1 Kings 3

Sidamo

← Chapter 2 Jump to: Chapter 4 →

1Moote Selemooni Gibitsete moote Feriooni ledo elle amade beettosi adhi. Mootete minenna Qullaawa Mine mine ka"a geeshshanna Yerusaalamete Katama huxxe guda geeshsha, ise abbe Daawiti Katami widoonni worino.

2Hatte yannara Kaaliiqi su'ma ayirrisate yine Qullaawa Mine minnoonnikki daafira, mannu gaarrate aana kakka'lanni no.

3Selemooni Kaaliiqa baxannoho; annisi Daawiti kulinosireno agadhino. Ikkollana kaphu magannara saada gorre gaarrate aana kakkalino; hixaanano giirino.

4Wo'munkunni rooru kakkalote gaari Gebaooni yinanniwa noo daafira, Selemooni mitto barra kakkalara hakkiichira ha'ri. Hakkunnira albaannino hakkiicho 1,000 saada shilqote kakkalora gorrino.

5Hakko hashsha Kaaliiqi Selemoonira haaqeete, «Ma aammohera hasi'ratto?» yee xa'misi.

6Selemoonino, «Soqqamaanchikki anni'ya Daawiti ammanaminoha, halaalaanchonna taalo ikkino daafira, bagamannokkiha baxillekki leellishoottosi. Konne baxillekki techono leellishshe, isi darga amade gashshanno beetto oottosi.

7Kaaliiqa Magano'ya, ani lowo geeshsha shiimaho; gashshinanni garano diegennoommo. Ati kayinni anni'ya darga amade gashsheemmo gede assoottoe.

8Kune ani, ati doodhootto manni kiirre anfannikkihu giddo noommo.

9Kunnira, bushanna dancha bade afe, mannakki halaalunninna taalotenni gashsheemmo gede egenno uyie. Hakkunni ka'a konne bati'ra mannakki hiitto asse gashsheemmo?» yii.

10Selemooni konne coye huucci'rino daafira Kaaliiqira tashshi yiisi.

11Kaaliiqino, «Umikkira seeda diro woy jiro dihuucci'rootto; woy diinikki goofanno gede dihalchootto. Halaalunni gashshate egenno huucci'rootto daafira,

12kune huucci'roottore eemmohe. Kunni albaanni ayerano nookkita, kunni ka'ano afi'nannikki egennonna wodancha eemmohe.

13Hakkunni aanano xa'mi'roottokkire lede eemmohe. Ate yannara ayee mooteno afi'rinokki jironna ayirrinye afi'ratto.

14Annikki Daawiti gede doogo'ya ha'rittoronna hajajamittoero, seera'yanna hajajo'ya wonshittoro seeda diro hee'ratto gede asseemmohe» yiisi.

15Selemooni goxanotenni baqqi yii yannara, Kaaliiqi haaqeete daye hasaawisinosita wodanchi. Hakkunni gedensaanni galagale Yerusaalame hige, Kaaliiqi Taabooti albaanni uurre shilqonnitanna mittimmate kakkalo Kaaliiqira shiqishi. Ledosi gashshaano baalanterano jila jili.

16Mitto barra 2 fooru meenti giwame Selemooniwa dayi.

17Lamente giddonni mitticho, «Mooticha'ya, aninna tini mancho mitteenni mitto mine hee'nanna ani mitto qaaqqo iloomma.

18Ani ilummahunni sayikki barra iseno mitto qaaqqo iltino. Hakko mine isenna ane agurranna wolu mittu mannino dino.

19Mitto hashsha ise qaaqqisera aanaho goxxeenna fugame reyino.

20Hashsha ani goxe hee'reenna giddo wodhoommaha ane qaaqqo adhite, iseha reyinoha abbite giddo wortinoe.

21Soodo gute kae qansi'rammara layi'reemma woyite, ree nooha afoomma. Buuxe laeemma woyite reeshshuno ane qaaqqiha di"ikkino» yitu.

22Ti'i mancho qolte, «Dee'ni! Lubbotenni noohu ane qaaqqooti; reyinohu ateho!» yitu. Balaxxe coyidhuti qolte, «Dee'ni! Reyinohu ateho; lubbotenni noohu aneho» yitu. Meentu kunni garinni mootete albaanni coyi'rami.

23Hakkunni gedensaanni moote Selemooni, «Mitte, ‹Lubbotenni noohu aneho; reyinohu ateho› yitanni no. Ti'ino, ‹Lubbotenni noohu aneho; reyinohu ateho› yitanni no» yii.

24Hakkunni gedensaanni moote, «Bise haadhine abbe"e» yii. Biseno abbineenna,

25«Lubbotenni noo qaaqqo lamewa dartine darate darate beekkensa» yii.

26Qaaqqu ama kayinni qaaqqose marartino daafira, «Moote'ya, eeggatena qaaqqo shitootina isera uyite agurise!» yitu. Ti'i kayinni, «Aterano anerano ikkoonkena, lamewa beenko!» yitu.

27Hakkunni gedensaanni moote Selemooni, «Qaaqqo shitinoontena, hatti balaxxe coyidhuti amatena qaaqqo isera uuyyese!» yee hajaji.

28Israeelete manni Selemooni yiino yoo macciishshihu gedensaanni, taalo coyi'ranno gede Maganu uyinosi egenno giddosi noota afe lowo geeshsha ayirrisisi.

← Chapter 2 Jump to: Chapter 4 →