Titus 1

Shan

Jump to: Chapter 2 →

1ၵဝ် ပေႃးလူႉ ဢၼ်ပဵၼ်ၶႃႈၽြႃးပဵၼ်ၸဝ်ႈ ဢၼ်ပဵၼ်တမၢၼ်ႇၸဝ်ႈ ယေႇသူႉၶရိၸ်ႈ ပုၼ်ႈတၢင်းဢၼ်ယုမ်ႇမၢတ်ႈ ၶဝ်ၸိူဝ်းဢၼ်ၽြႃးပဵၼ်ၸဝ်ႈ လိူၵ်ႈၵဵပ်းဝႆႉ ဢိၵ်ႇတင်းပုၼ်ႈတၢင်းဢၼ် ႁပ်ႉတုင်းဢဝ်သမ်ႇမႃႇတြႃး ဢၼ်ၸၢပ်ႈသႅင်ႇၵၼ်တင်း တၢင်းဢၼ် မူၼ်ႈပျေႃႇၼႂ်းဝၢတ်ႈၽြႃး၊-

2ၵွပ်ႈပိူဝ်ႈဢၼ်မုင်ႈထႃႈမွင်းထႃႈ ဢသၢၵ်ႈထႃႇဝရႃႉ ဢၼ်ၽြႃးပဵၼ်ၸဝ်ႈ ဢၼ်ၵၢင်းလွတ်ႈတၢင်းမူႉသႃႇၼၼ်ႉဝႆႉၵတီႉဝႆႉ ၸူဝ်ႈဢၼ်ဢမ်ႇပႆႇႁွတ်ႈထိုင် ၵၢပ်ႈၵႃႇလႃႉမိူဝ်ႈဢွၼ်ၼႆႉၼၼ်ႉလႄႈ၊-

3ၼႂ်းၶိင်ႇမိူဝ်ႈဢၼ်သၢင်ႇထုၵ်ႇ ဢဝ်တင်းဢၶႂၢင်ႉတၢင်းဢၼ် ႁေႃးလၢတ်ႈတြႃး ဢၼ်ဢၢပ်ႈဝႆႉတီႈၵဝ် ၵႃႈၼင်ႇပိင်းၺၢပ်ႈၽြႃးပဵၼ်ၸဝ်ႈ ဢၼ်ပဵၼ်ၸဝ်ႈၵႄႇၶျွတ်ႈဢဝ်ႁဝ်းၼၼ်ႉ ႁႂ်ႈၼုၵ်ႈၵပၢတ်ႈတြႃးၸဝ်ႈထၢင်ႇသႃးၼၼ်ႉၼႆႉ ပၼ်ငိၼ်းၵႂႃႇ၊-

4တီႈ တီႉတူႉ ဢၼ်ပဵၼ်လုၵ်ႈၸၢႆးၵဝ်ၸႅတ်ႈၸႅတ်ႈၵွပ်ႈပိူဝ်ႈတၢင်းဢၼ်ယုမ်ႇမၢတ်ႈ ဢၼ်သိူၵ်ႈသမ်ႇၵၼ်တင်းႁဝ်းဢေႃႈ။ ႁႂ်ႈၵျေးၸူးဢိၵ်ႇတင်းၵရူႉၼႃႇ တင်းတၢင်းၼိမ် ဢၼ်ပဵၼ်မႃးၵႃႈတီႈၽြႃးပေႃႈၸဝ်ႈ တင်း ယေႇသူႉၶရိၸ်ႈ ၸဝ်ႈဢၼ်ၵႄႇၶျွတ်ႈဢဝ်ႁဝ်းၼၼ်ႉ မီးသေၵမ်းလူၺ်ႈ။

5ၵဝ်ဢဝ်မႂ်းဝႆႉၵိုတ်း ၵႃႈၼႂ်းၵုၼ် ၵရေႇတေႇ ႁႂ်ႈမႂ်းလႆႈ မႄးႁႅၼ်းဝႆႉ ၵႃႈဢၼ်ဢမ်ႇၸေး ဢမ်ႇၸုမ်ႇၵႃႈၼႂ်းၵုၼ်ၼၼ်ႉလႄႈ ၶၢၼ်းဝႆႉၶဝ်ၸိူဝ်းဢၼ် ဢုပ်ႉၸိူဝ်းၸဝ်ႈ ၵႃႈၼႂ်းၵူႈဝၢၼ်ႈၵူႈဝဵင်း ၵႃႈၼင်ႇဢၼ်ၵဝ် သင်ႇလၢတ်ႈဝႆႉတီႈမႂ်းၼၼ်ႉဢေႃႈ။-

