Jonah 1

Shan

Jump to: Chapter 2 →

1ၼုၵ်ႈၵပၢတ်ႈ ထႃႇဝရႃႉၽြႃး ဢၼ်ႁွတ်ႈမႃးတီႈ ယူဝ်းၼႃႉ လုၵ်ႈၸၢႆး ဢမိတ်ႉတေႇ ၼၼ်ႉၸမ်ႉ၊-

2မႂ်းလုၵ်ႉလႄႈၵႂႃႇၸူးၵႃႈတီႈဝဵင်း ၼီႉၼေႇဝူၺ်ႇ ဝဵင်းလူင်ၼၼ်ႉ သေလႄႈ ႁွင်ႉပၢဝ်ႇႁွင်ႉသေႃႇ ယူႇၽၢႆႇၼိုင်ႈ တင်းမၼ်းတႃႉ။ တူႉၸရိူၵ်ႈဢပႅတ်ႈ ဢၼ်ၶဝ်ၼၼ်ႉႁဵတ်းၼၼ်ႉ ၶိုၼ်ႈမႃးႁွတ်ႈထိုင် ၵႃႈတီႈၽၢႆႇၼႃႈၵဝ်ယဝ်ႉ၊ ဝႃႈၼင်ႇၼႆဢေႃႈ။-

3ၵူၺ်းၵႃႈ ယူဝ်းၼႃႉ ၼၼ်ႉ လုၵ်ႉလႄႈၵျၢမ်ႇပွင် ဢၢင်ႈတၵ်းဢွၵ်ႇပၢႆႈသေ ၵႃႈတီႈၽၢႆႇၼႃႈထႃႇဝရႃႉၽြႃး ၵႂႃႇၸူးၵႃႈတီႈဝဵင်း တႃႇသူႉ လႄႈ လူင်းၵႂႃႇ ႁွတ်ႈထိုင်ၵႃႈတီႈဝဵင်း ယွပ်ႉပႃႉ သေယဝ်ႉ၊ ႁူပ်ႉထူပ်း ႁိူဝ်းသၢင်းၽေႃး ဢၼ်ၵႂႃႇၸူး ၵႃႈတီႈဝဵင်း တႃႇသူႉ လႄႈ ပၼ်ၵႃႈႁိူဝ်းသၢင်းၽေႃးသေလႄႈ ၶဝ်ႈလူင်း ၵႃႈၼႂ်းႁိူဝ်းသၢင်းၽေႃးၼၼ်ႉ ႁႂ်ႈလႆႈၸွမ်းလူၺ်ႈၵၼ်တင်း ၵူၼ်းႁိူဝ်းသၢင်းၽေႃးၸိူဝ်းၼၼ်ႉ ၽၢတ်ႇသေၵႃႈတီႈ ထႃႇဝရႃႉၽြႃးဢေႃႈ။-

4ထႃႇဝရႃႉၽြႃးပွႆႇၸႂ်ႉလူမ်း ဢၼ်ႁႅင်းယႂ်ႇၼႃႇ ၸူးၵႃႈၼိူဝ်ပၢင်ႇလၢႆႇ လႄႈ ပဵၼ်ၽူၼ်လူင်လူမ်းလူင် ၵႃႈတီႈပၢင်ႇလၢႆႇၼၼ်ႉ ထၼ်ႈပေႃးမိူၼ်ၼင်ႈႁၢင်ႈ ႁိူဝ်းသၢင်းၽေႃး တၵ်းလူႉတၵ်းလႅဝ်ဢေႃႈ။-

5မိူဝ်ႈၼၼ်ႉ ၵူၼ်းႁိူဝ်းသၢင်းၽေႃး ၸိူဝ်းၼၼ်ႉၵူဝ်ႁႄလႄႈ သႅၼ်ႇႁွင်ႉႁႃၽြႃးၶဝ် ႁင်းၽႂ်ႁင်းမၼ်းဢေႃႈ။ ၶဝ်ဢွၼ်ၵၼ် ဢဝ်ၶူဝ်းလဵင်း ဢၼ်မီးၵႃႈၼႂ်း ႁိူဝ်းသၢင်းၽေႃးၸိူဝ်းၼၼ်ႉ ထိမ်ႈတူၵ်းပႅတ်ႈတူၵ်း ၵႃႈၼႂ်းပၢင်ႇလၢႆႇ ႁႂ်ႈမၼ်းမဝ်မႃးဢေႃႈ။ ယူဝ်းၼႃႉ ၸမ်ႉ၊ လူင်းၶဝ်ႈၵႃႈၼႂ်းတွင်ႉႁိူဝ်းသၢင်းၽေႃးလႄႈ ၼွၼ်းယူႇၵႃႈတီႈၼၼ်ႈလႄႈ လပ်းယူႇဢေႃႈ။-

