Joel 2

Shan

← Chapter 1 Jump to: Chapter 3 →

1ဢွၼ်ၵၼ်ပဝ်ႇၼႄးၶရႃႇ ၵႃႈၼိူဝ်လွႆ ၸီႉဢုၼ်ႇ တႃႉ။ ဢွၼ်ၵၼ်ႁဵတ်း သဵင်ဢၼ်ပၼ်သတီႉ ၵႃႈၼိူဝ်လွႆ ဢၼ်မူတ်းၸၢင်ႇၵဝ် ၼၼ်ႉတႃႉ။ ႁႂ်ႈၵူၼ်းဝၢၼ်ႈၵူၼ်းမိူင်း တင်းသဵင်ႈတင်းလူင် သၼ်ႇသၼ်ႇသၢႆသၢႆသေ။ လွင်ႈမၼ်းၸမ်ႉ မိုဝ်ႉဝၼ်းထႃႇဝရႃႉၽြႃး မႃးလႄႈၸမ်ယဝ်ႉ။-

2ပဵၼ်ဝၼ်းဢၼ်လပ်းသိင်ႇလပ်းႁူမ်ႇ၊ ဝၼ်းဢၼ်ၽူၼ်ၵုမ်ႈၽူၼ်ဢုမ်းလႄႈ လပ်းသိင်ႇၼႃတၼ်ၼႃႇဢေႃႈ။ ၸိူဝ်ႉၼင်ႇဢၼ်ဢႃႇရူင်ႇ သၢႆဢရွင်ႇၵၢင်ဝၼ်း ၸွတ်ႇတူဝ်ႈၵႃႈၼိူဝ်လွႆတင်းလၢႆ ၼၼ်ႉ၊ မဵဝ်းဢၼ်ၼမ်ၼႃႇလႄႈ ႁႅင်းယႂ်ႇၼၼ်ႉ မႃးယူႇဢေႃႈ။ မိူဝ်ႈၵွၼ်ႇဢွၼ်ၼႆႉၼၼ်ႉ ဢမ်ႇတွၼ်ႉပဵၼ် ၸိူဝ်ႉၼင်ႇၼၼ်။ ၵမ်းလိုၼ်း ၵူႈၸူဝ်ႈၵူႈပၢၼ် သိုပ်ႇသိုပ်ႇတၢမ်းတၢမ်းၵေႃႈ တၵ်းဢမ်ႇလႆႈပဵၼ်။-

3ၽႆးမႆႈၵႂႃႇယူႇ ၵႃႈတီႈၽၢႆႇၼႃႈၶဝ်လႄႈ ၵႃႈတီႈၽၢႆႇလင်ၵေႃႈ ပဵဝ်ၽႆးလုၵ်ႉယူႇဢေႃႈ။ မိူင်းဢၼ်မီး ၵႃႈတီႈၽၢႆႇၼႃႈၶဝ်ၼၼ်ႉ ပဵၼ်ၸိူဝ်ႉၼင်ႇသူၼ်ဢူးယဵၼ်ႇ ဢေႇတိၼ်ႇ ဝႆႉလႄႈ ၵႃႈတီႈၽၢႆႇလင်ၶဝ်ၸမ်ႉ၊ ပဵၼ်ထိူၼ်ႇဢၼ်ၽဵဝ်ႈပႅတ်ႈယဝ်ႉ ၼၼ်ႉဢေႃႈ။ လွင်ႈတၢင်းဢၼ်လႂ် ဢမ်ႇလႆႈလွတ်ႈသေ ၵႃႈၼႂ်းမိုဝ်းၶဝ်ၼၼ်ႉ သေၸိူဝ်ႉသေပိူင်။-

4ႁၢင်ႈၽၢင်ၶဝ်ၼၼ်ႉ ပဵၼ်မိူၼ်ၸိူဝ်ႉၼင်ႇ ႁၢင်ႈၽၢင်မႃႉလႄႈ ၶဝ်ၶုၼ်ႇလႅၼ်ႈ မိူၼ်ၸိူဝ်ႉၼင်ႇ တပ်ႉၵူၼ်းသိုၵ်းၶီႇမႃႉ ၼၼ်ႉဢေႃႈ။-

5ၶဝ်ဢွၼ်ၵၼ်မေႃးသဵင်လႄႈ ဝႅၼ်ၵျွၵ်းဝႅၼ်ႁူင် ၵႃႈၼိူဝ်ပၢႆလွႆ ၸိၵ်းလွႆတင်းလၢႆ လႄႈ ႁဵတ်းသဵင်လင်သဵင်မေႃးယူႇ မိူၼ်ၸိူဝ်ႉၼင်ႇ သဵင်လေႃႉရထႃး ဢိၵ်ႇတင်းမိူၼ်ၸိူဝ်ႉၼင်ႇ သဵင်ၽႆး ဢၼ်မႆႈယိူဝ်ႈႁႅင်ႈ ယိူဝ်ႈႁွင် တင်းမိူၼ်ၸိူဝ်ႉၼင်ႇ သဵင်မုၵ်ႉၵူၼ်း ၸိူဝ်းၵူၼ်း ဢၼ်ႁႅင်းယႂ်ႇၼႃႇၼၼ်ႉ ၶၢင်းတပ်ႉၶၢင်းငႃး ႁႂ်ႈလႆႈတိုၵ်းသိုၵ်းၼၼ်ႉဢေႃႈ။-

6မဵဝ်းၵူၼ်းတင်းလၢႆ သၼ်ႇသၼ်ႇသၢႆသၢႆယူႇ ၵႃႈတီႈၽၢႆႇၼႃႈၶဝ်ၼၼ်ႉလႄႈ ၼႃႈၶဝ်တင်းသဵင်ႈတင်းလူင် ႁႅတ်ႇၵႂႃႇႁႅင်ႈၵႂႃႇဢေႃႈ။-

7ၶဝ်ၼၼ်ႉ ၶုၼ်ႇလႅၼ်ႈမိူၼ်ၸိူဝ်ႉၼင်ႇ ၵူၼ်းသိုၵ်းလႄႈ ၶိုၼ်ႈလမ်းဝဵင်း မိူၼ်ၸိူဝ်ႉၼင်ႇ ႁူဝ်ႁၢၼ်ၵူၼ်းသိုၵ်းဢေႃႈ။ ၶဝ်ၼၼ်ႉ ယင်းဢမ်ႇယႃႉ မုၵ်ႉၶဝ်ၸိူဝ်းၶဝ်လႄႈ ၸွမ်းသဵၼ်ႈတၢင်းၶဝ်ၵႂႃႇယူႇ သိုဝ်ႈသိုဝ်ႈ ႁင်းၽႂ်ႁင်းမၼ်းဢေႃႈ။-

8ၸိူဝ်းၼိုင်ႈလႄႈ ၸိူဝ်းၼိုင်ႈယင်းဢမ်ႇတွၵ်ႈၵၼ် ဢီးၵၼ်လႄႈ ၸွမ်းသဵၼ်ႈတၢင်းၽႂ်သဵၼ်ႈတၢင်းမၼ်းဢေႃႈ။ ပိၵ်ႉသမ်ႉၶဝ်တိူဝ်ႉသႂ်ႇ ၶူမ်းလၢပ်ႇၶူမ်းလႅဝ်းသေၵေႃႈ ဢမ်ႇလႆႈၶၢမ်ႇတၢင်းဢၼ်တိူဝ်ႉ ဢၼ်မၢတ်ႇ။-

9ၶဝ်ၶုၼ်ႇလႅၼ်ႈ ၵႂႃႇၵႂႃႇၶိုၼ်းၶိုၼ်းၵႃႈၼႂ်းဝဵင်းယူႇ၊ ၶၢမ်ႈလမ်းဝဵင်းယူႇ၊ ၶိုၼ်ႈၵႃႈၼိူဝ်ႁိူၼ်းယူႇ၊ ၶဝ်ႈၵႃႈၼႂ်းႁူးလၢင်းတဵၼ်ယူႇ မိူၼ်ၸိူဝ်ႉၼင်ႇၽူႈလၵ်ႉၼၼ်ႉဢေႃႈ။-

10လိၼ်မိူင်းတူင်ႉၼိုင်ယူႇ ၵႃႈတီႈၽၢႆႇၼႃႈၶဝ်လႄႈ ၽႃႉၵၢင်ႁၢဝ်ၵေႃႈ သၼ်ႇဝႆၶွၼ်းၶဝ်ႇယူႇဢေႃႈ။ ၵၢင်ဝၼ်း ဢိၵ်ႇတင်း လိူၼ်လပ်းသိင်ႇၵႂႃႇလႄႈ လၢဝ်တင်းလၢႆယင်းဢမ်ႇႁိူဝ်ႈလႅင်းလႄႈ ယူႇဢေႃႈ။-

11ထႃႇဝရႃႉၽြႃးၵေႃႈ ၵိဝ်သဵင်ၸဝ်ႈ ၵႃႈတီႈၽၢႆႇၼႃႈတပ်ႉမၼ်းၸဝ်ႈလႄႈ တပ်ႉမၼ်းၸဝ်ႈၼၼ်ႉ ယႂ်ႇၶိုၵ်ႉၼႃႇလူင်လၢင်ဢေႃႈ။ တပ်ႉၼၼ်ႉ ၸီႇယၢင်ႇၸွမ်းၵႃႈၼင်ႇဢၼ် ၵႂၢမ်းမၼ်းၸဝ်ႈမီးၼၼ်ႉလႄႈ တၼ်းၶူဝ်းယႂ်ႇၼႃႇဢေႃႈ။ မိုဝ်ႉဝၼ်းထႃႇဝရႃႉၽြႃး ၼၼ်ႉ ယႂ်ႇၼႃႇလႄႈ ပဵၼ်ဝၼ်းဢၼ်လီၵူဝ်လီႁႄ ၼႃႇလူင်လၢင်ဢေႃႈ။ ၽူႈလႂ်တၵ်းၸုၵ်းၶၢမ်ႇယူႇလႆႈ။

12ပိူဝ်ႈၼႆလႄႈ ထႃႇဝရႃႉၽြႃး မီးဢမိင်ႉၸမ်ႉ၊ တေႃႈလဵဝ်ၼႆႉ ပႃးတင်းႁူဝ်ၸႂ်သဵင်ႈသဵင်ႈ ဢိၵ်ႇတင်း တၢင်းဢၼ်ၵမ်တၢင်းၵိၼ်၊ တၢင်းဢၼ်ႁႆႈဢၼ်ႁွင်ႉ၊ တၢင်းဢၼ်ပွင်ႉၶၢင်းပွင်ႉမိူၼ်ႇ သေလႄႈ ဢွၼ်ၵၼ်ၶိုၼ်းမႃးၸူး ၵႃႈတီႈၵဝ်တႃႉ။-

13ယင်းဢမ်ႇၸၵ်ႉဢမ်ႇသိၵ်ႇ ၶူဝ်းၼုင်ႈသူလႄႈ ၸၵ်ႉသိၵ်ႇႁူဝ်ၸႂ်သူသေလႄႈ ဢွၼ်ၵၼ်ၶိုၼ်းမႃးၸူး ၵႃႈတီႈထႃႇဝရႃႉၽြႃး ၽြႃးပဵၼ်ၸဝ်ႈသူတႃႉ။ မၼ်းၸဝ်ႈမီးၸႂ်သၽေႃး ဢၼ်ၸၢင်ႈဢဵတ်းလူႁၵ်ႉပႅင်း၊ ၸႂ်သၽေႃးဢၼ်ပျေႉၸုမ်ႇဝႆႉတင်း မႅတ်ႈတႃႇၵရူႉၼႃႇ၊ ၸႂ်သၽေႃးဢၼ်ယႂ်ႇဢၼ်ယၢဝ်း၊ ၸႂ်သၽေႃးဢၼ်ၶႂ်ႈႁဵတ်းၵျေးၸူး၊ ၸႂ်သၽေႃးဢၼ်ၸၢင်ႈၶုၵ်းၸႂ်လႆႈ ၶႆႈၸႂ်လူၺ်ႈ တၢင်းဢၼ်ပၼ်ဢပႅတ်ႈၼၼ်ႉ ဢေႃႈ။-

14ၽူႈလႂ်ႁူႉလွင်ႈဢၼ်မၼ်းၸဝ်ႈ တၵ်းသမ်ႉၶိုၼ်းမႃးလႄႈ ၶုၵ်းၸႂ်လႆႈမႆႈၸႂ်လူၺ်ႈ သေလႄႈ ႁႂ်ႈတၢင်းလီမင်ႇၵလႃႇ ဢၼ်ဝႃႈၶိူင်ႈပုၵ်ႈၸေႃႇၽေႃးၸဵၼ်ႇ ဢိၵ်ႇတင်းၶိူင်ႈပုၵ်ႈၸေႃႇ ဢၼ်သွၼ်းလေႃႇ တီႈထႃႇဝရႃႉၽြႃး ၽြႃးပဵၼ်ၸဝ်ႈသူၼၼ်ႉၸိူဝ်းၼၼ်ႉ ၵိုတ်းၵျၢၼ်ႇဝႆႉႁိုဝ် ဢမ်ႇၵိုတ်းၵျၢၼ်ႇဝႆႉႁိုဝ် ၼၼ်ႉလႆႈ။-

15ဢွၼ်ၵၼ်ပဝ်ႇၼႄးၶရႃႇ ၵႃႈၼိူဝ်လွႆ ၸီႉဢုၼ်ႇ တႃႉ။ ဢွၼ်ၵၼ်ၶၢၼ်း ၶိင်ႇမိုဝ်ႉဝၼ်းဢၼ် တၵ်းလႆႈ ဝႄႈလႆႈၵမ်တၢင်းၵိၼ် တၢင်းၶူပ်းၼၼ်ႉဝႆႉတႃႉ။ ဢွၼ်ၵၼ်ၶၢၼ်း ၶိင်ႇမိုဝ်ႉဝၼ်းဢၼ် တၵ်းလႆႈၵမ်ၵျၢင်ႉ ၵႅၼ်ႇၵႅၼ်ႇၶႅင်ၶႅင် ၼၼ်ႉတႃႉ။-

16ဢွၼ်ၵၼ်ႁွင်ႉဢဝ် ၵူၼ်းတင်းလၢႆ မႃးလႄႈ ႁႂ်ႈပရဵၵ်ႈသၢတ်ႈတင်းလၢႆ မူတ်းၸၢင်ႇတႃႉ။ ႁႂ်ႈၶဝ်ၸိူဝ်းဢၼ် ဢသၢၵ်ႈယႂ်ႇတင်းလၢႆ ဢိၵ်ႇတင်းၶဝ်ၸိူဝ်းဢၼ် ယင်းလဵၵ်ႉယင်းၼုမ်ႇ တင်းၶဝ်ၸိူဝ်းဢၼ် ယင်းၵိၼ်ၼူမ်းယူႇၸိူဝ်းၼၼ်ႉ မႃးၸူႉၵၼ်တုမ်ၵၼ်တႃႉ။ ႁႂ်ႈၽူႈမၢဝ်ႇဢၼ်သွင်ႇမင်ႇၵလႃႇၼၼ်ႉ ဢွၵ်ႇသေၵႃႈၼႂ်းလုၵ်းမၼ်းလႄႈ ႁႂ်ႈလုၵ်ႈယိင်းသၢဝ် ဢၼ်သွင်ႇမင်ႇၵလႃႇၼၼ်ႉ ဢွၵ်ႇသေၵႃႈၼႂ်းၽႃႈၵင်ႈ ဢၼ်လပ်ႉၵင်ႈမၼ်းဝႆႉၼၼ်ႉသေ။-

17ႁႂ်ႈယိတ်ႈပရေႃးႁဵၵ်ႈတင်းလၢႆ၊ ၶဝ်ၸိူဝ်းဢၼ် ပႂ်ႉဢမူႉထႃႇဝရႃႉၽြႃး ၼၼ်ႉ ဢွၼ်ၵၼ်ႁႆႈႁွင်ႉ ၵႃႈတီႈၵႄႈဝူင်ႈၵၢင် ၼႃႈႁိူၼ်းၸဝ်ႈ ဢိၵ်ႇတင်း ယိတ်ႈပလၢင်ႇ ယူႇသေလႄႈ လဝ်ႊဝႃႈ၊ ထႃႇဝရႃႉၽြႃးတီႈၶႃႈ၊ ၶႅၼ်းတေႃႈဢဵတ်းလူ ၵူၼ်းၸဝ်ႈႁဝ်းတင်းလၢႆ သေၵမ်းတီႈၶႃႈ၊ ယႃႇပေဢဝ်ဢမူၺ်ႇၸဝ်ႈႁဝ်း ဢၢပ်ႈပၼ်တီႈ တၢင်းဢၼ်သႄႉဢၼ်သွမ်း ႁႂ်ႈၵူၼ်းတၢင်ႇၸိူဝ်ႉတၢင်ႇၶိူဝ်းတင်းလၢႆ လႆႈဢုပ်ႉပိူင်ႇၶဝ် သေၵမ်းတီႈၶႃႈ၊ ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈ ၵူၼ်းတၢင်ႇၸိူဝ်ႉတၢင်ႇၶိူဝ်း တင်းလၢႆ တၵ်းလႆႈဢွၼ်ၵၼ်လၢတ်ႈလႄႈဝႃႈ၊ ၽြႃးပဵၼ်ၸဝ်ႈၶဝ်ၸမ်ႉ၊ မီးၵႃႈလႂ်၊ ဝႃႈၼင်ႇၼႆႁိုဝ်တီႈၶႃႈ၊

18ပေႃးႁဵတ်း ၸိူဝ်ႉၼင်ႇၼၼ်ၸိုင်၊ ထႃႇဝရႃႉၽြႃး တၵ်းမီးၸႂ်ဢၼ် ၶႂ်ႈၸွႆႈထႅမ်မိူင်းမၼ်းၸဝ်ႈ ႁႅင်းယႂ်ႇၼႃႇလႄႈ တၵ်းၵႄႇသႄႇ ဢဵတ်းလူၵူၼ်းမၼ်းၸဝ်ႈတင်းလၢႆ ၼၼ်ႉဢေႃႈ။-

19ထႃႇဝရႃႉၽြႃး တၵ်းၶိုၼ်းဢိူဝ်လႄႈ မီးဢမိင်ႉတီႈၵူၼ်းမၼ်းၸဝ်ႈတင်းလၢႆ သေလႄႈဝႃႈ၊ တူၺ်းလူး။ ၵဝ်တၵ်းပၼ်ၶဝ်ႈပိူၵ်ႇ ၶဝ်ႈသၢၼ်၊ ၼမ်ႉၸပိတ်ႈ၊ ၼမ်ႉမၼ်းမႃးတီႈသူလႄႈ သူတၵ်းလႆႈဢိမ်ႇ လႆႈတဵမ်ဢေႃႈ။ ၵမ်းလိုၼ်း၊ ၵဝ်တၵ်းဢမ်ႇဢဝ်သူ ဢၢပ်ႈပၼ် ႁႂ်ႈပဵၼ်တီႈဢၼ် ၵူၼ်းတၢင်ႇၸိူဝ်ႉတၢင်ႇၶိူဝ်း သႄႉသွမ်း။-

20ၵဝ်တၵ်းၶၢမ်ႇဢဝ် ၵူၼ်းတပ်ႉၼႃႈတၢင်းႁွင်ႇ ၸိူဝ်းၼၼ်ႉ ဝႆႉၵႃႈတီႈၵႆယၢၼ်ၵၼ် တင်းသူလႄႈ ႁေႃႈၶဝ်ဢွၵ်ႇပႅတ်ႈၸူး ၵႃႈၼႂ်းတီႈဢၼ်ႁႅင်ႈဢၼ်ႁွင်လႄႈ ၽူႈလႂ်ဢမ်ႇယူႇဢမ်ႇသဝ်း ၼၼ်ႉဢေႃႈ။ ႁူဝ်တပ်ႉမၼ်းတၵ်းဝၢႆႇၼႃႈတေႃႇ ပၢင်ႇလၢႆႇၼႃႈဝၼ်းဢွၵ်ႇယူႇ၊ ႁၢင်တပ်ႉမၼ်းတၵ်းဝၢႆႇၼႃႈတေႃႇ ပၢင်ႇလၢႆႇၼႃႈဝၼ်းတူၵ်းယူႇ သေဢေႃႈ။ ဢၢႆဢၼ်မဵၼ်တူႇမၼ်း တၵ်းဢွၵ်ႇလႄႈ၊ ဢၢႆဢၼ်မဵၼ်ၼဝ်ႈမၼ်း တၵ်းမိုတ်းမိူဝ်ၵႂႃႇ ၵွပ်ႈပိူဝ်ႈဢၼ်မၼ်းၸဝ်ႈ ႁဵတ်းလွင်ႈတၢင်းဢၼ်ယႂ်ႇၼႃႇ လူင်လၢင်ၼၼ်ႉဢေႃႈ၊ ဝႃႈၼင်ႇၼႆဢေႃႈ။-

21မိူင်းၸဝ်ႈဢိူၺ်း၊ ယႃႇပေမႆႈၸႂ်။ မီးတၢင်းဢၼ် ၸူမ်းသိူဝ်းလႄႈ သႂၢင်ႇၸႂ်တႃႉ။ ထႃႇဝရႃႉၽြႃး တၵ်းႁဵတ်း လွင်ႈတၢင်းဢၼ်ယႂ်ႇၼႃႇ လူင်လၢင်ဢေႃႈ။-

22တူဝ်ထိူၼ်ႇႁၢႆႉၶဝ်ဢိူၺ်း၊ ယႃႇပေမႆႈၸႂ်။ တူၼ်ႈယိူဝ်ႈတူၼ်ႈယႃႈ ၵႃႈတီႈထိူၼ်ႇတီႈၶိူဝ်းၼၼ်ႉ ဢွၵ်ႇမႃးယူႇ၊ တူၼ်ႈမႆႉတူၼ်ႈတွၵ်ႇ မၢၵ်ႇမၢၵ်ႇယူႇ၊ တူၼ်ႈမၢၵ်ႇလိူဝ်ႇသၢင်းၽေႃး ဢိၵ်ႇတင်း တူၼ်ႈၶိူဝ်းမၢၵ်ႇၸပိတ်ႈၵေႃႈ ၽူၵ်ႈလီႁႅင်းလီမႃး ယူႇဢေႃႈ။-

23ၵူၼ်းဝဵင်း ၸီႉဢုၼ်ႇ ၶဝ်ဢိူၺ်း၊ ဢွၼ်ၵၼ် ၸူမ်းသိူဝ်းလႄႈ ဢိင်ပိုင်ႈထႃႇဝရႃႉၽြႃး ၽြႃးပဵၼ်ၸဝ်ႈသူ သေလႄႈ သႂၢင်ႇၸႂ်သိူဝ်းၸႂ်ယူႇတႃႉ။ လွင်ႈမၼ်းၸမ်ႉ မၼ်းၸဝ်ႈ တၵ်းႁႂ်ႈၽူၼ်ႁူဝ်ပီႊတူၵ်း မၢၼ်ႇလီမႅၼ်ႈလီလႄႈ ႁႂ်ႈၽူၼ်ဢၼ်ယႂ်ႇၼႃႇ ဢၼ်ဝႃႈၽူၼ်ႁူဝ်ပီႊ ဢိၵ်ႇတင်း ၽူၼ်ႁၢင်ပီႊၸိူဝ်းၼၼ်ႉ တူၵ်းပုၼ်ႈသူ မိူၼ်ၸိူဝ်ႉၼင်ႇ မိူဝ်ႈဢွၼ်တၢင်းၼၼ်ႉဢေႃႈ။-

24တလၢင်းယဵပ်ႇၶဝ်ႈတင်းလၢႆ တၵ်းတဵမ်ဝႆႉတင်း ၶဝ်ႈပိူၵ်ႇလႄႈ ၶိူင်ႈဢၼ်ၼူတ်ႈမၢၵ်ႇ ၸိူဝ်းၼၼ်ႉၵေႃႈ တၵ်းလူၼ်ႉတူၵ်းဝႆႉ တင်းၼမ်ႉၸပိတ်ႈ တင်းၼမ်ႉမၼ်းဢေႃႈ။-

25ၼင်ႇၼၼ်လႄႈ ၶဝ်တၵ်းဢဝ်ၶူပ်ႇပီႊ ဢၼ်မႅင်းၵႅင်း ဢရႃႇၽႃႉ ၊ မႅင်းၵႅင်း ယႃႇလိၵ်ႉ ၊ မႅင်းၵႅင်း ၶႃႇသီႉလႃႉ ၊ မႅင်းၵႅင်း ၵႃႇၸမ်ႇ ဢၼ်ဝႃႈ မႁႃႇပူဝ်ႇပႃႇၵဝ် ဢၼ်ၵဝ်ပွႆႇၸႂ်ႉၸူးတီႈသူၸိူဝ်းၼၼ်ႉ ၶူပ်းၵိၼ်ၼၼ်ႉ ၶိုၼ်းပၼ်တီႈသူၼမ်ၼႃႇဢေႃႈ။-

26သူတၵ်းလႆႈၵိၼ်ၼမ်ၼႃႇလႄႈ ဢိမ်ႇတဵမ်ဢေႃႈ။ သူတၵ်းယွင်ႈယေႃးၼႃႇမႃႉၸိုဝ်ႈသဵင်ထႃႇဝရႃႉၽြႃး ၽြႃးပဵၼ်ၸဝ်ႈသူ ဢၼ်ႁဵတ်းလွင်ႈတၢင်းဢၼ်လီဢၢမ်းၼႃႇ တီႈသူၼၼ်ႉဢေႃႈ။ ၵမ်းလိုၼ်းၵူၼ်းၵဝ်တင်းလၢႆ ဢမ်ႇလႆႈမီး တၢင်းဢၼ်ဢူၵ်း ဢၼ်ဢၢႆ။-

27သူတၵ်းလႆႈႁူႉလွင်ႈဢၼ် ၵဝ်မီးယူႇၵႃႈၼႂ်းၵၢင် မဵဝ်း ဢီႉသရေႇလႃႉ ဢိၵ်ႇတင်းလွင်ႈဢၼ် ၵဝ်ပဵၼ်ထႃႇဝရႃႉၽြႃး ၽြႃးပဵၼ်ၸဝ်ႈ သူလႄႈ ဢမ်ႇမီးၽြႃးတၢင်ႇသူႇ တၢင်ႇပႃးၼၼ်ႉဢေႃႈ။ ၵမ်းလိုၼ်းၵူၼ်းၵဝ်တင်းလၢႆ ဢမ်ႇလႆႈမီး တၢင်းဢၼ်ဢူၵ်း ဢၼ်ဢၢႆ။

28လိုၼ်းၼၼ်ႉၸင်ႇ၊ ၵဝ်တၵ်းဢဝ် ဝီႉၺိၺ်ႇၵဝ်သွၼ်းလေႃႇ ၵႃႈၼိူဝ်မဵဝ်းၵူၼ်း တင်းသဵင်ႈတင်းလူင်ဢေႃႈ။ လုၵ်ႈလၢင်းသူၼၼ်ႉ တၵ်းလႆႈဢဝ်တင်းၺၢၼ်ႇ ပရေႃးၽႅတ်ႈ ႁေႃးလၢတ်ႈဢေႃႈ။ ၵူၼ်းထဝ်ႈၵူၼ်းၵႄႇသူၼၼ်ႉ တၵ်းလႆႈ ၼွၼ်းၽၼ်ႁၼ် ၼီႉမိၵ်ႈတင်းလၢႆ ဢေႃႈ။ ၵူၼ်းၼုမ်ႇၵူၼ်းၵမ်သူၼၼ်ႉၵေႃႈ တၵ်းလႆႈႁၼ် ရူႇပႃႇရူင်ႇပျႃႇတိၵ်ႈၸဝ်ႈဢေႃႈ။-

29ၼႂ်းၶိင်ႇမိူဝ်ႈၼၼ်ႉၵေႃႈ ၵဝ်တၵ်းသွၼ်းလေႃႇ ဝီႉၺိၺ်ႇၵဝ် ၵႃႈၼိူဝ်ၵူၼ်းၸၢႆး ၵူၼ်းယိင်းဢၼ်ႁဵတ်း ပွင်ဢမူႉၵဝ် ၸိူဝ်းၼၼ်ႉဢေႃႈ။-

30ၵဝ်တၵ်းၼႄပျႃး လွင်ႈတၢင်းဢၼ်လီဢၢမ်း တင်းလၢႆ ၵႃႈၼိူဝ်ၽႃႉၵၢင်ႁၢဝ် ဢိၵ်ႇတင်း ၸႃႉၸဵမ်လိူတ်ႈလႄႈ ပဵဝ်ၽႆးသဝ်ၵႂၼ်းၽႆး၊ ပုၵ်ႉပႃႉၼီႉမိၵ်ႈ တင်းလၢႆ ၵႃႈတႂ်ႈၼိူဝ်လိၼ်မိူင်းၼႆႉဢေႃႈ။-

31ၸူဝ်ႈဢၼ်ဝၼ်းယႂ်ႇဝၼ်းလူင် ဢၼ်လီၵူဝ်လီႁႄ ထႃႇဝရႃႉၽြႃး ၼၼ်ႉ ဢမ်ႇပႆႇႁွတ်ႈမႃးၼၼ်ႉၸိုင်၊ ၵၢင်ဝၼ်းတၵ်းပဵၼ် ဢၼ်လပ်းသိင်ႇၽိတ်းၽိတ်း ၵႂႃႇဢေႃႈ။ လိူၼ်ၵေႃႈတၵ်းပဵၼ် လိူတ်ႈၵႂႃႇဢေႃႈ။-

32မိူဝ်ႈၼၼ်ႉ ၶဝ်ၸိူဝ်းဢၼ် ႁဵတ်းသူးတွင်းပထၼႃႇ တီႈၼႃႇမႃႉၸိုဝ်ႈသဵင် ထႃႇဝရႃႉၽြႃး ၵႃႈမီးၸိူဝ်းၼၼ်ႉ တၵ်းလႆႈႁွတ်ႈထိုင် တၢင်းဢၼ်ၵႄႇသႄႇ ၶျွတ်ႈဢဝ်ဢေႃႈ။ လွင်ႈမၼ်းၸမ်ႉ ၵႃႈတီႈလွႆ ၸီႉဢုၼ်ႇ ဝဵင်း ယေႇရူႉသလႅမ်ႇ ၼၼ်ႉ တၵ်းလႆႈမီး ၶဝ်ၸိူဝ်းဢၼ်လွတ်ႈဢွၵ်ႇ ၸွမ်းၵႃႈၼင်ႇဢၼ် ထႃႇဝရႃႉၽြႃး မီးဢမိင်ႉၼၼ်ႉ ဢိၵ်ႇတင်း ၶဝ်ၸိူဝ်းဢၼ်ၵိုတ်းဢၼ်ၵျၢၼ်ႇ ဢၼ်ထႃႇဝရႃႉၽြႃး ႁွင်ႉဢဝ်ၼၼ်ႉဢေႃႈ။

← Chapter 1 Jump to: Chapter 3 →