Acts 21

Seraiki

1جِیں ویلے اساں اُنہاں کنُوں اَنج تھی تے جہاز ءچ روانہ تھئے تاں سِدھے کوس ءچ آئے۔ ڈُوجھے ڈینہہ اساں رُدُس پُجے، ولا اُتھوں کنُوں پترہ ٹُر پئے۔

2اُتھاں ہِک جہاز مِلیا جیہڑا سِدھا فینیکے ویندا پِیا ہا۔ اساں اُوندے ءچ سوار تھی تے روانہ تھئے۔

3جِیں ویلے کُپرُس جزیرہ نظریا تاں اساں اُونکُوں کھبے ہتھ چھوڑ تے سُوریہ کیتے روانہ تھئے تے صور ءچ لتھے کیوں جو اُتھاں ساڈے جہاز کُوں مال لہاونڑا ہا۔

4اُتھاں راہنڑ آلے شاگرداں کُوں گولھ تے اساں اُنہاں نال سَت ڈینہہ تئیں ریہے۔ اُنہاں رُوح دی ہدایت نال پولُس کُوں یروشلیم ونجنڑ تُوں منع کیتا۔

5جِیں ویلے او ڈینہہ لنگھ گئے تاں اساں اُتھوں کنُوں اگُوں ونجنڑ کیتے روانہ تھئے تے ساریاں ذالاں تے بالاں سمیت ساکُوں شہر کنُوں باہر تئیں پُچایا۔ وَل سمندر دے کنارے اساں گوڈے ٹیک تے دُعا منگی۔

6اِیندے بعد ہِک ڈُوجھے کُوں خُدا حافظ آکھ تے اساں جہاز ءچ سوار تھی گئے، تے او آپنڑے آپنڑے گھر وَل گئے۔

7اساں صور کنُوں اگُوں گئے تے پَتُلمِیس ءچ جہاز تُوں لتھے۔ اُتھاں اساں بِھرانواں کُوں سلام کیتا تے اُنہاں دے نال ہِک ڈینہہ تئیں ریہے۔

8ڈُوجھے ڈینہہ اساں روانہ تھئے تے قیصریہ ءچ پُج تے فِلپُس ناں دے ہِک بندے دے گھر ٹِکے جیہڑا نجات دی خوشخبری سُنڑیندا ہا تے یروشلیم ءچ چُنڑے ہوئے سَت مددگاراں ءچوں ہا ۔

9اُوندیاں چار کُنواریاں دِھیاں ہَن جیہڑیاں نبُوّت کریندیاں ہَن۔

10جِیں ویلے ساکُوں اُتھاں راہندے بہُوں ڈینہہ تھی گئے تاں ہِک نبی جِیندا ناں اگبُس ہا یہُودیہ تُوں آیا۔

11اُوں ساڈے کولھ آ تے پولُس دا کمر بند گِھدا تے اُوندے نال آپنڑے ہتھ پیر بَدھ تے آکھنڑ لگا، ”رُوح القُدس فرمیندے جو یروشلیم دے یہُودی اِیں کمر بند دے مالک کُوں اِینویں بَدھ تے غیر قوماں دے حوالے کر ڈیسن۔“

12ایہ سُنڑ تے اساں تے اُتھوں دے اِیمانداراں پولُس دی مِنت کیتی جو او یروشلیم نہ ونجے۔

13پر پولُس جواب ڈِتا، ”تُساں ایہ کیا کریندے ہیوے؟ کیوں رو رو تے میڈا دل تُڑیندے ہیوے؟ مَیں یروشلیم ءچ خُداوند یسُوع دے ناں دی خاطر صرف بدھیجنڑ کیتے ای نئیں بلکہ مرݨ کیتے وی تیار ہاں۔“

14جِیں ویلے او کہیں طرحاں وی قائل نہ تھیّا تاں اساں ایہ آکھ تے چُپ تھی گئے جو ”خُداوند دی مرضی پُوری تھیوے۔“

15اُوندے بعد اساں سفر دی تیاری کیتی تے یروشلیم کیتے روانہ تھئے۔

16قیصریہ دے کُجھ شاگرد وی ساڈے نال ٹُر پئے تے ساکُوں مَنَاسون دے گھر گِھن آئے جِتھاں اساں ٹِکنڑاں ہا۔ مَنَاسون کُپرُس دا راہنڑ آلا ہا تے پُرانڑے شاگرداں ءچوں ہا۔

17جِیں ویلے اساں یروشلیم پُجے تاں بِھرا بہُوں جوش نال ساکُوں مِلے۔

18ڈُوجھے ڈینہہ اساں پولُس کُوں نال گِھن تے یعقُوب کُوں مِلنڑ گئے۔ اُتھاں سارے بزُرگ پہلے تُوں جمع ہَن۔

19پولُس اُنہاں کُوں سلام آکھیا تے تفصیل نال ڈسایا جو خُدا اُوندی خدمت دے ذریعے غیریہُودیاں ءچ کیا کُجھ کیتے۔

20ایہ سُنڑ تے اُنہاں خُدا دی حمد کیتی تے وَل اُونکُوں آکھیا، ”بِھرا! تُوں آپ ڈیدھیں جو ہزاراں یہُودی اِیمان گِھن آئے ہِن تے او سارے شریعت اُتے عمل کرݨ ءچ بہُوں جوشیلے ہِن۔

21اُنہاں کُوں ایہ ڈسایا گِیا ہے جو تُوں غیر قوماں ءچ راہنڑ آلے یہُودیاں کُوں مُوسیٰ کُوں چھوڑ ڈیوݨ دی تعلیم ڈیندا ہیں جو بالاں دا ختنہ نہ کرو تے رسماں کُوں نہ منّو۔

22بس ہُنڑ کیا کیتا ونجے؟ کیوں جو او ضرور سُنڑسن جو تُوں اِتھاں آ گِیا ہیں۔

23اِیں واسطے جیہڑا کُجھ اساں تیکُوں آدھے ہیں او کر۔ ساڈے کولھ چار بندے ہِن جِنہاں مَنت منّی ہے۔

24اُنہاں کُوں آپنڑے نال گِھن وَنج تے اُنہاں نال رَل تے پاک تھیوݨ دیاں ساریاں رسماں کُوں پُورا کر، تے اُنہاں دا خرچا وی چا تاں جو او آپنڑے سر مُنوا سگنڑ۔ وَل ہر کہیں کُوں پتہ چل ویسی جو جیہڑے گالھیں تیڈے خلاف کیتیاں گئیاں ہِن او کُوڑیاں ہِن بلکہ تُوں خود وی شریعت اُتے عمل کر تے زندگی گُزریندا ہیں۔

25تے جِتھوں تئیں اُنہاں غیریہُودیاں دا سوال ہے جیہڑے اِیمان گِھن آئے ہِن، اُنہاں کیتے اساں فیصلہ کر تے پہلے ای خط لِکھ ڈِتے جو او بُتاں دیاں قُربانیاں دے گوشت تے خون تُوں، گَل گُھٹ تے مارے ہوئے جانوراں دا گوشت کھاوݨ تُوں تے حرام کاری تُوں پرہیز کرݨ۔“

26اِیں واسطے ڈُوجھے ڈینہہ پولُس اُنہاں بندیاں کُوں نال گِھن گِیا تے اُنہاں نال خود وی پاک تھیوݨ دیاں رسماں پُوریاں کر تے ہیکل ءچ داخل تھیّا تے اُوں تاریخ دے بارے ءچ ڈسایا جڈاں اُنہاں دے پاک تھیوݨ دے ڈینہہ پُورے تھیسن تے اُنہاں دیاں قُربانیاں پیش کیتیاں ویسن۔

27جِیں ویلے پاک تھیوݨ دے سَت ڈینہہ پُورے تھئے تاں آسِیہ دے کُجھ یہُودیاں پولُس کُوں ہیکل ءچ ڈیکھ تے لوکاں ءچ ہلچل مچا ڈِتی تے اُونکُوں پکڑ تے

28چیخنڑ لگے جو ”اِسرائیلیو! ساڈی مدد کرو۔ اِیہو بندہ ہے جیہڑا ہر جاہ لوکاں کُوں ساڈے خلاف، ساڈی شریعت دے خلاف تے اِیں ہیکل دے خلاف تعلیم ڈیندا ہے۔ اِیندے علاوہ اُوں یُونانیاں کُوں وی ہیکل ءچ گِھن آ تے اِیں پاک جاہ کُوں ناپاک کر ڈِتے۔“

29کیوں جو اُنہاں پہلے ای ترُفِمُس اِفِسی کُوں شہر ءچ پولُس نال ڈیکھ گِھدا ہا تے سوچیندے پئے ہَن جو پولُس اُونکُوں ہیکل ءچ گِھن آیا ہے۔

30سارے شہر ءچ ہلچل مچ گئی تے لوک بھج بھج تے کٹھے تھیوݨ لگے۔ اُنہاں پولُس کُوں پکڑ گِھدا تے ہیکل ءچوں گِھیل تے باہر کڈھ آئے تے دروازے بند کر ڈِتے۔

31جِیں ویلے اُونکُوں قتل کرݨ دی کوشش ءچ ہَن تاں رومی پلٹن دے سپہ سالار کُوں خبر پُجی جو سارے یروشلیم ءچ ہلچل مچ گئی ہے۔

32او فوراً پلٹن دے سپاہیاں تے افسراں کُوں گِھن تے اُنہاں دے کولھ تلے بھجدا آیا۔ جِیں ویلے لوکاں پلٹن دے سپہ سالار کُوں تے سپاہیاں کُوں ڈِٹھا تاں پولُس کُوں مارݨ تُوں رُک گئے۔

33پلٹن دے سپہ سالار نیڑے آ تے اُونکُوں گرفتار کر تے ڈُو زنجیراں نال بدھنڑ دا حُکم ڈِتا۔ وَل پُچھیا ایہ بندہ کوݨ ہے تے اِینیں کیا کیتے؟

34بِھیڑ ءچوں کہیں کُجھ آکھیا تے کہیں کُجھ۔ اِتنا شور مچ گِیا جو سپہ سالار کُوں حقیقت معلوم نہ تھی سگی، اِیں واسطے اُوں حُکم ڈِتا جو پولُس کُوں قلعہ ءچ پُچا ڈِتا ونجے۔

35جِیں ویلے پوڑیاں اُتے پُجیا تاں عوام دی زبردستی دی وجہ تُوں سپاہیاں کُوں اُونکُوں چا تے گِھن ونجنڑاں پِیا۔

36کیوں جو لوکاں دی بِھیڑ پولُس دے پِچُھوں چیخ چیخ تے ایہ آدھی پئی ہئی جو ”اُونکُوں مار گھتو۔“

37سپاہی پولُس کُوں قلعہ دے اندر گِھن ونجنڑ آلے ای ہَن جو اُوں پلٹن دے سپہ سالار کُوں آکھیا، ”کیا مَیں تیکُوں کُجھ آکھ سگدا ہاں؟“ اُوں پُچھیا، ”کیا تُوں یُونانی جانڑدا ہیں؟

38کیا تُوں او مِصری نئیں جئیں کُجھ عرصہ پہلے بغاوت کیتی ہئی تے چار ہزار قاتلاں کُوں بیابان ءچ گِھن گِیا ہَویں؟“

39پولُس آکھیا، ”مَیں یہُودی ہاں تے کلکیہ دے مشہور شہر تَرسُس دا راہنڑ آلا ہاں۔ مَیں تُہاڈی مِنت کریندا ہاں جو میکُوں لوکاں نال گالھ کرݨ دی اِجازت ڈیؤ۔“

40جِیں ویلے سپہ سالار تُوں اِجازت گِھن گِھدی تاں اُوں پوڑیاں اُتے کھڑا تھی تے لوکاں کُوں ہتھ دا اِشارہ کیتا۔ جِیں ویلے او چُپ تھی گئے تاں اُنہاں کُوں عبرانی زبان ءچ اِینویں آکھنڑ لگا:

← Chapter 20 Jump to: Chapter 22 →