈၼင်ႇႁိုဝ်မၼ်းတၵ်းဢူၵ်းတၵ်းဢၢႆၸိုင်၊ ယႃႇပေႁဵတ်းၵေႃႉႁဵတ်းသေႈလူၺ်ႈၵၼ်တင်းမၼ်း။-

15ၼႂ်းဝႃႈၼၼ်သေၵေႃႈ ယင်းဢမ်ႇမၢတ်ႈတွင်းမၼ်းဝႆႉ ပဵၼ်ၸိူဝ်ႉၼင်ႇရၢၼ်ႇသူႇ၊ မၢတ်ႈတွင်းမၼ်းဝႆႉပဵၼ်ၸိူဝ်ႉၼင်ႇပီႈၼွင်ႉၼၼ်ႉ သေလႄႈပၼ်သတီႉတႃႉ။

16ႁႂ်ႈတူဝ်ၸဝ်ႈတၢင်းၼိမ်ၼၼ်ႉ ပၼ်တၢင်းၼိမ်တီႈသူၼႂ်းလွင်ႈတၢင်းၵူႈၸိူဝ်ႉၵူႈပိူင် တႃႇသေႇဢမ်ႇထၢတ်ႇသေၵမ်းလူၺ်ႈ။ ႁႂ်ႈၸဝ်ႈၽြႃးမီးလူၺ်ႈၵၼ်တင်းသူသေၵမ်းလူၺ်ႈ။

17ၵဝ် ပေႃးလူႉ ဢဝ်တင်းမိုဝ်းတူဝ်ၸဝ်ႈၵဝ်ႇ တႅမ်ႈလွင်ႈတၢင်းဢၼ် တၵ်ႉၼၢႆသူဢၼ်ပဵၼ်လၢၵ်ႈၶၼႃႇလိၵ်ႈဢေႃးဝႃႇတႃႉ ၵႃႈမီး တင်းသဵင်ႈတင်းလူင်ၼၼ်ႉၼႆႉဢေႃႈ။ ၵဝ်တႅမ်ႈဝႆႉၸိူဝ်ႉၼင်ႇၼႆဢေႃႈ။

18ႁႂ်ႈသူႉၵျေးၸူးၸဝ်ႈ ယေႇသူႉၶရိၸ်ႈ မီးၼိူဝ်သူတင်းသဵင်ႈတင်းလူင်သေၵမ်းလူၺ်ႈ။ ဢႃႇမိၼ်ႇ။ လိၵ်ႈဢေႃးဝႃႇတႃႉ ထိတ်ႉသႃႇလေႃးၼိၵ်ႈ ၽိုၼ်တူႉတီႉယႃႉယဝ်ႉယဝ်ႉဢေႃႈ။

← Chapter 2 Jump to: