Matthew 7

Sidamo

← Chapter 6 Jump to: Chapter 8 →

1Yesuusi, «Ki'nera yoo yinanni'nekki gede, ki'neno woleho yoo yitinoonte.

2Woleho yitinoonni yoo garinni Maganu ki'nerano yoo yaanno'ne. Woleho safartine uyitinanni safaraanchinni safarranni'ne.

3Ate ille giddo noo mokkollicho laittokkinni rodiikki illera noo ishincho mayira la"atto?

4Ate ille giddo noo mokkollicho afittokkinni rodookki, ‹Rodoo'ya, illekki giddo noo ishincho fushshoheni?› hiitto yaatto?

5Ati lawisiisaanchu! Hanni balaxxe umikki ille giddo noo mokkollicho fushshi'ri. Hakkunni gedensaanni rodiikki illera noo ishincho fushshate illekki xunsite la'anno.

6«Wirri yee ki'ne ga'manno'nekki gede, qullaawoota woshshaho tugginoonte. Lekkatenni kakkaddannona, maareekonnire manchaamete albaanni wortinoonte» yii.

7Yesuusi qole, «Huuccidhe, uyinanni'nena; hasidhe, afidhinannina; woshshidhe fannanni'nena.

8Huucci'rannohu baalu adhanno; hasi'rannohu afi'ranno; woshshi'rannohura fannannisi.

9Ki'ne giddonni, beettisi tima huucci'reenna kincho aannohu nooni?

10Qulxu'me huucci'reenna hamashsho aannoni?

11Ki'ne bushuulle ikkitine heedhinenni ooso'nera danchare aa egentinina, gordoho noohu Anni'ne huuccidhannorira roorenka hiitto danchare aa hooganno?

12Mannu ki'nera assa'nera hasidhinannire baala ki'neno insara assensa! Seeru maxaafinna himanaanono konne coye kultanno» yii.

13Yesuusi lede, «Ruukkashsho waalcho higgine e'e! Baote widira massanno waalchi hala'ladoho. Doogono hala'ladote; hakkaanni higge e'annorino batinyeho.

14Heeshshote widira massanno waalchi ruukkashshoho; doogono gurchote; ise afi'ranno manni kiiro shiimaho» yii.

15Yesuusi, «Kaphaano himanaanowiinni umo'ne agadhe! Insa ge'reewu lande uddidhe dogganno'ne; giddoyidonsa kayinni bibbiddanno hiyyeeyyeeti.

16Insa baddine affinannihu guminsanniiti. Utu aaninni woyinete laalo xinqi'nannini? Kokko'lu aaninni balasete laalo xinqi'nannini?

17Dancha haqqicho baala dancha laalo laaltanno. Busha haqqicho kayinni busha laalo laaltanno.

18Dancha haqqicho busha laalo laala didandiitanno; busha haqqichono dancha laalo laala didandiitanno.

19Dancha laalo laaltannokki haqqicho baala murre giirate tunganni.

20Kaphaano himanaanono loosinsa guminni affinanninsa» yii.

21Yesuusi lede, «‹Mooticha'ya! Mooticha'ya!› yaannoehu baalu gordu Gashshoote dieanno. Gordu Gashshoote eannohu Anni'ya yiinore wonshannoho.

22Yoote barra lowo manni, ‹Mooticha'ya! Mooticha'ya! Su'mikkinni himana dicoyi'nummo? Su'mikkinni durriisa difushshinummo? Su'mikkinni lowo maalale diloonsummo?› yaannoe.

23Hatte yannara ani kayinni, ‹Horonta diegennoommo'ne; ki'ne bunshe assitinanniri, anewiinni faffe!› yeemmonsa» yii.

24Yesuusi aanche, «Qaale'ya macciishshe wonshannohu baalu mine kinchu aana mi'ninoha egennaamo mancho lawanno.

25Xeena gani; lolahuno dayi; bubbeno bubbisse hakkonne mine xiibbu. Ikkollana minu kinchu aana minnoonni daafira diuwino.

26Qaale'ya macciishshe wonshannokkihu, mine shaafu aana mi'ninoha hawanya mancho lawanno.

27Xeena gani; lolahuno dayi; bubbeno bubbisse hakkonne mine xiibbu. Minuno hakkawoyintenni uwi; uwasino lowo geeshsha jaddonnite» yii.

28Yesuusi konne coye coyi're gudihu gedensaanni, macciishshitinori rosiisino roso dhaggeeffattu.

29Yesuusi Muse Seeri rosiisaano gede ikkikkinni Gashshootu mootoolla gede ikke rosiisinonsa.

← Chapter 6 Jump to: Chapter 8 →