James 5

Shan

← Chapter 4 Jump to:

1ၵူၼ်းမၢၵ်ႈၵူၼ်းမီးၶဝ်ဢိူၺ်း၊ ဢွၼ်ၵၼ်မႃးတေႃႈလဵဝ်ၼႆႉတႃႉ။ ဢွၼ်ၵၼ်ႁွင်ႉသႅၼ်ႇႁွင်ႉႁႆႈ ၵွပ်ႈပိူဝ်ႈၽေးတုၵ်ႉၶႃႉဝူၺ်ႇတၼႃႇ ဢၼ်တၵ်းႁွတ်ႈမႃးၵႃႈၼိူဝ်သူၼၼ်ႉတႃႉ။-

2ဢုၵ်ႉၸႃႇၶိူင်ႈပိူင်သူတင်းလၢႆၼၼ်ႉ ပဵၼ်ဢၼ်တူႇဢၼ်ၼဝ်ႈယူႇဢေႃႈ။ ၶူဝ်းၼုင်ႈၶူဝ်းမႆသူၵေႃႈ မူင်ႈမႅင်းၶူပ်းၵိၼ်ယဝ်ႉယဝ်ႉ။-

3ငိုၼ်းၶမ်းသူၵေႃႈႁေႃၵိၼ်လႄႈလူႉသဵင်ႈယဝ်ႉ။ ႁေႃၼၼ်ႉတၵ်းပဵၼ်သၢၵ်ႈသေႇ ယူႇၽၢႆႇၼိုင်ႈတင်းသူလႄႈ ၵိၼ်ၼိူဝ်ႉသူမိူၼ်ၸိူဝ်ႉၼင်ႇၽႆးဢေႃႈ။ သူသိမ်းပႅင်းၽၼ်ႇတႃႇဢုၵ်ႉၸႃႇသူဝႆႉၼႂ်းၶိင်ႇဝၼ်းၵႃႇလႃႉၵမ်းလိုၼ်းသုတ်းၼၼ်ႉလူင်ပႄႇ။

4တူၺ်းလူး၊ ၵႃႈၶၼ်ၶဝ်ၸိူဝ်းဢၼ်ပၢတ်ႇၶဝ်ႈ ၵႃႈၼႂ်းၼႃးသူလႄႈ သူပႅတ်ႉသူလႅၼ် ယင်းဢမ်ႇပၼ်ၵႃႈမၼ်းၶၼ်မၼ်းလႄႈယူႇၼၼ်ႉ ႁွင်ႉသႅၼ်ႇယူႇဢေႃႈ။ သဵင်တၢင်းဢၼ် ၶဝ်ၸိူဝ်းဢၼ်ပၢတ်ႇၶဝ်ႈ ႁွင်ႉသႅၼ်ႇၼၼ်ႉ ၶဝ်ႈႁွတ်ႈၵႃႈၼႂ်းႁူထႃႇဝရႃႉၽြႃး ၸဝ်ႈပူဝ်ႇပႃႇၵၢင်ႁၢဝ်ပုၼ်ႉဢေႃႈ။-

5သူၸၢမ်ႇၸႃးၸေးၸိမ်ႇၵႃႇမၵုင်ႇၵႃႈၼိူဝ်လိၼ်မိူင်းၼႆႉလႄႈ မူၼ်ႈပျေႃႇၼႃႇလူင်လၢင်ယဝ်ႉ။ သူလဵင်ႉလူႁူဝ်ၸႂ်သူ မိူၼ်ၸိူဝ်ႉၼင်ႇၼႂ်းဝၼ်း ဢၼ်လႆႈဢဝ်တၢႆၼၼ်ႉယဝ်ႉ။-

6သူၸီႇယၢင်ႇၵေႃႉဢၼ်သိုဝ်ႈတေႃႇၼၼ်ႉသေလႄႈ ဢဝ်တၢႆယဝ်ႉ။ မၼ်းၵေႃႈဢမ်ႇႁႄႉဢမ်ႇၶႅၼ်သူ။

7ပိူဝ်ႈၼႆလႄႈ ပီႈၼွင်ႉၶဝ်ဢိူၺ်း၊ ဢွၼ်ၵၼ်ယိူၼ်ႉၶၢမ်ႇပႂ်ႉယူႇ တေႃႇထိုင်ႁွတ်ႈၸဝ်ႈၽြႃးပေႃႇမႃးၼၼ်ႉတႃႉ။ တူၺ်းလူး၊ ၵေႃႉဢၼ်ႁဵတ်းၼႃးၼၼ်ႉၸၢင်ႈယိူၼ်ႉၶၢမ်ႇယူႇသေလႄႈ ပႂ်ႉမၢၵ်ႇၼမ်ႉမၢၵ်ႇလိၼ်ဢၼ်ထိူၵ်ႈၵႃႈထိူၵ်ႈၶၼ်ၼၼ်ႉလႄႈမုင်ႈထႃႈမွင်းထႃႈတေႃႇထိုင်ႁွတ်ႈထၼ်ႈပေႃး လႆႈၼမ်ႉႁူဝ်ၽူၼ်ဢိၵ်ႇတင်းၼမ်ႉႁၢင်ၽူၼ်ဢေႃႈ။-

8သူၵေႃႈယိူၼ်ႉၶၢမ်ႇလႄႈပႂ်ႉယူႇတႃႉ။ ပိူဝ်ႈဢၼ်ၶိင်ႇဢၼ်ၸဝ်ႈၽြႃးတၵ်းပေႃႇမႃးၼၼ်ႉၸမ်တၵ်းႁွတ်ႈထိုင်ယဝ်ႉလႄႈ ႁဵတ်းႁႂ်ႈႁူဝ်ၸႂ်တူဝ်ၸဝ်ႈၵဝ်ႇမၼ်ႈၶိူင်ႇယူႇတႃႉ။-

9ပီႈၼွင်ႉၶဝ်ဢိူၺ်း၊ ၼင်ႇႁိုဝ်တၵ်းၵၢင်းလွတ်ႈတင်းတၢင်းဢၼ်ၸႅတ်ႈထၢမ်ၸီႇယၢင်ႇၸိုင် ယႃႇပေႁဵတ်းတၢင်းဢၼ်ၵေႃႉၼိုင်ႈလႄႈၵေႃႉၼိုင်ႈတွပ်ႇထဵင်တၢင်ႇဢပႅတ်ႈတီႈၵၼ်။ တူၺ်းလူး၊ ၵေႃႉဢၼ်ပိူင်ႇတၢင်းဢၼ်ၸီႇယၢင်ႇတြႃးၼၼ်ႉမီးယူႇၵႃႈတီႈၽၢႆႇၼႃႈၽၵ်းတူဢေႃႈ။-

10ပီႈၼွင်ႉၵဝ်တင်းလၢႆဢိူၺ်း၊ မၢတ်ႈတွင်းလွင်ႈဢၼ်ပရေႃးၽႅတ်ႈ ဢၼ်ဢိင်ပိုင်ႈၼႃႇမႃႉၸိုဝ်ႈသဵင်ထႃႇဝရႃႉၽြႃးသေလႄႈ ႁေႃးလၢတ်ႈၸိူဝ်းၼၼ်ႉ ၼႄပျႃးပုင်ႇသၢၵ်ႈသေႇ တၢင်းဢၼ်လႆႈထူပ်းတုၵ်ႉၶႃႉတၢင်းၽၢၼ် ဢိၵ်ႇတင်းတၢင်းဢၼ်လႆႈယိူၼ်ႉၶၢမ်ႇၼၼ်ႉယဝ်ႉၼၼ်ႉတႃႉ။-

11တူၺ်းလူး၊ ႁဝ်းႁွင်ႉၶဝ်ၸိူဝ်းဢၼ်ယိူၼ်ႉၶၢမ်ႇလႆႈၼၼ်ႉ ပဵၼ်ၵေႃႉဢၼ်မီးမင်ႇၵလႃႇဢေႃႈ။ သူလႆႈငိၼ်းလွင်ႈဢၼ် ယေႃးၽႃႉ ယိူၼ်ႉၶၢမ်ႇၼၼ်ႉယဝ်ႉ။ ၼႂ်းတီႈသုတ်း လွင်ႈတၢင်းဢၼ် ထႃႇဝရႃႉၽြႃးၵွႆသေဢမူႉမၼ်းၸဝ်ႈၼၼ်ႉ၊ သူလႆႈႁူႉလႆႈႁၼ်လွင်ႈဢၼ်မၼ်းၸဝ်ႈ ၸၢင်ႈႁၵ်ႉပႅင်းဢဵတ်းလူ မီးၵရူႉၼႃႇၼၼ်ႉယဝ်ႉ။

12ပီႈၼွင်ႉၵဝ်တင်းလၢႆဢိူၺ်း၊ ၼႂ်းလွင်ႈတၢင်းၵူႈၸိူဝ်ႉၵူႈပိူင် တင်းသဵင်ႈတင်းလူင်ၼၼ်ႉ သူယဵင်ႈၶႅၼ်း ဝႄႈပႅတ်ႈသေတၢင်းဢၼ်ၵိၼ်ႇဢၼ်ဝႃႈတႃႉ။ မိူင်းၵၢင်ႁၢဝ်ၸိုင် ယႃႇပေဢဝ်ၵိၼ်ႇဢဝ်ဝႃႈ။ လိၼ်မိူင်းၵေႃႈ ယႃႇပေဢဝ်ၵိၼ်ႇဢဝ်ဝႃႈ။ တၢင်းၵိၼ်ႇတၢင်းဝႃႈ ဢၼ်လႂ်သေဢမ်ႇဝႃႈ၊ ယႃႇပေဢဝ်ၵိၼ်ႇဢဝ်ဝႃႈ။ ၵူၺ်းၵႃႈ ၼင်ႇႁိုဝ်တၵ်းၵၢင်းလွတ်ႈတင်း တၢင်းဢၼ်ၸီႇယၢင်ႇဢပႅတ်ႈၸိုင် ၵႂၢမ်းသူၼၼ်ႉဢၼ်ၸႂ်ႈၸိုင် ႁႂ်ႈပဵၼ်ဢၼ်ၸႂ်ႈတႃႉ။ ဢၼ်ဢမ်ႇၸႂ်ႈၸိုင် ႁႂ်ႈပဵၼ်ဢၼ်ဢမ်ႇၸႂ်ႈတႃႉ။

13ၼႂ်းသူၼၼ်ႉ ပေႃးမီးၵေႃႉဢၼ်လႆႈၶၢမ်ႇတုၵ်ႉၶႃႉတၢင်းၽၢၼ်ၸိုင် ႁႂ်ႈမၼ်းသူးတွင်းတႃႉ။ ပေႃးမီးၵေႃႉဢၼ်သိူဝ်းပျေႃႇၸိုင် ႁႂ်ႈမၼ်းႁဵတ်းၵႂၢမ်းသႃႇလၢမ်ႇတႃႉ။-

14ပေႃးမီးၵေႃႉဢၼ်မီးတၢင်းၶႆႈတၢင်းပဵၼ်ၸိုင်၊ ႁႂ်ႈမၼ်းႁွင်ႉဢဝ်ၵူၼ်းဢုပ်ႉၸိူဝ်းၸဝ်ႈတင်းလၢႆမႃးလႄႈ ႁႂ်ႈၶဝ်ၼၼ်ႉဢိင်ပိုင်ႈၼႃႇမႃႉၸိုဝ်ႈသဵင်ၸဝ်ႈၽြႃးသေလႄႈ ဢဝ်ၼမ်ႉမၼ်းတႃးၵူၼ်းပဵၼ်ၼၼ်ႉလႄႈ သူးတွင်းၵႃႈၼိူဝ်မၼ်းတႃႉ။-

15ပေႃးႁဵတ်းၸိူဝ်ႉၼင်ႇၼၼ်ၸိုင်၊ ၵႂၢမ်းသူးတွင်းတၢင်းဢၼ်ယုမ်ႇမၢတ်ႈၼၼ်ႉ တၵ်းၵႄႇသႄႇလိတ်ႈဢဝ်ၵေႃႉဢၼ်ပဵၼ်ၼၼ်ႉလႄႈ ၸဝ်ႈၽြႃးတၵ်းႁႂ်ႈမၼ်းၶိုၼ်းလုၵ်ႉဢေႃႈ။ ပိၵ်ႉသမ်ႉမၼ်းၼၼ်ႉ ႁဵတ်းဢပႅတ်ႈမႅၼ်ႈသေၵေႃႈ မၼ်းၸဝ်ႈတၵ်းပွႆႇလွတ်ႈဢပႅတ်ႈၼၼ်ႉဢေႃႈ။

16သူၼင်ႇၵၼ်ၵၼ်ၵေႃႉၼိုင်ႈလႄႈၵေႃႉၼိုင်ႈ ၽုၺ်ႇဢွၵ်ႇၼႄပျႃး ဢပႅတ်ႈတူဝ်ၸဝ်ႈၵဝ်ႇတီႈၵၼ်သေလႄႈ တွင်းပၢၼ်ႇၵၼ်တႃႉ။ ၼင်ႇႁိုဝ်တၵ်းလႆႈၵတ်းယဵၼ်ၶျၢမ်းသႃႇၸိုင်၊ ၵေႃႉၼိုင်ႈလႄႈၵေႃႉၼိုင်ႈ ၼင်ႇၵၼ်ၵၼ်သူးတွင်းပုၼ်ႈၵၼ်တႃႉ။ ပထၼႃႇဢၼ် ၵူၼ်းသိုဝ်ႈတေႃႇသူးတွင်းလႄႈ မီးဢႁုင်ႇယႂ်ႇၼၼ်ႉ ပႃးတၼ်းၶူဝ်းၼမ်ၼႃႇဢေႃႈ။-

17ဢေးလီႉယႃႉ ၼၼ်ႉ ပိၵ်ႉသမ်ႉပဵၼ်ၵူၼ်းဢၼ်ၸၢပ်ႈသႅင်ႇၵၼ်တင်း တြႃးလေႃးၵထမ်ႇ မိူၼ်ၸိူဝ်ႉၼင်ႇႁဝ်းၼႆႉသေၵေႃႈ၊ ၼင်ႇႁိုဝ်ၽူၼ်တၵ်းဢမ်ႇလႆႈတူၵ်းၸိုင် သူးတွင်းယႂ်ႇၼႃႇလူင်လၢင်လႄႈ သၢမ်ပီႊပၢႆႁူၵ်းလိူၼ်တဵမ်တဵမ်ၽူၼ်ဢမ်ႇတူၵ်း ၵႃႈၼိူဝ်လိၼ်မိူင်းလႄႈယူႇဢေႃႈ။-

18ၵမ်းၼၼ်ႉယဝ်ႉ၊ မၼ်းသမ်ႉၶိုၼ်းသူးတွင်းလႄႈ ၽႃႉၵၢင်ႁၢဝ်ႁႂ်ႈၽူၼ်တူၵ်းဢေႃႈ။ လိၼ်မိူင်းၵေႃႈ ႁႂ်ႈမၢၵ်ႇမၼ်းမၢၵ်ႇမႃးဢေႃႈ။

19ပီႈၼွင်ႉၶဝ်ဢိူၺ်း ၼႂ်းသူၼၼ်ႉ ပေႃးသေၵေႃႉသေၵူၼ်း ၽိတ်းပိူင်ႈသဵၼ်ႈတၢင်းသမ်ႇမႃႇတြႃးၵႂႃႇလႄႈ ပိူၼ်ႈတၢင်ႇၵေႃႉ ႁႂ်ႈမၼ်းၶိုၼ်းမႃးၸိုင်၊-

20ႁႂ်ႈမၼ်းၼၼ်ႉ ႁူႉလွင်ႈဢၼ်ၵေႃႉဢၼ်ႁႂ်ႈၵူၼ်းဢၼ်မီးဢပႅတ်ႈ လုၵ်ႉသေၵႃႈတီႈတၢင်းဢၼ် ၽိတ်းပိူင်ႈမႃးၼၼ်ႉ ၸၢင်ႈၵႄႇသႄႇၶျွတ်ႈဢဝ် ဝီႉၺိၺ်ႇသဵၼ်ႈၼိုင်ႈ ၵႃႈၼႂ်းတၢင်းတၢႆလႄႈ ႁူမ်ႇဝႆႉဢပႅတ်ႈၼမ်ၼႃႇၼၼ်ႉတႃႉ။ လိၵ်ႈဢေႃးဝႃႇတႃႉယႃႇၵုပ်ႈယဝ်ႉယဝ်ႉဢေႃႈ။

← Chapter 4 Jump to: