Hosea 13

Sotho 1951 (BIBELE)

← Chapter 12 Jump to: Chapter 14 →

1E be e re ge Efuraimi a bolela, gwa tšhogwa. E be e le e mogolo mo go Isiraele. Gomme a oba molato ka Baali; ya ba gona go hwa.

2Bjale o iša pele go senya; ba itirela diswantšho ka disilifera tša bona, medimo ka go ithatela, ye e dirilwego ke ba bohlale ka moka ga yona; ke yona ye ba rego: E tlišetšeng didimo, mme batho ba atla mamane.

3Ke ka tše bjalo ge ba swana le mouwane ge go esa, ba tlo ka phoka e tlogago ge le hlaba, le moko o tšewago ke ledimo seboeng, le muši wo o tšwago ka lešoba.

4Mme nna ke Morena Modimo wa gago go tloga nageng ya Egipita; ga o tsebe Modimo ge e se nna; mme ga go Mophološi ge e se nna.

5Nna ke go tsebela kua lešokeng, nageng yela ya go fiša.

6Gomme e itše ge ba hweditše mafulo, ba hora ba nona. Ba re go hora ba ikgogomoša, mme ba ntebala.

7Bjale nna ke ba fetogela tau, ke tlo ba lalela mo tseleng boka nkwe.

8Ke tlo ba šwahlela bjalo ka sebata seamogwabana; ke tlo ba garolanya pelo sehubeng, ka ba ja boka tau; dibata tša naga di tlo ba tumukanya.

9Joo Isiraele, o itshenya ka noši ge o gana nna ke go hlakodišago.

10E kae kgoši ya gago? A e go hlakodiše metseng ya gago ka moka! Ba kae baahlodi ba gago, ba o ba kgopetšego wa re: Mpheng kgoši le bakgoma!

11Kgoši ke go neile ke befetšwe; ke tlo buša ke e tloša ke galefile.

12Molato wa Efuraimi ke o phuthetše; sebe sa gagwe ke se bolokile.

13O tlo swarwa ke mahloko a mmelegi; fela, ngwana ga a ne tlhaologanyo, ga a tšwelele tswaleng ka lebaka.

14Ke tlo ba phološa kua bodulabahu; mo lehung ke tlo ba namolela. Hee lehu! Mahloko a gago a kae? Hee bodulabahu! Tshenyo ya gago e kae? Tšhegamo ga e yo go nna.

15Le ge Efuraimi a ba dienywa mehlakeng, go tlo tsoga phefo ya bohlabatšatši, ledimo la Morena le hlagago lešokeng, la tlo galoša didiba tša gagwe, la mo hlakola lehumo la dilo tšohle tša matsaka.

← Chapter 12 Jump to: Chapter 14 →

Recommended Reading

Commentary Hosea Commentaries → Devotional Hosea Devotional Guide → Get This Bible BIBELE Study Bible →