Zechariah 8

Shan

← Chapter 7 Jump to: Chapter 9 →

1လႆႈသမ်ႉ ၼုၵ်ႈၵပၢတ်ႈၸဝ်ႈ ပူဝ်ႇပႃႇၵၢင်ႁၢဝ် ထႃႇဝရႃႉၽြႃး ႁွတ်ႈမႃးတီႈၵဝ်လႄႈဝႃႈ၊-

2ၸဝ်ႈပူဝ်ႇပႃႇၵၢင်ႁၢဝ် ထႃႇဝရႃႉၽြႃး မီးဢမိင်ႉၸမ်ႉ၊ ၵဝ်မီးၸႂ်ဢၼ်ႁၵ်ႉပႅင်းၶႅၼ်ဝႆႉ ႁႅင်းယႂ်ႇၼႃႇလူင်လၢင်လႄႈ ႁၵ်ႉပႅင်းၶႅၼ်ဝႆႉပုၼ်ႈလွႆ ၸီႉဢုၼ်ႇ ယဝ်ႉ။ ၵဝ်မီးတေႃးသႃႉ တၢင်းၸႂ်မႆႈၶႆႈၸႃႉ ႁႅင်းယႂ်ႇၼႃႇလူင်လၢင် သေလႄႈ ႁၵ်ႉပႅင်းၶႅၼ်ဝႆႉပုၼ်ႈမၼ်းယဝ်ႉ။-

3ၸဝ်ႈပူဝ်ႇပႃႇၵၢင်ႁၢဝ် ထႃႇဝရႃႉၽြႃး မီးဢမိင်ႉၸမ်ႉ၊ ၵဝ်ၶိုၼ်းမႃးၵႃႈတီႈလွႆ ၸီႉဢုၼ်ႇ ယဝ်ႉ။ ၵဝ်တၵ်းယူႇ ၵႃႈၼႂ်းၵၢင်ဝဵင်း ယေႇရူႉသလႅမ်ႇ ဢေႃႈ။ ဝဵင်း ယေႇရူႉသလႅမ်ႇ တၵ်းလႆႈၶၢမ်ႇ တၢင်းဢၼ်ႁွင်ႉႁဵၵ်ႈၸိုဝ်ႈ ဝဵင်းသမ်ႇမႃႇလႄႈ၊ လွႆၸဝ်ႈပူဝ်ႇပႃႇၵၢင်ႁၢဝ် ထႃႇဝရႃႉၽြႃးၼၼ်ႉ ၸိုဝ်ႈ လွႆဢၼ်မူတ်းၸၢင်ႇဢေႃႈ။-

4ၸဝ်ႈပူဝ်ႇပႃႇၵၢင်ႁၢဝ် ထႃႇဝရႃႉၽြႃး မီးဢမိင်ႉၸမ်ႉ ၵူၼ်းထဝ်ႈယိင်း၊ၵူၼ်းထဝ်ႈၸၢႆး၊ ၶဝ်ၸိူဝ်းဢၼ်ဢသၢၵ်ႈယႂ်ႇၼႃႇလႄႈ ယိပ်းၵမ်ၶွၼ်ႉတဝ်ႉ ႁင်းၽႂ်ႁင်းမၼ်းၼၼ်ႉ တၵ်းလႆႈယူႇလႆႈသဝ်း ၵႃႈၼႂ်းသဵၼ်ႈတၢင်းဝဵင်း ယေႇရူႉသလႅမ်ႇ ၸိူဝ်းၼၼ်ႉ ထႅင်ႈလူးၵွၼ်ႇဢေႃႈ။-

5သဵၼ်ႈတၢင်းဝဵင်းၸိူဝ်းၼၼ်ႉၵေႃႈ တၵ်းမီးတဵမ်ဝႆႉတင်း လုၵ်ႈဢွၼ်ႇၸၢႆး၊လုၵ်ႈဢွၼ်ႇယိင်း ဢၼ်လဵၼ်ႈၵၼ်လေႃႈၵၼ်ယူႇ ၵႃႈၼႂ်းသဵၼ်ႈတၢင်းၸိူဝ်းၼၼ်ႉဢေႃႈ။-

