Exodus 22

Sotho 1951 (BIBELE)

← Chapter 21 Jump to: Chapter 23 →

1Ge lehodu le ka swarwa le thubula, la itiwa la hwa, ga go molato wa madi.

2Fela, ge le ka bolawa le šetše le hlabetšwe ke letšatši, gona e tlo ba molato wa madi. Sa lehodu ke go lefa; ge le se ne selo, gona a le rekišwe ka baka la bohodu bja lona.

3Se se utswitšwego ge se ka hwetšwa se le diatleng tša lona se sa phela, e ka ba kgomo, e ka ba pokolo, e ka ba sehuswane, gona le lefe ka tše pedi.

4Ge motho a fudiša tšhemong ya gagwe, le ge e le serapeng sa gagwe, a tlogela dikgomo tša gagwe, mme tša tsena tšhemong ya e mongwe tša e ja, gona a lefe ka tšona tše botse tša mo tšhemong ya gagwe, le ka tše botse tša mo serapeng sa gagwe.

5Ge mollo o ka šwahla wa swara madiga, wa fiša mabele a sethaleng goba a lehlakeng, le ge e ka ba dihlare tše di lewago, e a tšhumilego mollo woo a lefe.

6Ge motho a neela wa gabo thšelete le ge e le thoto gore a mmolokele, mme tša utswiwa mo ngwakong wa monna yoo, ge lehodu le ka swarwa, le lefe setee ka tše pedi.

7Ge lehodu leo le sa ka la bonwa, mong wa ngwako a batamele Modimo, go bonwe ge a sa ka a tšea thoto yeo ya wa gabo.

8Ka taba efe le efe ya molato, e ka ba wa kgomo, goba wa pokolo, goba wa kobo, goba selo sefe le sefe se se timetšego, se e mongwe a rego ke sa gagwe, taba ya ba babedi bao a e išwe go Modimo; gomme yo Modimo a tlogo mmea molato, a lefe wa gabo setee ka tše pedi.

9Ge motho a ka fišetša wa gabo pokolo, goba pholo, goba sehuswane, goba seruiwa se sengwe, gomme sa hwa, goba sa robega, goba sa thopša, go se na e a di bonego,

10gona taba e fedišwe ka keno ya go ena ka Morena, a re: Ga nka ka tšea thoto ya wa gešo. Mong wa yona a dumele, a se mo lefiše.

11Fela, ge e utswitšwe, a lefe mong wa yona.

12Ge e bolailwe ke sebata, gona a tlišetše mong wa yona bohlatse; se se bolailwego ke sebata ga a se lefe.

13Ge motho a kgopetše a adingwa seruiwa, mme sa robega, goba sa hwa, mong wa sona a se gona, gona a se lefe.

14Ge mong wa sona a be a le gona, a se ke a lefa. Ge e be e adimilwe, gona moputso wa kadimo e be e le go lefa.

15Ge motho a ka fapoša kgarebe ye e sešogo ya beeletšwa, a robala nae, gona a mo nyale e be mosadi wa gagwe.

16Ge tatagwe a ka gana go mo fa kgarebe yeo, gona a lefe ka tšhelete ye e lekanego go nyala kgarebe.

17Mosadi wa moloi o se ke wa mo lesa a phela.

18E a lalago le seruiwa a hwe lehu.

19E a išago sebego medimong, mme a se ke a se tlišetsa Morena fela, a a gafelwe lehu.

20Modiiledi o se ke wa mo pateletša, o se ke wa mo katelela; ka gobane le lena le be le le badiiledi nageng ya Egipita.

21O se ke wa hlakiša mohlologadi le sešuana.

22Ge o ka ba wa ba hlakiša, mme ba ntelela, ke tlo kwa sello sa bona;

23mme bogale bja ka bo tlo tuka, ka le bolaiša lerumo, basadi ba lena ba šala e le bahlologadi, bana ba lena ba šala e le dišuana.

24Ge motho wa setšhaba sa ka, e ka bago mohumanegi, o mo adima tšhelete, o se ke wa re e boe e tswetše, e na le kokeletšo.

25Ge o tšere kobo ya wa geno wa mo swarelela ka yona, o mmušetše kobo yeo le sešo la dikela;

26ka gobane ga a na kobo e nngwe; ke sona seaparo sa mmele wa gagwe. O tlo robala kang? E tlo re ge a ntelela, ke tlo kwa; ka gobane nna ke yo kgaugelo.

27O se ke wa goboša Modimo; o se ke wa roga mmuši wa setšhaba sa geno.

28O se ke wa diega go ntšha lekgetho la mabele le sebego sa morara. Leitšibolo la bana ba gago o nee nna.

29Le maitšibulo a dikgomo tša gago, le a dihuswane tša gago, o nee nna. A di fetše matšatši a šupago di na le bommatšo. O di tliše go nna ka la seswai.

30Le be batho ba ka ba bakgethwa. Nama ya se se bolailwego ke sebata le se ke la e ja; le e lahlele dimpša.

← Chapter 21 Jump to: Chapter 23 →