Romans 9

Shan

← Chapter 8 Jump to: Chapter 10 →

1ၸႂ်ဢၼ်ႁူႉတူဝ်ၵဝ် ၶၢမ်ႇသၢၵ်ႈသေႇၽၢႆႇၵဝ်လူၺ်ႈၵၼ်တင်းဝီႉၺိၺ်ႇဢၼ်မူတ်းၸၢင်ႇၸဝ်ႈယူႇသေလႄႈ ၵဝ်ယင်းဢမ်ႇပႃးမူႉသႃႇလႄႈလၢတ်ႈဢၼ်ၸိုဝ်ႈဢၼ်ၸႂ်ႈၽၢႆႇၼႃႈၸဝ်ႈၶရိၸ်ႈၸမ်ႉ၊-

2ၵဝ်မီးတၢင်းဢၼ်ၸႂ်လဵၵ်ႉၼႃႇလူင်လၢင်ဢေႃႈ။ ၼႂ်းႁူဝ်ၸႂ်ၵဝ်ၼႆႉမီးဝူၺ်ႇတၼႃႇ တၢင်းဢၼ်ယၢပ်ႇၸႂ်ၽိုတ်ႇၸႂ်ဢမ်ႇထၢတ်ႇသေပွၵ်ႈဢေႃႈ။-

3လွင်ႈမၼ်းၸမ်ႉ ၵွပ်ႈပိူဝ်ႈပီႈၼွင်ႉၵဝ်ဢၼ်ၸွမ်းၼင်ႇၸႃႇတီႉပဵၼ်ၸိူဝ်ႉၶိူဝ်းၵဝ်ၸိူဝ်းၼၼ်ႉလႄႈ ၵဝ်မီးၸႂ်သၽေႃးထၼ်ႈပေႃး ၶႂ်ႈၽၢတ်ႇယၢၼ်ၵၼ်တင်းၸဝ်ႈၶရိၸ်ႈလႄႈ ၶၢမ်ႇတၢင်းၵိၼ်ႇတၢင်းဝႃႈဢေႃႈ။-

4ၶဝ်ၼၼ်ႉပဵၼ်ၵူၼ်း ဢီႉသရေႇလႃႉ လႄႈ ၸၢပ်ႈသႅင်ႇၵၼ်တင်း တၢင်းဢၼ်ယွင်ႈဝႆႉၼႂ်းဢရႃႇလုၵ်ႈဢိၵ်ႇတင်းမုၼ်ၽုင်းဢႃႇၼူႉၽေႃႇ၊ တင်းပတီႉၺိၺ်ႇတြႃးတင်းလၢႆ၊ တင်းတၢင်းဢၼ်ဝႆႉပိင်းၺၢပ်ႈတြႃး၊ တင်းတၢင်းဢၼ်ႁဵတ်းဝၢတ်ႈ၊ တင်းၵတီႉၸဝ်ႈတင်းလၢႆၼၼ်ႉဢေႃႈ။-

5ၶဝ်ပဵၼ်ၵူၼ်းၸိူဝ်းဢၼ်သိုပ်ႇလူင်းမႃး ၵႃႈတီႈပူႇပေႃႈတင်းလၢႆဢေႃႈ။ ၵႃႈတီႈမဵဝ်းၶဝ်ၵေႃႈ ၸဝ်ႈၶရိၸ်ႈၸွမ်းၼင်ႇၸႃႇတီႉလႄႈပေႃႇဢွၵ်ႇမႃးဢေႃႈ။ မၼ်းၸဝ်ႈၼၼ်ႉဢုပ်ႉပိူင်ႇၵူႈၸိူဝ်ႉၵူႈပိူင် ၵႃႈမီးတင်းသဵင်ႈတင်းလူင်လႄႈ ပဵၼ်ၽြႃးပဵၼ်ၸဝ်ႈဢၼ်မီးမင်ႇၵလႃႇထႃႇဝရႃႉဢေႃႈ။ ဢႃႇမိၼ်ႇ။

6ၼႂ်းဢၼ်ဝႃႈၸိူဝ်ႉၼင်ႇၼႆၼၼ်ႉ ၵတီႉၽြႃးပဵၼ်ၸဝ်ႈဢမ်ႇတႄႇ ဝႃႈၼႆ ၵဝ်ဢမ်ႇၶႂ်ႈဝႃႈ။ လွင်ႈမၼ်းၸမ်ႉ ၶဝ်ၸိူဝ်းဢၼ်သိုပ်ႇလူင်းမႃးၵႃႈတီႈ ဢီႉသရေႇလႃႉ ၵႃႈမီးတင်းသဵင်ႈတင်းလူင်ၼၼ်ႉ ပဵၼ်ၵူၼ်း ဢီႉသရေႇလႃႉ ဢၼ်မၢၼ်ႇဢၼ်မႅၼ်ႈဢမ်ႇၸႂ်ႈ။-

7မိူၼ်ၼင်ႇၼႆ ၶဝ်ၸိူဝ်းဢၼ် ပဵၼ်ၸိူဝ်ႉၶိူဝ်း ဢႃႇပြႃႇႁၢမ်ႇ ၵႃႈမီးတင်းသဵင်ႈတင်းလူင်ၼၼ်ႉ ပဵၼ်လုၵ်ႈ ဢႃႇပြႃႇႁၢမ်ႇ ဢၼ်မၢၼ်ႇဢၼ်မႅၼ်ႈဢမ်ႇၸႂ်ႈ။ ၸိူဝ်ႉၶိူဝ်းမႂ်းတၵ်းတႄႇၼႂ်း ဢီႉၸၢၵ်ႈ ၵူၺ်းဝႃႈၼႆ၊ ပျႃႇတိၵ်ႈၸဝ်ႈမီးဝႆႉဢေႃႈ။-

8ပိူဝ်ႈၼႆလႄႈ လုၵ်ႈၸႃႇတီႉပၵတီႉၸိူဝ်းၼၼ်ႉ ပဵၼ်လုၵ်ႈၽြႃးပဵၼ်ၸဝ်ႈဢၼ်မၢၼ်ႇဢၼ်မႅၼ်ႈဢမ်ႇၸႂ်ႈ။ လုၵ်ႈၸိူဝ်းဢၼ်ၸၢပ်ႈသႅင်ႇၵၼ်တင်းၵတီႉၸဝ်ႈၵူၺ်း မၼ်းၸဝ်ႈမၢတ်ႈပဵၼ်ၸိူဝ်ႉၶိူဝ်းဢၼ်မၢၼ်ႇဢၼ်မႅၼ်ႈဢေႃႈ။-

9ၵတီႉၸဝ်ႈမီးဝႆႉလႄႈဝႃႈၸမ်ႉ၊ ၸႃႉၸဵမ်တေႃႈလဵဝ်ၼႆႉလႄႈ မိူဝ်ႈဢၼ်ၶိင်ႇမၼ်းထိုင်ၸိုင်၊ ၵဝ်တၵ်းမႃးလႄႈ၊ ၸႃႇရႃႇ ၵေႃႈတၵ်းလႆႈလုၵ်ႈၸၢႆးဢေႃႈ၊ ဝႃႈၼင်ႇၼႆဢေႃႈ။-

10လိူဝ်သေၼၼ်ႉဢမ်ႇၵႃး၊ မိူဝ်ႈဢၼ် ရေႇပႅၵ်ႉၵႃႉ ဢဝ်ၵၼ်တင်းပေႃႈႁဝ်း ဢီႉၸၢၵ်ႈ လႄႈ ပႃးပတိၵ်ႉသၼ်ႇထေႇၼၼ်ႉၸိုင်၊-

11ၸူဝ်ႈဢၼ်လုၵ်ႈၸိူဝ်းၼၼ်ႉ ဢမ်ႇပႆႇၵိူတ်ႇလဵင်ႉ၊ ၸူဝ်ႈဢၼ်ဢမ်ႇပႆႇၵမ်ၵျၢင်ႉဢၼ်လီ ဢၼ်ဢမ်ႇလီၼၼ်ႉ၊ ၼင်ႇႁိုဝ်တၢင်းၵျၢမ်ႇတၢင်းပွင်ၸဝ်ႈ ဢၼ်ၸၢပ်ႈသႅင်ႇၵၼ်တင်းတၢင်းဢၼ်ၽြႃးပဵၼ်ၸဝ်ႈလိူၵ်ႈၵဵပ်းဢဝ်ၼၼ်ႉ တၵ်းဢမ်ႇတႄႇၵွပ်ႈတၢင်းၵမ်တၢင်းၵျၢင်ႉလႄႈ တၵ်းတႄႇၵွပ်ႈပိူဝ်ႈဢလူဝ်ႇၸဝ်ႈဢၼ်ႁွင်ႉဢဝ်ၼၼ်ႉၸိုင်၊-

