Hosea 9

Sotho 1951 (BIBELE)

← Chapter 8 Jump to: Chapter 10 →

1Isiraele! Lesa go thaba le go hlalala boka ditšhaba; gobane Morena Modimo wa gago o mo hladile; o ratile theko ya bootswa mo go fela diboeng tša mabele.

2Diboa le photlelo di ka se ba horiše, morara o tlo ba fora.

3Ba ka se ke ba hlwa ba dula nageng ya Morena; Efuraimi o tlo boela Egipita, mme kua Asuri ba tlo yo ja seila.

4Ba ka se ipege go Morena ka morara; a ka se kgahlwe ke didimo tša bona; ba tlo hwetša e le dijo tša mahloko, mme ba ba di jago ba ja seila; gobane e tlo ba tša tlala ya bona, di sa fihle Ntlong ya Morena.

5Le tlo dira bjang mohla wa phuthego, mohla wa monyanya wa Morena?

6Gobane šedio: Le ge ba khudušwa ke tšhwalalano, naga ya Egipita e tlo ba phutha, motse wa Mofo wa ba wa mabitla a bona; botšhepi bja bona bja silifera bo tlo apešwa ditshehlo, malapeng a bona go tlo mela meetlwa.

7Go fihlile mehla ya dikotlo, go tla mehla ya tefetšo; Isiraele o tlo lemoga ge moporofeta e se lešilo, mme monna wa moya wa Modimo e se legafa; molato wa gago le tše o hloelwago tšona di godile.

8Efuraimi o lalela Modimo wa ka; mme moporofeta ba mo thea mo tseleng tša gagwe tšohle; mo Ntlong ya Modimo wa gagwe go bonaba.

9Ba itshentše o mobe bjalo ka mehleng ya Gibea (Baahl. 19:14-30). Molato wa bona a ka se o lebale; o tlo lefetša dibe tša bona.

10Isiraele ke mo hweditše a etša nkgwa ya morara lešokeng; botataweno ke ba hweditše ba etša mogo wa serake; fela bona ba tsena go Baali Peoro; ba ikgethela tša dihlong, ba hlaswega bjalo ka yena moratwa eo wa bona.

11Letago la Efuraimi le tlo tloga bjalo ka nonyana ge e fofile, go tlo hlokwa pelego le mpa le go ima.

12Le ge ba ka godiša bana, ke tlo ba amoga bona gwa šala go se motho. Kotsi e tlo ba wela mohla ke ba lahla.

13Efuraimi e sa le mola ke mmona, o swana le lentswe le le medilego mafulong; fela bjale bana ba gagwe o ba iša go mmolai.

14Morena ba nee! Mme o tlo ba neang? Ba nee mpa ya boopa le matswele a pšhelego.

15Mabobe a bona ka moka ke a kua Giligala; ke moo ke ba hloilego ka baka la bobe bja tiro tša bona. Nka se hlwe ke ba rata; bagolo ba bona ka moka ke bahlanogi.

16Efuraimi o bodile thito; medu e omile, ga ba enywe selo; le ge ba ka tswala, ke tlo lesa banabaratwa ba bona ba hwa.

17Modimo wa ka o a ba lahla, gobane ba gana go mo kwa; bjale e tlo ba batimedi gare ga ditšhaba.

← Chapter 8 Jump to: Chapter 10 →