1 John 3

Sotho 1951 (BIBELE)

← Chapter 2 Jump to: Chapter 4 →

1Bonang! Ke lerato le lekaakang le Modimo a re seditšego ka lona, ge re bile re bitšwa bana ba Modimo! Gomme ge lefase le sa re lemoge, ke ka gobane le sa mo tsebe.

2Barategi! Re bana ba Modimo re le fa; gomme se re tlogo ba sona ga se ešo sa bonagala. Fela, se re se tsebago ke gore mohla a tlogo bonagala, re tlo ba ba ba swanago le yena, ra mmona se a lego sona.

3Gomme mang le mang e a mo holofetšego ka kholofelo e bjalo, o a ikgetha, boka le yena e le e Mokgethwa.

4Mang le mang e a dirago sebe o hlala molao; gomme sebe ke go hlala molao.

5Gomme le a tseba, se a bonagetšego sona ke gore a tloše dibe tša rena; mme mo go yena ga go sebe.

6Motho e a dulago e le wa gagwe ga a dire sebe: e a dirago sebe ga a ešo a mmona a mo tseba.

7Bana ba ka! Le se ke la arošwa ke motho. E a yago ka toko ke moloki, boka le yena e le Moloki.

8Modirasebe ke wa diabolo; gobane diabolo o dira sebe o tloga mathomong. Se Morwa wa Modimo a tletšego sona, ke go fediša mediro ya diabolo.

9Motho e a tswetšwego ke Modimo ga a dire sebe, gobane peu ya Modimo e dula e le mo go yena. Le gona ga a kgone go dira sebe ka ge a tswetšwe ke Modimo.

10Ke gona moo go bonagalago ba e lego bana ba Modimo, le ba e lego bana ba diabolo. E a sa yego ka toko, ga a tswalwa ke Modimo, boka le eo a sa ratego ngwanabo.

11Ke yona taba ye le e kwelego go tloga mathomong, ye ya gore re ratane.

12Re se etše Kaine a e twetšwego ke emobe, a bolaya ngwanabo. Gomme o mmolaelang? O mmolaile ka ge ya gagwe mediro e le e mebe, mme ya ngwanabo e le ya go loka.

13Bana bešo! Le se ke la tlabega ge lefase le le hloile.

14Na re tseba gobane re tšwele lehung, re seletše bophelong, gobane re rata bana ba borena. E a sa ratego ngwanabo, o dula e le wa lehung.

15Mang le mang e a hloilego ngwanabo ke mmolai, gomme le a tseba, ga go mmolai e a nago le bophelo bjo bo sa felego bjo bo kago dula e le bja gagwe.

16Ge e le lona lerato, se re le tsebilego ka sona, ke ge yena a gafile bophelo bja gagwe ka baka la rena; le rena, se se re swanetšego ke ge re gafa bophelo bja rena ka baka la bana ba borena.

17Bjale, ge motho a ruile tša bophelo bja lefase, mme a bona ngwanabo a hloka, a tla a mo tswalelela pelo ya gagwe, go yena lerato la Modimo le ka dula bjang?

18Bana ba ka! A re se ke ra ratana ka polelo le ka leleme; a re rataneng ka tiro le ka therešo.

19Ke sona se re tlogo tseba ka sona ge re le ba therešo; mme re tlo rola pelo pele ga gagwe,

20ra re, ge pelo e re bega, ra re: E Mogolo ke Modimo, o feta dipelo tša rena, mme o tseba tšohle.

21Barategi, ge re se ba go begwa ke pelo, gona re ka ba le mafolofolo a go tlo lebana le Modimo.

22Gomme se re kago se kgopela, re tla se amogela go Modimo, gobane re tlo ba re eya ka melao ya gagwe, re dira se se mo kgahlago.

23Gomme molao wa gagwe ke gore re dumele leina la Morwa wa gagwe Jesu Kriste, mme re ratane ka mokgwa wo a re lailego ka wona.

24Gomme ge o eya ka melao ya gagwe, o tlo dula o le wa gagwe, yena e le wa gago. Gomme se re tsebago ka sona ge a dutše e le wa rena, ke Moya wo a re neilego wona.

← Chapter 2 Jump to: Chapter 4 →