Leviticus 20

Sotho 1951 (BIBELE)

← Chapter 19 Jump to: Chapter 21 →

1Morena o boletše a re:

2Botša Baisiraele o re: Moisiraele ofe le ofe, goba o šele e a diiletšego go Baisiraele, e a ntšhetšago Mologo ngwana wa gagwe, o tlo hwa lehu; setšhaba sa naga ye se mo thume ka maswika.

3Gomme nna, motho e mobjalo ke tlo mo hlaba ka mahlo, ka ba ka mo fediša mo setšhabeng sa gabo, ka gobane o neetše Mologo ngwana wa gagwe; o tšhilafatša sekgethwa sa ka, o goboša leina la ka le lekgethwa.

4Ge setšhaba sa naga yeo se sa re selo ge motho a ntšhetša Mologo ngwana wa gagwe, ge se sa mmolaye,

5gona e tlo ba nna ke tlo go hlaba motho eo ka mahlo, le ba moloko wa gagwe, ka ba ka mo fediša setšhabeng sa gabo, le bohle ba ba otswitšego ba latela Mologo.

6Ge motho a eya go ba maphalo, le go dinoge, a ba latela bootsweng bja bona, ke tlo mo hlaba ka mahlo, ka ba ka mo fediša setšhabeng sa gabo.

7Ikgetheng le be ba bakgethwa, ka gobane ke nna Morena Modimo wa lena.

8Hlokomelang melao ya ka, le dire se se bolelwago ke yona; ka gobane ke nna Morena; ke le dira ba bakgethwa.

9E a rogago tatagwe goba mmagwe a hwe lehu. O rogile tatagwe le mmagwe; o na le molato wa madi.

10Ge motho a dira bootswa le mosadi wa e mongwe, a senya mosadi wa wa gabo, monna eo le mosadi eo wa seotswa ba hwe lehu.

11Ge monna a ka robala le mosadi wa tatagwe, o hlobodiša tatagwe, bona ba hwe lehu ka babedi; ba ne molato wa madi.

12Motho e a robalago le ngwetši ya gagwe, ba hwe lehu ka babedi; ba dirile bohlola; ba ne molato wa madi.

13Monna e a robalago le monna e mongwe ka mokgwa wa go robala le mosadi, ba dirile botšopša; ba hwe lehu; ba ne molato wa madi.

14Ge monna a ka tšea mosadi, mme a tšea le mmago mosadi yo, gona yena le basadi bao ka babedi ba fišwe ka mollo, gore mo go lena go se ke gwa ba le bohlola.

15Ge monna a ka robala le seruiwa, a hwe lehu; le sona seruiwa se bolawe.

16Le mosadi ge a ka batamela seruiwa, a goelwa ke sona, gona o bolaye mosadi eo le seruiwa seo; o na le molato wa madi, le seruiwa se nawo.

17E a tšeago kgaetšedi ya gagwe, morwedi wa tatagwe goba wa mmagwe, a robala nae ba kwane, ke leepo; o tlo fedišwa, ba gabo ba tlo di bona. O hlobodišitše kgaetšedi; o obile molato.

18Ge monna a robala le mosadi a sa hlapa, a mo hlobodiša a na le madi a teng, le mosadi a hlobodiša madi a teng bobedi bja bona ba fedišwe setšhabeng sa gabo.

19O se ke wa hlobodiša mmangwanago goba rakgadiago, ka gobane ke go hlobodiša madi eno, ke go oba molato.

20Ge monna a ka robala le mosadi wa ngwanabotatagwe, ba tlo rwala sebe sa bona; ba tlo hwa ba se na bana.

21Ge monna a ka tšea mosadi wa ngwanabo, ke bohlola; o hlobodiša ngwanabo; ba tlo hloka bana.

22Hlokomelang melao ya ka ka moka, le ditaelo tša ka ka moka; le dire ka mo di bolelago ka gona; gore naga ye ke le išago go yona gore le dule go yona, e se ke ya le hlatša.

23Le se ke la swara ka tsela ya ditšhaba tše ke tlogo di raka ge le fihla; ka gobane bona ba dirile dilo tšeo, gomme ke belekegile ka tšona.

24Bjale lena ke le boditše ka re: Le tlo tšea naga yeo ya bona; mme nna ke tlo le nea naga yeo ya ba ya lena, naga e elago maswi le nose. Ke nna Morena Modimo wa lena; ke nna ke le hlaotšego mo gare ga ditšhaba.

25Le lena hlaolang diphoofolo tše di sekilego go tše di sa sekegago, le dinonyana tše di sa sekegago go tše di sekilego; gore le se itšhilafatše ka diphoofolo le ka dinonyana le ka digagabi tša lefase, tše ke di hlaotšego ka re le di ile.

26Le be bakgethwa ba ka, ka gobane nna Morena ke e Mokgethwa; gomme ke hlaotše lena mo ditšhabeng gore le be ba ka.

27Ge monna goba mosadi ba na le moya wa malopo le ge e le wa bonoge, ba hwe lehu; ba thungwe ka matlapa: ba obile molato wa madi.

← Chapter 19 Jump to: Chapter 21 →