1 Peter 3

Sotho 1951 (BIBELE)

← Chapter 2 Jump to: Chapter 4 →

1Le lena basadi, bušwang ke banna ba lena, gore ge go na le ba ba ganago go kwa Lentšu, ba tle ba ruiwe ka go bona tsela ye e swerwego ke basadi, go se lentšu le le bolelwago,

2ge ba lemogile tsela ya lena e le ya go boifa le go ila tšhila.

3A ba lemoge gore botšhepi bja lena ga se bjoo bja ntle bja go loga meriri le go apara tša gauta le bothakga bja mašela.

4Botšhepi e le motho wa go ikuta wa pelong, botšhepi bjo bo sa onalego bja moya wa boleta le leago. Ke tšona tše Modimo a bonago e le tše bohlokwa.

5Ke wona mokgwa wa go tšhepa ga basadi ba bakgethwa ba kgale, ba ba bego ba holofetše Modimo; e be e le ba go bušwa ke banna ba bona;

6boka Sara ge e le a kwago Aborahama, a re ke mong wa ka. Ke yena eo le bago bana ba gagwe ge le dira gabotse, ge le sa boife se se kago le tšhošetša.

7Le lena banna! Le phedišane le bona le tseba gore mosadi re ka re ke yena sebjana se se swanetšego go neneketšwa. Ba godišeng le tseba ge le bona e le baji ba bohwa bja neo ya bophelo, gore dithapelo tša lena di se tlo šitišwa.

8Ke moka, bang ba kgopolo e tee ka moka ga lena, le kwelane bohloko, le ratane le bana ba bolena, le be ba bonolo le ba botho.

9Le se ke la lefetša bobe ka bobe, le lehlapa ka lehlapa; wa lena mokgwa e be go šegofatša, le tseba gore ke sona se le bileditšwego sona, gore le tle le be ba go tlo ja bohwa bja tšhegofatšo.

10Gobane e a kgahlwago ke bophelo, a rata go bona matšatši a tše botse, a a khutšiše leleme lagwe bobe; le melomo ya gagwe e se ke ya bua maaka.

11A a kgaogane le tše mpe, a dire tše botse; a nyake molao a o kganyelele.

12Gobane mahlo a Morena a bona baloki; tsebe tša gagwe di kwa ge ba lla. Gomme sefahlogo sa Morena se lebile ba go dira bobe.

13Ke mang e a tlogo le dira bošula ge le phegelela bothakga?

14Fela, ge le hlokofatšwa molato e le toko, gona le ba mahlatse. Le se ke la boifa se ba se boifago, le se ke la tšhoga.

15Mme Morena Modimo mo pelong tša lena le mo tsebe ge e le Mokgethwa; Le dule le loketše go ipolela ka kholofelo ye e lego mo go lena ge le fetola mang le mang e a le sekišago ka yona,

16le dire fao ka boleta le ka go boifa, letswalo la lena le sa tsebe molato gore ba ba le pharago eke le disenyi, ba lewe ke dihlong, bona bao ba go goboša tsela e botse ye le e swerego le le ba Kriste.

17Gobane ge Modimo a ka rata gore le hlokofatšwe, gona go kaone ge le ka hlokofatšwa le dirile botse, le se ke la hlokofatšwa le dirile tše mpe.

18Gobane Kriste le yena mola a hlokofatšwa ka baka la dibe ke ge Moloki a hwela bakgopo, gore a re iše go Modimo, a bolawa mmele, a phedišwa moya.

19Ka moya woo o ile a yo goelela meoya ya kua kgolegong,

20meoya ye e gannego go kwa mehla yela ge Modimo a sa e letetše ka go se fele pelo, mehleng ya Noage ya ge go sa lokišwa polokelo yela ya go tsenwa ke e sego bakae, gwa phologa ba seswai fela ba tšwa meetseng.

21Meetse ao, ka lehlakore le lengwe, a a re phološa, ke ra kolobetšo, ye e sego go hlatswa mmele ditšhila, e lego go kgopela letswalo le le botse go Modimo. Kolobetšo e re phološa ka tsogo ya Jesu Kriste,

22e a rotogetšego magodimong, a dula ka letsogong le letona la Modimo, a buša barongwa, le mebušo, le ba maatla.

← Chapter 2 Jump to: Chapter 4 →