6လႆႈသမ်ႉ ၸဝ်ႈပူဝ်ႇပႃႇၵၢင်ႁၢဝ် ထႃႇဝရႃႉၽြႃး မီးဢမိင်ႉၸမ်ႉ၊ ပိၵ်ႉသမ်ႉ လွင်ႈတၢင်းၼၼ်ႉ ပဵၼ်တီႈဢၼ်လီဢၢမ်း သိုဝ်ႈၼႃႈတႂ်ႈတႃ ၶဝ်ၸိူဝ်းဢၼ်ယင်းၵိုတ်းယင်းၵျၢၼ်ႇယူႇ ၵႃႈၼႂ်းၵူၼ်းမဵဝ်းၼႆႉ ၼႂ်းၶိင်ႇမိူဝ်ႈလဵဝ်ၼႆႉ ၸိူဝ်းၼၼ်ႉသေၵေႃႈ တၵ်းလႆႈပဵၼ် တီႈဢၼ်လီဢၢမ်း သိုဝ်ႈၼႃႈတႂ်ႈတႃ ၶဝ်ၸိူဝ်းဢၼ်ယင်းၵိုတ်းယင်းၵျၢၼ်ႇယူႇ ၵႃႈၼႂ်းၵူၼ်းမဵဝ်းၼႆႉ ၼႂ်းၶိင်ႇမိူဝ်ႈလဵဝ်ၼႆႉ ၸိူဝ်းၼၼ်ႉ သေၵေႃႈ တၵ်းလႆႈပဵၼ် တီႈဢၼ်လီဢၢမ်း သိုဝ်ႈၼႃႈတႂ်ႈတႃၵဝ်ႁိုဝ်။ ဝႃႈၼင်ႇၼႆလႄႈ ၸဝ်ႈပူဝ်ႇပႃႇၵၢင်ႁၢဝ် ထႃႇဝရႃႉၽြႃးမီးဢမိင်ႉဢေႃႈ။-

7ၸဝ်ႈပူဝ်ႇပႃႇၵၢင်ႁၢဝ် ထႃႇဝရႃႉၽြႃး မီးဢမိင်ႉၸမ်ႉ၊ တူၺ်းလူး။ ၵဝ်တၵ်း ၵႄႇသႄႇၶျွတ်ႈဢဝ်ၵူၼ်းၵဝ်တင်းလၢႆ ဢွၵ်ႇသေၵႃႈၼႂ်းမိူင်း ၽၢႆႇၼႃႈဝၼ်းဢွၵ်ႇ ဢိၵ်ႇတင်းၵႃႈၼႂ်းမိူင်းၽၢႆႇၼႃႈဝၼ်းတူၵ်း ၸိူဝ်းၼၼ်ႉမႃးလႄႈ၊-

8ဢဝ်မႃးသေယဝ်ႉ၊ ၶဝ်ၼၼ်ႉ တၵ်းလႆႈယူႇၵႃႈၼႂ်းၵၢင်ဝဵင်း ယေႇရူႉသလႅမ်ႇ လႄႈ ၶဝ်ၼၼ်ႉ တၵ်းပဵၼ်ၵူၼ်းၵဝ်လႄႈ ၵဝ်ၵေႃႈတၵ်းပဵၼ် ၽြႃးပဵၼ်ၸဝ်ႈၶဝ် ၸွမ်းလူၺ်ႈတြႃးသဵတ်ႈၸႃႇ ဢိၵ်ႇတင်း တြႃးတၢင်းဢၼ်သိုဝ်ႈတေႃႇဢေႃႈ။-

9ၸဝ်ႈပူဝ်ႇပႃႇၵၢင်ႁၢဝ် ထႃႇဝရႃႉၽြႃးမီးဢမိင်ႉၸမ်ႉ၊ သူၸိူဝ်းဢၼ်ငိၼ်းၵႂၢမ်းၼႆႉ ဢၼ်ပဵၼ်ၵႂၢမ်းဢၼ် ပရေႃးၽႅတ်ႈတင်းလၢႆ ဢၼ်မီးၼႂ်းၶိင်ႇမိူဝ်ႈဢၼ် ၶျႃးငဝ်ႈႁၢၵ်ႈတိူၵ်ႈႁိူၼ်း ၸဝ်ႈပူဝ်ႇပႃႇၵၢင်ႁၢဝ် ထႃႇဝရႃႉၽြႃး ႁႂ်ႈလႆႈတႄႇႁဵတ်းပိၵ်ႈမၢၼ်ႇၸဝ်ႈၼၼ်ႉ ၼႂ်းၶိင်ႇမိူဝ်ႈလဵဝ်ၼႆႉၶဝ်ဢိူၺ်း၊ ဢွၼ်ၵၼ်ႁႂ်ႈမိုဝ်းသူႁႅင်းယႂ်ႇတႃႉ။-

10မိူဝ်ႈဢွၼ်တၢင်း ၶိင်ႇမိူဝ်ႈၼၼ်ႉၼၼ်ႉ၊ ဢမ်ႇမီးၵႃႈၶၼ် ဢၼ်ၵူၼ်းလႆႈၶၢမ်ႇဢဝ်။ ဢမ်ႇမီးၵႃႈၶၼ် ဢၼ်တရိၵ်ႈသၢၼ်ႇလႆႈၶၢမ်ႇဢဝ်။ ၶဝ်ၸိူဝ်းဢၼ်ၶဝ်ႈၶဝ်ႈ ဢွၵ်ႇဢွၵ်ႇၼၼ်ႉ၊ ၵွပ်ႈပိူဝ်ႈဢၼ်မီးရၢၼ်ႇသူႇလႄႈ ဢမ်ႇလႆႈၵတ်းယဵၼ်ၶျၢမ်းသႃႇ။ ၵဝ်ၼႆႉႁႂ်ႈၵူၼ်းတင်းသဵင်ႈတင်းလူင် ၵေႃႉၼိုင်ႈလႄႈၵေႃႉၼိုင်ႈ ပဵၼ်ရၢၼ်ႇ၊တၢင်းၽိတ်းၵၼ်ဢေႃႈ။-

11တေႃႈလဵဝ်ၼႆႉၸမ်ႉ ၵဝ်တၵ်းဢမ်ႇႁဵတ်းၸိူဝ်ႉၼင်ႇ မိူဝ်ႈၵမ်းဢွၼ်တၢင်းၼၼ်ႉ တီႈၵူၼ်းမဵဝ်းၼႆႉ ဢၼ်ယင်းၵိုတ်းယင်းၵျၢၼ်ႇဝႆႉၸိူဝ်းၼႆႉ၊ ဝႃႈၼင်ႇၼႆလႄႈ ၸဝ်ႈပူဝ်ႇပႃႇၵၢင်ႁၢဝ် ထႃႇဝရႃႉၽြႃး မီးဢမိင်ႉဢေႃႈ။-

12တၵ်းလႆႈဝၢၼ်ႇၸိူဝ်ႉဝၢၼ်ႇၽၼ်း ၼိမ်ၼိမ်လီလီလႄႈ တူၼ်ႈၶိူဝ်းမၢၵ်ႇၸပိတ်ႈ တၵ်းလႆႈပၼ်တိၼ်ႇမၼ်း၊မၢၵ်ႇမၼ်းဢေႃႈ။ လိၼ်တၵ်းလႆႈပၼ်လွင်ႈတၢင်းဢၼ် ပဵၼ်တိုၼ်းပဵၼ်ႁွၼ်းမၼ်းလႄႈ ၽႃႉၵၢင်ႁၢဝ် တၵ်းလႆႈပၼ် ၼမ်ႉၼၢႆးမၼ်းဢေႃႈ။ ၵဝ်တၵ်းႁဵတ်းႁႂ်ႈ ၵူၼ်းမဵဝ်းၼႆႉ ဢၼ်ယင်းၵိုတ်းယင်းၵျၢၼ်ႇဝႆႉ ၸိူဝ်းၼႆႉ လႆႈၶၢမ်ႇဢမူၺ်ႇလွင်ႈတၢင်းၸိူဝ်းၼႆႉဢေႃႈ။-

13မဵဝ်း ယူႉတႃႉ ဢိၵ်ႇတင်း မဵဝ်း ဢီႉသရေႇလႃႉ ၶဝ်ဢိူၺ်း၊ မိူၼ်ၸိူဝ်ႉၼင်ႇဢၼ် သူလႆႈပဵၼ် တီႈဢၼ်ၵိၼ်ႇလႃႇ ၵႃႈၼႂ်းၵူၼ်းတၢင်ႇၸိူဝ်ႉတၢင်ႇမဵဝ်းတင်းလၢႆ ၼၼ်ႉ၊ ၵဝ်တၵ်းၵႄႇသႄႇၶျွတ်ႈဢဝ်သူလႄႈ သူတၵ်းလႆႈၶၢမ်ႇဢဝ် တၢင်းလီဢေႃႈ။ ယင်းဢမ်ႇမႆႈၸႂ်လႄႈ ဢွၼ်ၵၼ်မီးတၢင်းဢၼ် ႁႅင်းမိုဝ်းယႂ်ႇတႃႉ။-

14ၸဝ်ႈပူဝ်ႇပႃႇၵၢင်ႁၢဝ် ထႃႇဝရႃႉၽြႃး မီးဢမိင်ႉၸမ်ႉ၊ မိူၼ်ၸိူဝ်ႉၼင်ႇဢၼ် ၵဝ်ယင်းဢမ်ႇၶုၵ်းၸႂ်လႆႈမႆႈၸႂ်လႄႈ ၵျၢမ်ႇပွင်တၵ်းပၼ်တၢမ်ႇတီႈသူ ၼႂ်းမိူဝ်ႈဢၼ်ပူႇသူမွၼ်ႇသူ တိုၵ်းယူင်းတၢင်းၸႂ်မႆႈၶႆႈၸႃႉၵဝ်ၼၼ်ႉ၊-

15လႆႈသမ်ႉ ၼႂ်းၶိင်ႇမိူဝ်ႈလဵဝ်ၼႆႉ ၵဝ်သမ်ႉၶိုၼ်းၵျၢမ်ႇပွင် တၵ်းႁဵတ်းၵျေးၸူးတီႈ ဝဵင်း ယေႇရူႉသလႅမ်ႇ ဢိၵ်ႇတင်း မဵဝ်း ယူႉတႃႉ ဢေႃႈ။ ယႃႇပေမႆႈၸႂ်၊ ဝႃႈၼင်ႇၼႆလႄႈ ၸဝ်ႈပူဝ်ႇပႃႇၵၢင်ႁၢဝ် ထႃႇဝရႃႉၽြႃး မီးဢမိင်ႉဢေႃႈ။-

16တၢင်းၵမ်တၢင်းၵျၢင်ႉ ဢၼ်သူတၵ်းလႆႈ ၵမ်ၵျၢင်ႉၸမ်ႉ၊ သူၵႃႈမီးၵေႃႉၼိုင်ႈလႄႈ ၵေႃႉၼိုင်ႈ လၢတ်ႈၵႂၢမ်းဢၼ်ၸိုဝ်ႈ၊ဢၼ်ၸႂ်ႈတေႃႇၵၼ်တႃႉ၊ ဢွၼ်ၵၼ်ႁဵတ်းတၢင်းဢၼ်ၸီႇယၢင်ႇ သိုဝ်ႈသိုဝ်ႈတေႃႇတေႃႇ ဢိၵ်ႇတင်း တၢင်းဢၼ်ႁႂ်ႈဢမူႉ၊ ဢၼ်ထူပ်းတြႃးၵၼ်ထၢတ်ႇယဵၼ်ၼၼ်ႉ ဢွၼ်ၵၼ် တႅပ်းတတ်း ၵႃႈၼႂ်းႁူးၽၵ်းတူဝဵင်းသူ တင်းလၢႆတႃႉ။-

17ၵေႃႉၼိုင်ႈလႄႈၵေႃႉၼိုင်ႈ ယႃႇပေၵျၢမ်ႇပွင်တၢင်းၵျၢမ်ႇတၢင်းပွင် ဢၼ်ဢမ်ႇလီတီႈၵၼ်။ ယႃႇပေဢွၼ်ၵၼ်ထုၵ်ႇၸႂ်ၵျိူၵ်ႈၸႂ် တၢင်းဢၼ်တိူင်ႇဝႃႈၵိၼ်ႇဝႃႈ ဢၼ်ဢမ်ႇၸိုဝ်ႈဢမ်ႇၸႂ်ႈၼၼ်ႉ။ ၵဝ်ၸင်းလွင်ႈတၢင်းဢၼ် ၸိူဝ်ႉၼင်ႇၼၼ်ၵႃႈမီးၼၼ်ႉဢေႃႈ၊ ဝႃႈၼင်ႇၼႆလႄႈ ထႃႇဝရႃႉၽြႃးမီးဢမိင်ႉဢေႃႈ။

18လႆႈသမ်ႉ ၼုၵ်ႈၵပၢတ်ႈ ၸဝ်ႈပူဝ်ႇပႃႇၵၢင်ႁၢဝ် ထႃႇဝရႃႉၽြႃး ႁွတ်ႈမႃးတီႈၵဝ်လႄႈဝႃႈ၊-

19ၸဝ်ႈပူဝ်ႇပႃႇၵၢင်ႁၢဝ် ထႃႇဝရႃႉၽြႃး မီးဢမိင်ႉၸမ်ႉ၊ တၢင်းဢၼ်ၵမ်တၢင်းၵိၼ် ၼႂ်းလိူၼ်ၸတုၵ်ႉထႃႉ၊ တၢင်းဢၼ်ၵမ်တၢင်းၵိၼ် ၼႂ်းလိူၼ်ပိၼ်ႇၸမႃႉ၊ တၢင်းဢၼ်ၵမ်တၢင်းၵိၼ် ၼႂ်းလိူၼ်သတ်ႉတမႃႉ၊ တၢင်းဢၼ်ၵမ်တၢင်းၵိၼ် ၼႂ်းလိူၼ်တႃႉသမႃႉ ၸိူဝ်းၼၼ်ႉ တၵ်းပဵၼ်ၶိင်ႇမိူဝ်ႈဢၼ် မဵဝ်း ယူႉတႃႉ ၸူမ်းသိူဝ်း၊သႂၢင်ႇၸႂ်လႄႈ ႁဵတ်းပွႆးဢၼ်မူၼ်ႈပျေႃႇဢေႃႈ။ ပိူဝ်ႈၼႆလႄႈ ဢွၼ်ၵၼ် ထုၵ်ႇၸႂ်ၵျိူၵ်ႈၸႂ် တြႃးတၢင်းဢၼ်သိုဝ်ႈတေႃႇ၊ တြႃးတၢင်းဢၼ်တဵတ်ႇလီၼိမ်လီတႃႉ။-

20ၸဝ်ႈပူဝ်ႇပႃႇၵၢင်ႁၢဝ် ထႃႇဝရႃႉၽြႃး မီးဢမိင်ႉၸမ်ႉ၊ မဵဝ်းၵူၼ်းတင်းလၢႆ ဢိၵ်ႇတင်းၵူၼ်းဝဵင်းၵႃႈၼႂ်းဝဵင်းၼမ်ၼႃႇ တၵ်းဢွၼ်ၵၼ်မႃးဢေႃႈ။-

21ၵူၼ်းဢၼ် ယူႇၵႃႈၼႂ်းဝဵင်း ဝဵင်းၼိုင်ႈ တၵ်းၵႂႃႇၸူးၵႃႈတီႈ ၶဝ်ၸိူဝ်းဢၼ်ယူႇၵႃႈၼႂ်း ဝဵင်းတၢင်ႇတီႈတၢင်ႇဝဵင်းလႄႈ ႁွင်ႉၸူဝ်းဢဝ်လႄႈဝႃႈ၊ ဢွၼ်ၵၼ်ၼႅတ်ႈၵႂႃႇႁႂ်ႈလႆႈႁႃဢဝ် ၸဝ်ႈပူဝ်ႇပႃႇၵၢင်ႁၢဝ် ထႃႇဝရႃႉၽြႃးတႃႉႁဝ်း၊ ၵဝ်ၵေႃႈတၵ်းၵႂႃႇဢေႃႈ၊ ဝႃႈၼင်ႇၼႆဢေႃႈ။-

22မဵဝ်းၵူၼ်းၼမ်ၼႃႇ ဢိၵ်ႇတင်း ၵူၼ်းတၢင်ႇၸိူဝ်ႉတၢင်ႇၶိူဝ်း ဢၼ်ႁႅင်းယႂ်ႇၼႃႇ ၸိူဝ်းၼၼ်ႉ တၵ်းဢွၼ်ၵၼ်မႃး ႁႂ်ႈလႆႈႁႃဢဝ် ၸဝ်ႈပူဝ်ႇပႃႇၵၢင်ႁၢဝ် ထႃႇဝရႃႉၽြႃး ၵႃႈၼႂ်းဝဵင်း ယေႇရူႉသလႅမ်ႇ လႄႈ သူးတွင်း ယွၼ်းၶၢမ်ႇဢဝ်ၵျေးၸူး တီႈထႃႇဝရႃႉၽြႃးဢေႃႈ။-

23ၸဝ်ႈပူဝ်ႇပႃႇၵၢင်ႁၢဝ် ထႃႇဝရႃႉၽြႃး မီးဢမိင်ႉၸမ်ႉ၊ ၼႂ်းမိုဝ်ႉဝၼ်းၼၼ်ႉ ၵူၼ်းသိပ်းၵေႃႉ ၵႃႈၼႂ်းၵူၼ်းၵူႈၸိူဝ်ႉၵူႈမဵဝ်း ဢၼ်ၸၢင်ႈလၢတ်ႈၵႂၢမ်းၽႃႇသႃႇ ႁင်းၽႂ်ႁင်းမၼ်းၸိူဝ်းၼၼ်ႉ တၵ်းဢွၼ်ၵၼ်ယိပ်းၵမ်ၸဵင်ႇၶူဝ်းၼုင်ႈ ၵေႃႉဢၼ် ပဵၼ်ၵူၼ်း ယူႉတႃႉ ၼၼ်ႉ ယူႇသေလႄႈဝႃႈ၊ ၵွပ်ႈပိူဝ်ႈဢၼ် ႁဝ်းၶႃႈလႆႈႁူႉလႆႈငိၼ်း လွင်ႈဢၼ်ၽြႃးပဵၼ်ၸဝ်ႈ မီးယူႇလူၺ်ႈၵၼ်တင်းသူၸဝ်ႈလႄႈ ႁဝ်းၶႃႈတၵ်းၸွမ်းလူၺ်ႈၵၼ်တင်းသူၸဝ်ႈ ၶႃႈဢေႃႈ၊ ဝႃႈၼင်ႇၼႆယဝ်ႉ၊ ဝႃႈၼင်ႇၼႆဢေႃႈ။

← Chapter 7 Jump to: Chapter 9 →