Amos 6

Sidamo

← Chapter 5 Jump to: Chapter 7 →

1Israeelete manni ayirrisanno'nerinna huucci'ranno'neri, Tsiyooni qawaaxxaamminna, Samaariyaho waajjitinikkinni heedhinanniri, egennantinoonni gashshaano, ki'nera aanne'e!

2Hanni Kaaline katama martine la'e; hakkiinnino sa'ine jawa Hamaati katamanna, Filisxeemootu katama Gaati dirre. Insa ki'newiinni woyyitannoni? Gashshootinsa ki'ne gashshootiwiinni roorannoni?

3Ki'ne, «Bushu barri rahe didaanno» yitine heddine barshe loossinanni.

4Daaniichu hinkonni seesiinsoonni daallasira goxxinanni; ge'reewu wilii'lenna, lalu siitta ittinanni; haranchu daallasi aana gangalattinanni.

5Daawiti gede addi addiha muuziiqu uduunne seekkidhine, maasinqotenni addi addiha mullicho sirba, sirbitinanni hagiidhitinanni.

6Woyinete xajje birilletenni ikkikkinni, gawatetenni agginanni. Lowo geeshsha waaga iibbado shitto buudhitinanni; Israeelete aana daggino baora kayinni, horonta didadillitinanni. Konne baala coye assitinanni daafira, ki'nera aanne'e!

7Kunnira, qafadame ha'rate, ki'ne umire ikkitinanni; hatte yannara la'ma'neranna, misingila'nera gawalo ikkanno.

8Wo'manka Dandaannohu Mootichu Kaaliiqi, «Israeelete manni naaxxa giwisinoe; qinaado minna'neno tiyyi'roommo. Kunnira katamanna, katamu giddo heedhannore baala, diinaho sayise eemmo» yee su'misinni xaarino.

9Mittu mini manni giddonni 10 manni gatirono, hakkurino reyitanno.

10Reyinohura muli fiixa ikkinohunna madaarannohu reeshsha mininni fushshe haa're ha'ranno. Hatte yannara mitto mine maaxame noo mancho woshshe, «Ate ledo gatinohu wolu nooni?» yee xa'manno. Manchuno, «Wolu gatinohu dino» yee dawaranno. Xa'mihuno, «Kaaliiqi su'ma gana dihasiissannonkena sammi yii» yaanno.

11Kaaliiqi hajajonni jajjabba minna cancanantanno; shiimmaadda minnano butu butu yitanno.

12Farashsho kinnate aana gulunfannini? Handunni baara hawuurrannini? Ki'ne kayinni yoo qaraarote soorritinoonni; halaaleno kaphoho galchitinoonni.

13Lodebaari Katama qeeltinoonni daafira hagiidhitinoonni; «Qarinayimi Katamano wolqankenni amandoommo» yitine boollaqidhinoonni.

14Olantote Mootichi Kaaliiqi, «Israeelete manna, horrannoha wole gobba manna aana'ne kayisammoraati; insano aliyyeenni Hamaati e'nanni waalchinni kayisse, wodiidoonni Araba Lagichi geeshsha iillite qarrissanno'ne» yii.

← Chapter 5 Jump to: Chapter 7 →