1 Samuel 10

Sidamo

← Chapter 9 Jump to: Chapter 11 →

1Hakkunni gedensaanni Saamueeli buudaho noo zayite haa're, Saaooli umira duni. Saaoolino sunqe, «Mannasi gashshatto gede Kaaliiqi buuranni noohe.

2Techo anewiinni baxxite ha'ratto woyite, Biiniyaami dannira Tselitsahi yinanniwa Raaheeli moogiwa lamu manninni xaadatto. Insano, ‹Hasatto harre leeltino; annikkino harrennire agure: Beetti'ya daafira hanni ma"asso?› yaanni yaadanni no yitannohe» yiisi.

3«Atino hakkiinni sa'e lowo haqqicho Taaboorite geeshsha ha'ratto. Hakkono, sasu manni: Mittu meu wilii'le, mittu 3 tima, mittu qole gogu ogorira wonshinoonnita woyinete xajje haadhe Maganoho kakkalo shiqishshara Beeteli hadhanna xaadatto.

4Insano keere haadhuhe gedensaanni 2 tima uyitannohe; atino uyitinoha adha gibbooti.

5«Hakkunni gedensaanni Filisxeemete olamaano noowa Maganu Ilaaliwa Gibia maratto. Katama iillitanni heedheennanni himanaano maasinqo, dibbe, suusullenna bagana anga adhitinori albaanni hadhanni Maganu Gaari aaninni dirritanna xaadatto. Insano kukkubbitanni himana coyidhanno.

6Hatte yannara Kaaliiqi Ayyaani dirre wolqa wonshanno. Atino kukkubbitanni insa ledo himana coyi'ratto; soorrante wole mancho ikkatto.

7Kuni malaati baalu ikkanno yannara Kaaliiqi ledokki noona, seyanno yaattore baala assi.

8«Ani gudinse shilqinshannitanna mittimmate kakkalo shiqishate Galgala dayemmona ati balaxxe sa'e agarie. Ani daye assattore kulammohe geeshsha 7 barra hakko agari» yiisi.

9Saaooli Saamueeliwiinni baxxe ha'rara kai yannara, Maganu soorre haaro mancho assisi. Saamueeli kuli malaati baalunku hakko barranni wo'mi.

10Saaooli soqqamaanchu ledo Gibia iilli yannara, himanaano dagge isinni xaaddu. Maganu Ayyaanino dirre wolqa wonshisi; isino hagiirrunni kukkubbanni ledonsa himana coyi'ri.

11Alba egentinosiri himanaanote ledo himana coy'ranna affe, «Qiisi beetti maikki? Saaoolino himanaanote widihoni?» yite mimmito xa'mitu.

12Hakkiicho hee'rannohu mittu manchi, «Tini himanaano ayete?» yee xa'mi. «Saaoolino himanaanote ledohoni?» yine maammaankannihu kunniraati.

13Saaooli hagiirrunni kukkubbanni himana coyi'rihu gedensaanni, kakkalo shiqinshanniwa Maganu gaariwa ha'ri.

14Wosiilisi isinna soqqamaanchunni xaade, «Hiikko ba'ini?» yee xa'minsa. Saaoolino daware, «Harre hansammora ha'noommo; hanse hoongummoti Saamueeliwa marroommo» yii.

15Saaooli wosiilino, «Hanni Saamueeli yii'nere kulle"e» yii.

16Saaooli daware, «Harre leeltinota kulinonke» yii. Saamueeli moohatto yiinosita kayinni wosiilisira dikulino.

17Saamueeli Israeelete manna Mitsiphara Kaaliiqi xaadira woshshe,

18«Israeelete Magani Kaaliiqi, ‹Ki'ne Gibitsetenni fushshoommo'ne. Gibitsootunna wolootu gadadissanno'neri anganni gatisoommo'ne.

19Techo kayinni qarri'nenna shetto'ne baalantenni gatiseemmo'neha ane Magano'ne mishshine: Dee'ni, ninke moote hasi'noommo yitinoonni. Kunnira, ga're ga're'nenninna boosaalli boosaalli'nenni Kaaliiqi albira shiqqe› yiino'ne» yiinsa.

20Saamueeli Israeelete ga're baalanta shiqisheenna, Kaaliiqi Biiniyaami ga're doori.

21Hakkunni gedensaanni Biiniyaami ga're boosaalli boosaallinsanni shiqisheenna, Maaxiiri boosaallo doorri. Hakkiinni aanche Qiisi beetto Saaooli doorri. Iso kayinni hanse hoongi.

22Mannuno, «Hanni xa isi dayinoyya?» yee Kaaliiqa xa'mi. Kaaliiqino daware, «Daa dayinona, uduunnu giddo maaxame no» yii.

23Insano doddanni marte maaxaminowiinni haadhe abbitu. Mannu albaanni uurrinsita wole manna gujjo rooreho.

24Saamueelino manna wo'manka, «Kaaliiqi doorino manchi konneeti. Ninke giddo isi geeshshihu dino» yii. Hatte yannara mannu, «Moote hegerera moohi» yii.

25Saamueelino mootimmate hasiissanno wodhonna woga mannaho kulihu gedensaanni maxaafu aana borreesse Kaaliiqi albaanni Gondooru Taabooti mule wori. Hakkunni gedensaanni Saamueeli manna baalanka qae qaesi ha'ranno gede assi.

26Saaoolino qaera Gibia ha'ri. Maganu kakkayisino wolqaataammino ledosi hadhu.

27Mitu mitu garimalooti kayinni, «Kuni manchi hiitto asse gatisannonke?» yite mishshinosi daafira afanshano diuyitinosi. Saaooli kayinni cuqqi diyiino.

← Chapter 9 Jump to: Chapter 11 →