1 John 5

Sotho 1951 (BIBELE)

← Chapter 4 Jump to:

1Motho e a dumetšego gore Jesu ke yena Kriste, o tswetšwe ke Modimo; gomme motho e a ratago Motswadi eo wa gagwe, o rata le ba ba tswetšwego ke yena Motswadi.

2Se re tsebago ka sona gore re bana ba Modimo, ke ge re rata Modimo, ge re ya ka melao ya gagwe.

3Gobane lerato la go rata Modimo ke ge re eya ka melao ya gagwe; gomme melao ya gagwe ga se e thata.

4Gobane tšohle tše di tswetšwego ke Modimo di fenya lefase; gomme phenyo e fentšego lefase ke tumelo ya rena.

5Ke mang e a fenyago lefase, ge e se e a dumelago gore Jesu ke yena Morwa wa Modimo?

6Ke yena a tlago ka meetse le ka madi; e sego ka meetse fela; o tla ka meetse le ka madi. Hlatse ke Moya, gobane Moya ke therešo.

7Dihlatse tša kua magodimong ke tše tharo: Ke Tata wešo, le yena lentšu, le Moya o Mokgethwa. Gomme ba bararo ba ke batee.

8Le mo lefaseng dihlatse ke tše tharo: Ke Moya, le meetse le madi. Le tše tharo tše di iša gotee.

9Bjale bohlatse bja batho re bo amogela, gona bohlatse bjo bogolo ke bja Modimo ge a hlatsela Morwa wa gagwe.

10E a dumelago Morwa wa Modimo o na le bohlatse mo pelong ya gagwe. E a sa dumelego Modimo, o re Modimo ke wa maaka ka ge a sa dumele bohlatse bjo Modimo a hlatsetšego Morwa wa gagwe ka bjona.

11Gomme bohlatse bjoo šebo, bo re: Modimo o re neile bophelo bjo bo sa felego, mme bophelo bjoo bo gona ka Morwa wa gagwe.

12E a nago le yena Morwa, le bjona bophelo bjoo o nabjo. E a se nago yena Morwa wa Modimo, le bophelo bjoo ga a nabjo.

13Ditaba tše ke di ngwaletše lena ba le dumelago leina la Morwa wa Modimo, gore le tsebe gore le na le bophelo bjo bo sa felego, le gore le fele le dumela leina la Morwa wa Modimo.

14Gomme kholofelo ye e tiilego, ye re mo holofetšego ka yona, ke ge re tseba gore o a re kwa ge re kgopela se se amanago le thato ya gagwe.

15Gomme ge re tseba gobane o a re kwa ge re tla le kgopelo efe le efe, gona re tseba le gore, tše re di kgopetšego re šetše re na natšo.

16Ge motho a ka bona ngwanabo a dira sebe se se sa išego lehung, a a mo rapelele, a phediše ba go dira dibe tše di sa išego lehung. Gobane go na le sebe se se išago lehung; e a dirago tše bjalo, ga ke re a rapelelwe.

17Go se loke ka moka ke sebe; gomme go na le sebe se se sa išego lehung.

18Re tseba gore bohle ba ba tswetšwego ke Modimo ga ba dire sebe. Motho e a tswetšwego ke Modimo o a itshwara; mme emobe ga a kgone go mo kgwatha.

19Rena re tseba gore re tšwa Modimong; mme lefase ka moka le rapaletše bobeng.

20Le gona re tseba gore Morwa wa Modimo o tlile a re nea tlhaologanyo ya gore re tsebe therešo. Bjale re ba yena Morereši, re ba Morwa wa gagwe Jesu Kriste. Yena yo ke Modimo wa makgonthe; ke yena bophelo bjo bo sa felego.

21Bana ba ka! Phafogelang medimo e šele Amene.

← Chapter 4 Jump to: