1 John 2

Sotho 1951 (BIBELE)

← Chapter 1 Jump to: Chapter 3 →

1Bana ba ka! Ke le ngwalela ditaba tše, gore le se ke la dira dibe. Ge go ka ba le e a dirago dibe, gona re na le Morapeledi go Tata wešo, Jesu Kriste yena Moloki.

2Ke yena seloba sa dibe tša rena; gomme ga se sa tša rena fela; ke yena seloba sa dibe tša lefase ka moka.

3Bjale, se re lemogago ka sona gore re a mo tseba, ke ge re eya ka melao ya gagwe.

4E a kago re: Ke a mo tseba, mme a se ye ka melao ya gagwe, ke wa maaka, mme therešo ga e gona mo go yena.

5Yo lerato la Modimo le tletšego go yena sa ruri, ke yo a yago ka Lentšu la gagwe; ke sona se re tsebago ka sona ge re le ba gagwe.

6E a rego: Ke dutše ke le wa gagwe, go swanetše ge a tšea ka tsela ye yena a bego a tšea ka yona.

7Bana bešo! Ga ke le ngwalele molao o mofsa. Ke molao wa kgale wo le bego le na nawo go tloga mathomong. Molao woo wa kgale ke lentšu le le le kwelego go tloga mathomong.

8Le gona molao wo ke le ngwalelago wona ke o mofsa wo o rerefalago ke yena le ka lena; Gobane leswiswi le fetile; bjale ke gona seetša sa makgonthe se bonega.

9E a kago re: Ke mo seetšeng seo, a realo a hloile ngwanabo, o sa le lewsiswing le bjale.

10Wa go dula a le seetšeng ke eo a ratago ngwanabo; go yena ga go se se kgopišago.

11Wa leswiswing ke eo a hloilego ngwanabo; o swere tsela ya leswiswing; ga a tsebe mo a yago; gobane lefsifsi le mo foufaditše mahlo.

12Ke ngwalela lena bana, gobane le lebaletšwe dibe ka baka la leina la gagwe.

13Ke ngwalela lena botatagobana, gobane le tseba eo wa go ba gona go tloga mathomong. Lena babafsa, ke le ngwalela gobane le fentše e mobe. Mme lena bana, ke le ngwalela ka gobane le tseba Tatawešo.

14Ke ngwaletše lena Botatagobana, gobane le tseba eo wa go ba gona go tloga mathomong. Lena babafsa, ke le ngwaletše gobane le tiile, mme Lentšu la Modimo le dula le le mo go lena, mme le fentše e mobe.

15Le se ke la rata lefase le tša lefaseng; ge motho a rata lefase, lerato la Tata wešo ga le gona mo go yena.

16Gobane tšohle tša lefaseng, e lego kganyogo ya nama, le kganyogo ya mahlo, le go phela ka go ikgogomoša, ga di tšwe go Tata wešo, di tšwa lefaseng.

17Gomme lefase le a feta, le yona kganyogo la lona. E a tlogo dula a le gona go ya go ile, ke eo a dirago tše Modimo a di ratago.

18Bana ba ka! Ke nako ya bofelo. Gomme bjalo ka ge le kwele gore go etla molwalekriste, mehleng yeno go tsogile balwalekriste ba bantši. Ke sona se re bonago ka sona, ge e le nako ya bofelo.

19Ba tšwile mo go rena; fela, e be e se ba rena. Ge e ka be e le ba rena, ba ka be ba dutše ba na le rena. Fela, ke gore ba bonagala ge e se ba rena ka moka ga bona.

20Ge e le lena le ba go tlotšwa ke yena Mokgethwa; mme tšohle le a di tseba.

21Ga se gore ke le ngwalela ka ge le sa tsebe therešo; ke le ngwalela ka gobane le a e tseba, le tseba le gore ga go maaka a kago tšwa therešong.

22Wa maaka ke mang? A ga se eo a ganetšago a re: Jesu ga se yena Kriste? Ke yena molwalekriste, e a ganetšago Tatawešo le Morwa wa gagwe.

23Gomme e a ganetšago Morwa, le Tatago Morwa ga a na nae.

24Ge e le lena, tše le di kwelego go tloga mathomong, a di dule di le mo go lena. Ge tšona tšeo la go di kwa go tloga mathomong di ka dula di le mo go lena, ke mo le lena le tlogo dula le le ba Morwa le ba Tatagwe.

25Gomme se a re holofedišitšego sona sese: Ke bophelo bjo bo sa felego.

26Ge ke le ngwalela ditaba tše ke dira ka baka la bao ba go le aroša.

27Gomme lena, dulang le le batlotšwa ba gagwe. Ga le sa le ba go ka rutwa ke e mongwe; gobane botlotšwa bjoo bo le etetša dilong tšohle e le therešo, e se maaka. Bjale dulang le le ba gagwe, ka mo yena a le rutilego ka gona.

28Gomme bjale, lena bana ba ka, dulang le le ba gagwe, gore mohla a tlogo bonagala, re be le kholofelo ye e tiilego, re se tlo lewa ke dihlong ge re lebana nae go tleng ga gagwe.

29Ge le tseba gore Moloki ke yena, ke gona le lemogago le gore ba ba tswetšwego ke yena ke bao bohle ba dirago ka toko.

← Chapter 1 Jump to: Chapter 3 →