Jonah 2

Shan

← Chapter 1 Jump to: Chapter 3 →

1ၵႂၢမ်းဢၼ် ယူဝ်းၼႃႉ ယူႇၵႃႈၼႂ်း တွင်ႉပႃလူင်ယူႇၼၼ်ႉသေလႄႈ သူးတွင်းတီႈ ထႃႇဝရႃႉၽြႃး ၽြႃးပဵၼ်ၸဝ်ႈ မၼ်းၼၼ်ႉၸမ်ႉ၊-

2ၵွပ်ႈပိူဝ်ႈဢၼ် ၵဝ်လႆႈၶၢမ်ႇတုၵ်ႉၶႃႉ တၢင်းၽၢၼ်လႄႈ ၵဝ်သႅၼ်ႇႁွင်ႉႁႃ ထႃႇဝရႃႉၽြႃးလႄႈ မၼ်းၸဝ်ႈဢိူဝ်ဢေႃႈ။ ၶႃႈၸဝ်ႈယူႇၵႃႈၼႂ်းတွင်ႉ မိူင်းမရၼႃႉ ႁွင်ႉသႅၼ်ႇလႄႈ ၸဝ်ႈႁဝ်းထွမ်ႇဢဝ် သဵင်ၶႃႈၸဝ်ႈတီႈၶႃႈဢေႃႈ။-

3ၸဝ်ႈႁဝ်းဢဝ်ၶႃႈၸဝ်ႈ ၶျႃးတူၵ်းသႂ်ႇ ၵႃႈၼႂ်းတီႈ ဢၼ်လိုၵ်ႉဢၼ်လမ်ႇ၊ ၵႃႈၼႂ်းၶိုင်ႈၵၢင်ၼမ်ႉ သမ်ႇမုၵ်ႉတြႃႇလႄႈ၊ ၼမ်ႉပၢင်ႇလၢႆႇ လဵပ်ႈႁွပ်ႈၶႃႈၸဝ်ႈယူႇသေလႄႈ လႅင်းၼမ်ႉပိူပ်ႈၼမ်ႉၸဝ်ႈႁဝ်း ၸိူဝ်းၼၼ်ႉ ထူမ်ႈႁူမ်ႇၶႃႈၸဝ်ႈတီႈၶႃႈယဝ်ႉ။-

4မိူဝ်ႈၼၼ်ႉ ၶႃႈၸဝ်ႈသူးတွင်း လဝ်ႊလၢတ်ႈလႄႈဝႃႈ၊ ပိၵ်ႉသမ်ႉ ၶႃႈၸဝ်ႈလႆႈၶၢမ်ႇတၢင်းဢၼ် ဢဝ်ထိမ်ႈၶျႃးတူၵ်းပႅတ်ႈသေၵႃႈတီႈသိုဝ်ႈၼႃႈတႂ်ႈတႃ ၸဝ်ႈႁဝ်း ၸိူဝ်ႉၼင်ႇၼၼ်ယဝ်ႉ သေၵေႃႈ၊ ၶႃႈၸဝ်ႈတၵ်းသမ်ႉဢဝ်ၼႃႈၶႃႈၸဝ်ႈ ဝၢႆႇၸူးပိၵ်ႈမၢၼ်ႇၸဝ်ႈႁဝ်းၼၼ်ႉ ထႅင်ႈလူးၵွၼ်ႇတီႈၶႃႈဢေႃႈ၊ ဝႃႈၼင်ႇၼႆတီႈၶႃႈဢေႃႈ။-

5ၼမ်ႉၸိူဝ်းၼၼ်ႉ လႆႈလွမ်ႉလဵပ်ႈႁွပ်ႈၶႃႈၸဝ်ႈဝႆႉ ႁႂ်ႈဢသၢၵ်ႈၶႃႈၸဝ်ႈလႆႈတၢႆလႄႈ ၶႃႈၸဝ်ႈလႆႈၶၢမ်ႇတၢင်းဢၼ်ၶျုၵ်ႈဝႆႉယူႇ ၵႃႈၼႂ်းၵၢင်ပၢင်ႇလၢႆႇ တီႈၶႃႈဢေႃႈ။ တူၼ်ႈယိူဝ်ႈပၢင်ႇလၢႆႇ မီးတၢင်းဢၼ် မတ်ႉၶဵၼ်းၵွၵ်းႁူဝ်ၶႃႈၸဝ်ႈဝႆႉယူႇ တီႈၶႃႈဢေႃႈ။-

