1 Thessalonians 4

Sidamo

← Chapter 3 Jump to: Chapter 5 →

1Roduuwa'ya, Magano hagiirsiisate hiitto ikkine hee'ra hasiissannoro ninkewiinni rossinoonni; xa heedhinoonnihu hakko garinniiti. Leddine leddine hatte heeshsho heedhinanni gede Mootichu Yesuusi su'minni huucci'neemmo'nenna amaalleemmo'ne.

2Mootichu Yesuusi su'minni hiittoo wodho uyinoommo'nero affinoonni.

3Maganu halcho, ki'ne qullaawoota ikkitinanni gedeetinna horonta foorretewiinni xeertidhinanni gedeeti.

4Mittu mittunku galte'ne ledo hiitto ikkitine qullaawanna ayirrado heeshsho heedhinanniro afa hasiissanno'ne.

5Magano affinokki daga gede foorrete hamaande heedhoonke'ne.

6Kunni coyinni ayino so'roonke; wole ammanaanono miicoonke. Kunni albaanni kullummo'nenna qorophisiinsummo'nente gede, hattoo coye assitannore Mootichu qorichishanno.

7Maganu battaambammora ikkikkinni qullaawoota ikkine hee'nammora woshshinonke.

8Kunnira tenne seejjo giwannohu, manna giwannoha ikkikkinni Qullaawa Ayyaanasi aanno'neha Magano giwinoho.

9Mimmitu lede baxama ki'nenni Maganuwiinni rossinoonni daafira, ayino tenne hajara ki'nera borreessa dihasiissanno.

10Addanko, Meqedooniyaho heedhanno roduuwa baala baxxinanni. Ikkollana xaano hakkiinni roorsitine baxxinanni gede huucci'neemmo'ne.

11Ga'labbitte heeshsho heedhe; alba kullummo'nente gede diinagge'nenna anga'nenni loosi'ra habbinoonte.

12Kunni garinni amma'ninokki manni mereero ayirradda ikkitinanni ikkinnina manni anga dila'inanni.

13Roduuwa'ya, hexxo afi'rinokki manni gede ikkitine dadillitinoonte; reyino mannire baddine affinara hasi'neemmo.

14Yesuusi reyinotanna reyotenni kainota ammannoommo. Kunnira Yesuusa ammante heedhe reyitinore Maganu Isi ledo haa're abbannonsa.

15Mootichuwiinni macciishshinoommo qaali garinni kulleemmo'nehu, Mootichu daanno yanna geeshsha lubbotenni hee'neemmori reyitinore dibalanxeemmo.

16Mootichu hajajote hirbinni, sokkaasinete roorrichi huuronni Maganu woshshatto xurumbunnitenni dukkisame gordunni daanno. Kiristoosa ammante heedhe reyitinori balaxxe ka'anno.

17Hakkunni gedensaanni lubbotenni hee'noommori, Mootichu ledo bubbete aana xaandammora, insa ledo gomichu giddora hawulukammeemmo. Mootichu ledono hegerera hee'neemmo.

18Kunnira, mimmito'ne kunni qaalinni jawaachishshe!

← Chapter 3 Jump to: Chapter 5 →