Joel 1

Shan

Jump to: Chapter 2 →

1ၼုၵ်ႈၵပၢတ်ႈထႃႇဝရႃႉၽြႃး ဢၼ်ႁွတ်ႈမႃးတီႈ ယူဝ်းဢေးလႃႉ လုၵ်ႈၸၢႆး ပေႇသူၺ်ႇလႃႉ ၼၼ်ႉၸမ်ႉ၊

2ၵူၼ်းၸိူဝ်းဢၼ် ဢသၢၵ်ႈယႂ်ႇၶဝ်ဢိူၺ်း၊ ဢွၼ်ၵၼ်ထွမ်ႇငိၼ်းတႃႉ။ ၵူၼ်းဝၢၼ်ႈၵူၼ်းမိူင်း တင်းသဵင်ႈတင်းလူင် ၶဝ်ဢိူၺ်း၊ ဢွၼ်ၵၼ်ႁေႈႁူသူၸူးတႃႉ။ လွင်ႈတၢင်းၸိူဝ်ႉၼင်ႇၼႆၼႆႉ ယၢမ်ႈပဵၼ် ၼႂ်းၸူဝ်ႈပၢၼ်သူႁိုဝ်။ ယၢမ်ႈပဵၼ် ၼႂ်းၸူဝ်ႈပၢၼ်ပူႇသူမွၼ်ႇသူႁိုဝ်။-

3ဢွၼ်ၵၼ်မွၵ်ႇလၢတ်ႈ တီႈလုၵ်ႈသူလၢင်းသူတႃႉ။ ႁႂ်ႈလုၵ်ႈၶဝ်လၢင်းၶဝ်ၸိူဝ်းၼၼ်ႉ ဢွၼ်ၵၼ်မွၵ်ႇလၢတ်ႈ တီႈၶဝ်ၸိူဝ်းဢၼ် သိုပ်ႇၵႂႃႇတၢၼ်းၵႂႃႇၼၼ်ႉတႃႉ။-

4လွင်ႈတၢင်းဢၼ်မႅင်းၵႅင်း ၵႃႇၸမ်ႇ ဝႆႉၵိုတ်းဝႆႉၵျၢၼ်ႇ ၼၼ်ႉၸိုင် မႅင်းၵႅင်း ဢရႃႇၽႃႉ ၵိၼ်ပႅတ်ႈဢေႃႈ။ လွင်ႈတၢင်းဢၼ် မႅင်းၵႅင်း ဢရႃႇၽႃႉ ဝႆႉၵိုတ်းဝႆႉၵျၢၼ်ႇ ၼၼ်ႉၸိုင် မႅင်းၵႅင်း ယႃႇလိၵ်ႉ ၵိၼ်ပႅတ်ႈဢေႃႈ။ လွင်ႈတၢင်း ဢၼ်မႅင်းၵႅင်း ယႃႇလိၵ်ႉ ဝႆႉၵိုတ်းဝႆႉၵျၢၼ်ႇ ၼၼ်ႉၸိုင် မႅင်းၵႅင်း ၶႃႇသီႉလႃႉ ၵိၼ်ပႅတ်ႈဢေႃႈ။-

5ၵူၼ်းဢၼ်ၵိၼ်လဝ်ႈ ပူၼ်ႉလိူဝ်ၶဝ်ဢိူၺ်း၊ ဢွၼ်ၵၼ်တိုၼ်ႇလႄႈ ႁႆႈႁွင်ႉတႃႉ။ ၵူၼ်းဢၼ် ၵိၼ်ၼမ်ႉၸပိတ်ႈ ပူၼ်ႉလိူဝ်ၶဝ်ဢိူၺ်း၊ ဢွၼ်ၵၼ်ႁွင်ႉႁႆႈပွင်ႉၶၢင်း ၵွပ်ႈပိူဝ်ႈဢၼ် ၼမ်ႉၸပိတ်ႈဢၼ်ဝၢၼ်ၼၼ်ႉ ထၢတ်ႇၵႂႃႇသေၵႃႈတီႈ သူပ်းသူၼၼ်ႉတႃႉ။-

6လွင်ႈမၼ်းၸမ်ႉ မဵဝ်းၵူၼ်းဢၼ်ႁႅင်းယႂ်ႇၼႃႇလႄႈ ၼမ်ၼႃႇထၼ်ႈပေႃး ဢမ်ႇၼပ်ႉဢမ်ႇဢၢၼ်ႇလႆႈၼၼ်ႉ ၶိုၼ်းမႃးၵႃႈၼိူဝ်မိူင်းၵဝ်ယဝ်ႉ။ ၶဵဝ်ႈမဵဝ်းၶဝ်ၼၼ်ႉ ပဵၼ်ၸိူဝ်ႉၼင်ႇၶဵဝ်ႈသၢင်ႇသီႈလႄႈ ငႃးမၼ်းၵေႃႈ မိူၼ်ၸိူဝ်ႉၼင်ႇငႃးသၢင်ႇသီႈမႄႈ ၼၼ်ႉဢေႃႈ။-

7မၼ်းယႃႉတူၼ်ႈ ၶိူဝ်းမၢၵ်ႇၸပိတ်ႈၵဝ် ပႅတ်ႈလႄႈ ႁႂ်ႈတူၼ်ႈမၢၵ်ႇလိူဝ်ႇသၢင်းၽေႃးၵဝ် ႁၵ်းလႅဝ်ပႅတ်ႈယဝ်ႉ။ မၼ်းထၢၵ်ႇပႅတ်ႈပွၵ်ႇ ပႅတ်ႈပိူၵ်ႇမၼ်းလႄႈ ဢဝ်လူမ်ႉပႅတ်ႈယဝ်ႉ။ မၼ်းႁႂ်ႈၵိင်ႇမၼ်းၶႃႊမၼ်း ပဵၼ်ဢၼ်ၽိူၵ်ႇ ဢၼ်ၶၢဝ်ဝႆႉဢေႃႈ။-

8ႁႆႈႁွင်ႉၶၢင်းၶီၶၢင်းၽၢၼ် မိူၼ်ၸိူဝ်ႉၼင်ႇလုၵ်ႈယိင်းသၢဝ်ဢၼ် ဢဝ်ၼင်ပေႃႁတ်ႉဢႅဝ်မၼ်း ၵွပ်ႈပိူဝ်ႈၽူဝ်မၼ်းဢၼ်သွင်ႇမင်ႇၵလႃႇႁူမ်ႈပွင်းၵၼ်တင်းမၼ်း ၸဵမ်မိူဝ်ႈဢၼ်ဢသၢၵ်ႈမၼ်း ယင်းလဵၵ်ႉယင်းဢွၼ်ႇၼၼ်ႉတႃႉ။-

9ၶိူင်ႈပုၵ်ႈၸေႃႇၽေႃးၸဵၼ်ႇ ဢိၵ်ႇတင်းၶိူင်ႈပုၵ်ႈၸေႃႇဢၼ်သွၼ်းလေႃႇၼၼ်ႉ ထၢတ်ႇၵႂႃႇသေၵႃႈတီႈ ႁိူၼ်းထႃႇဝရႃႉၽြႃးလႄႈ ယိတ်ႈပရေႃးႁဵၵ်ႈ ဢၼ်ဝႃႈၶဝ်ၸိူဝ်းဢၼ်ပႂ်ႉဢမူႉ ထႃႇဝရႃႉၽြႃးၼၼ်ႉ ဢွၼ်ၵၼ်ႁႆႈႁွင်ႉ ပွင်ႉၶၢင်းယူႇဢေႃႈ။-

10ၼႃႈလူႉၵႂႃႇယဝ်ႉ။ လိၼ်တမ်ႇၼွႆႉမွင်ၸႂ်ဢေႃႈ။ လွင်ႈမၼ်းၸမ်ႉ ၶဝ်ႈပိူၵ်ႇလူႉၵႂႃႇဢေႃႈ။ ၼမ်ႉၸပိတ်ႈဢၼ်ဝၢၼ်သဵင်ႈၵႂႃႇယဝ်ႉ။ ၼမ်ႉမၼ်းယွမ်းၵႂႃႇယဝ်ႉ။-

11ၵူၼ်းဢၼ်ႁဵတ်းၼႃး ၶဝ်ဢိူၺ်း၊ ဢွၼ်ၵၼ်မီးတၢင်း ဢၼ်ဢူၵ်းဢၼ်ဢၢႆလႄႈ ၵူၼ်းဢၼ်လုမ်းလႃးသူၼ်ဢူးယဵၼ်ႇ တူၼ်ႈၶိူဝ်းမၢၵ်ႇၸပိတ်ႈၶဝ်ဢိူၺ်း၊ ႁွင်ႉႁႆႈပွင်ႉၶၢင်း ပုၼ်ႈၶဝ်ႈၵျုင်ႇတင်းၶဝ်မူႉယေႃးတႃႉ။ လွင်ႈမၼ်းၸမ်ႉ မၢၵ်ႇႁူင်းဢၼ်လႆႈပၢတ်ႇၵႃႈၼႂ်းတူင်ႈၼႃးၼၼ်ႉ လူႉၵႂႃႇယဝ်ႉ။-

12တူၼ်ႈၶိူဝ်းမၢၵ်ႇၸပိတ်ႈ ႁဵဝ်ႇၸွပ်ႈလႄႈ တူၼ်ႈမၢၵ်ႇလိူဝ်ႇသၢင်းၽေႃး ယူတ်းႁႅင်ႈယဝ်ႉ။ တူၼ်ႈမၢၵ်ႇၸင်ႈ၊ တူၼ်ႈထၢၼ်၊ တူၼ်ႈမၢၵ်ႇၶီႈၼူ၊ တူၼ်ႈမႆႉထိူၼ်ႇၵႃႈမီးၵေႃႈ ႁဵဝ်ႇၸွပ်ႈၵႂႃႇယဝ်ႉ။ လွင်ႈတၢင်းဢၼ်လီၸူမ်း လီသိူဝ်းၼၼ်ႉ ယူတ်းႁႅင်ႈၵႂႃႇသေ ၵႃႈတီႈလုၵ်ႈၵူၼ်းတင်းလၢႆ ဢမၢၼ်ႇၶၼ်ပဵၼ်ယဝ်ႉ။

13ယိတ်ႈပရေႃးႁဵၵ်ႈၶဝ်ဢိူၺ်း၊ ဢွၼ်ၵၼ်ဢဝ် ၶူဝ်းၼုင်ႈၼင်ပေႃ ႁတ်ႉဢႅဝ်သူသေလႄႈ ႁွင်ႉႁႆႈတႃႉ။ သူၸိူဝ်းဢၼ်ပႂ်ႉဢမူႉ ယိတ်ႈပလၢင်ႇၸဝ်ႈၶဝ်ဢိူၺ်း၊ ဢွၼ်ၵၼ်ပွင်ႉၶၢင်းတႃႉ။ သူၸိူဝ်းဢၼ်ပႂ်ႉဢမူႉ ၽြႃးပဵၼ်ၸဝ်ႈၵဝ် ၶဝ်ဢိူၺ်း၊ ဢွၼ်ၵၼ်မႃးလႄႈ ၼုင်ႈၶူဝ်းၼုင်ႈၼင်ပေႃယူႇ သေလႄႈ ၼွၼ်းယူႇတင်းၶိုၼ်းတႃႉ။ လွင်ႈမၼ်းၸမ်ႉ ၶိူင်ႈပုၵ်ႈၸေႃႇၽေႃးၸဵၼ်ႇ ဢိၵ်ႇတင်း ၶိူင်ႈပုၵ်ႈၸေႃႇ ဢၼ်သွၼ်းလေႃႇၼၼ်ႉ ဢမ်ႇလႆႈမီး တၢင်းဢၼ်ဢဝ်သၢၵ်ႈဢဝ်ၵၢပ်ႈ ၵႃႈတီႈႁိူၼ်း ၽြႃးပဵၼ်ၸဝ်ႈသူ ယဝ်ႉလူင်ပႄႇ။-

14ဢွၼ်ၵၼ်ၶၢၼ်းၶိင်ႇမိုဝ်ႉဝၼ်းဢၼ်မူတ်းၸၢင်ႇ ဢၼ်တၵ်းလႆႈဝႄႈလႆႈၵမ် တၢင်းၵိၼ်တၢင်းၶူပ်းၼၼ်ႉဝႆႉတႃႉ။ ဢွၼ်ၵၼ်ႁွင်ႉပၢဝ်ႇႁွင်ႉသေႃႇ ၶိင်ႇမိုဝ်ႉဝၼ်းဢၼ် တၵ်းလႆႈၵမ်ၵျၢင်ႉ ၵႅၼ်ႇၵႅၼ်ႇၶႅင်ၶႅင် ၼၼ်ႉတႃႉ။ ႁႂ်ႈၶဝ်ၸိူဝ်းဢၼ်ဢသၢၵ်ႈယႂ်ႇ ဢိၵ်ႇတင်း ၵူၼ်းဝၢၼ်ႈၵူၼ်းမိူင်း တင်းသဵင်ႈတင်းလူင်းမႃးၸူႉၵၼ်တုမ်ၵၼ် ၵႃႈတီႈႁိူၼ်း ထႃႇဝရႃႉၽြႃး ၽြႃးပဵၼ်ၸဝ်ႈ သူသေလႄႈ သႅၼ်ႇႁွင်ႉႁႃ ထႃႇဝရႃႉၽြႃးတႃႉ။-