12မၼ်းၸဝ်ႈပၼ်ပျႃႇတိၵ်ႈတီႈမႄႈယိင်းၼၼ်ႉလႄႈဝႃႈ၊ လုၵ်ႈၵေႃႉယႂ်ႇ တၵ်းလႆႈႁဵတ်းၶႃႈတီႈလုၵ်ႈၵေႃႉလဵၵ်ႉဢေႃႈ၊ ဝႃႈၼင်ႇၼႆဢေႃႈ။-

13ပဵၼ်ၸွမ်းၵႃႈၼင်ႇဢၼ်တႅမ်ႈၼႂ်းၵျၢမ်းလိၵ်ႈလႄႈဝႃႈ၊ ၵဝ်ႁၵ်ႉ ယႃႇၵုပ်ႈ လႄႈၸင်း ဢေးသေႃး ဢေႃႈ၊ ဝႃႈၼင်ႇၼႆၼၼ်ႉဢေႃႈ။

14ပိူဝ်ႈၼႆလႄႈ တၵ်းလႆႈလၢတ်ႈၸိူဝ်ႉၼင်ႇႁိုဝ်။ ၽြႃးပဵၼ်ၸဝ်ႈႁဵတ်းတၢင်းဢၼ်ဢမ်ႇတြႃးႁိုဝ်။ ဢမ်ႇပဵၼ်ၸိူဝ်ႉၼင်ႇၼၼ်။-

15မၼ်းၸဝ်ႈလၢတ်ႈတီႈ မူဝ်းသေႇ လႄႈဝႃႈ၊ ၵဝ်တၵ်းႁဵတ်းၵျေးၸူး တီႈၵေႃႉဢၼ်ၵဝ်ၶႂ်ႈႁဵတ်းၵျေးၸူးၼၼ်ႉဢေႃႈ။ ၵေႃႉဢၼ်ၵဝ်ၶႂ်ႈဢဵတ်းလူၵေႃႈ ၵဝ်တၵ်းဢဵတ်းလူဢေႃႈ၊ ဝႃႈၼင်ႇၼႆဢေႃႈ။-

16ပိူဝ်ႈၼႆလႄႈၵေႃႉဢၼ်မီးဢလူဝ်ႇၶႂ်ႈလႆႈၼၼ်ႉ တၢတ်ႈၼိူင်ႇလႆႈဢမ်ႇၸႂ်ႈ။ ၵေႃႉဢၼ်ၶုၼ်ႇဢၼ်လႅၼ်ႈၵေႃႈ တၢတ်ႈၼိူင်ႇလႆႈဢမ်ႇၸႂ်ႈ။ ၽြႃးပဵၼ်ၸဝ်ႈဢၼ်ႁဵတ်းၵျေးၸူးၼၼ်ႉၵူၺ်း တၢတ်ႈၼိူင်ႇလႆႈဢေႃႈ။-

17ဢၼ်ဝႃႈတီႈၶုၼ် ၽႃႇရေႃး ၼႂ်းၵျၢမ်းလိၵ်ႈၸမ်ႉ၊ လွင်ႈၼင်ႇႁိုဝ်ၵဝ်တၵ်းလႆႈၼႄပျႃးတၼ်းၶူဝ်းၵဝ် ၵႃႈၼႂ်းမႂ်းဢိၵ်ႇတင်းလွင်ႈၼင်ႇႁိုဝ် ၵဝ်တၵ်းလႆႈႁႂ်ႈၼႃႇမႃႉၸိုဝ်ႈသဵင်ၵဝ်သႃႈၸွတ်ႇၵႃႈၼိူဝ်လိၼ်မိူင်းတင်းသဵင်ႈတင်းမူတ်းၸိုင် ၵဝ်ယုၵ်ႉယွင်ႈမႂ်းဝႆႉယဝ်ႉ၊ ဝႃႈၼင်ႇၼႆဢေႃႈ။-

18ၵႃႈၼင်ႇဢၼ်ပဵၼ်ၼၼ်ႉ မၼ်းၸဝ်ႈႁဵတ်းၵျေးၸူး တီႈၵေႃႉဢၼ်မၼ်းၸဝ်ႈၶႂ်ႈႁဵတ်းၼၼ်ႉဢေႃႈ။ ၵေႃႉဢၼ်မၼ်းၸဝ်ႈ ၶႂ်ႈႁႂ်ႈၵႅၼ်ႇၶႅင်ၼၼ်ႉၵေႃႈ မၼ်းၸဝ်ႈႁႂ်ႈၵႅၼ်ႇၶႅင်ဢေႃႈ။

19ပေႃးပဵၼ်ၸိူဝ်ႉၼင်ႇၼႆၸိုင် မႂ်းတၵ်းလၢတ်ႈတီႈၵဝ်လႄႈဝႃႈ၊ ႁဵတ်းသင်လႄႈၽြႃးပဵၼ်ၸဝ်ႈယင်းတၢင်ႇဢပႅတ်ႈယူႇၼင်ႇႁိုဝ်။ ၽူႈလႂ်ယၢမ်ႈတွၼ်ႉႁႄႉၶႅၼ်ဢမူႉမၼ်းၸဝ်ႈ၊ ဝႃႈၼင်ႇၼႆလူးၵွၼ်ႇႁိုဝ်။-

20ၵေႃႉဢၼ်တွပ်ႇထဵင်ၽြႃးပဵၼ်ၸဝ်ႈၼႆႉဢိူၺ်း၊ မႂ်းၸမ်ႉပဵၼ်ၽူႈလႂ်။ ၶိူင်ႈပိူင်ဢၼ်လႆႈၶၢမ်ႇတၢင်းဢၼ်ႁဵတ်းၼၼ်ႉ တၵ်းလႆႈလၢတ်ႈတီႈၵေႃႉဢၼ်မေႃႁဵတ်းမၼ်းၼၼ်ႉလႄႈဝႃႈ၊ ႁဵတ်းၵဝ်ဝႆႉၸိူဝ်ႉၼင်ႇၼႆ ၵွပ်ႈပိူဝ်ႈၸိူဝ်ႉၼင်ႇႁိုဝ်။ ဝႃႈၼင်ႇၼႆလူးၵွၼ်ႇႁိုဝ်။

21ၸဝ်ႈမေႃႈပိူင်ႇလိၼ်မေႃႈဢမ်ႇၸႂ်ႈႁိုဝ်။ မၼ်းဢဝ်တင်းၵွင်လိၼ်ၼဵဝ်ၵွင်ၼိုင်ႈလႄႈ ပိူင်ႇႁဵတ်းမေႃႈလီမေႃႈၺၢမ်ႉ ဢမ်ႇၸႂ်ႈႁိုဝ်။-

22ပေႃးၽြႃးပဵၼ်ၸဝ်ႈ မီးဢလူဝ်ႇၶႂ်ႈၼႄပျႃးတၢင်းၸႂ်မႆႈၸဝ်ႈလႄႈ ႁႂ်ႈတၼ်းၶူဝ်းၸဝ်ႈထၢင်ႇသႃးယူႇသေလႄႈ ဢဝ်တင်းၶၼ်ႇထီႇတၢင်းဢၼ်ယိူၼ်ႉၶၢမ်ႇ ဢၼ်ယႂ်ႇၼႃႇယိူၼ်ႉၶၢမ်ႇမေႃႈတၢင်းၸႂ်မႆႈ ဢၼ်မႄးႁႅၼ်းဝႆႉပုၼ်ႈဢၼ်တၵ်းႁွတ်ႈထိုင် တၢင်းလူႉတၢင်းလႅဝ်ၼၼ်ႉၸိုင်၊ တၵ်းမီးတီႈလၢတ်ႈၵႃႈသင်လူးၵွၼ်ႇ။-

23ၵႃႈတီႈမေႃႈၵရူႉၼႃႇ ဢၼ်မၼ်းၸဝ်ႈမႄးႁႅၼ်းဝႆႉဢွၼ်တၢင်း ပုၼ်ႈဢၼ်တၵ်းၶၢမ်ႇတၢင်းဢၼ်ယုၵ်ႉယွင်ႈဝႆႉ၊-

24ဢၼ်ဝႃႈႁဝ်း ဢၼ်မၼ်းၸဝ်ႈႁွင်ႉဢဝ်ၵႃႈၼႂ်းမဵဝ်းၵူၼ်း ယူႉတႃႉ ၵူၺ်းဢမ်ႇၸႂ်ႈ။ ႁွင်ႉဢဝ်ၵႃႈၼႂ်းၵူၼ်းတၢင်ႇၸိူဝ်ႉတၢင်ႇၶိူဝ်းတင်းလၢႆၼၼ်ႉၼႆၵေႃႈ၊ ပေႃးမၼ်းၸဝ်ႈၶႂ်ႈႁဵတ်းႁႂ်ႈ တၢင်းဢၼ်မုၼ်ၽုင်းဢႃႇၼူႉၽေႃႇၸဝ်ႈ ဢၼ်ယႂ်ႇၵႂၢင်ႈၼၼ်ႉထၢင်ႇသႃးၸိုင်၊ တၵ်းမီးတီႈလၢတ်ႈၵႃႈသင်လူးၵွၼ်ႇ။-

25ဢၼ်မႃးၼႂ်းၵျၢမ်းလိၵ်ႈ ႁူဝ်းသေႇ လႄႈဝႃႈၸမ်ႉ၊ ဢၼ်ဢမ်ႇၸႂ်ႈၵူၼ်းၵဝ်ၼၼ်ႉ၊ ၵဝ်တၵ်းႁွင်ႉဝႃႈ ၵူၼ်းၵဝ်ဢေႃႈ။ လုၵ်ႈယိင်းသၢဝ်ဢၼ်ၵဝ်ဢမ်ႇႁၵ်ႉၵေႃႈ ၵဝ်တၵ်းႁွင်ႉဝႃႈဢၼ်ႁၵ်ႉဢေႃႈ။-

26ၶဝ်ၸိူဝ်းဢၼ်ယူႇၵႃႈၼႂ်းတီႈဢၼ်လၢတ်ႈလႄႈဝႃႈ၊ သူဢမ်ႇၸႂ်ႈၵူၼ်းၵဝ်၊ ဝႃႈၼင်ႇၼႆၼၼ်ႉတၵ်းလႆႈၶၢမ်ႇတၢင်းဢၼ်ႁွင်ႉဝႃႈ လုၵ်ႈၽြႃးပဵၼ်ၸဝ်ႈဢၼ်ဢသၢၵ်ႈလိပ်းယူႇၼၼ်ႉဢေႃႈ၊ ဝႃႈၼင်ႇၼႆဢေႃႈ။

27ပရေႃးၽႅတ်ႈ ဢီႉသႃႇယႃႉ ၵေႃႈ ႁေႃးလၢတ်ႈလူၺ်ႈလွင်ႈ ၵူၼ်းမဵဝ်း ဢီႉသရေႇလႃႉ လႄႈဝႃႈၸမ်ႉ၊ ပိၵ်ႉသမ်ႉၵူၼ်း ဢီႉသရေႇလႃႉ တင်းလၢႆ ၼမ်ထၢၼ်ႇသၢႆးၼမ်ႉသမ်ႇမုၵ်ႉတြႃႇသေၵေႃႈ၊ ၶဝ်ၸိူဝ်းဢၼ်ၵိုတ်းဢၼ်ၵျၢၼ်ႇၼၼ်ႉၵူၺ်း တၵ်းႁွတ်ႈထိုင်တၢင်းဢၼ်ၵႄႇၶျွတ်ႈဢဝ်ဢေႃႈ။-

28မၼ်းၸဝ်ႈတၵ်းႁႂ်ႈဢမူႉမၼ်းၸဝ်ႈယဝ်ႉတူဝ်ႈလႄႈ တႅပ်းတတ်းသိုဝ်ႈသိုဝ်ႈတေႃႇတေႃႇ ၸွမ်းၼင်ႇတြႃးဢေႃႈ။ ထႃႇဝရႃႉၽြႃးတၵ်းႁဵတ်းဢမူႉဢၼ်တႅပ်းတတ်းၵႃႈၼိူဝ်လိၼ်မိူင်းၼႆႉ၊ ဝႃႈၼင်ႇၼႆဢေႃႈ။-