6ပိၵ်ႉသမ်ႉၶႃႈၸဝ်ႈ လူင်းယူႇၵႃႈတီႈ ႁၢၵ်ႈတိၼ်လွႆလႄႈ ၶၢမ်ႇတၢင်းဢၼ်ဢဝ်လိၼ် ဢိၵ်ႇတင်း ၵိူၼ်ႇလိၼ် ဢိုတ်းႁပ်းသွတ်ႇဝႆႉယူႇ တႃႇသေႇ သေၵေႃႈ၊ ထႃႇဝရႃႉၽြႃး ပဵၼ်ၸဝ်ႈၵဝ်ၶႃႈတီႈၶႃႈ၊ ၸဝ်ႈႁဝ်းတၵ်း ၵႄႇသႄႇဢဝ်ဢသၢၵ်ႈၶႃႈၸဝ်ႈ ဢွၵ်ႇသေၵႃႈၼႂ်း တၢင်းဢၼ်လူႉဢၼ်လႅဝ်ၼၼ်ႉ တီႈၶႃႈဢေႃႈ။-

7မိူဝ်ႈဢၼ်ၶႃႈၸဝ်ႈ ၸႂ်လူႉၼၼ်ႉၸိုင်၊ ၶႃႈၸဝ်ႈၶုၵ်းၸႂ်လႆႈၶႆႈၸႂ်ထူပ်း ထႃႇဝရႃႉၽြႃး လႄႈ ပထၼႃႇၶႃႈၸဝ်ႈၼႆႉ ၶဝ်ႈႁွတ်ႈ ၶဝ်ႈထိုင်ၵႃႈတီႈၸဝ်ႈႁဝ်း ၵႃႈၼႂ်းပိၵ်ႈမၢၼ်ႇၸဝ်ႈႁဝ်းၼၼ်ႉ တီႈၶႃႈဢေႃႈ။-

8ၶဝ်ၸိူဝ်းဢၼ် ဢိင်ပိုင်ႈဢၼတ်ႉတႃႉ မူႉသႃႇတင်းလၢႆ ယူႇၼၼ်ႉ ၸုၼ်ႉပႅတ်ႈတီႈဢၼ်ၶဝ်ၶၢမ်ႇ ၵရူႉၼႃႇၼၼ်ႉ တီႈၶႃႈဢေႃႈ။-

9ၶႃႈၸဝ်ႈၸမ်ႉ၊ တၵ်းပႃးသဵင်ၵႂၢမ်း တၢင်းဢၼ်ယွင်ႈယေႃး ၵျေးၸူးၸဝ်ႈသေလႄႈ ပုၵ်ႈၸေႃႇယိတ်ႈတီႈၸဝ်ႈႁဝ်း တီႈၶႃႈဢေႃႈ။ တၵ်းႁဵတ်းဝၢတ်ႈသဵတ်ႈၸႃႇ ၸွမ်းၵႃႈၼင်ႇဢၼ် ၶႃႈၸဝ်ႈဝႆႉ ၵတီႉသဵတ်ႈၸႃႇၼၼ်ႉ တီႈၶႃႈဢေႃႈ။ တၢင်းဢၼ်ၵႄႇသႄႇၶျွတ်ႈဢဝ် ၼၼ်ႉ ဢွၵ်ႇပဵၼ်မႃး တီႈထႃႇဝရႃႉၽြႃး တီႈၶႃႈဢေႃႈ၊ ဝႃႈၼင်ႇၼႆဢေႃႈ။-

10ထႃႇဝရႃႉၽြႃး မီးဢမိင်ႉ တီႈပႃလူင်ၼၼ်ႉလႄႈ ပႃလူင်ၼၼ်ႉႁၢၵ်ႈ ယူဝ်းၼႃႉ ဢွၵ်ႇဝႆႉ ၵႃႈၼိူဝ်ၵုင်းဢေႃႈ။

← Chapter 1 Jump to: Chapter 3 →