15ၵွပ်ႈပိူဝ်ႈမိုဝ်ႉဝၼ်းၼၼ်ႉလႄႈ မီးဢႃႉမင်ႇၵလႃႇဢေႃႈ။ မိုဝ်ႉဝၼ်းထႃႇဝရႃႉၽြႃး ၸမ်ယဝ်ႉ။ တၵ်းႁွတ်ႈမႃး ၸိူဝ်ႉၼင်ႇ ၽေးတၢင်းဢၼ် ၸဝ်ႈဢၼၼ်ႇတႃႉတၼ်းၶူဝ်း ယႃႉပႅတ်ႈၼၼ်ႉဢေႃႈ။-

16တၢင်းၵိၼ်တၢင်းၶူပ်းႁဝ်းၼၼ်ႉ ထၢတ်ႇၵႂႃႇသေၵႃႈတီႈ သိုဝ်ႈၼႃႈတႂ်ႈတႃႁဝ်းယဝ်ႉ ဢမ်ႇၸႂ်ႈႁိုဝ်။ လွင်ႈတၢင်းဢၼ်လီၸူမ်းသိူဝ်း သႂၢင်ႇၸႂ် ထၢတ်ႇၵႂႃႇသေၵႃႈတီႈ ႁိူၼ်းၽြႃးပဵၼ်ၸဝ်ႈႁဝ်းယဝ်ႉ ဢမ်ႇၸႂ်ႈႁိုဝ်။-

17ၸိူဝ်ႉၽၼ်းတင်းလၢႆ ၼဝ်ႈၵႂႃႇ ၵႃႈတႂ်ႈၽၢၼ်ႈလိၼ်ဢေႃႈ။ ယွင်ၶဝ်ႈယေးၶဝ်ႈ လူႉၵႂႃႇလႄႈ တိူၵ်ႈၽၼ်ႇတႃႇတင်းလၢႆ ၵိူၼ်ႇပင်း ၵွပ်ႈပိူဝ်ႈဢၼ် တူၼ်ႈၶဝ်ႈ ႁဵဝ်ႇႁႅင်ႈၵႂႃႇၼၼ်ႉဢေႃႈ။-

18တရိၵ်ႈသၢၼ်ႇတင်းလၢႆ ၶၢင်းၶီၶၢင်းၽၢၼ် ၼႃႇလူင်လၢင်ဢေႃႈ။ ၽုင်သူဝ်းတင်းလၢႆ ယၢပ်ႇၸႂ်ၶၢၼ်ၸႂ် ၵွပ်ႈပိူဝ်ႈဢၼ်တီႈဢၼ် ၵိၼ်ယူႇသေႇသေႇၼၼ်ႉ ဢမ်ႇမီးၼၼ်ႉလႄႈ ၽုင်သူဝ်းတင်းလၢႆၵေႃႈ လူႉၵႂႃႇဢေႃႈ။-

19ထႃႇဝရႃႉၽြႃးတီႈၶႃႈ၊ ၶႃႈၸဝ်ႈႁွင်ႉသႅၼ်ႇႁွင်ႉႁႃၸဝ်ႈႁဝ်း တီႈၶႃႈဢေႃႈ။ ၽႆးလၢမ်းၽႆးၵိၼ် ၵႃႈတီႈဢၼ်ၵိၼ် ယူႇသေႇသေႇ ၵႃႈၼႂ်းထိူၼ်ႇၼၼ်ႉ ၸိူဝ်းၼၼ်ႉလႄႈ ပဵဝ်ၽႆးမႆႈတူၼ်ႈမႆႉထိူၼ်ႇ ၵႃႈမီးၼၼ်ႉ ပႅတ်ႈတီႈၶႃႈယဝ်ႉ။-

20တူဝ်ထိူၼ်ႇႁၢႆႉတင်းလၢႆၵေႃႈ ဢွၼ်ၵၼ်ႁွင်ႉသႅၼ်ႇႁွင်ႉႁႃတီႈၸဝ်ႈႁဝ်း တီႈၶႃႈဢေႃႈ။ ၼမ်ႉႁွင်ႈၼမ်ႉၵႄး တင်းလၢႆ ယူတ်းႁႅင်ႈၵႂႃႇလႄႈ ၽႆးမႆႈၵႃႈတီႈ ဢၼ်ၵိၼ်ယူႇသေႇသေႇ ၵႃႈၼႂ်းထိူၼ်ႇၼၼ်ႉ ၸိူဝ်းၼၼ်ႉ တီႈၶႃႈယဝ်ႉ။

Jump to: Chapter 2 →