Joel 3

Shan

← Chapter 2 Jump to:

1တူၺ်းလူး။ မိူဝ်ႈဢၼ်ၵဝ်သမ်ႉ ဢဝ်ၵူၼ်း ယူႉတႃႉ ၊ ၵူၼ်းဝဵင်း ယေႇရူႉသလႅမ်ႇ ဢၼ်လႆႈၶၢမ်ႇ တၢင်းဢၼ်သိမ်းဢဝ်ၵႂႃႇ ၸိူဝ်းၼၼ်ႉ ၶိုၼ်းမႃးၼၼ်ႉၸိုင် ၼႂ်းၶိင်ႇၵႃႇလႃႉမိုဝ်ႉဝၼ်းၼၼ်ႉ၊-

2ၵဝ်တၵ်းႁႂ်ႈ ၵူၼ်းၵူႈၸိူဝ်ႉၵူႈမဵဝ်း ၸူႉၵၼ်တုမ်ၵၼ် သေလႄႈ ႁွင်ႉဢဝ်ၶဝ် လူင်းမႃးၵႃႈတီႈၶူင်ႈႁူၺ်ႈ ယူဝ်းသၽတ်ႉ ဢေႃႈ။ ၵဝ်တၵ်းယူႇၽၢႆႇ မဵဝ်း ဢီႉသရေႇလႃႉ ၊ ၵူၼ်းဢမူၺ်ႇၵဝ် ဢၼ်ၶဝ်ဢဝ်ၸၢတ်ႇပိုၼ်ပႅတ်ႈ ၵႃႈၼႂ်းၵူႈသိုင်ႇၵူႈမိူင်းသေလႄႈ ၽႄမိူင်းၵဝ်မႅင်ႇပၼ် ၸိူဝ်းၼၼ်ႉသေလႄႈ လၢတ်ႈတြႃးတေႃႇၵၼ် တင်းၶဝ်ၼၼ်ႉဢေႃႈ။-

3ၶဝ်ၼၼ်ႉ တူၵ်းလိၵ်ႈၸႃႇၵွၵ်ႈ ပုၼ်ႈၵူၼ်းၵဝ် တင်းလၢႆယဝ်ႉ။ ၶဝ်ဢဝ်ၽူႈၸၢႆးဢွၼ်ႇ လႅၵ်ႈဢဝ်လၢႆႈဢဝ် မႄႈမွၵ်ႇယႃႈလႄႈ ဢဝ်မႄႈယိင်းဢွၼ်ႇ ၶၢႆပႅတ်ႈသိုဝ်ႉဢဝ် ၼမ်ႉၸပိတ်ႈပုၼ်ႈဢၼ်ၶဝ်တၵ်းၵိၼ်ဢေႃႈ။-

4ဝဵင်း တူႉရူႉ ဢိူၺ်း၊ ဝဵင်း ၸီႉတုၼ်ႇ ဢိူၺ်း၊ တီႈဢၼ်ၸမ်ၵၼ်တင်းမိူင်း ၽီႉလိတ်ႉတီႉ ၵႃႈမီးၶဝ်ဢိူၺ်း၊ သူၸၢပ်ႈသႅင်ႇၵၼ်တင်းၵဝ် ၸိူဝ်ႉၼင်ႇႁိုဝ်။ သူတၵ်းတွပ်ႇၶိုၼ်းတႅၼ်းၶိုၼ်း ရၢၼ်ႇတၢင်းၽိတ်း တီႈၵဝ်ႁိုဝ်။ ပေႃးတွပ်ႇၶိုၼ်း တႅၼ်းၶိုၼ်းရၢၼ်ႇတၢင်းၽိတ်း တီႈၵဝ်ၸိုင်၊ ၵဝ်တၵ်းႁႂ်ႈရၢၼ်ႇ တၢင်းၽိတ်းၼၼ်ႉ ၶိုၼ်းႁွတ်ႈထိုင် ၵႃႈၼိူဝ်ႁူဝ်သူ ၶၼ်ၶၼ်ၽႂ်းၽႂ်းဢေႃႈ။-

5ၵွပ်ႈပိူဝ်ႈဢၼ်သူ သိမ်းဢဝ်ငိုၼ်းၶမ်းၶဝ်လႄႈ ဢဝ်ဢုၵ်ႉၸႃႇမျၢတ်ႈ ဢၼ်ထုၵ်ႇၸႂ်ၵျိူၵ်ႈၸႂ် ၵဝ်ၼၼ်ႉ သႂၢင်းၶဝ်ႈၵႃႈၼႂ်း ၽုင်ႇပိၵ်ႈမၢၼ်ႇသူ၊-

6ဢိၵ်ႇတင်း ၵွပ်ႈပိူဝ်ႈဢၼ်သူဢဝ်ၵူၼ်းမိူင်း ယူႉတႃႉ ၊ ၵူၼ်းဝဵင်း ယေႇရူႉသလႅမ်ႇ တင်းလၢႆ ၶၢႆပၼ်တီႈၵူၼ်း ႁေႇလသႃႉ တင်းလၢႆ ႁႂ်ႈၶဝ်ဢဝ်ဢွၵ်ႇသေ ၵႃႈၼႂ်းမိူင်းတီႈယူႇၶဝ် ၶၢႆႉတီႈၵႂႃႇ ၵႃႈတီႈဢၼ်ၵႆၼၼ်ႉသေ၊-

7တူၺ်းလူး။ ၵဝ်တၵ်းႁႂ်ႈၶဝ် လုၵ်ႉသေၵႃႈတီႈ တီႈဢၼ်သူ ၶၢႆပႅတ်ႈၼၼ်ႉ ၶိုၼ်းမႃးလႄႈ ႁႂ်ႈတၢင်းဢၼ်သူတွပ်ႇၶိုၼ်း တႅၼ်းၶိုၼ်းရၢၼ်ႇ တၢင်းၽိတ်းၼၼ်ႉ ၶိုၼ်းႁွတ်ႈထိုင် ၵႃႈၼိူဝ်ႁူဝ်သူဢေႃႈ။-

8လုၵ်ႈၸၢႆးလုၵ်ႈယိင်းသူ တင်းလၢႆၵေႃႈ ၵဝ်တၵ်းဢဝ်ၶၢႆတေႃႇၵူၼ်းမဵဝ်း ယူႉတႃႉ လႄႈ ၶဝ်တၵ်း သမ်ႉဢဝ်ၶၢႆပၼ် တီႈၵူၼ်း သေးၽႃႉ တင်းလၢႆ ဢၼ်ဝႃႈ မဵဝ်းဢၼ်ၵႆၼၼ်ႉဢေႃႈ။ ထႃႇဝရႃႉၽြႃးမီးဢမိင်ႉဝႆႉ ၸိူဝ်ႉၼင်ႇၼၼ်ယဝ်ႉ။

9မွၵ်ႇလၢတ်ႈလွင်ႈတၢင်းၼႆႉ တီႈၵူၼ်းတၢင်ႇၸိူဝ်ႉ တၢင်ႇၶိူဝ်းတင်းလၢႆ တႃႉ။ ပွင်ႁႅၼ်းပွင်မႄး ႁႂ်ႈလႆႈတိုၵ်းသိုၵ်းလႄႈ တိုၵ်းယူင်းၵူၼ်းဢၼ်ႁႅင်းယႂ်ႇၼႃႇတင်းလၢႆ တႃႉ။ ႁႂ်ႈၵူၼ်းသိုၵ်း တင်းသဵင်ႈတင်းလူင် သုတ်ႉၸပ်းသုတ်ႉၸူးလႄႈ ဢွၼ်ၵၼ်ၶိုၼ်ႈၸူးသေ။-

10ဢွၼ်ၵၼ်ဢဝ်သိၵ်ႈၽိူဝ်လဵၵ်းသူတင်းလၢႆ ၶဵၼ်ႇႁဵတ်းလၢပ်ႇလႄႈ ဢဝ်ၶဵဝ်းသူတင်းလၢႆ ၶဵၼ်ႇႁဵတ်းႁွၵ်ႇတႃႉ။ ႁႂ်ႈၶဝ်ၸိူဝ်းဢၼ်ႁႅင်းလဵၵ်ႉၼၼ်ႉ လၢတ်ႈလႄႈဝႃႈ၊ ၵဝ်ႁႅင်းယႂ်ႇၼႃႇဢေႃႈ၊ ဝႃႈၼင်ႇၼႆသေ။-

11ၵူၼ်းတၢင်ႇၸိူဝ်ႉတၢင်ႇၶိူဝ်း ဢၼ်ယူႇလဵပ်ႈႁွပ်ႈ တင်းသဵင်ႈတင်းလူင်ၶဝ်ဢိူၺ်း၊ ဢွၼ်ၵၼ်ႁိပ်ႈၼႅတ်ႈသေလႄႈ မႃးတႃႉ။ ဢွၼ်ၵၼ်မႃးၸူႉတုမ်ၵၼ်တႃႉ။ ထႃႇဝရႃႉၽြႃးတီႈၶႃႈ၊ ႁႂ်ႈၵူၼ်းသိုၵ်းၸဝ်ႈႁဝ်း လူင်းမႃးၸူးၵႃႈတီႈၼၼ်ႈ သေၵမ်းတီႈၶႃႈ၊-

12ႁႂ်ႈၵူၼ်းတၢင်ႇၸိူဝ်ႉ တၢင်ႇၶိူဝ်းတင်းလၢႆ လုၵ်ႉလႄႈ ဢွၼ်ၵၼ်ၶိုၼ်ႈၸူး ၵႃႈတီႈၶူင်ႈႁူၺ်ႈ ယူဝ်းသၽတ်ႉ သေ။ ၵဝ်တၵ်းၼင်ႈ ၵႃႈတီႈၼၼ်ႈ ႁႂ်ႈလႆႈၸႅတ်ႈထၢမ် ၸီႇယၢင်ႇၵူၼ်းတၢင်ႇၸိူဝ်ႉတၢင်ႇၶိူဝ်း ဢၼ်ယူႇလဵပ်ႈႁွပ်ႈ တင်းသဵင်ႈတင်းလူင်ၼၼ်ႉဢေႃႈ။-

13ၵွပ်ႈပိူဝ်ႈဢၼ်ၶဝ်ႈ ဢၼ်လီပၢတ်ႇၼၼ်ႉ သုၵ်းယဝ်ႉလႄႈ ဢွၼ်ၵၼ်ပွႆႇၶဵဝ်းတႃႉ။ ၵွပ်ႈပိူဝ်ႈဢၼ်ၶိူင်ႈ ဢၼ်ၼူတ်ႈမၢၵ်ႇၸပိတ်ႈတဵမ်လႄႈ ႁၢင်းၼမ်ႉမၢၵ်ႇၸပိတ်ႈတင်းလၢႆ လူၼ်ႉလိူဝ်ယဝ်ႉၼၼ်ႉလႄႈ၊ ဢွၼ်ၵၼ်မႃးလႄႈ လူင်းယဵပ်ႇလူင်းၼူတ်ႈတႃႉ။ လွင်ႈမၼ်းၸမ်ႉ တူႉၸရိူၵ်ႈဢပႅတ်ႈ ဢၼ်ၶဝ်ႁဵတ်းၼၼ်ႉ ယႂ်ႇၼႃႇဢေႃႈ။-

14ၵႃႈၼႂ်းပၢင်ႇႁူၺ်ႈ တၢင်းဢၼ်ၸီႇယၢင်ႇ တႅပ်းတတ်းၼၼ်ႉ၊ ၵူၼ်းၼမ်ၼႃႇ မီးတၢင်းဢၼ်ၸူႉၵၼ် တုမ်ၵၼ်ယူႇ၊ ၵူၼ်းၼမ်ၼႃႇ မီးတၢင်းဢၼ်ၸူႉၵၼ် တုမ်ၵၼ်ယူႇဢေႃႈ။ မိုဝ်ႉဝၼ်းထႃႇဝရႃႉၽြႃး ၸမ်တၵ်းႁွတ်ႈထိုင်ၵႃႈတီႈပၢင်ႇႁူၺ်ႈ တၢင်းဢၼ်ၸီႇယၢင်ႇ တႅပ်းတတ်းၼၼ်ႉယဝ်ႉ။-

15ၵၢင်ဝၼ်း ဢိၵ်ႇတင်းလိူၼ် တၵ်းလပ်းသိင်ႇၵႂႃႇလႄႈ လၢဝ်တင်းလၢႆ ယင်းဢမ်ႇႁိူဝ်ႈဢမ်ႇလႅင်းလႄႈ တၵ်းယူႇဢေႃႈ။-

16ထႃႇဝရႃႉၽြႃး တၵ်းယူႇၵႃႈၼိူဝ်လွႆ ၸီႉဢုၼ်ႇ ႁွင်ႉသႅၼ်ႇသေလႄႈ ယူႇၵႃႈၼႂ်းဝဵင်း ယေႇရူႉသလႅမ်ႇ ၵိဝ်သဵင်လႄႈ ၽႃႉၵၢင်ႁၢဝ် ဢိၵ်ႇတင်း လိၼ်မိူင်းတၵ်းသၼ်ႇၶွၼ်းဝႆဢေႃႈ။ ၵူၺ်းၵႃႈ ထႃႇဝရႃႉၽြႃး ၼၼ်ႉ တၵ်းပဵၼ်တီႈဢၼ်သွၼ်ႈဢၼ်ပိုင်ႈ တီႈၵူၼ်းမၼ်းၸဝ်ႈတင်းလၢႆ၊ တၢင်းၵတ်ႉတၢင်းၶၼ် တီႈၵူၼ်းမဵဝ်း ဢီႉသရေႇလႃႉ တင်းလၢႆဢေႃႈ။

