James 1

Shan

Jump to: Chapter 2 →

1ၵဝ် ယႃႇၵုပ်ႈ ဢၼ်ပဵၼ်ၶႃႈၽြႃးပဵၼ်ၸဝ်ႈ တင်းၸဝ်ႈ ယေႇသူႉၶရိၸ်ႈ ၼႆႉ ပၼ်မႅတ်ႈတႃႇၵႂႃႇ ၵႃႈတီႈမဵဝ်းၸိူဝ်ႉၶိူဝ်းသိပ်းသွင်ပႃး ဢၼ်ၽၢတ်ႇၽႄၵၼ်မီးယူႇၵူႈတီႈၵူႈလႅၼ်ဢေႃႈ။

2ပီႈၼွင်ႉၵဝ်တင်းလၢႆဢိူၺ်း၊ သူႁူႉလွင်ႈဢၼ်တၢင်းဢၼ်ၸႅတ်ႈထၢမ် ၸၢမ်းတူၺ်းတၢင်းဢၼ်ယုမ်ႇမၢတ်ႈသူၼၼ်ႉ တၵ်းႁႂ်ႈတၢင်းဢၼ်ယိူၼ်ႉၶၢမ်ႇ ယႂ်ႇၵႂၢင်ႈမႃးၼၼ်ႉယူႇသေလႄႈ-

3မိူဝ်ႈဢၼ်သူႁူပ်ႉထူပ်း တၢင်းဢၼ်ၸၢမ်းတူၺ်းယႃႉယူၵ်ႉ ၵူႈၸိူဝ်ႉၵူႈပိူင်ၼၼ်ႉၸိုင် မၢတ်ႈပဵၼ်လွင်ႈတၢင်း ဢၼ်လီသိူဝ်းပျေႃႇၵူၺ်းတႃႉ။-

4လွင်ႈၼင်ႇႁိုဝ်သူတၵ်း ဢမ်ႇလူဝ်ႇထႅင်ႈသေဢိတ်းလႄႈ ၸေးၸုမ်ႇတဵမ်ဝႆႉၸိုင် ႁႂ်ႈတၢင်းဢၼ်ယိူၼ်ႉၶၢမ်ႇသူၼၼ်ႉ ႁဵတ်းပဵၼ်တင်းသဵင်ႈတင်းလူင်သေၵမ်း။

5ၼႂ်းသူၼၼ်ႉပေႃးသေၵေႃႉသေၵူၼ်း လူဝ်ႇပိင်ႇၺႃႇၸိုင် ႁႂ်ႈမၼ်းယွၼ်းဢဝ်ၵႃႈတီႈ ၽြႃးပဵၼ်ၸဝ်ႈဢၼ်ဢမ်ႇသႄႉသွမ်း တၢင်ႇဢပႅတ်ႈ၊ ဢၼ်မီးၸႂ်ၸေႇတၼႃႇၵူၺ်းလႄႈ ပၼ်တီႈၵူၼ်းတင်းသဵင်ႈတင်းလူင်ၼၼ်ႉတႃႉ။ မၼ်းၸဝ်ႈတၵ်းပၼ်တီႈၵေႃႉၼၼ်ႉဢေႃႈ။-

6ၵူၺ်းၵႃႈ ယင်းဢမ်ႇၶႆႈၸႂ်လူၺ်ႈလွင်ႈ တၢင်ႇၸိူဝ်ႉတၢင်ႇပိူင်လႄႈ တၵ်းလႆႈဢဝ်တင်းၸႂ်ဢၼ်ယုမ်ႇမၢတ်ႈ ယွၼ်းဢဝ်ဢေႃႈ။ ၵေႃႉဢၼ်မီးတၢင်းဢၼ်ၶႆႈၸႂ် လူၺ်ႈလွင်ႈတၢင်ႇၸိူဝ်ႉတၢင်ႇပိူင်ၼၼ်ႉၸမ်ႉ၊ မိူၼ်ၸိူဝ်ႉၼင်ႇလႅင်းၼမ်ႉပိူပ်ႈၼမ်ႉပၢင်ႇလၢႆႇ ဢၼ်လူမ်းထူဝ်းလႄႈ တူင်ႉၵႂႃႇၼိုင်ၵႂႃႇၼၼ်ႉဢေႃႈ။-

7ယႃႇပေႁႂ်ႈမၼ်းထၢင်ႇတၵ်းလႆႈ သေၸိူဝ်ႉသေပိူင်ၵႃႈၼႂ်း မိုဝ်းၽြႃးပဵၼ်ၸဝ်ႈ။-

8ၵူၼ်းၸိူဝ်ႉၼင်ႇၼၼ်ၼၼ်ႉၸိုင် ပဵၼ်ၵေႃႉဢၼ်မီးႁူဝ်ၸႂ်သွင်ၽၢႆႇသွင်ပႃႈ၊ ၵေႃႉဢၼ်ဢမ်ႇမၼ်ႈဢမ်ႇၶိူင်ႇ ၵႃႈၼႂ်းၵႃႈဢၼ်မၼ်းႁဵတ်း တင်းသဵင်ႈတင်းလူင်ၼၼ်ႉဢေႃႈ။

9ႁႂ်ႈပီႈၼွင်ႉဢၼ်ၶျႃးတႅမ်ႇၼၼ်ႉ ဢုပ်ႇဝၢဝ်းသိူဝ်းပျေႃႇၵႃႈၼႂ်းတၢင်းဢၼ်တူဝ်ၸဝ်ႈၵဝ်ႇ ၶၢမ်ႇတၢင်းဢၼ်ယွင်ႈယေႃးၼၼ်ႉတႃႉ။-

10ႁႂ်ႈပီႈၼွင်ႉဢၼ်ၸၢင်ႈမၢၵ်ႈၸၢင်ႈမီးၼၼ်ႉ ဢုပ်ႇဝၢဝ်းသိူဝ်းပျေႃႇၵႃႈၼႂ်းတၢင်းဢၼ်တူဝ်ၸဝ်ႈၵဝ်ႇ ၶၢမ်ႇတၢင်းဢၼ်ၶျႃးတႅမ်ႇၼၼ်ႉတႃႉ။ လွင်ႈမၼ်းၸမ်ႉ မၼ်းတၵ်းလႆႈႁၢႆလၢႆၵႂႃႇမိူၼ်ၸိူဝ်ႉၼင်ႇမွၵ်ႇယိူဝ်ႈမွၵ်ႇယႃႈၼၼ်ႉဢေႃႈ။-

11မိူဝ်ႈဢၼ်ၵၢင်ဝၼ်းဢွၵ်ႇမႃး ဢိၵ်ႇတင်းသၢႆဢရွင်ႇဢၼ်မႆႈၼၼ်ႉၸိုင်၊ ယိူဝ်ႈယႃႈၼၼ်ႉ ၸၢင်ႈႁွတ်ႈထိုင်တၢင်းဢၼ် ႁဵဝ်ႇႁႅင်ႈၵႂႃႇလႄႈ မွၵ်ႇမၼ်းၵေႃႈ ၸၢင်ႈလူၼ်ႇႁူင်ႈၵႂႃႇဢေႃႈ။ ႁၢင်ႈၽၢင်မၼ်း ဢၼ်ႁၢင်ႈလီၼၼ်ႉၵေႃႈ ၸၢင်ႈႁွတ်ႈထိုင်တၢင်းလူႉတၢင်းလႅဝ်ၵႂႃႇဢေႃႈ။ မိူၼ်ၸိူဝ်ႉၼင်ႇၼၼ်၊ ၵူၼ်းဢၼ်ၸၢင်ႈမၢၵ်ႈၸၢင်ႈမီးၼၼ်ႉ တၵ်းလႆႈႁွတ်ႈထိုင်တၢင်းဢၼ် ႁဵဝ်ႇႁႅင်ႈလူႉလႅဝ်ၵႂႃႇ ၼႂ်းတၢင်းဢၼ်မၼ်းႁဵတ်းယူႇ ၸိူဝ်းၼၼ်ႉဢေႃႈ။

