Matthew 16

Sidamo

← Chapter 15 Jump to: Chapter 17 →

1Farisootunna Saduqootu Yesuusiwa dagge jiffe la'asira yite, «Gordunni malaate leellishinke» yitu.

2Isi kayinni, [«Hawarro gordu duu'miha affinanni woyite, ‹Foorararaati› yitinanni.

3Soodanno woyite, ‹Techo gordu gomiche kolishshi'rinona xeena gananno› yitinanni. Gordu dana baddine affinanni; diru malaate kayinni baddine afa didandiitinanni.]

4Bushanna foora ilama malaate la"a hasidhanno; ikkollana Himanaanchu Yoonaasi malaate agurranna wole malaate dileellinshanninsa» yii. Hakkunni gedensaanni insa hakko agure wolewa ha'ri.

5Rosaanosi baara widoonni fultu woyite sinqe adhitukkinni habbe hadhino.

6Yesuusi rosaanosi, «Wodana asse; Farisootunna Saduqootu gamaancho qorophe!» yiinsa.

7Insa kayinni, «Togo yaannonkehu anga sinqe adha hoongoommohuraati» yite mimmitu ledo hasaabbu.

8Yesuusi kayinni hedonsa afe, «Ki'ne amma'na xe'ino'neri, ‹Sinqe anga hoongoommohuraati› yitine mayira hasaabbinanni?

9Xaa geeshsha dibuuxxinoonni? Ontu timi onte kume manna duushshe gateenna hambaa me"e soro kayissiniro diqaagginanni?

10Lamalu timi shoolu kumi mannira ikke gateenna hambaa me"e soro wo'ma kayissinirono diqaagginanni?

11Farisootunna Saduqootu gamaancho qorophe yeemmo'neti timu haja ikkitinokkita mayira buuxa hoogginiyya?» yiinsa.

12Hakkunni gedensaanni rosaanosi, Yesuusi qorophitanno gede kulinonsahu Farisootunna Saduqootu roso ikkinnina waasu gamaancho ikkinokkita huwattu.

13Yesuusi, Filiphoosi Qiisaariyaati yinanniwa dayi yannara rosaanosi, «Mannu Manchi Beetto ayeti yaanno?» yee xa'minsa.

14Insa qolte, «Mitu, ‹Cuuaancho Yohaannisiiti› yaanno; wolu kayinni, ‹Eeliyaasiiti› yaanno; wolu qole, ‹Ermiyaasiiti, woy Himanaanote giddonni mittichoho› yaanno» yite qoltusi.

15Yesuusino, «Ki'ne ane ayeti yitinannieyya?» yee xa'minsa.

16Hatte yannara Simiooni Pheexiroosi qole, «Ati Heeshshote Magani Beetto Kiristoosaati» yii.

17Yesuusino, «Yoona Beetto Simiooni, ba'raa'rootto! Konne coye gordoho hee'rannohu Anni'ya xawisinohe ikkinnina mannu dikulinohe.

18Ani kuleemmohena, Pheexiroosi ati kinchoho; kunni kinchi aana Beetekiristaane'ya mi'neemmo. Ise reyote wolqa nafa diqeeltannose.

19Kuneeti atera gordu gashshooti waalchi fannanniricho eemmohe; uulla usuroottohu gordohono usuraminoha ikkanno. Uulla tiroottohu gordohono tidhaminoha ikkanno» yiisi.

20Hakkunni gedensaanni Yesuusi rosaanosi Isi Kiristoosa ikkinota ayerano kultannokki gede hajajinsa.

21Hatte yannanni kayise Yesuusi rosaanosira, «Yerusaalame ha'ra hasiissannoe; hakkiicho geerru, qeesootu roorrootinna Seeru rosiisaano qarra kalaqqannoe; shitannoe. Sayikki barra kayinni kaeemmo» yiinsa.

22Pheexiroosi Yesuusa bade qacce fushshe, «Mooticha, horontanni di"ikkanno! Kuni coyi atera iilloonkehe!» yee hayi yaate wo'naali.

23Yesuusi kayinni caaqqi yee Pheexiroosi, «Ati Sheexaanu muli'yanni ho'li! Ati mannunnita ikkinnina Maganunnita hedattokki daafira ati anera gufichoho» yiisi.

24Hakkunni gedensaanni Yesuusi rosaanosi, «Ane hoode ha'ra hasi'rannohu umosi kaado; masiqalasino duqqe hoode'ya dayo!

25Lubbosi gatisi'ra hasi'rannohu baalu hu'nanno; ane daafira yee lubbosi hunannohu kayinni gatisi'ranno.

26Mannu gobba baalate jiro afi're lubbosi hu'niro, ma lexxanno? Woy kayinni lubbosi gatisi'rate maricho aanno?

27Manchi Beetti Annisi ayirrinyinni sokkaasinesi ledo daanno woyite, mittu mittunkura loosisi garinni aanno.

28Halaale kuleemmo'nena, Manchi Beetti Gashshootisi ayirrinyinni daanna la'a geeshsha konniicho uurrite noori giddonni reyitannokkiri no» yii.

← Chapter 15 Jump to: Chapter 17 →