Hosea 2

Sotho 1951 (BIBELE)

← Chapter 1 Jump to: Chapter 3 →

1Botšang bana ba bolena le re: Le setšhaba sa ka! Le dikgaetšedi tša lena le di botše le re: Le bagaugelwa!

2Sekišang mmaweno. Le mo sekišeng le re o reng ge e se mosadi wa ka, monna wa gagwe e se nna. A a tloše bootswa bja gagwe fahlogong sa gagwe, le bononyana bjagwe bo mo tloge sehubeng.

3Ke se tlo mo hlobodiša, ka mo lesa a le fela, a etša mola a sa tšo belegwa, ka mo dira lehanata naga tshehla, ka mmolaya ka lenyora,

4Ke se gaugele bana bagwe, ka gobane e le bana ba bootswa.

5Gobane mmabo o dirile tša bootswa, o ba imile ka tša dihlong, ka gobane o be a re: Nna ke ya le baratwa ba ka ba go mpha bogobe le meetse, le dikobo le mašela, le tša go nwa.

6Molato ke wona woo ge ke thiba tsela yago ka meetlwa, ka kgatla morako wa hloka dirobana.

7O tlo re a kganyelele go baratwa bagwe, a se fihle mo ba lego gona; o tlo ba nyaka a ba hloka. Ke mo a tlogo re: A nke ke boele go monna wa ka yola wa pele; gobane tša mehla yela di be di le kaone.

8Ke ka gobane a sa tsebe ge e le nna ke mo neago mabele le morara le makhura, ke mo atišetša silifera le gauta; mme ba direla Baali ka tšona.

9Nna bjale ke tlo mo amoga mabele a ka lebakeng la ona, le morara wa ka lebakeng la wona; ke tlo mo amoga le dikobo tša ka, le mašela a ka, le tša go apeša bofela bja gagwe.

10Ke tlo mo tšola, baratwa bagwe ba di bona; go ka se be wa go mo namolela atleng sa ka.

11Ke tlo kgaotša mathabo a gagwe ka moka, le menyanya ya gagwe, le ya kgwedi e mpsha, le ya disabatha, le ya diphuthego.

12Ke tlo senya merara ya gagwe, ye a bego a re: Ke yona meputso ye ke e neilwego ke baratwa ba ka; Ke tlo e dira lerobo la fela, tša tlo lewa ke dibata tša nageng.

13Ke mo sekiša ka tša mehla ya boBaali, ge a ba tupišetša diorelo a tšhephile ka mangina le dipheta, la latela baratwa ba gagwe, nna a ntebetše. O realo Morena.

14Tsebang! E tlo ba ka baka leo ge ke mo goketša ka mo iša lešokeng, ka yo mo fepeletša.

15Re le gona kua ka mo nea rapa tša morara, mme moedi wa mahloko ya tlo ba mojako wa lehutšo; a tlo tlotla boka mola e sa le ngwanana, boka mola a rotoga a etšwa nageng ya Egipita.

16Mehleng yeo -- o realo Morena -- O tlo nthe: Monna wa ka! Wa se sa tlo re: Baali wa ka!

17Gobane maina a boBaali ke tlo a tloša molomong wa gagwe; maina a bona a se hlwe a ukangwa.

18Mehleng yeo ke tlo ba direla kwano le dibata tša lešoka le nonyana tša sebaka le tše di gagabago lefaseng; ke tlo roba mara le marumo le tša ntwa, ka di tloša mo nageng, ka tlo ba agiša ka molao.

19Ke tlo go dira mmeeletšwa wa ka ka molao le ka toko, le ka botho le ka kgaugelo.

20Ke tlo go dira mmeeletšwa wa ka ka potego, mme wa tlo tseba Morena.

21Mehleng yeo nna ke tlo ba wa go kwa. -- O realo Morena. -- Ke tlo kwana le legodimo; mme lona le tlo kwana le lefase.

22Gomme lefase le tlo kwana le mabele le morara le makhura; mme tšona di tlo kwana le Jeseriele (tšhemo ya Modimo).

23Ke tlo mo šema mo nageng, ka gaugela Mosegaugelwe; Gase ba ka ka tlo mo re: O setšhaba sa ka: mme yena a re: O Modimo wa ka!

← Chapter 1 Jump to: Chapter 3 →