17ၼင်ႇၼၼ်လႄႈ သူတၵ်းလႆႈႁူႉလွင်ႈဢၼ် ၵဝ်ပဵၼ်ထႃႇဝရႃႉၽြႃး ၽြႃးပဵၼ်ၸဝ်ႈသူ ဢၼ်ယူႇၵႃႈၼိူဝ်လွႆ ၸီႉဢုၼ်ႇ ဢၼ်မူတ်းၸၢင်ႇၵဝ်ၼၼ်ႉဢေႃႈ။ ဝဵင်း ယေႇရူႉသလႅမ်ႇ ၵေႃႈ တၵ်းပဵၼ် ဢၼ်မူတ်းၸၢင်ႇလႄႈ ၵမ်းလိုၼ်း ၵူၼ်းတၢင်ႇၸိူဝ်ႉတၢင်ႇမဵဝ်း ဢမ်ႇလႆႈယဵပ်ႇလႆႈၶၢမ်ႈဝဵင်းၼၼ်ႉ။-

18ၼႂ်းမိုဝ်ႉဝၼ်းၼၼ်ႉ လွႆတင်းလၢႆ တၵ်းယွတ်ႇႁူဝ်ႈဢွၵ်ႇၼမ်ႉၸပိတ်ႈ ဢၼ်ဝၢၼ်လႄႈ ၵုင်းတင်းလၢႆ တၵ်းဢွၵ်ႇၼမ်ႉၼူမ်း လႆၵႂႃႇဢေႃႈ။ ၼမ်ႉႁွင်ႈ ယူႉတႃႉ ၵႃႈမီးၼၼ်ႉ တၵ်းမီး တၢင်းဢၼ်ၼမ်ႉလႆယူႇလႄႈ ၼမ်ႉဢွၵ်ႇႁူး တၵ်းဢွၵ်ႇသေၵႃႈၼႂ်း ႁိူၼ်းထႃႇဝရႃႉၽြႃးသေလႄႈ ႁႂ်ႈပၢင်ႇႁူၺ်ႈ သိတ်ႇတိမ်ႇ ယမ်းဢေႃႈ။-

19မိူင်း ဢေႇၵိပ်ႉတူႉ တၵ်းမီးတၢင်းဢၼ်သဵတ်ႇၵူၼ်း ယဵၼ်ၵူၼ်းၵႂႃႇလႄႈ မိူင်း ဢေႇတုမ်ႇ တၵ်းပဵၼ်ထိူၼ်ႇ ပဵၼ်ၶိူဝ်း ဢၼ်ၽိတ်ႇၵူၼ်း ငႅဝ်ၵူၼ်းၵႂႃႇ ၵွပ်ႈပိူဝ်ႈဢၼ်ၶဝ် ၼိၵ်ႈၸၢၵ်ႈငႅၼ်းသႄးၵူၼ်းမဵဝ်း ယူႉတႃႉ တင်းလၢႆလႄႈ ထွၵ်ႇလိူတ်ႈ ၶဝ်ၸိူဝ်းဢၼ်ဢမ်ႇမီးဢပႅတ်ႈၼၼ်ႉ ပႅတ်ႈၵႃႈၼႂ်းမိုဝ်းၶဝ်ၼၼ်ႉ ဢေႃႈ။-

20မိူင်း ယူႉတႃႉ ၸမ်ႉ၊ တၵ်းလႆႈပဵၼ်မိူင်းထႃႇဝရႃႉ၊ ဝဵင်း ယေႇရူႉသလႅမ်ႇ ၸမ်ႉ၊ တၵ်းလႆႈပဵၼ်ဝဵင်းဢၼ် တႄႇယူႇၶိင်ႇၵႃႇလႃႉ တႃႇသေႇဢမ်ႇထၢတ်ႇဢေႃႈ။-

21ၵဝ်တၵ်းမၢတ်ႈတၢင်းဢၼ် ၶဝ်ထွၵ်ႇလိူတ်ႈပႅတ်ႈ ဢၼ်ၵဝ်ဢမ်ႇမၢတ်ႈပဵၼ် ဢၼ်ၵၢင်းလွတ်ႈတင်းဢပႅတ်ႈၼၼ်ႉ ပဵၼ်ၸိူဝ်ႉၼင်ႇဢၼ် ဢမ်ႇမီးဢပႅတ်ႈၼၼ်ႉဢေႃႈ။ လွင်ႈမၼ်းၸမ်ႉ ထႃႇဝရႃႉၽြႃး ၵိင်းဝၢပ်ႈယူႇၵႃႈၼိူဝ်လွႆ ၸီႉဢုၼ်ႇ ဢေႃႈ။ ၵျၢမ်းဢၼႃႇၵၢတ်ႈတီႉယူဝ်းဢေးလႃႉယဝ်ႉယဝ်ႉဢေႃႈ။

← Chapter 2 Jump to: