1 Samuel 1

Sidamo

Jump to: Chapter 2 →

1Gaaraame Efireemi gobbara Raama Katamira Efireemi ga're giddo Hiliqaana yinannihu mittu manchi no. Hiliqaana Yirohaamiho, Yirohaami Eliyuho, Eliyu Tohuho, Tohu Tsuufiho.

2Hiliqaanara Haannanna Finaana yinanniri lamu meenti noosi. Finaanara ooso noosena Haanna kayinni ila diafidhino.

3Kuni manchi Wo'manka Dandaanno Kaaliiqa magansi'raranna isira kakkalo shiqishi'rara diru dirunkunni hee'ranno kataminni kae Seelo katama ha'ranno. Hakkiicho lamunku Eeli ooso Afiininna Finihaasi Kaaliiqira qeesimmatenni soqqantanno.

4Hiliqaana Seelora ha're kakkalo shiqishanno yanna iillitanno woyite, galtesi Finaanara, seennunna labballi oososi baalate iillannonsaha maalu beehacho aannonsa.

5Haanna kayinni roorse baxannosehuranna Kaaliiqi ila uyinosekki daafira, lame anga asse aannose.

6Kaaliiqi ila uyinosekki daafira ginase qussitanni caacceessituse.

7Kaaliiqi minira hadhanno yanna baalantera, ginase kunni coyinni diru dirunku marro marro higge caacceessitannase wi'litanni ita hooggu.

8Ayiddaannise Hiliqaanano, «Haanna, mayira wi'latta? Mayira ita giwatta? Wodanikki mayira dadillanno? Tonne oosonni ani dirooreemmohe?» yiise.

9Mitto barra Seelo ittuhunna agguhu gedensaanni Haanna ka'e uurritu. Qeesichu Eeli Kaaliiqi Mini Qullaawaho waalchu mule ofolle hee'reenna,

10Haanna hururante wi'litanni Kaaliiqa huuccidhu.

11Iseno, «Wo'manka Dandaatto Kaaliiqa, ane borojjichokki qarra la'e hawittoekkinni qaagge labbaa beetto uyittoero, hee'ranno diro baala iso qole atera eemma; umisi dananchono horonta dimeendanni» yite xa'nitu.

12Haanna uurrissukkinni Kaaliiqa huuccidhanni keeshshiteenna Eeli afoose la"anno woyite,

13qoonqose leeltukkinni suume calla milli assitanni wodanunni huuccidhanni noo daafira Eelira dimbitinoha lawinosi.

14Kunnira, «Tini dimbakki aanikkinni mamoote ho'litanno? Dimbakki agurte garaho higi» yiise.

15Haannano, «Mooticha'ya, diiwedimboomma; ani dadillaame manchootiwe! Wodani'yata Kaaliiqira ku'lanni noommata ikkinnina dimbisannore diagoomma.

16Kageeshshi yanna qarri'yanninna yaaddo'yanni kainohunni huucci'ranni noommana, shota mancho gede assite kiirtootie» yitusi.

17Eelino, «Israeelete Magani huucci'roottare oohena, keerunni ha'ri» yiise.

18Iseno, «Mooticha'ya, wo'manka woyite ane danchatennilla qaagie» yitusi. Hakkiinni ka'e hadhe sagaleno ittu. Hakkunni gedensaanni albisera dadillu dileellino.

19Layinki soodo Hiliqaananna minisi manni gute kae, Kaaliiqa magansi'rihu gedensaanni Raama mininsara ha'ri. Hiliqaana Haanna ledo gali; Kaaliiqino huuccattose macciishsheenna,

20godobbe labbaa qaaqqo iltu. Iseno, «Kaaliiqa huucci're afi'roommaho» yitanni su'ma Saamueeli yite fushshitusi.

21Layinki diro Hiliqaananna minisi manni Kaaliiqira diru kakkalo kakkalaranna xano uyi'rara Seelora ha'ri yannara,

22Haanna kayinni mine gattino. Iseno ayiddaannisera, «Qaaqqu unuuna agurihu gedensaanni haa're Kaaliiqi Minira masseemma. Lubbotenni noo geeshshano hakkiicho hee'ranno» yitusi.

23Ayiddaannise Hiliqaanano, «Ati seyanno yiittare assi; qaaqqu unuuna agura geeshsha agari. Kaaliiqi yoottarella wonshohe» yiise. Haannano qaaqqo unuuna hoolta geeshsha mine keeshshitu.

24Saamueeli unuuna aguri yannara, qaaqqo ikkiro nafa Seelora Kaaliiqi Minira haadhe hadhinosi. Iso haadhe hadhu woyite, sasu diri middicha, tonne kiilo bulleenna mitte maaqqe wo'mitannota woyinete xajje haadhe massitino.

25Insano middicha gorrituhu gedensaanni qaaqqo Eeliwa shiqishshu.

26Haannano Eelira, «Mooticha'ya, konniicho albakkiinni uurre Kaaliiqa huucci'rummata qaagatto? Hatti mancho aneetiwe.

27Konne qaaqqo aaerawe huucci'roomma. Kaaliiqino huucci'roommaha uyinoe.

28Anino iso qole Kaaliiqira eemma. Lubbotenni noo geeshsha Kaaliiqiha ikkanno» yitu. Insano hakkiicho Kaaliiqa magansidhu.

Jump to: Chapter 2 →