12ၵေႃႉဢၼ်ယိူၼ်ႉၶၢမ်ႇတၢင်းဢၼ် ၸၢမ်းတူၺ်းယႃႉယူၵ်ႉၼၼ်ႉ မီးမင်ႇၵလႃႇဢေႃႈ။ လွင်ႈမၼ်းၸမ်ႉ မိူဝ်ႈဢၼ်ၶၢမ်ႇတၢင်းဢၼ် ၸႅတ်ႈထၢမ်ၸၢမ်းတူၺ်းၼၼ်ႉယဝ်ႉၸိုင်၊ မၼ်းတၵ်းလႆႈသရၽူႇဢသၢၵ်ႈ ဢၼ်ၸဝ်ႈၽြႃးဝႆႉၵတီႉ တီႈၶဝ်ၸိူဝ်းဢၼ်ႁၵ်ႉမၼ်းၸဝ်ႈၼၼ်ႉဢေႃႈ။-

13ၽူႈလႂ်သေဢမ်ႇဝႃႈ၊ ၵေႃႉဢၼ်လႆႈၶၢမ်ႇတၢင်းဢၼ် ဢပႅတ်ႈၸူဝ်းၵႂႃႇၸူဝ်းပႆၼၼ်ႉၸမ်ႉ၊ ၽြႃးပဵၼ်ၸဝ်ႈၸူဝ်းၵဝ်ၵႂႃႇၵဝ်ပႆဝႃႈၼႆ ယႃႇပေႁႂ်ႈလၢတ်ႈႁႂ်ႈဝႃႈ။ လွင်ႈတၢင်းဢၼ်ဢမ်ႇလီဢမ်ႇငၢမ်းၼၼ်ႉ ဢမ်ႇၸူဝ်းၽြႃးပဵၼ်ၸဝ်ႈၵႂႃႇၽြႃးပဵၼ်ၸဝ်ႈပႆလႆႈ။ မၼ်းၸဝ်ႈၵေႃႈဢမ်ႇၸူဝ်းၽူႈလႂ်ၵႂႃႇၽူႈလႂ်ပႆ ၵႃႈၼႂ်းဢပႅတ်ႈသေၵေႃႉသေၵူၼ်း။-

14ၵေႃႉဢၼ်လႆႈၶၢမ်ႇတၢင်းဢၼ်တိုတ်ႉၸၼ်ၸူဝ်းဢဝ် ၵွပ်ႈပိူဝ်ႈတၢင်းဢၼ် ၸႂ်တူဝ်ၸဝ်ႈၵဝ်ႇၸပ်းၸွႆးယူႇၼၼ်ႉၸမ်ႉ၊ ၸၢင်ႈႁွတ်ႈထိုင်တၢင်းဢၼ် ဢပႅတ်ႈၸူဝ်းၵႂႃႇၸူဝ်းပႆဢေႃႈ။-

15ၸႂ်ဢၼ်ၸပ်းဢၼ်ၸွႆးၼၼ်ႉ ပႃးပတိၵ်ႉသၼ်ႇထေႇလႄႈ ၸၢင်ႈၵိူတ်ႇလဵင်ႉ ဢပႅတ်ႈတူႉၸရိူၵ်ႈမႃးဢေႃႈ။ ဢပႅတ်ႈတူႉၸရိူၵ်ႈၼၼ်ႉၵေႃႈ၊ မိူဝ်ႈဢၼ်ၸေးၸုမ်ႇယဝ်ႉၼၼ်ႉၸိုင် ၸၢင်ႈၵိူတ်ႇလဵင်ႉတၢင်းတၢႆမႃးဢေႃႈ။

16ပီႈၼွင်ႉဢၼ်ၵဝ်ႁၵ်ႉၶဝ်ဢိူၺ်း၊ ယႃႇပေဢဝ်တၢင်းဢၼ်ၽိတ်းဢၼ်ပိူင်ႈ။-

17သူႉၵျေးၸူးဢၼ်မျၢတ်ႈလီလႄႈ ၸေးၸုမ်ႇၵႃႈမီးတင်းသဵင်ႈတင်းလူင်ၼၼ်ႉလုၵ်ႉသေၵႃႈၼိူဝ်လႄႈ လူင်းမႃးသေၵႃႈတီႈပေႃႈ တၢင်းဢၼ်ႁိူဝ်ႈလႅင်းတင်းလၢႆဢၼ်ဝႃႈ ၸဝ်ႈဢၼ်ဢမ်ႇမီးတၢင်းဢၼ် သုတ်ႈယွမ်းပိူင်ႈၵႂႃႇလႄႈ ၵၢင်းလွတ်ႈတင်းသၢႆငၢႆတၢင်းဢၼ်ၶၢႆႉပုတ်ႈၼၼ်ႉဢေႃႈ။-

