1 Peter 4

Sotho 1951 (BIBELE)

← Chapter 3 Jump to: Chapter 5 →

1Bjalo ka ge Kriste a hlokofaditšwe mmele ka baka la rena, le lena itlhameng ka kgopolo e etšago yeo, ya go re: e a hlokofatšwago mmele o hlobogana le dibe,

2gore ge le sa šaletšwe ke lebaka la go phela nameng, le se hlwe le phelela dikganyogo tša batho, le phelele thato ya Modimo.

3Gobane ga go sa nyakwa tša mehla ye e fetilego, tša ge re sa dira tše di ratwago ke bantle tša go keka le maipshino le dikganyogo le botagwa le bohori le go nwa, le mekgwa ye e ronago ya go direla medimo e šele.

4Ke sona se se ba tlabago, ge le sa etše bona la kitimela moo ba itahlelago bohlola, mme ba le goboša.

5Bona ba tlo iphetolela ba lebane le eo a tlogo sekiša ba ba phelago le ba ba hwilego.

6Ge bahu ba boditšwe Ebangedi, ke go re ka thoko ya motho wa nama ba solwe, mme ba phele moyeng ka thato ya Modimo.

7Bofelo bja dilo tšohle bo batametše. Bang le kelelo le phakgamele dithapelo.

8Se segolothata le be le leratano le tletšego, gobane lerato le bipa dikarogo tšohle.

9Le be ba go thabelana le baeng; go se be le go ngongorega.

10Le direlane ka mo e mongwe le e mongwe a seditšwego ka gona ka go gaugelwa; le be balaki ba botse ba dikabelo tša mehutahuta tša kgaugelo ya Modimo.

11Ge e mongwe e le wa go bolela, a ye ka dithuto tša Modimo; ge e mongwe e le wa go direla, a dire ka mo Modimo a mo neilego ka gona; e be gore dilong tšohle go tumišwe Modimo ka Jesu Kriste, mong wa letago le maatla go iša mehleng ya neng le neng. Amene.

12Barategi, le se ke la tlabja ke phišo ye e le wetšego gore le lekwe ka yona; e se ke ya le tlaba boka selo se le sa se tsebego.

13Sa lena a e be go thaba ge le lena le eba batee le Kriste ka go tlaišwa, gore mohla letago la gagwe le bonalago, le tle le thabe le hlalale.

14Ge le gobošwa ka baka la leina la Kriste, gona le ba lehlogonolo, gobane ke gona le okametšwe ke Moya wa letago le maatla, Moya wa Modimo, wo bona ba o gobošago, wo lena le o retago.

15Mo go lena go se ke gwa ba le e a hlokofatšwago e le mmolai goba lehodu, goba sesenyi goba sehwirihwiri.

16Ge motho a ka hlokofatšwa ka gore e le Mokriste, a se ke a kwa dihlong; a a retiše Modimo ka lona ina leo.

17Gobane lebaka la gore kahlolo e thome ka Ngwako wa Modimo le fihlile. Bjalo ge e thoma ka rena, pheletšo ya ba ba ganago go kwa Ebangedi ya Modimo e tlo ba eng?

18Ge wa moloki a tlo phologa ka thata, monyatši wa Modimo le modirabobe ba tlo leba kae?

19Ke gona ba ba hlokofatšwago ge go iwa ka thato ya Modimo, a ba gafele meoya ya bona yena Mmopi Mmotegi, ba fela ba dira gabotse.

← Chapter 3 Jump to: Chapter 5 →