James 4

Shan

← Chapter 3 Jump to: Chapter 5 →

1ၼႂ်းသူၼၼ်ႉ တၢင်းဢၼ်တိုၵ်းတေႃးၵၼ် ဢိၵ်ႇတင်းတၢင်းဢၼ်ၽိတ်းၵၼ်ၸိူဝ်းၼၼ်ႉ ပဵၼ်ၵွပ်ႈပိူဝ်ႈၸိူဝ်ႉၼင်ႇႁိုဝ်။ ပဵၼ်ၵွပ်ႈပိူဝ်ႈ ၸႂ်ၵီႉလေႇသႃႇၵႃႇမႃႉဢၼ်တိုၵ်းတေႃးၵၼ်ယူႇ ၵႃႈၼႂ်းဢၢင်ႇၵႃႇတူဝ်သူၼၼ်ႉ၊ ဢမ်ႇၸႂ်ႈႁိုဝ်။-

2သူၸႂ်ၸပ်းၸႂ်ၸွႆးယူႇလႄႈဢမ်ႇလႆႈ။ သူဢဝ်ဢသၢၵ်ႈၵူၼ်းတၢႆ၊ သူမီးၸႂ်လေႃးၽႃႉ ဢၼ်ၶႂ်ႈလႆႈယူႇလႄႈ၊ ဢမ်ႇပျေႉၸုမ်ႇ ၵႃႈၼင်ႇဢလူဝ်ႇတူဝ်ၸဝ်ႈၵဝ်ႇလႆႈၼၼ်ႉ။ သူႁဵတ်းတၢင်းဢၼ်ၽိတ်းၵၼ် ဢိၵ်ႇတင်းတၢင်းဢၼ် တိုၵ်းတေႃးၵၼ်ယူႇလႄႈဢမ်ႇလႆႈ။ လွင်ႈမၼ်းၸမ်ႉ သူဢမ်ႇႁဵတ်းသူးတွင်းလႄႈယူႇဢေႃႈ။-

3ပေႃးသူးတွင်းၵေႃႈ၊ ၵွပ်ႈပိူဝ်ႈဢၼ်ယွၼ်းဢဝ်ဢၼ်ၽိတ်းဢၼ်ပိူင်ႈ ႁႂ်ႈလႆႈမီးတီႈဢၼ်တၵ်း ၸၢမ်ႇၸႃးၵႃႇမၵုင်ႇၼၼ်ႉလႄႈ ဢမ်ႇလႆႈ။

4မႄႈယိင်းဢၼ်ႁဵတ်းမေႇထုင်ႇ ဢၼ်ဢမ်ႇတြႃးၶဝ်ဢိူၺ်း၊ သူဢမ်ႇႁူႉလွင်ႈဢၼ် မိၵ်ႉသႃႇႁႃယႃႉလေႃးၵီႇၼႆႉ ပဵၼ်လွင်ႈဢၼ်ၶတ်းၵၼ်တင်းၽြႃးပဵၼ်ၸဝ်ႈၼၼ်ႉႁိုဝ်။ ၽူႈလႂ်သေဢမ်ႇဝႃႈ၊ ၵေႃႉဢၼ်ႁဵတ်းမိၵ်ႉသႃႇႁႃယႃႉ လူၺ်ႈၵၼ်တင်းလေႃးၵႃႉၼႆႉၼၼ်ႉ၊ ၵေႃႉၼၼ်ႉပဵၼ်ရၢၼ်ႇသူႇ ၽြႃးပဵၼ်ၸဝ်ႈဢေႃႈ။-

5သူထၢင်ႇၵျၢမ်းလိၵ်ႈဢၼ်ဝႃႈ၊ ဝီႉၺိၺ်ႇၸဝ်ႈ ဢၼ်မၼ်းၸဝ်ႈႁႂ်ႈတႄႇယူႇ ၼႂ်းႁဝ်းၼႆႉၼၼ်ႉ မီးသၽေႃးဢၼ်ယုမ်ႇမၢတ်ႈငၢႆႈလႄႈ ၸႂ်ၸပ်းၸႂ်ၸွႆးလႄႈ ၶႂ်ႈလႆႈႁဝ်းဢေႃႈ၊ ဝႃႈၼင်ႇၼႆၼၼ်ႉ ပဵၼ်ဢၼ်လၢႆလၢႆ ဢမ်ႇပွင်ႇလွင်ႈၵႃႈသင်ႁိုဝ်။-

6မၼ်းၸဝ်ႈၼၼ်ႉ ပၼ်ၵျေးၸူးဢၼ်ယဵင်ႈၶႅၼ်းၼမ်ၼႃႇဢေႃႈ။ ၵွပ်ႈပိူဝ်ႈၸိူဝ်ႉၼင်ႇၼႆလႄႈ၊ ၵျၢမ်းလိၵ်ႈမႃးလႄႈဝႃႈ၊ ၽြႃးပဵၼ်ၸဝ်ႈ ႁၢမ်ႈတၢပ်ႈႁႄႉၶႅၼ် ၶဝ်ၸိူဝ်းဢၼ်ဢမ်ႇၼပ်ႉဢမ်ႇၶၢၼ်းလႄႈ ႁူဝ်ၸႂ်ၽႅၼ်သုင်ၼၼ်ႉဢေႃႈ။ ၵူၺ်းၵႃႈ မၼ်းၸဝ်ႈပၼ်ၵျေးၸူး တီႈၶဝ်ၸိူဝ်းဢၼ် မီးႁူဝ်ၸႂ်ဢၼ်ၶျႃးတႅမ်ႇၼၼ်ႉဢေႃႈ၊ ဝႃႈၼင်ႇၼႆဢေႃႈ။

7ပိူဝ်ႈၼႆလႄႈ ၸွမ်းဢလူဝ်ႇၽြႃးပဵၼ်ၸဝ်ႈတႃႉ။ ႁႄႉၶႅၼ်မႃႇၼၢတ်ႈတႃႉ။ ပေႃးႁဵတ်းၸိူဝ်ႉၼင်ႇၼၼ်ၸိုင် မၼ်းတၵ်းဢွၵ်ႇပၢႆႈၵႂႃႇသေၵႃႈတီႈသူဢေႃႈ။-

8သုတ်ႉၸမ်တီႈၽြႃးပဵၼ်ၸဝ်ႈတႃႉ။ ပေႃးႁဵတ်းၸိူဝ်ႉၼင်ႇၼၼ်ၸိုင် မၼ်းၸဝ်ႈတၵ်းသုတ်ႉၸမ် ၵႃႈတီႈသူဢေႃႈ။ ၵူၼ်းၸိူဝ်းဢၼ်မီးဢပႅတ်ႈၶဝ်ဢိူၺ်း၊ ႁႂ်ႈမိုဝ်းသူသႂ်ၸၢင်ႇတႃႉ။ ၵူၼ်းၸိူဝ်းဢၼ် မီးႁူဝ်ၸႂ်သွင်ငၢမ်ႈၶဝ်ဢိူၺ်း၊ ႁႂ်ႈႁူဝ်ၸႂ်သူမူတ်းသႂ်တႃႉ။-

9မီးတၢင်းဢၼ်ယၢပ်ႇၸႂ်ယုင်ႈၸႂ်၊ တၢင်းဢၼ်ၸႂ်ဢမ်ႇသႃႇမႆႈၸႂ်ၶီၸႂ်၊ တၢင်းဢၼ်ႁွင်ႉႁႆႈတႃႉ။ ႁႂ်ႈတၢင်းဢၼ်သူယုမ်ႉၶူဝ်ၼၼ်ႉ ပဵၼ်တၢင်းဢၼ်ၸႂ်ဢမ်ႇသႃႇမႆႈၸႂ်ၶီၸႂ်တႃႉ။ ႁႂ်ႈတၢင်းဢၼ်သူသိူဝ်းပျေႃႇၼၼ်ႉ ပဵၼ်တၢင်းဢၼ်ၸႂ်လဵၵ်ႉၸႂ်ဢူၼ်ႈတႃႉ။-

10ဢဝ်တူဝ်ၸဝ်ႈၵဝ်ႇၶျႃးတႅမ်ႇ ၵႃႈတီႈၽၢႆႇၼႃႈၽြႃးပဵၼ်ၸဝ်ႈတႃႉ။ ပေႃးႁဵတ်းၸိူဝ်ႉၼင်ႇၼၼ်ၸိုင် မၼ်းၸဝ်ႈတၵ်းယုၵ်ႉယွင်ႈသူဢေႃႈ။

11ပီႈၼွင်ႉၶဝ်ဢိူၺ်း၊ ၵေႃႉၼိုင်ႈလႄႈၵေႃႉၼိုင်ႈ ယႃႇပေသႄႉၵၼ်သွမ်းၵၼ်။ ၵေႃႉဢၼ်သႄႉသွမ်းပီႈၼွင်ႉမၼ်းလႄႈ ၸီႇယၢင်ႇဝႃႈ၊ မၼ်းမီးဢပႅတ်ႈဢေႃႈ၊ ဝႃႈၼင်ႇၼႆၼၼ်ႉ ပဵၼ်ၵေႃႉဢၼ်သႄႉသွမ်းတြႃးလႄႈၸီႇယၢင်ႇဝႃႈ၊ တြႃးမီးဢပႅတ်ႈဢေႃႈ၊ ဝႃႈၼင်ႇၼႆဢေႃႈ။ ပေႃးႁဵတ်းၸိူဝ်ႉၼင်ႇၼၼ်ၸိုင်၊ မႂ်းပဵၼ်ၵေႃႉဢၼ်ၵမ်ၵျၢင်ႉတြႃးဢမ်ႇၸႂ်ႈ။ ပဵၼ်ၵေႃႉဢၼ်ၸႅတ်ႈထၢမ်ၸီႇယၢင်ႇတြႃးဢေႃႈ။-

12ၵေႃႉဢၼ်ဝႆႉပိင်းၺၢပ်ႈတြႃး ဢိၵ်ႇတင်းၵေႃႉဢၼ်ၸႅတ်ႈထၢမ်ၸီႇယၢင်ႇတြႃးၼၼ်ႉ မီးပႃးလဵဝ်ၵူၺ်းဢေႃႈ။ ပဵၼ်ၵေႃႉဢၼ်တၢတ်ႈၼိူင်ႇလႆႈ ႁႂ်ႈလႆႈၵႄႇၶျွတ်ႈဢဝ် ဢိၵ်ႇတင်းႁႂ်ႈလႆႈယႃႉၽဵဝ်ႈပႅတ်ႈဢေႃႈ။

13ၵူၼ်းၸိူဝ်းဢၼ်ၸၢင်ႈလၢတ်ႈလႄႈဝႃႈ၊ မိူဝ်ႈၼႆႉမိူဝ်ႈၽုၵ်ႈ ႁဝ်းတၵ်းၵႂႃႇ ၵႃႈတီႈဝဵင်းၼၼ်ႉယူႇပီႊၼိုင်ႈလႄႈ ၵႃႉၶၢႆႁႂ်ႈလႆႈဢမျၢတ်ႈမၼ်းဢေႃႈ၊ ဝႃႈၼင်ႇၼႆၼၼ်ႉၶဝ်ဢိူၺ်း၊ ဢွၼ်ၵၼ်ထွမ်ႇငိၼ်းတႃႉ။-

14သူဢမ်ႇႁူႉလွင်ႈဢၼ် တၵ်းပဵၼ်မႃးၸိူဝ်ႉၼင်ႇႁိုဝ် ၼႂ်းဝၼ်းမိူဝ်ႈၽုၵ်ႈၼၼ်ႉ။ ဢသၢၵ်ႈသူၼၼ်ႉ ပဵၼ်ၸိူဝ်ႉၼင်ႇႁိုဝ်။ ပဵၼ်ၸိူဝ်ႉၼင်ႇဢၢႆ ၼင်ႇၵႂၼ်း ဢၼ်ထၢင်ႇသႃးယူႇၵမ်းဢွၼ်ႇၼိုင်ႈၵူၺ်းလႄႈ သမ်ႉလႆႈႁၢႆၵႂႃႇၼၼ်ႉဢေႃႈ။-

15သူထုၵ်ႇလီလၢတ်ႈလႄႈဝႃႈ၊ ပေႃးထႃႇဝရႃႉၽြႃးမီးဢလူဝ်ႇၸိုင်၊ ႁဝ်းတၵ်းဢသၢၵ်ႈလိပ်းယူႇလႄႈ ႁဵတ်းၸိူဝ်ႉၼင်ႇၼႆ၊ ဢမ်ႇၼၼ်ၵေႃႈ တၵ်းႁဵတ်းၸိူဝ်ႉၼင်ႇၼၼ်ဢေႃႈ၊ ဝႃႈၼင်ႇၼႆၼၼ်ႉဢေႃႈ။-

16ၵူၺ်းၵႃႈ တေႃႈလဵဝ်ၼႆႉ သူဢုပ်ႇဢၢတ်ႇယူႇ ၵႃႈၼႂ်းတၢင်းဢၼ်ႁူဝ်ၸႂ်တူဝ်ၸဝ်ႈၵဝ်ႇ ၽႅၼ်သုင်ၼၼ်ႉဢေႃႈ။ တၢင်းဢၼ်ၸၢင်ႈဢုပ်ႇၸၢင်ႈဢၢတ်ႇ ၸိူဝ်ႉၼင်ႇၼၼ် ၵႃႈမီးတင်းသဵင်ႈတင်းလူင်ၼၼ်ႉ ပဵၼ်ဢၼ်ဢမ်ႇလီဢမ်ႇထုၵ်ႇဢေႃႈ။-

17ပိူဝ်ႈၼႆလႄႈ ၵေႃႉဢၼ်ႁူႉတၢင်းၵမ်တၢင်းၵျၢင်ႉ ဢၼ်လီဢၼ်ငၢမ်းယူႇလႄႈ ဢမ်ႇၵမ်ဢမ်ႇၵျၢင်ႉၼၼ်ႉ မီးဢပႅတ်ႈဢေႃႈ။

← Chapter 3 Jump to: Chapter 5 →