18မၼ်းၸဝ်ႈၼၼ်ႉ ဢဝ်တင်းၵႂၢမ်းသမ်ႇမႃႇတြႃးလႄႈ ႁႂ်ႈႁဝ်းပဵၼ်မႃးၸွမ်းၵႃႈၼင်ႇ ဢလူဝ်ႇမၼ်းၸဝ်ႈ ႁႂ်ႈႁဝ်းလႆႈပဵၼ်ၸိူဝ်ႉၼင်ႇမၢၵ်ႇဢၼ်မၢၵ်ႇဢွၼ်တၢင်းပိူၼ်ႈၼၼ်ႉ ၼႂ်းၼီႉမိၵ်ႈတႃႉသတ်ႉတဝႃႇတင်းလၢႆဢေႃႈ။

19ပီႈၼွင်ႉဢၼ်ၵဝ်ႁၵ်ႉၶဝ်ဢိူၺ်း၊ သူႁူႉလွင်ႈမၼ်းတၢင်းမၼ်းယူႇဢေႃႈ။ ၵူၺ်းၵႃႈ ႁႂ်ႈၵူႈၵေႃႉၵူႈၵူၼ်းဢွၼ်ၵၼ်ႁဵတ်းၶၼ်ႁဵတ်းၽႂ်း ႁႂ်ႈလႆႈထွမ်ႇလႆႈငိၼ်းတႃႉ။ ႁႂ်ႈဢွၼ်ၵၼ်ႁဵတ်းထိူင်းႁဵတ်းၼၢၼ်း ႁႂ်ႈလႆႈလၢတ်ႈၵႂၢမ်း ဢိၵ်ႇတင်းႁႂ်ႈတၢင်းၸႂ်မႆႈၶႆႈၸႃႉ လႆႈဢွၵ်ႇၼၼ်ႉတႃႉ။-

20လွင်ႈမၼ်းၸမ်ႉ တၢင်းၸႂ်မႆႈၶႆႈၸႃႉၵူၼ်းႁဝ်းၼႆႉ ဢမ်ႇၸၢင်ႈပွင်ႁဵတ်းတြႃး တၢင်းဢၼ်သိုဝ်ႈတေႃႇၽြႃးပဵၼ်ၸဝ်ႈ။

21ပိူဝ်ႈၼႆလႄႈ ပႅတ်ႈသေတၢင်းဢၼ်ၵူဝ်ႈၵိူၵ်ႇ ၵူႈၸိူဝ်ႉၵူႈပိူင် ဢိၵ်ႇတင်းတၢင်းဢၼ်ၸႂ်ဢၼ် သီႈၵေႉႁေႈတႃပိူၼ်ႈပူၼ်ႉလိူဝ် ၸိူဝ်းၼၼ်ႉသေလႄႈ ဢဝ်တင်းၸႂ်ဢၼ်ၼိမ်သိမ်ႇဢူၼ်ႈဢွၼ်ႇ ၶၢမ်ႇဢဝ်ၼုၵ်ႈၵပၢတ်ႈၽြႃး ဢၼ်ၽုၵ်ႇသွမ်ႈၵႃႈတီႈ ၽၢႆႇတၢင်းၼႂ်းလႄႈ ၵႄႇၶျွတ်ႈဢဝ် ဝီႉၺိၺ်ႇသူလႆႈၼၼ်ႉတႃႉ။

22ယႃႇပေပဵၼ်ၵေႃႉဢၼ်ထွမ်ႇငိၼ်း ၼုၵ်ႈၵပၢတ်ႈတြႃးၵူၺ်းလႄႈ တူဝ်ၸဝ်ႈၵဝ်ႇပႅတ်ႉလႅၼ်တူဝ်ၸဝ်ႈၵဝ်ႇၼၼ်ႉ။ ပဵၼ်ၵေႃႉဢၼ်ၵမ်ၵျၢင်ႉတြႃးတႃႉ။-

23ၵေႃႉဢၼ်ဢမ်ႇၵမ်ၵျၢင်ႉတြႃးလႄႈ ထွမ်ႇငိၼ်းၵူၺ်းၼၼ်ႉၸမ်ႉ၊ မိူၼ်ၸိူဝ်ႉၼင်ႇၵေႃႉဢၼ် တူၺ်းၼႃႈပၵတီႉတူဝ်ၸဝ်ႈၵဝ်ႇ ၵႃႈၼႂ်းၸမ်ႈၼၼ်ႉဢေႃႈ။-

24လွင်ႈမၼ်းၸမ်ႉ တူဝ်ၸဝ်ႈၵဝ်ႇ ယႅၵ်ႉတူၺ်းတူဝ်ၸဝ်ႈၵဝ်ႇသေယဝ်ႉ၊ ၵႂႃႇတၢင်ႇတီႈတၢင်ႇလႅၼ်လႄႈ လိုမ်းပႅတ်ႈသေႁၢင်ႈၽၢင်တူဝ်ၸဝ်ႈၵဝ်ႇၼၼ်ႉ ၵမ်းလဵဝ်ဢေႃႈ။-

25ၵေႃႉဢၼ်လူတူၺ်းၼႂ်းတြႃး ဢၼ်ၸေးၸုမ်ႇလႄႈ ၸၢပ်ႈသႅင်ႇၵၼ်တင်း တၢင်းဢၼ်ၵၢင်းလွတ်ႈၼၼ်ႉ ၸေးၸေးၸွတ်ႇၸွတ်ႇလႄႈ မၼ်ႈၶိူင်ႇယူႇၼၼ်ႉၸမ်ႉ၊ ၵွပ်ႈပိူဝ်ႈဢၼ်ပဵၼ်ၵေႃႉဢၼ်ထွမ်ႇငိၼ်းတြႃးလႄႈ လိုမ်းပႅတ်ႈဢမ်ႇၸႂ်ႈ၊ ပဵၼ်ၵေႃႉဢၼ်ၵမ်ၵျၢင်ႉတြႃးၼၼ်ႉလႄႈ ပဵၼ်ၵေႃႉဢၼ်မီးမင်ႇၵလႃႇၼႂ်းလွင်ႈတၢင်း ဢၼ်တူဝ်ၸဝ်ႈၵဝ်ႇၵမ်ၵျၢင်ႉၼၼ်ႉဢေႃႈ။

26ၼႂ်းသူၼၼ်ႉပေႃးသေၵေႃႉသေၵူၼ်း ႁဵတ်းၸိူဝ်ႉၼင်ႇႁၢင်ႈမီးသီႇလႃႉလႄႈ ဢမ်ႇၶျုၵ်ႈသူပ်းတူဝ်ၸဝ်ႈၵဝ်ႇယူႇသေလႄႈ ပႅတ်ႉလႅၼ်ႁူဝ်ၸႂ်တူဝ်ၸဝ်ႈၵဝ်ႇယူႇၸိုင်၊ သီႇလႃႉမၼ်းၼၼ်ႉ ပဵၼ်ဢၼ်လၢႆလၢႆ ဢမ်ႇပွင်ႇလွင်ႈၵႃႈသင်ဢေႃႈ။-

27သီႇလႃႉဢၼ်ၶၢဝ်ၸၢင်ႇမူတ်းသႂ် ၵႃႈတီႈၽၢႆႇၼႃႈပေႃႈၸဝ်ႈ ၽြႃးပဵၼ်ၸဝ်ႈၼၼ်ႉၸမ်ႉ၊ ပဵၼ်တၢင်းဢၼ်လူတူၺ်းလုၵ်ႈဢွၼ်ႇ ဢၼ်ဢမ်ႇမီးပေႃႈမီးမႄႈ ဢိၵ်ႇတင်းမႄႈမူၵ်းမႄႈမၢႆႈတင်းလၢႆ ၵႃႈၼႂ်းၶိင်ႇမိူဝ်ႈဢၼ်ၶဝ် မီးတုၵ်ႉၶႃႉတၢင်းၽၢၼ်ၼၼ်ႉ ဢိၵ်ႇတင်းတၢင်းဢၼ်ပႂ်ႉတူၺ်း တူဝ်ၸဝ်ႈၵဝ်ႇ ႁႂ်ႈတူဝ်ၸဝ်ႈၵဝ်ႇ လႆႈၵၢင်းလွတ်ႈတင်း တၢင်းဢၼ်ဝူၺ်ႇဢၼ်ႁင်ႈလေႃးၵႃႉၼႆႉၼၼ်ႉဢေႃႈ။

Jump to: Chapter 2 →