Amos 2

Sidamo

← Chapter 1 Jump to: Chapter 3 →

1Kaaliiqi, «Moaabi manni marro marro hige loosino cubbi daafira, mararro nookki kaajjillinni qorichishummokkinni diagureemmo. Insa, Edoomi moote miqicho giirte buluulo assitino.

2Kunnira Moaabi baatto aana giira qaseemmo. Qiriyoti Qiishono giireemmo; olantote alaakanninna ufuunfanni xurumbi luulinni kainohunni, Moaabi manni waajje reyanno.

3Moaabi gashshaanchonna gobbasira noo albisaano huneemmo» yii.

4Kaaliiqi, «Yihudu manni marro marro hige loosino cubbi daafira, mararro nookki kaajjillinni qorichishummokkinni diagureemmo. Insa seera'ya huntino; hajajo'yano diagadhitino. Insano, annuwansa magansidhinoti kaphu maganna so'risiissinonsa.

5Kunnira Yihudu baattora giira qaseemmo; Yerusaalamete qiishono giireemmo» yii.

6Kaaliiqi, «Israeelete manni marro marro hige loosino cubbi daafira, mararro nookki kaajjillinni qorichishummokkinni diagureemmo. Insa asale qola dandiinokkiha beebbaataamonna koattete waaga baata dandiinokkiha buxicho mancho borojjimmate hirtino.

7Wolqa afidhinokkirenna kaa'lannohu nookkire bukote aana tugge umonsa kakkaddanno. Gadadaamma xiibbe doogote aaninni fushshitanno. Annunna beettu mitte soqqamaancho ledo foortanno. Kunni loosinsanni qullaawa su'ma'ya batteessitanno.

8Asale baata dandiitannokki buxane aaninni uddano amadote adhitanno. Kakkalo shiqishshanno darga baalawa hattenne uddano diphite goxxanno. Asalaasinete anganni murote adhitinota woyinete xajje abbite Maganinsa mine agganno.

9«Ani kayinni ki'ne daafira yee hojja daguwu gedeere, jawaante ejersu gedee Amooraawoota rumushshunkunni buqqise hunoommo.

10Gibitsete gobbanni fushshe 40 diro wo'ma halallitte gobbara massagoommo'ne. Amooraawootu baattono ki'nera iqqa asse oommo'ne.

11Labballu ooso'ne mereerinni mito himanaano, wedelli'ne giddonnino mito Naaziroota asse gaamoommo'ne. Israeelete manna! Kuni coyi dihalaaleho? Ani Kaaliiqi konne coye coyi'roommo.

12Ki'ne kayinni Naaziroota woyinete xajje hayikkissinoonni. Himanaanono himana coyidhannokki gede hooltinoonni.

13Kunnira, lowo gide hogomboonni faradi gaare gede asse hiiqqaqqeemmo'ne.

14Rakke doddannori nafa xooqqe difultanno. Wolqaataamu mannino wolqa hooganno. Bagadaanono umonsa gatisa didandiitanno.

15Maxxa oltannorino gargadha didandiitanno. Rakke doddannori xooqqe difultanno. Faradaasineno lubbo gatisi'ra didandiitanno.

16Hakko barra, lowo geeshsha jawaata olanto nafa bagadonsa hunte xooqqanno» yii.

← Chapter 1 Jump to: Chapter 3 →