Lamentations 1

Sotho 1951 (BIBELE)

Jump to: Chapter 2 →

1O reng o dutše o nnoši motse wola wa mabotho! O reng e le mohlologadi, e bego e le o mogolo gare ga ditšhaba, e le mohumagadi gare ga dilete; bjale ke lethopša.

2O lala o lla bošego, dithama di ela megokgo. O hloka mohomotši go ba ba bego ba go rata. O hladilwe ke bagwera. Ba go fetogetše manaba.

3Juda o faletše ka mohlako, le ka bothopša bjo bogolo, a yo dula gare ga bantle, a hloka makhutšo. Bahlomari bagwe bohle ba mo swere a patikegile.

4Tsela tša Tsione di wetše kgwahlana ka go hloka ba ba tlago ka menyanya. Kgoro tša gona tšohle ke marako. Bomphamodimo ba gona ke ba go rotla. Banenyana ba gona ke ba go lla; mme wona motse di o befetše.

5O bušwa ke ba ba o hloilego; go thaba manaba a wona. Ke gona go otlwa ke Morena ka ge o atišitše dikarogo; bana ba gona ba tloga ba thopilwe ke lenaba.

6Ngwanana wa Tsione o tlogilwe ke botšhephi bjohle; bakgoma ba gona ba etša diphala di hloka mafulo; ba sepela ba ikgoga ge go fihla bahlomari.

7Jerusalema mehleng yeno ya go hlaka le go tšhoga o elelwa mabothakga ohle a a bego a na nao mehleng yela. Bjale batho ba gona ba tekotšwe ke matsogo a manaba go se monamoledi. Bahloi ba wona ge ba di bona ba sega ge o šaraketšwe.

8Jerusalema o dirile sebe se segolo ge bjale a le selalogi. Ba ba bego ba o reta bjale ba o nyatša, ka gobane ba o bone o hlobotše, mme o dula o fulere o fegelwa.

9O sa rwele tšhila tša wona ka mameno a dikobo; ga wa tseba mo di bego di o iša gona, wa wa ka mokgwa o makatšago. Ga o na mohomotši. Morena, mpone ka mo ke hlakago ge lenaba le ikgogomoša.

10Lenaba le ntšhitše letsogo la tšea matsaka ka moka a felo fa. O di bone ge Ngwakong wa gona o mokgethwa go tlile bantle, bona bao o kilego wa iletša wa re ba se ke ba tsena phuthegong ya gago.

11Ba motse wo, bohle ba fegelwa ba lla bogobe. Ba ntšhitše dipheta tša bona, ba reka selewa sa go ka tsoša bophelo. Morena, gadia o bone ge ke fetogile segoboga.

12Hee lena bafeti ka moka! Lebelelang le bone ge go ka ba le bohloko bo etšago bja ka, bjo bo nkwetšego, nna mootliwa wa Morena wa mohla a tuka bogale.

13O romile mollo a le kua magodimong, wa ntsena mašapong; maoto aka o a tantše ka molaba a nkgomiša, a ntira lešope, molwetši wa ka mehla.

14Atla tšagwe di dirile joko ka bosenyi bjaka; bo tlemilwe mme bja mpewa molaleng; mme bja mphetša maatla. Mong wa ka o nkgafetše matsogong a ba ke sa kgonego go lwa nabo.

15Ba dinatla ba ke bego ke na nabo, mong wa ka o ba fedišitše bohle; o epile solo la go robaganya masogana a ka; banna ba Juda o ba pšhatlile.

16Ke tšona di ntirago wa mahlo a go lla, wa mahlo a go ela meetse. Ga go batamele mohomotši, wa go ka tsoša phelo bja ka. Bana ba ka ba senyetše, gobane lenaba le na le maatla.

17Tsione o ntšha matsogo a gagwe, mme go hlokwa wa go mo homotša. Morena o rapile manaba, a tla a dika. Jakobo, Jerusalema a fetoga selalogi gara bona.

18Morena yena ga a foša; ke nna ke bego ke nyatša molomo wa gagwe. Hee lena ditšhaba tšohle, kwang! Bonang mahloko a ka; banenyana ba ka le masogana a ka ba ile bothopša.

19Ke biditše bao ba bego ba nthata; ba napa ba ntahla. Bomphamodimo ba ka le bagolo ba ka ba feletše fa motseng mola ba nyaka dilewa tša go ka tsoša maphelo a bona.

20Morena, mpone, ge ke tlaletšwe; fa teng ga ka go a bela; e phekgogile pelo ya ka ka moetlo; ke be ke le senganganganga; mme kua ntle lerumo la ntlhakola bana, mo gae ya ba lehulebe.

21Ba nkwele ge ke fegelwa, gwa se be le a nkhomotšago. Manaba a ka ka moka a kwele ge ke welwa ke dikotsi, a thaba a re go dirile wena. Tliša tšatši leo o le boletšego, ba tle ba swana le nna.

22Dibe tša bona ka moka a di tle pele ga gago, o tle o ba dire se o ntirilego sona ka baka la karogo tšaka tšohle; gobane diphegelo tšaka ke tše kgolo, ke swa pelo.

Jump to: Chapter 2 →