29မိူၼ်ၼင်ႇၼၼ် ဢီႉသႃႇယႃႉ သမ်ႉႁေႃးလၢတ်ႈထႅင်ႈမိူဝ်ႈဢွၼ်ၼႆႉၼၼ်ႉလႄႈဝႃႈၸမ်ႉ၊ ပေႃးၸဝ်ႈပူဝ်ႇပႃႇၵၢင်ႁၢဝ်ထႃႇဝရႃႉၽြႃးၼၼ်ႉ ဢမ်ႇႁႂ်ႈၸိူဝ်ႉၽၼ်းၵိုတ်းၵျၢၼ်ႇဝႆႉၵႃႈၼႂ်းႁဝ်းၸိုင်၊ ႁဝ်းလႆႈပဵၼ်ၸိူဝ်ႉၼင်ႇဝဵင်း သေႃးတုမ်ႇ လႄႈ လႆႈမိူၼ်ၸိူဝ်ႉၼင်ႇ ဝဵင်း ၵေႃးမေႃးရႃႉ ၼၼ်ႉယဝ်ႉ၊ ဝႃႈၼင်ႇၼႆဢေႃႈ။

30ပိူဝ်ႈၼႆလႄႈႁဝ်းတၵ်းလႆႈဝႃႈၸိူဝ်ႉၼင်ႇႁိုဝ်ၸမ်ႉ၊ ၵူၼ်းတၢင်ႇၸိူဝ်ႉတၢင်ႇၶိူဝ်းတင်းလၢႆ ဢၼ်ဢမ်ႇၸွမ်းႁႂ်ႈၶိုတ်းတၢင်းဢၼ်သိုဝ်ႈတေႃႇၼၼ်ႉ ၶိုတ်းတၢင်းဢၼ်သိုဝ်ႈတေႃႇဢၼ်ဝႃႈ တၢင်းဢၼ်သိုဝ်ႈတေႃႇဢၼ်ၶိုတ်းၵွပ်ႈပိူဝ်ႈတၢင်းယုမ်ႇမၢတ်ႈဢေႃႈ။-

31ၵူၼ်း ဢီႉသရေႇလႃႉ တင်းလၢႆ ဢၼ်ၸွမ်းႁႂ်ႈၶိုတ်း တြႃးတၢင်းသိုဝ်ႈတေႃႇၼၼ်ႉၸမ်ႉ၊ ဢမ်ႇၶိုတ်းတြႃးတၢင်းသိုဝ်ႈတေႃႇ။-

32ႁဵတ်းသင်လႄႈ ဢမ်ႇၶိုတ်းၸိူဝ်ႉၼင်ႇႁိုဝ်။ ပိူဝ်ႈဢၼ်ဢမ်ႇၸွမ်းၵွပ်ႈပိူဝ်ႈတၢင်းယုမ်ႇမၢတ်ႈ၊ ၸွမ်းၵွပ်ႈပိူဝ်ႈတၢင်းၵမ်တၢင်းၵျၢင်ႉပိင်းၺၢပ်ႈတြႃးၵူၺ်းလႄႈ ဢမ်ႇၶိုတ်း။-

33ၵႃႈၼင်ႇဢၼ်မႃးၼႂ်းၵျၢမ်းလိၵ်ႈလႄႈဝႃႈ၊ ၵဝ်ဢဝ်မၢၵ်ႇႁိၼ်ဢၼ်တၵ်းတိူဝ်ႉမႅၼ်ႈလႄႈလူမ်ႉ ဢိၵ်ႇတင်းမၢၵ်ႇႁိၼ်ဢၼ်တၵ်းႁႂ်ႈၽိတ်းပိူင်ႈၼၼ်ႉ ၶျႃးဝႆႉၵႃႈၼိူဝ်လွႆ ၸီႉဢုၼ်ႇ ဢေႃႈ။ ၵေႃႉဢၼ်ဢိင်ပိုင်ႈမၢၵ်ႇႁိၼ်ၼၼ်ႉၸမ်ႉ၊ ဢမ်ႇမီးတၢင်းဢူၵ်းတၢင်းဢၢႆလႆႈ၊ ဝႃႈၼင်ႇၼႆၼၼ်ႉ၊ ၵူၼ်း ဢီႉသရေႇလႃႉ တင်းလၢႆ တိူဝ်ႉမႅၼ်ႈမၢၵ်ႇႁိၼ်ၼၼ်ႉလႄႈလူမ်ႉဢေႃႈ။

← Chapter 8 Jump to: Chapter 10 →