6ၵႄႇႁိူဝ်းသၢင်းၽေႃးၼၼ်ႉ မႃးၸူးၵႃႈတီႈမၼ်းလႄႈ လၢတ်ႈလႄႈဝႃႈ၊ ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈ မႂ်းၼွၼ်းလပ်းယူႇ ၸိူဝ်ႉၼင်ႇၼႆၼင်ႇႁိုဝ်။ လုၵ်ႉတႃႉ။ သူးတွင်းတီႈၽြႃးမႂ်းတႃႉ။ ၽြႃးမႂ်းၸၢင်ႈၶႄး တၵ်းၶုၵ်းၸႂ်လႆႈၶႆႈၸႂ်ထူပ်းႁဝ်း ႁႂ်ႈႁဝ်းဢမ်ႇလႆႈလူႉလႆႈလႅဝ်ဢေႃႈ၊ ဝႃႈၼင်ႇၼႆဢေႃႈ။-

7လိုၼ်းၼၼ်ႉ ၶဝ်ၼင်ႇၵၼ်ၵၼ် လၢတ်ႈၵၼ်လႄႈဝႃႈ၊ မႃးမႃးဢိူၺ်း၊ တူၵ်းလိၵ်ႈၸႃႇၵွၵ်ႈ ႁႂ်ႈလႆႈႁူႉလွင်ႈဢၼ် ဢမူႉၼႆႉ ႁွတ်ႈထိုင်ၵႃႈၼိူဝ်ႁဝ်း ၵွပ်ႈပိူဝ်ႈဢပႅတ်ႈၽူႈလႂ်ၼၼ်ႉ ၵၼ်ႁဝ်း၊ ဝႃႈၼင်ႇၼႆသေယဝ်ႉ၊ တူၵ်းလိၵ်ႈၸႃႇၵွၵ်ႈၵၼ်လႄႈ လိၵ်ႈၸႃႇၵွၵ်ႈတူၵ်းတီႈ ယူဝ်းၼႃႉ ဢေႃႈ။-

8ၶဝ်သမ်ႉ တွင်ႈထၢမ်တီႈမၼ်းလႄႈဝႃႈ၊ မွၵ်ႇလၢတ်ႈလွင်ႈဢၼ် ဢမူႉၼႆႉ ႁွတ်ႈထိုင်ၵႃႈၼိူဝ်ႁဝ်း ၵွပ်ႈပိူဝ်ႈဢၼ်လႂ်ၼၼ်ႉ သေၵမ်း။ မႂ်းႁဵတ်းၵၢၼ်ႁဵတ်းငၢၼ်းၵႃႈသင်။ မႂ်းလုၵ်ႉသေၵႃႈတီႈလႂ်မႃး။ မိူင်းမႂ်းပဵၼ်မိူင်းလႂ်။ မႂ်းပဵၼ်ၵူၼ်းမဵဝ်းၵႃႈသင်၊ မိူဝ်ႈဢၼ်ဝႃႈၼင်ႇၼႆၸိုင်၊-

9မၼ်းၶိုၼ်းလၢတ်ႈတီႈၶဝ်လႄႈဝႃႈ၊ ၵဝ်ပဵၼ်ၵူၼ်းမဵဝ်း ႁေႇပြႄး ဢေႃႈ။ ၵဝ်ပဵၼ်ၵေႃႉဢၼ် ၵူဝ်ယမ်ထႃႇဝရႃႉၽြႃး ၽြႃးပဵၼ်ၸဝ်ႈ ၸဝ်ႈၵၢင်ႁၢဝ် ဢၼ်ႁဵတ်းပဵၼ် ၼမ်ႉပၢင်ႇလၢႆႇ တင်းလိၼ်မိူင်းၼၼ်ႉဢေႃႈ၊ ဝႃႈၼင်ႇၼႆသေယဝ်ႉ၊-

10ၵူၼ်းၸိူဝ်းၼၼ်ႉ ၵူဝ်ႁႄၼႃႇလူင်လၢင်လႄႈ ဢွၼ်ၵၼ်တွင်ႈထၢမ်တီႈမၼ်းလႄႈဝႃႈ၊ ဢၼ်မႂ်းႁဵတ်းၼၼ်ႉ ပဵၼ်ၸိူဝ်ႉၼင်ႇႁိုဝ်။ ဝႃႈၼင်ႇၼႆဢေႃႈ။ လွင်ႈမၼ်းၸမ်ႉ ၵူၼ်းၸိူဝ်းၼၼ်ႉ လႆႈႁူႉလွင်ႈဢၼ် မၼ်းဢွၵ်ႇပၢႆႈသေၵႃႈတီႈ ထႃႇဝရႃႉၽြႃးမႃးၼၼ်ႉ ၵွပ်ႈပိူဝ်ႈဢၼ်မၼ်းလႆႈ မွၵ်ႇလၢတ်ႈတီႈၶဝ်ယဝ်ႉၼၼ်ႉဢေႃႈ။-

11မိူဝ်ႈၼၼ်ႉ ၵွပ်ႈပိူဝ်ႈဢၼ် လူမ်းလူင်လႅင်ႉလူင် ၵႃႈတီႈပၢင်ႇလၢႆႇၼၼ်ႉ ယဵင်ႈၶႅၼ်းလုၵ်ႉၶိုၼ်ႈ ယႂ်ႇတွၼ်းမႃးၼႃႇၼၼ်ႉလႄႈ ၶဝ်ၼၼ်ႉထၢမ်တီႈမၼ်းလႄႈဝႃႈ၊ ႁဝ်းတၵ်းလႆႈႁဵတ်း ၸိူဝ်ႉၼင်ႇႁိုဝ်တီႈမႂ်း ႁႂ်ႈပၢင်ႇလၢႆႇ ပဵၼ်ဢၼ်ၼိမ်ဢၼ်လီမႃး တီႈႁဝ်း၊ မိူဝ်ႈဢၼ်ဝႃႈၼင်ႇၼႆၸိုင်၊-

12မၼ်းၼၼ်ႉ ၶိုၼ်းလၢတ်ႈတီႈၶဝ်လႄႈဝႃႈ၊ ယုၵ်ႉဢဝ်ၵဝ်သေလႄႈ ထိမ်ႈၶျႃးတူၵ်းသႂ်ႇ ၵႃႈၼႂ်းပၢင်ႇလၢႆႇတႃႉ။ ပေႃးႁဵတ်းၸိူဝ်ႉၼင်ႇၼၼ်ၸိုင်၊ ပၢင်ႇလၢႆႇတၵ်းပဵၼ်ဢၼ်ၼိမ်ဢၼ်လီမႃး တီႈသူဢေႃႈ၊ ၵဝ်ႁူႉလွင်ႈဢၼ် ၽူၼ်လူင်လူမ်းလူင် ဢၼ်ယႂ်ႇၼႃႇၼႆႉ ႁွတ်ႈထိုင်ၵႃႈၼိူဝ်သူ ၵွပ်ႈပိူဝ်ႈၵဝ်ၵူၺ်း ၼၼ်ႉယူႇဢေႃႈ။ ပိၵ်ႉသမ်ႉဝႃႈၼင်ႇၼႆသေၵေႃႈ၊-

13ၵူၼ်းႁိူဝ်းသၢင်းၽေႃးၸိူဝ်းၼၼ်ႉ ဢွၼ်ၵၼ်ၽၢႆးႁိူဝ်း ယၢပ်ႇၸႂ်ၼႃႇလူင်လၢင် ႁႂ်ႈလႆႈႁွတ်ႈထိုင်ၵႃႈတီႈၽင်ႇဢေႃႈ။ ၵူၺ်းၵႃႈ ၵွပ်ႈပိူဝ်ႈဢၼ် လူမ်းလူင်လႅင်ႉလူင် ယဵင်ႈၶႅၼ်းလုၵ်ႉၶိုၼ်ႈ ယႂ်ႇတွၼ်းမႃးယူႇၽၢႆႇၼိုင်ႈ တင်းၶဝ်ၼၼ်ႉလႄႈ ၶဝ်ဢမ်ႇတၢတ်ႈၼိူင်ႇလႆႈ။-

14ပိူဝ်ႈၼႆလႄႈ ၶဝ်ဢွၼ်ၵၼ်ႁွင်ႉသႅၼ်ႇတီႈ ထႃႇဝရႃႉၽြႃးလႄႈဝႃႈ၊ ထႃႇဝရႃႉၽြႃးတီႈၶႃႈ ႁဝ်းၶႃႈတွင်းပၢၼ်ႇတီႈၶႃႈဢေႃႈ။ ႁဝ်းၶႃႈတွင်းပၢၼ်ႇတီႈၶႃႈဢေႃႈ။ ႁဝ်းၶႃႈတွင်းပၢၼ်ႇ ႁႂ်ႈႁဝ်းၶႃႈ ဢမ်ႇလႆႈၶၢမ်ႇတၢင်းလူႉတၢင်းလႅဝ် ၵွပ်ႈပိူဝ်ႈဢၼ်ဢသၢၵ်ႈၵေႃႉၼႆႉ ဢိၵ်ႇတင်း ႁႂ်ႈဢမ်ႇဢဝ်ဢပႅတ်ႈ ဢၼ်ထွၵ်ႇလိူတ်ႈ ၵေႃႉဢၼ်ဢမ်ႇမီးဢပႅတ်ႈၼၼ်ႉ တၢင်ႇသႂ်ႇၵႃႈၼိူဝ်ႁဝ်းၶႃႈ တီႈၶႃႈဢေႃႈ။ ထႃႇဝရႃႉၽြႃးတီႈၶႃႈ၊ ၸဝ်ႈႁဝ်း ႁဵတ်းၸွမ်းၵႃႈၼင်ႇဢၼ် ဢလူဝ်ႇၸဝ်ႈႁဝ်းမီးၼၼ်ႉ တီႈၶႃႈယဝ်ႉ၊ ဝႃႈၼင်ႇၼႆသေယဝ်ႉ၊-

15ဢွၼ်ၵၼ်ယုၵ်ႉဢဝ် ယူဝ်းၼႃႉ သေလႄႈ ထိမ်ႈၶျႃးတူၵ်းသႂ်ႇၵႃႈၼႂ်းပၢင်ႇလၢႆႇဢေႃႈ။ မိူဝ်ႈၼၼ်ႉ ပၢင်ႇလၢႆႇထၢတ်ႇယဵၼ်သေ တၢင်းဢၼ်မၼ်းလုၵ်ႉၶိုၼ်ႈ ပဵၼ်ၸွၼ်ပဵၼ်ၸႅၼ်ဝႆႉ ၼၼ်ႉဢေႃႈ။-

16ၵူၼ်းၸိူဝ်းၼၼ်ႉၵေႃႈ ၵူဝ်ႁႄ ထႃႇဝရႃႉၽြႃး ၼႃႇလူင်လၢင်လႄႈ ဢွၼ်ၵၼ်ပုၵ်ႈၸေႃႇယိတ်ႈ သေလႄႈ ဝႆႉၵတီႉသဵတ်ႈၸႃႇဢေႃႈ။-

17ထႃႇဝရႃႉၽြႃး ၶၢၼ်းပႃလူင် ႁႂ်ႈလႆႈဢိုၼ် ယူဝ်းၼႃႉ ၼၼ်ႉဝႆႉလႄႈ ယူဝ်းၼႃႉ လႆႈယူႇၵႃႈၼႂ်း တွင်ႉပႃလူင်ၼၼ်ႉ သၢမ်ဝၼ်းသၢမ်ၶိုၼ်း တဵမ်တဵမ်ဢေႃႈ။

Jump to: Chapter 2 →