Zechariah 10

Shan

← Chapter 9 Jump to: Chapter 11 →

1ဢွၼ်ၵၼ်သူးတွင်း ယွၼ်းဢဝ်တီႈ ထႃႇဝရႃႉၽြႃး ႁႂ်ႈၽူၼ်တူၵ်း ၼႂ်းၶိင်ႇမိူဝ်ႈဢၼ် ၽူၼ်ႁၢင်ပီႊတူၵ်းၼၼ်ႉတႃႉ။ ထႃႇဝရႃႉၽြႃးပွင်မႄး၊ပွင်ႁဵတ်းၽႃႉမႅပ်ႈလႄႈ ႁႂ်ႈႁႃႇၽူၼ်တူၵ်းသေလႄႈ ႁႂ်ႈတူၼ်ႈယိူဝ်ႈ၊တူၼ်ႈယႃႈ ဢွၵ်ႇမႃးၵႃႈတီႈပၢင်ႇတူင်ႈၼႃး ပုၼ်ႈၵူၼ်းတင်းသဵင်ႈတင်းလူင်ဢေႃႈ။-

2ရုၵ်ႈထူႉ တေႇရပ်ႉ ၸိူဝ်းၼၼ်ႉ လၢတ်ႈၵႂၢမ်း ဢၼတ်ႉတႃႉ လႄႈ ၶဝ်ၸိူဝ်းဢၼ်ႁဵတ်း ပရေႃးၽႅတ်ႈၼၼ်ႉ ႁၼ်ရူႇပႃႇရူင်ႇမူႉသႃႇလႄႈ ႁေႃးလၢတ်ႈတၢင်းဢၼ် ၼွၼ်းၽၼ်ႁၼ် ဢၼ်ဢမ်ႇၸိုဝ်ႈဢမ်ႇၸႂ်ႈၼၼ်ႉဢေႃႈ။ ၶဝ်ဢဝ်ဢၢႆဢဝ်ၵႂၼ်းသေလႄႈ ႁႂ်ႈပေႇၸႂ်ၼိမ်ၸႂ်ဢေႃႈ။ ပိူဝ်ႈၼႆလႄႈ ၶဝ်ၵႂႃႇမႃးမိူၼ်ၸိူဝ်ႉၼင်ႇ မုၵ်ႉသူဝ်းၽုင်သူဝ်းၼၼ်ႉလႄႈ ၶၢမ်ႇတုၵ်ႉၶႃႉတၢင်းၽၢၼ် ၵွပ်ႈပိူဝ်ႈဢၼ် ဢမ်ႇမီးၵေႃႉဢၼ်လဵင်ႉသူဝ်းထိင်းသူဝ်းၼၼ်ႉဢေႃႈ။-

3ၵဝ်တၵ်းၸႂ်မႆႈၶႆႈၸႃႉတေႃႇ ၶဝ်ၸိူဝ်းဢၼ်လဵင်ႉသူဝ်းထိင်းသူဝ်းၼၼ်ႉလႄႈ ပၼ်တၢမ်ႇတီႈပႄႉပေႃႈ တင်းလၢႆ ဢေႃႈ။ လွင်ႈမၼ်းၸမ်ႉ ၸဝ်ႈပူဝ်ႇပႃႇၵၢင်ႁၢဝ် ထႃႇဝရႃႉၽြႃး မႃးလူမႃးတူၺ်း ၽုင်သူဝ်းမၼ်းၸဝ်ႈ မဵဝ်း ယူႉတႃႉ ၼၼ်ႉလႄႈ ႁႂ်ႈၶဝ်ပဵၼ်ၸိူဝ်ႉၼင်ႇမႃႉတိုၵ်းသိုၵ်း ဢၼ်ပႃးဢဝ်မုၼ်ၽုင်းၸဝ်ႈ ၼၼ်ႉဢေႃႈ။-

4ၵႃႈၼႂ်းမဵဝ်းၼၼ်ႉ၊ မၢၵ်ႇႁိၼ်ငဝ်ႈႁၢၵ်ႈၸဵင်ႇတိူၵ်ႈ၊ မႆႉသဵပ်ႇၼိူဝ်ႉ၊ ၵၢင်ႇတိုၵ်းသိုၵ်း၊ ၵူၼ်းဢၼ်ပဵၼ်ၶုၼ်ပဵၼ်ၵႂၢၼ်ၵႃႈမီး တၵ်းပေႃႇဢွၵ်ႇမႃးဢေႃႈ။-

