Titus 2

Shan

← Chapter 1 Jump to: Chapter 3 →

1မႂ်းၸမ်ႉ၊ ႁေႃးလၢတ်ႈၵႃႈဢၼ်ထိူၵ်ႈတၢၼ်ႇၵၼ်တင်း ဢေႃးဝႃႇတႃႉဢၼ်ၶၢဝ်ၸၢင်ႇၼၼ်ႉတႃႉ။-

2တိုၵ်းယူင်းၸူဝ်းဢဝ်ႁႂ်ႈၵူၼ်းၸၢႆး ဢၼ်ဢသၢၵ်ႈယႂ်ႇတင်းလၢႆၼၼ်ႉ လႆႈပဵၼ်ၵေႃႉဢၼ် မီးသမ်ႇမႃႇသတီႉ၊ ၵေႃႉဢၼ်တႄႇ ၼိမ်ယူႇ ၵေႃႉဢၼ်ပႂ်ႉဢိင်ႇတရေႇ၊ ၵေႃႉဢၼ်မီးၸႂ်ဢၼ်ၶၢဝ်ၸၢင်ႇ ၼႂ်းၸႃႉၸဵမ်တၢင်းဢၼ်ယုမ်ႇမၢတ်ႈ၊ တၢင်းဢၼ်ႁၵ်ႉ၊ တၢင်းဢၼ်ယိူၼ်ႉၶၢမ်ႇ၊-

3မိူၼ်ၸိူဝ်ႉၼင်ႇၼၼ်၊ ႁႂ်ႈၵူၼ်းယိင်းဢၼ်ဢသၢၵ်ႈယႂ်ႇတင်းလၢႆၼၼ်ႉ လႆႈပဵၼ်ၵေႃႉဢၼ်ထိူၵ်ႈတၢၼ်ႇၵၼ်တင်း ထမ်ႇမႃႉဢမူႉ ၼႂ်းတၢင်းဢၼ်ၵမ်ၵျၢင်ႉ သၢင်ႈႁဵတ်း၊ ၵေႃႉဢၼ်ဢမ်ႇၸၢင်ႈ ၶျေႃးၵိၼ် ဝွၼ်းၵိၼ်၊ ၵေႃႉဢၼ်ဢမ်ႇၸၢင်ႈပူၼ်ႉလိူဝ်လူၺ်ႈ ၼမ်ႉၸပိတ်ႈ၊ ၵေႃႉဢၼ်ၸၢင်ႈသွၼ်ပၼ် လွင်ႈတၢင်းဢၼ်လီဢၼ်ငၢမ်းလႄႈ၊-

4ႁႂ်ႈၶဝ်လႆႈသင်ႇသွၼ်သုင်းမႃႉပၼ် ၵူၼ်းယိင်းဢၼ်ဢသၢၵ်ႈယင်းၼုမ်ႇတင်းလၢႆၼၼ်ႉ ႁႂ်ႈၶဝ်လႆႈပဵၼ်ၵေႃႉဢၼ် ႁၵ်ႉပႅင်းၽူဝ်ၶဝ်၊ ၵေႃႉဢၼ်ႁၵ်ႉလုၵ်ႈ ႁၵ်ႉလၢင်း၊-

5ၵေႃႉဢၼ်ပႂ်ႉဢိင်ႇတရေႇ၊ ၵေႃႉဢၼ်ၶၢဝ်ၸၢင်ႇ၊ ၵေႃႉဢၼ်ၸၢင်ႈလုမ်းလႃးႁိူၼ်းယေးၶဝ်၊ ၵေႃႉဢၼ်လီဢၼ်ငၢမ်း၊ ၵေႃႉဢၼ်ၶၢမ်ႇတၢင်းဢၼ် ၽူဝ်တူဝ်ၸဝ်ႈၵဝ်ႇဢုပ်ႉပိူင်ႇ လွင်ႈၼင်ႇႁိုဝ် ၼုၵ်ႈၵပၢတ်ႈတြႃးၽြႃးပဵၼ်ၸဝ်ႈ တၵ်းလႆႈၵၢင်းလွတ်ႈတင်းတၢင်းဢၼ် သႄႉသွမ်းၼၼ်ႉ၊-

6မိူၼ်ၸိူဝ်ႉၼင်ႇၼၼ်၊ ႁႂ်ႈၵူၼ်းၸၢႆး ဢၼ်ဢသၢၵ်ႈယင်းၼုမ်ႇတင်းလၢႆၼၼ်ႉ လႆႈပႂ်ႉဢိင်ႇတရေႇယူႇတႃႉ။

7တူဝ်ၸဝ်ႈၵဝ်ႇၼႄပျႃးပုင်ႇသၢၵ်ႈသေႇ ဢၼ်လီဢၼ်ငၢမ်းၼႂ်းလွင်ႈတၢင်း ၵူႈၸိူဝ်ႉၵူႈပိူင်တႃႉ။ မိူဝ်ႈဢၼ်ပၼ်သုင်းမႃႉ ဢေႃးဝႃႇတႃႉၼၼ်ႉၸိုင် ႁဵတ်းတၢင်းဢၼ်ၵၢင်းလွတ်ႈတၢင်း မိၵ်ႉသႃႇတိၵ်ႉထီႉ၊ တၢင်းဢၼ်တႄႇၼိမ်ယူႇ၊-

8တၢင်းဢၼ်ႁေႃးလၢတ်ႈၵႂၢမ်းတြႃး ဢၼ်ၶၢဝ်ၸၢင်ႇလႄႈ ဢမ်ႇမီးတီႈဢၼ်တၢင်ႇဢပႅတ်ႈၸိူဝ်းၼၼ်ႉတႃႉ။ ပေႃးပဵၼ်ၸိူဝ်ႉၼင်ႇၼၼ်ၸိုင် ၵေႃႉဢၼ်ယူႇၽၢႆႇၼိုင်ႈယူႇၼၼ်ႉ တၵ်းႁွတ်ႈထိုင် တၢင်းဢၼ်ဢူၵ်းဢၼ်ဢၢႆ ၵွပ်ႈပိူဝ်ႈဢၼ်မၼ်းဢမ်ႇလႆႈဢၶႂၢင်ႉ တီႈဢၼ် တၵ်းတၢင်ႇဢပႅတ်ႈလႆႈၼၼ်ႉဢေႃႈ။

9တိုၵ်းယူင်းၸူဝ်းဢဝ် ၶဝ်ၸိူဝ်းဢၼ်လႆႈၶၢမ်ႇႁဵတ်းၶႃႈၼၼ်ႉ ႁႂ်ႈၶဝ်လႆႈၶၢမ်ႇတၢင်းဢၼ် ၸဝ်ႈၶဝ်ဢုပ်ႉပိူင်ႇလႄႈ ယင်းဢမ်ႇမီးတၢင်းဢၼ်တွပ်ႇဢၼ်ထဵင်၊ ၸွမ်းဢလူဝ်ႇၸဝ်ႈၶဝ် ၼႂ်းလွင်ႈတၢင်းၵူႈၸိူဝ်ႉၵူႈပိူင်၊-

10ယင်းဢမ်ႇႁဵတ်းတၢင်းဢၼ် လၵ်ႉဢဝ်လွမ်ဢဝ်တဵတ်ႇတဵတ်ႇလႄႈ ၼႄပျႃး သဵတ်ႈၸႃႇ တင်းသဵင်ႈတင်းလူင် ထၢင်ႇထၢင်ႇသႃးသႃး ႁႂ်ႈလႆႈႁၢင်ႈၶိူင်ႈ ဢေႃးဝႃႇတႃႉ ၽြႃးပဵၼ်ၸဝ်ႈ၊ ၸဝ်ႈဢၼ်ၵႄႇၶျွတ်ႈႁဝ်းၼၼ်ႉ ၼႂ်းလွင်ႈတၢင်းၵူႈၸိူဝ်ႉၵူႈပိူင်ၼၼ်ႉတႃႉ။

11လွင်ႈမၼ်းၸမ်ႉ ၵျေးၸူးၽြႃးပဵၼ်ၸဝ်ႈ လႆႈပေႃႇမႃးထၢင်ႇသႃးလႄႈ ၸၢင်ႈၵႄႇၶျွတ်ႈဢဝ်ၵူၼ်း တင်းသဵင်ႈတင်းလူင် ယူႇသေလႄႈ သင်ႇသွၼ်သုင်းမႃႉႁဝ်း၊-

12ႁႂ်ႈႁဝ်းပႄႇပႅတ်ႈတၢင်းဢၼ်ဢမ်ႇမီးၽြႃးတြႃး၊ တၢင်းဢၼ်ၸႂ်ၸပ်းၸႂ်ၸွႆး လေႃးၵီႇတင်းလၢႆယူႇသေယဝ်ႉ၊ လႆႈယူႇၼႂ်းၸၢတ်ႈၼႆႉ ႁဵတ်းတၢင်းဢၼ်ပႂ်ႉဢိင်ႇတရေႇ၊ တၢင်းဢၼ်ၵမ်ၵျၢင်ႉၸွမ်းၼင်ႇတြႃး၊ တၢင်းဢၼ်မူၼ်ႈပျေႃႇၼႂ်းဝၢတ်ႈၽြႃးၼၼ်ႉယူႇ၊-

13မုင်ႈထႃႈမွင်းထႃႈ တၢင်းဢၼ်မုင်ႈထႃႈမွင်းထႃႈ ဢၼ်မီးမင်ႇၵလႃႇ ဢိၵ်ႇတင်း တၢင်းဢၼ်မုၼ်သရေႇၽြႃးပဵၼ်ၸဝ်ႈ ဢၼ်ယႂ်ႇမျၢတ်ႈၼႃႇ ဢၼ်ဝႃႈၸဝ်ႈဢၼ်ၵႄႇၶျွတ်ႈဢဝ်ဢပႅတ်ႈႁဝ်း ယေႇသူႉၶရိၸ်ႈ ပေႃႇမႃးထၢင်ႇသႃးၼၼ်ႉယူႇဢေႃႈ။-

14ၸဝ်ႈၼၼ်ႉၸုၼ်ႉပႅတ်ႈ တူဝ်ၸဝ်ႈၵဝ်ႇႁႂ်ႈလႆႈၼုၵ်ႈဢဝ်ႁဝ်း ဢွၵ်ႇသေၵႃႈၼႂ်းတူႉၸရိူၵ်ႈ တင်းသဵင်ႈတင်းလူင် ဢိၵ်ႇတင်း ႁႂ်ႈၵူၼ်းမဵဝ်းဢၼ် ၸႂ်ႁႅင်းယႂ်ႇ ၽၢႆႇတၢင်းၵမ်တၢင်းၵျၢင်ႉ ဢၼ်လီဢၼ်ငၢမ်းလႄႈ မၼ်းၸဝ်ႈထိူၵ်ႈပိူင်ႇၼၼ်ႉလႆႈ မူတ်းသႂ်ပုၼ်ႈ တူဝ်ၸဝ်ႈၵဝ်ႇယဝ်ႉ။

15ဢဝ်တင်းဢႃႇၼႃႇၵႃႈမီး ႁဵတ်းတၢင်းဢၼ် ႁေႃးလၢတ်ႈၵႂၢမ်းတြႃး၊ တၢင်းဢၼ်တိုၵ်းယူင်းၸူဝ်းဢဝ်၊ တၢင်းဢၼ်သုင်းမႃႉ တၢင်ႇဢပႅတ်ႈၸိူဝ်းၼၼ်ႉတႃႉ။ ယႃႇပေႁႂ်ႈၽူႈလႂ်လႆႈႁဵတ်း ဢမ်ႇပေႃးၼင်ႇႁိုဝ်တီႈမႂ်း။

← Chapter 1 Jump to: Chapter 3 →