Leviticus 18

Sotho 1951 (BIBELE)

← Chapter 17 Jump to: Chapter 19 →

1Morena o boletše le Moshe a re:

2Bolela le Baisiraele o re: Nna Morena ke Modimo wa lena.

3Le se ke la dira tša ba naga ya Egipita ye le kilego la dula go yona, le ge e le tša ba naga ya Kanana ye ke le išago go yona; le se ke la di dira, le se ke la tšea mekgwa ya bona.

4Le dire se se laetšwego ke nna, le hlokomele melao ya ka, le sware ka tsela ya yona. Ke nna Morena Modimo wa lena.

5Hlokomelang melao ya ka le ditaelo tša ka, tše e rego ge motho a dira ka mo di bolelago, a phela ka tšona. Ke nna Morena.

6Motho a se ke a batamela mosadi e lego motswalo wa gagwe a mo hlobodiša. Ke nna Morena.

7O se ke wa hlobodiša tatago le ge e le mmago; ke mmago, o se ke wa mo hlobodiša.

8O se ke wa hlobodiša mosadi wa tatago; ke go hlobodiša tatago.

9O se ke wa hlobodiša kgaetšedi ya gago e lego morwedi wa tatago, le ge e le morwedi wa mmago; e ka ba e a tswaletšwego gae goba e a tswaletšwego go šele. O se ke wa mo hlobodiša.

10O se ke wa hlobodiša morwedi wa morwa wa gago, le ge e le morwedi wa morwedi wa gago; ke go itlhobodiša.

11O se ke wa hlobodiša morwedi wa mosadi wa tatago, e a tswetšwego ke tatago; o se ke wa mo hlobodiša.

12O se ke wa hlobodiša kgaetšedi ya tatago; o tswetšwe le tatago.

13O se ke wa hlobodiša monyanana wa mmago, gobane o tswetšwe le mmago.

14O se ke wa hlobodiša ngwanabotatago; o se ke wa batamela mosadi wa gagwe; ke mmago.

15O se ke wa hlobodiša ngwetši wa gago; ke mosadi wa morwa wa gago; o se ke wa mo hlobodiša.

16O se ke wa hlobodiša mosadi wa monnago; ke go hlobodiša monnago.

17O se ke wa hlobodiša mosadi le morwedi wa gagwe, goba wa morwedi wa gagwe; o se ke wa mo tšea wa mo hlobodiša; ke metswalo, e ka ba bohlola.

18O se ke wa tšea monnago mosadi wa gago wa tsoša lehufa ge o mo hlobodiša hleng ga gagwe a sa phela.

19Le gona o se ke wa batamela mosadi ge a sa hlapile wa mo hlobodiša.

20O se ke wa robala le mosadi wa wa geno; e tlo ba go itšhilafatša ka go dira tše bjalo.

21Ngwana wa gago o se ke wa mo gafela Mologo, gore o se goboše leina la Modimo wa gago. Ke nna Morena.

22O se ke wa robala le monna wa mo dira mosadi. Ke botšopša.

23O se ke wa robala le seruiwa wa itšhilafatša ka go dira tše bjalo; le mosadi a se ke a ema a goelwa ke seruiwa; ke bohlola bjo bo tšhošago.

24Le se ke la itšhilafatša ka tše bjalo; ka gobane ba ba itšhilafaditšego ka tšona tšeo ka moka ke ba ditšhaba, ba ke tlogo ba raka ge le fihla.

25Naga e bile e tšhilafetše; ke tlo latiša bokgopo bja yona mo go yona. Naga e tlo hlatša beng ba yona.

26Ge e le lena, hlokomelang melao ya ka le ditaelo tša ka; le se sengwe sa botšopša bjoo se se ke sa dirwa ke wa geno, e ka ba e a tswaletšwego gae goba modiiledi e a diiletšego go lena.

27Ka gobane botšopša bjoo bo dirilwe ka moka ke batho ba naga yeo, mola le sešo la fihla; mme naga e tšhilafetše.

28Bo ileng, gore naga e se tlo hlatša le lena ge le ka e tšhilafatša, bjalo ka ge e hlatša ditšhaba tšeo le di hwetšago ge le fihla.

29Ka gobane e a dirago se sengwe sa botšopša bjoo ka moka, ke tlo mo ripa ka mo ntšha setšhabeng sa gabo.

30Lena hlokomelang tše di beilwego ke nna, le hlaswe mekgwa ya botšopša ye e dirilwego le sešo la fihla, gore le se ke la itšhilafatša ka yona. Ke nna Morena Modimo wa lena.

← Chapter 17 Jump to: Chapter 19 →