1 Chronicles 29

Sidamo

← Chapter 28 Jump to:

1Moote Daawiti songe noo manni baalaho, «Kune Kaaliiqi doorinohu beetti'ya Selemooni shiimaho; togoo loosono loose diegennino. Kuni minnanni mini kayinni mannaho minnanniha mootete mine ikkikkinni Maganonke Kaaliiqa magansi'nanniho. Kunnira loonsanni loosi lowo geeshsha wolqaataamoho.

2Anino danduummo geeshsha Qullaawa Mine minate culka, birra, camo, siwiila, haqqe, dilqa kinna, ilka, seesu kinnanna lowota cululluqa kinna gamba assoommo.

3Kuri qixxeessoommori gobbaanni, Maganu Minira laalaatoommo daafira umi'ya jajji giddonni lowo birranna culka oommo.

4Kunni garinni 100,000 kiilo ikkannoha fila culkanna 240,000 kiilo ikkannoha fila birra Qullaawu Mini xarra biifisatenna

5angate ogimma afidhinori seekkitanno uduunnira ikkanno gede oommo. Techo ki'ne giddonni wodanisinni baxe Kaaliiqira aannohu wolu ayeti?» yii.

6Hakkunni gedensaanni boosaallu boosaallu roorrooti, ga're ga'rete albisooti, kumunna xibbu hajajaanonna gobbate gashshaano,

7170,000 kiilo saino culka, 620,000 ikkitanno camo, 340,000 kiilo ikkanno birranna 3,400,000 kiilo rooranno siwiila aate qixxaabbu.

8Dilqa kinna afidhinori, Leewaawichu Gershooni boosaallo ikkinohu Yihieeli towatannohura Qullaawu Minira miinja ikkanno gede afansha assite uyitu.

9Mannu Kaaliiqira afansha baxe wo'mu wodaninni uyi. Lowo jajji gamba yiino daafira hagiidhitu; moote Daawitino lowo geeshsha hagiidhi.

10Daawiti hattenne songo baalate albaanni Kaaliiqa, «Albi awurinke Yaiqoobi Magano Kaaliiqa, hegerenni hegere geeshsha galatu atera iillohe!

11Ati jawahonna wolqaataamoho; ati ayirrinyu, xummenna gaamaarre wo'mitinoheho; gordohonna baattote aana noori baalu ateho; ati wo'munkura aliidihonna wo'munku aana roorre afi'rootto mooteeti.

12Jironna ayirrinye afi'nannihu atewiinniiti; wo'manka gashshoottohu ateeti; wolqanna jawaante angakki no. Ati manna jawaatanna wolqaataamo assa dandaatto.

13Maganonke, ninke xa ate galanteemmohe; ayirrado su'makkino guwinseemmo.

14«Baalankare oottonkehu ateeti; aninna manni'ya kageeshsha hige maminni abbinoommo? Atenkalla qolle uyinoommohe.

15Kaaliiqa'ya, akaakkanke baalante gede ninkeno tenne gobbara wosinchimma hee'neemmoreeti. Dirinke caalu gede mulenni sa"annoho; ninkeno reyinummokkinni diganteemmoreeti.

16Kaaliiqa Maganonke, konne baala jajja gamba assinoommohu qullaawu su'mikkira Qullaawa Mine minateeti. Ikkollana baalunku ateho; ninkerano atilla oottonke.

17Ati mannu baalunku wodana fonqolte la'e, ammanamino manninni hagiidhattota afoommo. Konne baala atera baxe oommohehu, halaalunniitinna taalotenniiti. Qoleno konne gamba yee noohu mannikki atera afansha aatenni lowo geeshsha hagiidhinota afoommo.

18Akaakkanke Abirihaami, Yisihaaqinna Yaiqoobi Magano Kaaliiqa, mannakki wo'manka woyite kunni garinni hagiidhanni aannoha assi; wo'manka woyite atera ammanaminoha assi.

19Beetti'ya Selemoonino hajajatto hajajo, wodhonna woga baala wo'mu wodaninni wonshanno gedenna kuri qixxeessoommori baalunkunni Qullaawa Mine minate ka"anno gede assi» yii.

20Hakkunni gedensaanni Daawiti manna, «Magano'ne Kaaliiqa galatte!» yii. Gamba yee noo manni baalu akaakkansa Magano Kaaliiqa galati. Baattote aana gombisame Kaaliiqira kumbuuli; mooteteno ayirrinye uyi.

21Layinki soodo lowo saada gorrite Kaaliiqira kakkalo shiqishshu. Hakkunni gedensaanni mannu itanno gede uyitu. Qolteno 1,000 bootta, 1,000 ge'reewu goccanna 1,000 ge'reewu wilii'le gorrite gudinse shilqinshanni kakkalo assite shiqishshu; woyinete xajjeno fushshaate assite shiqishshu.

22Kunni garinni hakko barra Kaaliiqi albaanni ittanninna agganni lowo geeshsha hagiidhitanni hossu. Selemooni moote ikkinotano lallabbe egensiissu. Kaaliiqi su'minni ejersu zayite umoho dunte moohissusi. Saadooqino buurte qeesicha assidhu.

23Kunni garinni Selemooni annisi darga amade moohi. Isino baalunku coyi qiniinosi moote ikki; Israeelete manni baalunku hajajamisi.

24Roorrootunna olanto baala wolootu Daawiti ooso nafa gattukkinni moote Selemoonira ammanante heedhannota egensiissu.

25Kaaliiqi gobbate manni baalu aana Selemooni ayirrado assisi; isira albaanni mookkinoti Israeelete mootoolla afidhinokkiha mootimmate ayirrinye uyisi.

26Isseyi beetti Daawiti Israeele baalate moohino.

27Kebirooni 7, Yerusaalamete 33, mitteenni 40 diro gashshino.

28Lowo jironna ayirrinye afi're dirono duuwe reyino. Beettisi Selemooni isi darga amade moohino.

29Uminni kayisse jeefote geeshsha nooti moote Daawiti dhagge 3 himanaano: Saamueeli, Naataaninna Gaadi borreessitino maxaaffa giddo no.

30Daawiti gashshino gara, mageeshshi wolqa noosiro, isi, Israeeletenna qooxeessinsara noo mootoolla baalate aana ikkino coye tenne maxaaffa giddo borreessinoonni.

← Chapter 28 Jump to: