Colossians 2

Sotho 1951 (BIBELE)

← Chapter 1 Jump to: Chapter 3 →

1Ke rata gore le tsebe gore ntwa ke e kaakang ye ke e lwelago lena le ba Laoditsea, le bohle ba ba sešogo ba mpona sefahlogo,

2gore ba ušwe pelo, ba gomarelane leratong, ba išane lehumong le le tletšego la tlhaologanyo, gore ba tsebe thopa ya Modimo le ya Kriste.

3Ke yena Kriste yo mahumo ka moka a bohlale le a tsebo a fihlilwego mo go yena.

4Ge ke bolela tšeo, ke gore le se ke la gakantšhwa ke motho ka dipolelo tša maano.

5Gobane, le ge ka mmele ke le mono kgole, ka moya ke na le lena; ke bona bothakga bja lena ke bo thabela, le ka mo le tiišago go dumela Kriste.

6Bjale, ge le amogetše Kriste Jesu Morena, swarang tsela le le ba gagwe,

7Le be ba ba tsemilego medu, ba ba agilwego godimo ga gagwe, ba ba tiilego tumelong ka mo le rutilwego ka gona, le be ba go mo leboga ka botlalo.

8Le phafoge gore go se be le a kago le thopa ka mabohlale, ka go le fora ka mafela, ka go ya ka melawana ya batho, le ka dithuto tša mathomo a legohle, e se go ya le Kriste.

9Gobane mo go yena ke mo go agilego botlalo bja go ba Modimo ka lebopo la mmele.

10Gomme le lena le ba botlalo ka yena, e lego yena hlogo ya bogoši bjohle le mebušo yohle.

11Le gona ka yena le bolotše ka lebollo le le sa dirwego ka diatla, e lego go apola mmele wa dibe tša nama ka lebollo la Kriste.

12Ke mo le fihlilwego le yena ka kolobetšo, la tsoga le yena ka yona ka go dumela maatla a Modimo e a mo tsošitšego bahung.

13Gomme lena ba le bego le hwetše dibeng, le go se bolleng ga mebele ya lena, o le phedišitše le yena ka go le lebalela dibe ka moka.

14A phumola lengwalo le le re begago ka Molao, a le tloša mo le bego le thibile tsela, a le kokotela sefapanong.

15Mme mmušo woo a o amoga marumo, a fediša maatla ao pepeneneng a goroga a fentše.

16Bjale go se ke gwa ba le motho e a le beago molato ka dilewa le dinwewa, le ka tša menyanya, le tša kgwedi e mpsha le tša disabatha.

17Dilo tšeo ke meriti fela ya tše di tlogo tla; mmele wona ke wa Kriste.

18Le se ke la dumela go hlokišwa mphapahlogo ke motho wa go kgantšha boipoetšo, a re ke direla barongwa, a re ke bona dipono a sa ka a bona selo, a fo ikgogomoša ka kgopolo ya gagwe ya nama.

19Motho e mobjalo ga a gomarele hlogo yeo e babalelago mmele ka moka, e kopane nawo ka ditšhika le ka mešifa, ya o phediša ka mokgwa o beilwego ke Modimo.

20Ge le hwile le Kriste, gona le kgaogane le melawana ya lefase. Le sa tlemelwang ka mekgwa la etša ba ba phelago lefaseng?

21Go thwe: Se sware seo! O se je seo! O se kgwathe seo!

22Mola e le dilo tše di beetšwego go fela ka go lewa. Bjale melawana yeo le dithuto tša batho di iša kae?

23Ke ditaba tše ba rego ke tša bohlale, mola e le tša borapedi bja boithatelo, le boipoetšo bja boithatelo, le go otla mmele ka boithatelo, di sa hole motho selo, e le go fo kgodiša mmele.

← Chapter 1 Jump to: Chapter 3 →

Recommended Reading

Commentary Colossians Commentaries → Devotional Colossians Devotional Guide → Get This Bible BIBELE Study Bible →