6ပေႃးပဵၼ်ၵေႃႉဢၼ်ၵၢင်းလွတ်ႈတၢင်း တီႈဢၼ်တၢင်ႇဢပႅတ်ႈ၊ ၵေႃႉဢၼ်မီးမေးၵေႃႉလဵဝ်ၵူၺ်း၊ ပေႃးလုၵ်ႈမၼ်းလၢင်းမၼ်းတင်းလၢႆ ယုမ်ႇမၢတ်ႈလႄႈၵၢင်းလွတ်ႈတင်း တီႈဢၼ်ပိူၼ်ႈတၢင်ႇဢပႅတ်ႈလႄႈ ဝႃႈပူၼ်ႉလိူဝ်ၼႂ်းၵႃႇမၵုင်ႇလႄႈ ဢမ်ႇထွမ်ႇဢမ်ႇဢဝ်၊ ဝႃႈၼင်ႇၼႆၼၼ်ႉၸိုင်၊ လီၶၢၼ်းၵူၼ်းၸိူဝ်ႉၼင်ႇၼၼ်ၼၼ်ႉဝႆႉဢေႃႈ။-

7လွင်ႈမၼ်းၸမ်ႉ သြႃႇဢုပ်ႉၸိူဝ်းၸဝ်ႈၸိုင်၊ တၵ်းလႆႈပဵၼ်ၵေႃႉဢၼ်ၵၢင်းလွတ်ႈတၢင်းတီႈဢၼ်တၢင်ႇဢပႅတ်ႈ ၸိူဝ်ႉၼင်ႇ ၽၼ်ႇတႃႇၸူဝ်းၽြႃးပဵၼ်ၸဝ်ႈၼၼ်ႉဢေႃႈ။ ဢမ်ႇလႆႈပဵၼ်ၵေႃႉဢၼ် ၸၢင်ႈၸွမ်းၼင်ႇဢလူဝ်ႇတူဝ်ၸဝ်ႈၵဝ်ႇ၊ ၵေႃႉဢၼ်ၸႂ်ပွတ်း ၸႂ်လွတ်း၊ ၵေႃႉဢၼ်မူၼ်ႈပျေႃႇၼႂ်းၼမ်ႉၸပိတ်ႈ၊ ၵေႃႉဢၼ်ၸၢင်ႈပေႃႉၸၢင်ႈယႅၼ်ႉပိူၼ်ႈ၊ ၵေႃႉဢၼ်ၸႂ်ၸပ်းၸႂ်ၸွႆးၸီးပႂႃး ဢၼ်ဢမ်ႇမူတ်းသႂ်လႄႈ၊-

8တၵ်းလႆႈပဵၼ်ၵေႃႉဢၼ် ၸၢင်ႈႁဵတ်းဝၢတ်ႈၶႅၵ်ႇ၊ ၵေႃႉဢၼ်ၸၢင်ႈႁဵတ်းၵေႃႉႁဵတ်းသေႈ လူၺ်ႈၵၼ်တင်းသူႇတေႃႇၵွင်း၊ ၵေႃႉဢၼ်ပႂ်ႉဢိင်ႇတရေႇ၊ ၵေႃႉဢၼ်သိုဝ်ႈတေႃႇ၊ ၵေႃႉဢၼ်မူတ်းၸၢင်ႇ၊ ၵေႃႉဢၼ်ၸၢင်ႈၶျုၵ်ႈၵႃႇမၵုင်ႇဢေႃႈ။-

9တၵ်းလႆႈပဵၼ်ၵေႃႉဢၼ်ၸပ်းၸွႆး ၵႂၢမ်းသဵတ်ႈၸႃႇၸဝ်ႈယူႇသေႇသေႇ ၸွမ်းၵႃႈၼင်ႇဢၼ်မၼ်းလႆႈသွၼ်ဢဝ်ယဝ်ႉၼၼ်ႉ လွင်ႈၼင်ႇႁိုဝ် မၼ်းတၵ်းလႆႈဢဝ်တင်းဢေႃးဝႃႇတႃႉ ဢၼ်ၶၢဝ်ၸၢင်ႇသေလႄႈ တၢတ်ႈၼိူင်ႇႁႂ်ႈလႆႈတိုၵ်းယူင်းၸူဝ်းဢဝ် ဢိၵ်ႇတင်း ႁႂ်ႈလႆႈ ၵႄႈလိတ်ႈၵႂၢမ်းၶဝ်ၸိူဝ်းဢၼ် တွပ်ႇထဵင်ၼၼ်ႉဢေႃႈ။

10လွင်ႈမၼ်းၸမ်ႉ ၶဝ်ၸိူဝ်းဢၼ်ယင်းဢမ်ႇထွမ်ႇဢမ်ႇဢဝ်လႄႈ ၸၢင်ႈလၢတ်ႈၵႂၢမ်းဢၼ်လၢႆလၢႆ ဢမ်ႇပွင်ႇလွင်ႈၵႃႈသင်ၼၼ်ႉသေလႄႈ ပႅတ်ႉလႅၼ်ၼၼ်ႉမီးၼမ်ၼႃႇဢေႃႈ။ ၼႂ်းၶဝ်ၸိူဝ်းဢၼ်ၶၢမ်ႇတၢင်းဢၼ် ထိူဝ်ႁိမ်းၼၼ်ႉၵေႃႈ ယဵင်ႈၶႅၼ်းမီးလႄႈ၊-

11တၵ်းလႆႈဢိုတ်းသူပ်းၶဝ်ၼၼ်ႉဢေႃႈ။ ၶဝ်ၼၼ်ႉၸၢင်ႈပၼ်ဢေႃးဝႃႇတႃႉ ဢၼ်ဢမ်ႇထုၵ်ႇလီပၼ် ၵွပ်ႈပိူဝ်ႈဢၼ်ၸႂ်ၸပ်းၸႂ်ၸွႆး ၸီးပႂႃး ဢၼ်ဢမ်ႇမူတ်းသႂ်ၼၼ်ႉလႄႈ ၶႂမ်ႈပိၼ်ႈတင်းႁိူၼ်းတင်းယေးပႅတ်ႈဢေႃႈ။-

12ပရေႃးၽႅတ်ႈသြႃႇဢၼ် ပဵၼ်ၸိူဝ်ႉၶိူဝ်းလဵဝ်ၵၼ်တင်းၶဝ်လႄႈ ပႃးၼႂ်းၶဝ်ၼၼ်ႉၵေႃႉၼိုင်ႈ လၢတ်ႈလႄႈဝႃႈ၊ ၵူၼ်း ၵရေႇတေႇ တင်းလၢႆ ၸၢင်ႈပဵၼ်ၵေႃႉဢၼ်သုင်းမူႉသႃႇ၊ တူဝ်ထိူၼ်ႇဢၼ်ႁၢႆႉ၊ ၵေႃႉဢၼ်ၶၢၼ်ႉဢိူၼ်လႄႈ ၵိၼ်ပူၼ်ႉၵိၼ်လိူဝ် ယူႇတႃႇသေႇဢေႃႈ၊ ဝႃႈၼင်ႇၼႆဢေႃႈ။-

13သၢၵ်ႈသေႇၼၼ်ႉမႅၼ်ႈဢေႃႈ။-

14ပိူဝ်ႈၼႆလႄႈ လွင်ႈၼင်ႇႁိုဝ်ၶဝ်ၼၼ်ႉ တၵ်းဢမ်ႇဝႆႉဢမူႉလူၺ်ႈၵႂၢမ်းတၢၼ်ႇတႃႇရီႇ ယူႉတႃႉ ဢိၵ်ႇတင်း ပိင်းၺၢပ်ႈၶဝ်ၸိူဝ်းဢၼ် ပႅတ်ႈဝႆႉ သမ်ႇမႃႇတြႃးၼၼ်ႉလႄႈ လႆႈၶၢဝ်ၸၢင်ႇၼႂ်းလွင်ႈတၢင်းဢၼ်ယုမ်ႇမၢတ်ႈၸိုင်၊ တၢင်ႇဢပႅတ်ႈတီႈၶဝ်သေလႄႈ သင်ႇသွၼ်သုင်းမႃႉ ၶဝ်ၼႃႇၼႃႇတႃႉ။

15တီႈၶဝ်ၸိူဝ်းဢၼ် ၶၢဝ်ၸၢင်ႇၼၼ်ႉၸိုင် လွင်ႈတၢင်းၵႃႈမီးတင်းသဵင်ႈတင်းလူင် ၶၢဝ်ၸၢင်ႇယူႇဢေႃႈ။ တီႈၶဝ်ၸိူဝ်းဢၼ် ဢမ်ႇၶၢဝ်ၸၢင်ႇလႄႈဢမ်ႇယုမ်ႇမၢတ်ႈၼၼ်ႉၸမ်ႉ၊ လွင်ႈတၢင်းဢၼ်လႂ်သေဢမ်ႇဝႃႈ ဢမ်ႇၶၢဝ်ၸၢင်ႇ၊ ႁူဝ်ၸႂ်ၶဝ် ဢိၵ်ႇတင်း ၸႂ်ဢၼ်ႁူႉ တူဝ်ၸဝ်ႈၵဝ်ႇၼၼ်ႉၵေႃႈ ဢမ်ႇၶၢဝ်ၸၢင်ႇ။-

16ပိၵ်ႉသမ်ႉၶဝ် ႁဵတ်းၸိူဝ်ႉၼင်ႇႁၢင်ႈ ႁူႉၸၵ်းၽြႃးပဵၼ်ၸဝ်ႈသေၵေႃႈ၊ ၶဝ်ဢဝ်တင်းတၢင်းၵမ်တၢင်းၵျၢင်ႉ ၶဝ်ထဵင်ပႅတ်ႈမၼ်းၸဝ်ႈဢေႃႈ။ ပဵၼ်ၵေႃႉဢၼ်လီႁင်ႈ ဢဵတ်ႇသဵတ်ႇ၊ ၵေႃႉဢၼ်ဢမ်ႇထွမ်ႇဢမ်ႇဢဝ်၊ ၵေႃႉဢၼ်ဢမ်ႇမီးၺၢၼ်ႇ ဢၼ်ၸၢင်ႈႁဵတ်း လွင်ႈတၢင်းဢၼ်လီဢၼ်ငၢမ်း သေၸိူဝ်ႉသေပိူင်ၵူၺ်းဢေႃႈ။

Jump to: Chapter 2 →