Exodus 40

Sotho 1951 (BIBELE)

← Chapter 39 Jump to:

1Morena o boditše Moshe a re:

2Ngwako wa Kgwerano o o hlome ka la pele la kgwedi ya pele.

3Go wona o bee polokelo ya melao, mme polokelo o e šire ka lešira la yona.

4Le sethalana o se iše moo, gomme o lokiše tše di bewago mo go sona. Le sehlomapone o se iše, mme o se hlomele mabone a sona.

5Aletare ya gauta ya diorelo o e bee pele ga polokelo ya melao. O kgone go fega lešira la mojako wa Ngwako.

6Mo pele ga mojako wa Ngwako wa Kgwerano o bee aletare ya dihlabelo.

7Legopo o le bee mo gare ga Ngwako wa Kgwerano le aletare, mme o tšhele meetse mo go lona.

8O kgone o dira lapa ka thoko tšohle, o be o fege lešira la sefero sa lapa.

9Ke mo o tlogo tšea makhura a setlolo wa tlotša Ngwako, le dilo tšohle tše di lego go wona, o o kgethe le dilo tšohle tša wona, gore e be o mokgethwa.

10O tlotše le aletare ya dihlabelo le dibjana tša yona ka moka; o kgethe aletare yeo gore e be e kgethwakgethwa.

11O tlotše le legopo le leoto la lona, o le kgethe.

12O batametše Arone le barwa ba gagwe mo pele ga mojako wa Ngwako wa Kgwerano, o ba hlapiše ka meetse.

13Arone o mo apeše diaparo tše kgethwa, o mo tlotše, o mo kgethe, gore e be moperisita wa go ntirela.

14Le barwa ba gagwe o ba batametše, o ba apeše dikobo.

15O ba tlotše bjalo ka ge o tloditše tatabo, gore e be baperisita ba go ntirela. Go tlotšwa ga bona go tlo ba dira baperisita ba neng le neng go iša ditlogolong tša bona.

16Gomme Moshe a dira tšohle ka mo Morena a mo laetšego ka gona.

17Ntlokgethwa ya hlomiwa ka la pele la kgwedi ya pele ya ngwaga wa bobedi.

18Moshe a hlomile Ntlokgethwa, a bea maoto a yona, a tsema legwakgwa la yona la mamati, a nokela dipalelo, a emiša dikokwane tša yona.

19A e rulela ka mašela a yona, le ka dikobo tšela tša hlaka, a dira ka mo Morena a mo laetšego.

20A tšea melao a e bea polokelong, a nokela diphata mo mekgokong ya polokelo, a e khurumela ka sekhurumelo sa yona.

21A iša polokelo mo Ntlongkgethwa, a fega lešira a šira polokelo ya melao, ka mo Morena a mo laetšego.

22A iša sethalana mo Ngwakong wa Kgwerano, a se bea lehlakoreng la thoko ya leboa, ka mono pele ga lešira.

23Mo go sona a bea dinkgwa a di hlatlaganya pele ga Morena ka mo Morena a mo laetšego.

24Le sehlomapone a se emiša mo Ngwakong wa Kgwerano, sa lebana le sethalana, se le lehlakoreng la thoko ya borwa.

25A hlomela dipone pele ga Morena, ka mo Morena a mo laetšego.

26Aletare ya gauta a e bea mo Ngwakong wa Kgwerano ka mono pele ga lešira.

27Mo go yona a thuntšha diorelo tša monko o bose, bjalo ka ge Morena a mo laetše.

28A fega lešira la mojako wa Ntlokgethwa.

29Aletare ya dihlabelo a e bea pele ga mojako wa Ntlokgethwa, wa Ngwako wa Kgwerano. Mo go yona a bea dihlabelo le dibego, ka mo Morena a mo laetšego.

30Legopo a le bea mo gare ga Ngwako wa Kgwerano le aletare yeo, a tšhela meetse mo go lona a go hlapa.

31Moshe le Arone le barwa ba gagwe ba be ba fela ba hlapa diatla le maoto go lona.

32Ba be ba hlapa ge ba tsena Ngwakong wa Kgwerano, le ge ba batamela aletare, bjalo ka ge Morena a laetše Moshe.

33A hloma le lapa la go dikologa le Ntlokgethwa le aletare, a fega lešira la sefero sa lapa. Ya ba gona go phetha modiro.

34Gomme gwa tla leru la apeša Ngwako wa Kgwerano, letago la Morena la tlala Ntlokgethwa.

35Le Mošhe a šitwa go tsena Ngwakong wa Kgwerano, ka ge leru le dutše mo go wona, ka ge letago la Morena le tletše Ntlokgethwa.

36E be e re ge leru le hlatloga le tloga mo Ntlong e kgethwa, ya ba gona Baisiraele ba tsogilego maetong a bona ka moka.

37Ge le sa hlatloge, ba be ba sa sepele, ba letela letšatši le hlatlogago ka lona.

38Ka gobane e be e le leru la Morena le le bego le le Ntlong e kgethwa mosegare; mme bošego go be go le mollo mo go lona. Bohle ba leloko la Isiraele ba di bone maetong a bona ka moka.

← Chapter 39 Jump to: