Zechariah 12

Shan

← Chapter 11 Jump to: Chapter 13 →

1ၼုၵ်ႈၵပၢတ်ႈ ပျႃႇတိၵ်ႈ ထႃႇဝရႃႉၽြႃး ဢၼ်ၸၢပ်ႈသႅင်ႇလူၺ်ႈလွင်ႈ မဵဝ်း ဢီႉသရေႇလႃႉ ဢၼ်ဝႃႈ ဢမိင်ႉ ဢၼ်ထႃႇဝရႃႉၽြႃး ဢၼ်ဢဝ်ၽႃႉၵၢင်ႁၢဝ်ၶဵင်ႈဝႆႉလႄႈ ၶျႃးငဝ်ႈႁၢၵ်ႈတိူၵ်ႈလိၼ်မိူင်း၊ ဢၼ်ႁဵတ်းပဵၼ် ဝီႉၺိၺ်ႇၵူၼ်း ၵႃႈၼႂ်းၵူၼ်းၼၼ်ႉ မီးဝႆႉၸမ်ႉ၊-

2ၵဝ်တၵ်း ႁႂ်ႈဝဵင်း ယေႇရူႉသလႅမ်ႇ ပဵၼ်ၵွၵ်းဢၼ်ဝၢင်ႇဝီႈဝၢင်ႇဝိူဝ်ႈယူႇ တီႈမဵဝ်းၵူၼ်း တင်းသဵင်ႈတင်းလူင် ဢၼ်မီးၵႃႈတီႈႁိမ်းႁွမ်း လဵပ်ႈႁွပ်ႈမၼ်း ၸိူဝ်းၼၼ်ႉဢေႃႈ။ ၵႃႈတီႈမိူင်း ယူႉတႃႉ ၵေႃႈ ၵဝ်တၵ်းႁႂ်ႈပဵၼ် မိူၼ်ၸိူဝ်ႉၼင်ႇၼၼ် ၼႂ်းမိူဝ်ႈဢၼ် ယင်းတိုၵ်ႉလွမ်ႉလဵပ်ႈႁွပ်ႈဝဵင်း ယေႇရူႉသလႅမ်ႇ ဝႆႉယူႇၼၼ်ႉဢေႃႈ။-

3ၼႂ်းမိုဝ်ႉဝၼ်းၼၼ်ႉ ၵဝ်တၵ်းႁႂ်ႈဝဵင်း ယေႇရူႉသလႅမ်ႇ ၼၼ်ႉ ပဵၼ်မၢၵ်ႇႁိၼ် ဢၼ်ၼၵ်းၼႃႇ တီႈမဵဝ်းၵူၼ်း တင်းသဵင်ႈတင်းလူင် လႄႈ ၶဝ်ၵႃႈဢၼ်ယုၵ်ႉယွင်ႈ မၢၵ်ႇႁိၼ်ၼၼ်ႉၸိူဝ်းၼၼ်ႉ တၵ်းလႆႈၶၢမ်ႇတၢင်းဢၼ်ႁၵ်းႁဵၵ်း လူႉလႅဝ်ပႅတ်ႈဢေႃႈ။ ၵူၼ်းလေႃးၵီႇၵူႈၸိူဝ်ႉ ၵူႈမဵဝ်းၼၼ်ႉ တၵ်းဢွၼ်ၵၼ်ၸူႉၵၼ်တုမ်ၵၼ် ယူႇၽၢႆႇၼိုင်ႈတင်းဝဵင်းၼၼ်ႉဢေႃႈ။-

4ထႃႇဝရႃႉၽြႃး မီးဢမိင်ႉၸမ်ႉ၊ ၼႂ်းမိုဝ်ႉဝၼ်းၼၼ်ႉ ၵဝ်တၵ်းပၼ်တၢမ်ႇ ႁႂ်ႈမႃႉၵႃႈမီးၼၼ်ႉ မဝ်းမိင်း ၵႂင်ၸႂ်ယုင်ႈၸႂ် ဢိၵ်ႇတင်းႁႂ်ႈၵူၼ်းသိုၵ်းၶီႇမႃႉ တင်းလၢႆ ပဵၼ်ၵူၼ်းယွင်ႇ၊ၵူၼ်းမႃႈၵႂႃႇဢေႃႈ။ ၵဝ်တၵ်းၽုၺ်ႇတႃ၊ မိုၼ်းတႃၵဝ်ၸူးမဵဝ်း ယူႉတႃႉ လႄႈ ပၼ်တၢမ်ႇ ႁႂ်ႈမႃႉ ၵႃႈဢၼ်မီး တီႈၵူၼ်းတၢင်ႇၸိူဝ်ႉတၢင်ႇၶိူဝ်း တင်းလၢႆၼၼ်ႉ တႃမွတ်ႇၵႂႃႇဢေႃႈ။-

5ၶုၼ် ယူႉတႃႉ တင်းလၢႆ တၵ်းဢွၼ်ၵၼ် လၢတ်ႈၼႂ်းၸႂ်လႄႈဝႃႈ၊ ၵူၼ်းဝဵင်း ယေႇရူႉသလႅမ်ႇ ၸိူဝ်းၼၼ်ႉ ပဵၼ်ဢဵၼ်ၵဝ်၊ႁႅင်းၵဝ် ၵွပ်ႈပိူဝ်ႈၽြႃးပဵၼ်ၸဝ်ႈၶဝ်၊ ၸဝ်ႈပူဝ်ႇပႃႇၵၢင်ႁၢဝ် ထႃႇဝရႃႉၽြႃးၼၼ်ႉဢေႃႈ၊ ဝႃႈၼင်ႇၼႆဢေႃႈ။-

6ၼႂ်းမိုဝ်ႉဝၼ်းၼၼ်ႉ ၵဝ်တၵ်းႁႂ်ႈၶုၼ် ယူႉတႃႉ ၸိူဝ်းၼၼ်ႉ ပဵၼ်ၸိူဝ်ႉၼင်ႇ မေႃႈၽႆး ၽၢင်ၽႆး ၵႃႈၼႂ်းၵွင်ၽိုၼ်း ဢိၵ်ႇတင်းၸိူဝ်ႉၼင်ႇ ၵၢၼ်ႈၽႆး ၵႃႈၼႂ်းလိုၼ်ႈၶဝ်ႈ ၼၼ်ႉလႄႈ ၶဝ်ၼၼ်ႉတၵ်းမႆႈ မဵဝ်းၵူၼ်းတင်းသဵင်ႈတင်းလူင် ဢၼ်မီးၵႃႈတီႈႁိမ်းႁွမ်း လဵပ်ႈႁွပ်ႈ ၽၢႆႇၶႂႃၽၢႆႇသၢႆႉၶဝ် ၼၼ်ႉဢေႃႈ။ ဝဵင်း ယေႇရူႉသလႅမ်ႇ ၵေႃႈ တၵ်းသမ်ႉၶိုၼ်း မီးတၢင်းဢၼ်တႄႇယူႇ သေႇသေႇ ၵႃႈၼႂ်းတီႈဢၼ်မၼ်းတႄႇယူႇၵဝ်ႇၵဝ်ႇ ဢၼ်ဝႃႈ၊ ဝဵင်း ယေႇရူႉသလႅမ်ႇ ၼၼ်ႉဢေႃႈ။-

7ထႃႇဝရႃႉၽြႃး တၵ်းၵႄႇသႄႇၶျွတ်ႈဢဝ် မူဝ်းၵႃႇ ယူႉတႃႉ တင်းလၢႆ ဢွၼ်တၢင်းပိူၼ်ႈ ႁႂ်ႈမုၼ်ၽုင်း မဵဝ်းၶုၼ် တႃႇဝိတ်ႈ ဢိၵ်ႇတင်း မုၼ်ၽုင်းၵူၼ်းဝဵင်း ယေႇရူႉသလႅမ်ႇ ၸိူဝ်းၼၼ်ႉ ဢမ်ႇလႆႈဢုပ်ႇဢၢတ်ႇယူႇ ၽၢႆႇၼိုင်ႈတင်းမိူင်း ယူႉတႃႉ ဢေႃႈ။-

8ၼႂ်းမိုဝ်ႉဝၼ်းၼၼ်ႉ ထႃႇဝရႃႉၽြႃး တၵ်းႁႄႉၵင်ႈပႂ်ႉၸွႆႈပႂ်ႉထႅမ် ၵူၼ်းဝဵင်း ယေႇရူႉသလႅမ်ႇ ၸိူဝ်းၼၼ်ႉယူႇလႄႈ၊ ၵေႃႉဢၼ်ႁႅင်းလဵၵ်ႉႁႅင်းၵေႇ ၼႂ်းမိုဝ်ႉဝၼ်းၼၼ်ႉ တၵ်းပဵၼ်ၸိူဝ်ႉၼင်ႇ ၶုၼ် တႃႇဝိတ်ႈ လႄႈ မဵဝ်းၶုၼ် တႃႇဝိတ်ႈ ၼၼ်ႉ တၵ်းပဵၼ်ၸိူဝ်ႉၼင်ႇ ၽြႃးပဵၼ်ၸဝ်ႈ ဢိၵ်ႇတင်း ၸိူဝ်ႉၼင်ႇ တမၢၼ်ႇၵၢင်ႁၢဝ် ထႃႇဝရႃႉၽြႃးၼၼ်ႉ ၵႃႈတီႈၽၢႆႇၼႃႈၶဝ် ၼၼ်ႉဢေႃႈ။-

9ၼႂ်းမိုဝ်ႉဝၼ်းၼၼ်ႉ ၵဝ်တၵ်းဢဝ်ႁႅင်းဢွၵ်ႇ ႁႂ်ႈလႆႈယႃႉၵူၼ်း ၵူႈၸိူဝ်ႉၵူႈမဵဝ်း ဢၼ်မႃးတိုၵ်းဝဵင်း ယေႇရူႉသလႅမ်ႇ ၸိူဝ်းၼၼ်ႉ ပႅတ်ႈဢေႃႈ။-

