Lamentations 5

Sotho 1951 (BIBELE)

← Chapter 4 Jump to:

1Morena, se lebale tše re dirilwego tšona; gadia o bone kgobogo ya rena.

2Naga ya gešo e tšerwe ke ba šele; nyako ya rena e dulwa ke ba mathoko.

3Re dišuana, ga re ne tatawešo; bommawešo ke bahlologadi.

4Meetse a rena re a nwa re a reka ka tšhelete; dikgong tša rena re di bona ka go reka.

5Bahlomari ba re swara ka melala; ge re lapa ga re dumelelwe go ka khutša.

6Re adibetša atla tša rena Egipita le Asuri, re re re hore bogobe.

7Borrawešo ba sentše, mme ba ile; mme rena re rwele melato ya bona.

8Re bušwa ke bahlanka; mme ga re na wa go ka re namolela diatleng tša bona.

9Dijo tša rena re di tliša fa ka go gafela bophelo marumo šokeng.

10Letlalo la rena le swile wa sebešo ka mollo wa tlala.

11Basadi ba Tsione, baneyana ba metseng ya Juda, ba katilwe.

12Bakgoma ba ba bolaile ka diatla tša bona; sefahlogo sa mogolo ga se sa godišwa.

13Masogana a rwadišwa lwala; bašimanyana ba hlahlatha ka go robja ke dikota.

14Kgorong ga go sa dula ba bagolo, masogana a lesitše go letša makope a bona.

15Lethabo mo pelong tša rena le tlogile; dikoša tša rena di fetogile dillo.

16Seala sa hlogong ya rena se wetše fase. Joo! Ke ka gobane re sentše.

17Ke tšona di lwadišago pelo tša rena; ke tšona di re fifatšago mahlo.

18Ke ka gobane thaba ya Tsione ya ba lešope mo go sepelago diphukubje.

19Mme wena Morena o dutše o le gona neng le neng. Sedulo sa gago se hwetšwa se le gona ke merafo le merafo.

20O reng o re lebetše moka? O reng o lahla go ya go ile?

21Morena re gomiše, re boele go wene; e be gona go boa ga rena. Buša o re tlišetše mehla e etšago yela ya mohlamonene.

22A o ka re lahla wa go lahla? A o ka re ngala ya ba moka?

← Chapter 4 Jump to: