Exodus 20

Sotho 1951 (BIBELE)

← Chapter 19 Jump to: Chapter 21 →

1Mantšu a a boletšwego ke Morena ka moka šea; o itše:

2Ke nna Morena Modimo wa gago. Ke nna ke go ntšhitšego nageng ya Egipita ngwakong wa bohlanka.

3Ke se ke ka bona o na le medimo e šele.

4O se ke wa itirela modimo wa go betlwa, le ge e le seswantšho se sengwe sa tše di lego kua legodimong, le ge e le sa tše di lego mono lefaseng, le sa tše di lego meetseng ka tlase ga lefase.

5O se ke wa di khunamela; o se ke wa di direla; ka gobane nna Morena Modimo wa gago ke Modimo yo bogale, e a latago bokgopo bja botatagobana go bana ba bona go fihla molokong wa boraro le wa bone mo go ba ba ntlhoilego.

6Gomme ge e le ba ba nthatago, ba ba hlokomelago melao ya ka ke ba dira ka botho go iša melokong e sekete.

7O se ke wa bolela leina la Morena Modimo wa gago ka lefela; ka gobane e a bolelago leina la gagwe ka lefela Morena a ka se ke a mo lesa a sa otlwe.

8Gopola letšatši la go khutša, o le kgethe.

9O sware mediro ka matšatši a a selelago, o phethe mešomo ya gago ka moka.

10Ge e le letšatši la go šupa ke la go khutša, ke la Morena Modimo wa gago. Ka lona o se ke wa swara modiro le o tee, le ge e le wena, le morwa wa gago, le morwedi wa gago, le molata wa gago wa monna le wa mosadi, le seruiwa sa gago, le modiiledi e a lego dikgorong tša geno.

11Ka gobane Morena, legodimo le lefase le lewatle, le tšohle tše di lego gona, o di dirile ka matšatši a selelago, mme a khutša ka tšatši la go šupa. Ke ka baka leo Morena a le šegofaditšego, a le dira le lekgethwa.

12Godiša tatago le mmago, gore o phele galelele nageng ye Morena Modimo wa gago a go fago yona.

13O se ke wa bolaya.

14O se ke wa otswa.

15O se ke wa utswa.

16O se ke wa bolela bohlatse bja maaka go wa geno.

17O se ke wa duma ntlo ya wa geno. O se ke wa duma mosadi wa wa geno, le molata wa gagwe wa monna le wa mosadi, le kgomo ya gagwe, le pokolo ya gagwe, le tšohle tše e lego tša wa geno.

18Gomme setšhaba ka moka se be se lebane le medumo yeo, le magadima, le moletšo wa naka, le thaba e thuntšhago muši; ge se bona tšeo sa roromela sa ema kgole.

19Sa kgopela Moshe sa re: Wa go bolela le rena a e be wena, mme re tlo kwa; a Modimo a se ke a bolela le rena, gore re se hwe.

20Moshe a bolela le setšhaba a re: Le se ke la boifa. Modimo o tlile gore a le leke, gore le bone go boifiša ga gagwe, mme le ile sebe.

21Gomme setšhaba sa ema kgole; Moshe yena a batamela leswiswi leo Modimo a bego a le mo go lona.

22Gomme Morena a laela Moshe a re: Bolela le Baisiraele o re: Le di bone ge ke bolela le lena ke le legodimong.

23Le se ke la itirela medimo hleng gaka; Le se ke la itirela medimo ya silifera, le medimo ya gauta.

24Nna o ntirele aletare ka mmu; mo go yona o ntlišetše dihlabelo tša gago, le ditebogo tša gago, le dihuswane tša gago, le dikgomo tša gago. Felo mo ke tlogo kwa leina la ka le bolelwa gona, e ka ba kae le kae, ke tlo tla ka go šegofatša.

25Ge o ntirela aletare ka maswika, o se ke wa e aga ka maswika a a betliwego. Ge o ka akga themo ya gago mo go yona, o e gobošitše.

26Le gona aletareng ya ka o se ke wa namela ka manamelo, gore aparo tša gago di se phaege pele ga yona.

← Chapter 19 Jump to: Chapter 21 →