5ၶဝ်ၼၼ်ႉ တၵ်းပဵၼ်ၸိူဝ်ႉၼင်ႇ ၵူၼ်းသိုၵ်းဢၼ်ႁႅင်းယႂ်ႇၼႃႇ ဢၼ်ယဵပ်ႇယမ်ႈရၢၼ်ႇသူႇ ၵႃႈၼႂ်းၵူမ်ႇ ၵႃႈတီႈသဵၼ်ႈတၢင်းတီႈဢၼ်တိုၵ်းသိုၵ်းၼၼ်ႉဢေႃႈ။ ၶဝ်တၵ်းတိုၵ်းသိုၵ်းတိုၵ်းသိူဝ် ၵွပ်ႈပိူဝ်ႈဢၼ်ထႃႇဝရႃႉၽြႃး မီးယူႇလူၺ်ႈၵၼ်တင်းၶဝ်ၼၼ်ႉလႄႈ ႁႂ်ႈၵူၼ်းသိုၵ်းၶီႇမႃႉ တင်းလၢႆဢူၵ်းဢၢႆဢေႃႈ။-

6ၵဝ်တၵ်းႁႂ်ႈမဵဝ်း ယူႉတႃႉ မၼ်ႈၶိူင်ႇလႄႈ ၵႄႇသႄႇၶျွတ်ႈဢဝ် မဵဝ်း ယူဝ်းသႅပ်ႈ ဢေႃႈ။ ၵွပ်ႈပိူဝ်ႈဢၼ်ၵဝ် ဢဵတ်းလူႁၵ်ႉပႅင်းၶဝ်လႄႈ ၵဝ်တၵ်းၶျႃးတီႈယူႇၶဝ်ပၼ်လႄႈ ၶဝ်ၼၼ်ႉတၵ်းပဵၼ်ၸိူဝ်ႉၼင်ႇ ဢၼ်ၵဝ်ဢမ်ႇတွၼ်ႉ ႁေႃႈၶဝ်ဢွၵ်ႇပႅတ်ႈ ၼၼ်ႉဢေႃႈ။ ၵဝ်ပဵၼ်ထႃႇဝရႃႉၽြႃး ၽြႃးပဵၼ်ၸဝ်ႈၶဝ်လႄႈ ထွမ်ႇဢဝ်ၵႂၢမ်းၶဝ်ဢေႃႈ။-

7ၵူၼ်းမဵဝ်း ဢေႇၽရိမ်ႇ ၸိူဝ်းၼၼ်ႉ တၵ်းပဵၼ်ၸိူဝ်ႉၼင်ႇ ၵူၼ်းသိုၵ်းဢၼ်ႁႅင်းယႂ်ႇၼႃႇလႄႈ ႁူဝ်ၸႂ်ၶဝ်တၵ်းၸူမ်းသိူဝ်း မိူၼ်ၸိူဝ်ႉၼင်ႇၵေႃႉဢၼ်ဢိမ်ႇတဵမ်ဝႆႉ တင်းၼမ်ႉၸပိတ်ႈၼၼ်ႉဢေႃႈ။ လုၵ်ႈၶဝ်လၢၼ်ၶဝ်ၼၼ်ႉ တၵ်းႁၼ်သေလႄႈ မူၼ်ႈပျေႃႇလႄႈ ႁူဝ်ၸႂ်ၶဝ်သိူဝ်းသႂၢင်ႇယူႇ ၼႂ်းထႃႇဝရႃႉၽြႃးဢေႃႈ။-

8ၵဝ်တၵ်းၵိဝ်သဵင်ၵႂႃႇၸူး တီႈၶဝ်လႄႈ ႁႂ်ႈၶဝ်ၸူႉၵၼ်တုမ်ၵၼ်ဢေႃႈ။ ၵွပ်ႈပိူဝ်ႈဢၼ်ၵဝ် ထုၵ်ႈၼုၵ်ႈဢဝ်ၶဝ်ယဝ်ႉလႄႈ ၶဝ်ၼၼ်ႉတၵ်းၼမ်ၵိုၼ်း မိူၼ်ၸိူဝ်ႉၼင်ႇဢၼ်ၼမ်ၵိုၼ်း မိူဝ်ႈဢွၼ်တၢင်းၼၼ်ႉဢေႃႈ။-

9ပိၵ်ႉသမ်ႉ ၵဝ်တၵ်းဢဝ်ၶဝ်ဝၢၼ်ႇပိုၼ် ၵႃႈၼႂ်းၵူၼ်းတၢင်ႇၸိူဝ်ႉတၢင်ႇၶိူဝ်းတင်းလၢႆ မိူၼ်ၸိူဝ်ႉၼင်ႇ ၸိူဝ်ႉၽၼ်းသေၵေႃႈ၊ ၶဝ်တၵ်းယူႇၵႃႈတီႈမိူင်း ဢၼ်ၵႆၼၼ်ႉ ၶုၵ်းၸႂ်လႆႈၶႆႈၸႂ်ထူပ်းၵဝ်လႄႈ ဢသၢၵ်ႈလိပ်းယူႇ လူၺ်ႈၵၼ်တင်းလုၵ်ႈၶဝ်လၢၼ်ၶဝ် သေလႄႈ ၶိုၼ်းမႃးဢေႃႈ။-

10ၵဝ်တၵ်းသမ်ႉဢဝ်ၶဝ်ဢွၵ်ႇသေ ၵႃႈၼႂ်းမိူင်း ဢေႇၵိပ်ႉတူႉ ၶိုၼ်းမႃးလႄႈ ႁွင်ႉဢဝ်ၶဝ် ဢွၵ်ႇသေၵႃႈၼႂ်းမိူင်း ဢႃႇသူႉရီႉ သေလႄႈ ႁႂ်ႈၸူႉၵၼ်တုမ်ၵၼ်ဢေႃႈ။ ၵဝ်တၵ်းဢဝ်ၶဝ်မႃးၵႃႈတီႈမိူင်း ၵီႉလတ်ႉ ဢိၵ်ႇတင်း မိူင်း လေႇပၼုၼ်ႇ လႄႈ လိၼ်တၵ်းဢမ်ႇၵုမ်ႇဢမ်ႇပေႃး ပုၼ်ႈဢၼ်ၶဝ်တၵ်းယူႇ တၵ်းသဝ်းၼၼ်ႉလႆႈ။-

11မၼ်းၸဝ်ႈတၵ်းလႆႈလတ်းၵႂႃႇ ၵႃႈၼႂ်းၵၢင်ပၢင်ႇလၢႆႇ တုၵ်ႉၶႃႉတၢင်းၽၢၼ်လႄႈ ပေႃႉယႅၼ်ႉလႅင်းၼမ်ႉ၊ပိူပ်ႈၼမ်ႉပၢင်ႇလၢႆႇဢေႃႈ။ တီႈဢၼ်လိုၵ်ႉ၊ဢၼ်လမ်ႇၼမ်ႉႁွင်ႈ ၼီႉလႃႉ ၵႃႈမီးၼၼ်ႉ တၵ်းယူတ်းႁႅင်ႈၵႂႃႇဢေႃႈ။ မႃႇၼႃႉၸႂ်သုင် မိူင်း ဢႃႇသူႉရီႉ တၵ်းလႆႈ ၶၢမ်ႇတၢင်းဢၼ်ၶျႃးတူၵ်း တီႈတႅမ်ႇလႄႈ ၵၼ်းႁွၵ်ႇရႃႇၸႃႉမိူင်း ဢေႇၵိပ်ႉတူႉ ၼၼ်ႉၵေႃႈ တၵ်းလပ်ႉႁၢႆၵႂႃႇဢေႃႈ။-

12ၵဝ်တၵ်းႁႂ်ႈၶဝ်မၼ်ႈၶိူင်ႇ ၼႂ်းထႃႇဝရႃႉၽြႃးလႄႈ ၶဝ်တၵ်းဢိင်ပိုင်ႈၼႃႇမႃႉ ၸိုဝ်ႈသဵင်ထႃႇဝရႃႉၽြႃးသေလႄႈ ဢွၼ်ၵၼ်ၵႂႃႇမႃးဢေႃႈ၊ ဝႃႈၼင်ႇၼႆလႄႈ ထႃႇဝရႃႉၽြႃး မီးဢမိင်ႉဢေႃႈ။

← Chapter 9 Jump to: Chapter 11 →