Colossians 1

Sotho 1951 (BIBELE)

Jump to: Chapter 2 →

1Paulo Moapostola wa Jesu Kriste ka thato ya Modimo, le Timotheo ngwanešo.

2Re ngwalela bana bešo ba bakgethwa ba tumelo ba motseng wa Kolose. Kgaugelo a e be le lena le khutšo e tšwago go Modimo Tata wešo le go Morena Jesu Kriste.

3Modimo Tata go Mong wa rena Jesu Kriste re mo leboga ka mehla ge re le rapelela,

4ka ge re kwele tša tumelo ya lena le dumetše Jesu Kriste, re kwele lerato la lena ge le rata bakgethwa ka moka.

5Re le lebogela le kholofelo ya ge le holofetše tša magodimong, le kwele lentšu la therešo la Ebangedi,

6le le fihlilego go lena bjalo, ka ge le enela lefase ka moka le bea dienywa le tšwelela pele ka mokgwa woo wa ge lena le le kwele mohla wola, la lemoga kgaugelo ya Modimo ka kgonthe,

7ka mo le rutilwego ke Epafora mohlankakarena morategi, wa go le direla a botegetše Kriste.

8Ke yena a re anegetšego tša lerato le Moyamokgethwa o le tsošitšego mo go lena.

9Bjale le rena, e sa le mola re di kwa, ga re kgaotše go le rapelela le go le kgopelela gore le tlatšwe tsebo ya go tseba thato ya gagwe, le be le bohlale ka moka le tlhaologanyo ya Moya.

10Re le rapelela gore le sware ka tsela ye e loketšego ba Morena, e be go mo kgahla gohle, le go enywa dienywa ka mediro e botse yohle, la tšwelela pele tsebong ya go tseba Modimo,

11la tlo ba bafiwamaatla dilong ka moka, ka mo go kgonago letago la gagwe, la tlo kgona go kgotlelela gohle, le sa fele pelo.

12La tlo leboga Tata wešo e a re dirilego ba ba swanetšwego ke kabelo ya bohwa bja bakgethwa seetšeng.

13Ke yena a re ubutšego maatleng a leswiswi, a re khudušetša mmušong wa Morwamoratwa wa gagwe,

14yo re hweditšego topollo ka yena ka madi a gagwe, e lego go lebalelwa dibe.

15Ke yena seswantšho sa Modimo e a sa bonwego, thakaletswalo ya dibopša tšohle.

16Ka gobane tšohle tša kua magodimong le mo faseng di hlodilwe ka yena, tše di bonwago le tše di sa bonwego; ditulo tša marena le bogoši bjohle, le mebušo le ba maatla, ka moka di hlodilwe ke yena, di hloletšwe yena.

17Ke yena Mobagona wa mola legohle le sešo la ba gona, me tšohle tša ba gona ka yena.

18Mme ke yena hlogo ya mmele, hlogo ya phuthego, ke yena mathomo, thakaletswalo motšwabahung, gore e be yena wa pele mo go tšohle.

19Gobane Modimo o ratile gore botlalo ka moka bo age mo go yena;

20ka yena o ratile go ipoelanya le tšohle tša mo lefaseng le tša magodimong, ka go fediša ntwa ka madi a sefapanong sa gagwe ka yena.

21Le lena ba le bego le le bahlanogi, le le manaba menagonong ya mediro e mebe,

22bjale o le boelantše le yena ka mmele wa gagwe wa nama, ka go hwa, a le emiša pele ga gagwe le le ba bakgethwa, le se na bosodi, le se na molato.

23Go bjalo, ge le tielela tumelong, ge le kgotlelela, ge le sa šišinyege la lesa go holofela Ebangedi ye le e kwelego e anegelwa babopsa bohle ba tlase ga legodimo, ye nna Paulo ke lego motseta wa yona.

24Bjale ke thabile ke le mahlokong a ke a rwelego ka baka la lena, mme ke sa tlatša se se hlaetšego nameng ya ka ke tle ke fihlele tšeo Kriste a hlokofaditšwego ka tšona ka baka la phuthego e lego mmele wa gagwe.

25Mme nna ke modiredi wa phuthego yeo, ka mo Modimo a mphilego bolaki bja gore Lentšu la Modimo le tlale mo go lena.

26Ke yona thopa e bego e utilwe go tloga mathomong a mabaka, e se tsebje ke ba mabaka a a fetilego, ya tla ya utollelwa bakgethwa ba gagwe,

27ba Modimo a ratilego gore ba tsebišwe lehumo la letago la thopa ye e lebanego bantle; lehumo leo ke ge Kriste a na le lena, e le yena yo re holofetšego letago ka yena.

28Ke yena yo re mmolelago mo go lena, re eletša batho bohle, mme re ruta batho bohle ka bohlale ka moka, gore batho bohle re ba thuše gore e be ba bolo ka tlalo ka Kriste Jesu.

29Ge sona se ke se phegelelago ke katana, mme ke kgonišwa ke yena e a dirago ka maatla a magolo mo go nna.

Jump to: Chapter 2 →