10ၵဝ်တၵ်းဢဝ် သၽေႃးတၢင်းဢၼ်ၶၢမ်ႇဢဝ်ၵျေးၸူးၸဝ်ႈ၊ သၽေႃးတၢင်းဢၼ်ႁဵတ်းသူးတွင်းပထၼႃႇၼၼ်ႉ သွၼ်းလေႃႇသႂ်ႇပၼ် ၵႃႈၼိူဝ်မဵဝ်းၶုၼ် တႃႇဝိတ်ႈ ဢိၵ်ႇတင်း ၵူၼ်းဝဵင်း ယေႇရူႉသလႅမ်ႇ ၸိူဝ်းၼၼ်ႉလႄႈ ၶဝ်ၼၼ်ႉ တၵ်းလႆႈဢွၼ်ၵၼ်တူၺ်းႁၼ်ၵဝ် ဢၼ်ၶဝ်တႅင်းပွင်ႇ ၼႆႉဢေႃႈ။ ၶဝ်တၵ်းဢွၼ်ၵၼ် ႁႆႈႁွင်ႉပွင်ႉၶၢင်း ၵွပ်ႈပိူဝ်ႈမၼ်းမိူၼ်ၸိူဝ်ႉၼင်ႇ ဢၼ်ပေႃႈႁႆႈႁွင်ႉပွင်ႉၶၢင်း ၵွပ်ႈပိူဝ်ႈလုၵ်ႈၸၢႆးၵေႃႉလဵဝ်ၵူၺ်း ၼၼ်ႉလႄႈ ၶဝ်တၵ်းဢွၼ်ၵၼ်ၸဵပ်းၸႂ်၊ၶူမ်ၸႂ် ၵွပ်ႈပိူဝ်ႈမၼ်း မိူၼ်ၸိူဝ်ႉၼင်ႇဢၼ် ပေႃႈၸဵပ်းၸႂ်ၶူမ်ၸႂ် ၵွပ်ႈပိူဝ်ႈလုၵ်ႈၸၢႆးတူၼ်ႈမၼ်း ၼၼ်ႉဢေႃႈ။-

11ၼႂ်းမိုဝ်ႉဝၼ်းၼၼ်ႉ တၵ်းမီးတၢင်းဢၼ်ႁႆႈႁွင်ႉ ပွင်ႉၶၢင်း ဢၼ်ယႂ်ႇၼႃႇလူင်လၢင် ၵႃႈၼႂ်းဝဵင်း ယေႇရူႉသလႅမ်ႇ မိူၼ်ၸိူဝ်ႉၼင်ႇ ဢၼ်ႁႆႈႁွင်ႉပွင်ႉၶၢင်း ၵႃႈတီႈဝဵင်း ႁႃႇတတြိမ်ႇမုၼ်ႇ ၵႃႈၼႂ်းပၢင်ႇႁူၺ်ႈ မေႇၵိတ်ႉတေႃႇ ၼၼ်ႉဢေႃႈ။-

12မိူင်းတင်းမိူင်း တၵ်းႁႆႈႁွင်ႉ ပွင်ႉၶၢင်းၸွမ်းလူၺ်ႈ မဵဝ်းၽႂ်မဵဝ်းမၼ်း ယေႈမဵဝ်းယေႈတီႈဢေႃႈ။ ပီႈၼွင်ႉၸိူဝ်ႉၶိူဝ်းၶုၼ် တႃႇဝိတ်ႈ တီႈၼိုင်ႈ၊ မႄႈယိင်းၶဝ် တီႈၼိုင်ႈ၊ ပီႈၼွင်ႉၸိူဝ်ႉၶိူဝ်း ၼႃႇသၼ်ႇ တီႈၼိုင်ႈ၊ မႄႈယိင်းၶဝ်တီႈၼိုင်ႈ၊-

13ပီႈၼွင်ႉၸိူဝ်ႉၶိူဝ်း လေႇဝီႉ တီႈၼိုင်ႈ၊ မႄႈယိင်းၶဝ် တီႈၼိုင်ႈ၊ ပီႈၼွင်ႉၸိူဝ်ႉၶိူဝ်း သီႉမီႉ တီႈၼိုင်ႈ၊ မႄႈယိင်းၶဝ် တီႈၼိုင်ႈ၊-

14ပီႈၼွင်ႉၸိူဝ်ႉၶိူဝ်းဢၼ်ယင်းၵိုတ်းယင်းၵျၢၼ်ႇၵႃႈမီးၼၼ်ႉ ယေႈမဵဝ်း ယေႈတီႈ၊ မႄႈယိင်းၶဝ် ယေႈမဵဝ်း ယေႈတီႈ တၵ်းဢွၼ်ၵၼ်ႁႆႈႁွင်ႉ ပွင်ႉၶၢင်း ႁင်းၽႂ်ႁင်းမၼ်းဢေႃႈ။

← Chapter 11 Jump to: Chapter 13 →