Leviticus 23

Sotho 1951 (BIBELE)

← Chapter 22 Jump to: Chapter 24 →

1Morena o boletše le Moshe a re:

2Bolela le Baisiraele o re: Menyanya ya Morena ye le tlogo re ke pitšokgethwa, e lego menyanya ya ka, še:

3Mediro a e dirwe ka matšatši a selelago; la go šupa lona ke la go khutša sa ruri, ke la pitšokgethwa. Go se ke gwa ba le modiro wo le o dirago ka lona; ke la Sabatha ya Morena mo meagong ya lena yohle.

4Yona menyanya ya Morena ya pitšokgethwa, ye le tlogo biletšwa go yona ka mabaka a yona, še:

5La lesome le metšo e mene la kgwedi ya pele, mantšiboa a lona, e be Paseka ya Morena.

6La lesome le metšo a fetšago seatla la kgwedi yeo ke la monyanya wa Morena wa magobe a sa omelwago. Le je magobe a se nago komelo matšatši a šupago.

7Ka la pele le kgobele pitšokgethwa; Le se ke la ba la swara modiro.

8Le fetše matšatši a šupago le batametša tša mello ya Morena; mme la go šupa e be la pitšokgethwa; le se ke la ba la swara modiro.

9Morena o boletše le Moshe a re:

10Bolela le Baisiraele o re: Ge le tlo ba le fihlile nageng ye ke le fago yona, ge le buna mašemo a yona, gona le tlišetše moperisita ngata ya thakangwaga.

11Ngata yeo o tlo e ekara pele ga Morena, gore le thabelwe ka yona. A e ekare ka tšatši le le hlatlamago la Sabatha.

12Ka lona tšatši leo la go ekara ngata le hlabe kwana ye e se nago bosodi, ya ngwaga o tee, e be sehlabelo.

13Le tliše le sebego sa ntlatlana ya bupi bjo bo tšhetšwego makhura, e be sa mello ya Morena sa monko o bose, le sebego sa moetana wa beine.

14Ge le sešo la tliša ngata yeo ya seekaro, le se ke la ja bogobe, le ge e le masohlo, goba megollelo. A e be molao wa lena wa ka mehla go iša ditlogolong mo meagong ya lena mo go fela.

15Go tlogo ka tšatši leo la go hlatlama la Sabatha, la ngata ya seekaro, le bale dibeke tše di šupago tše di tletšego.

16Go fihla la go hlatlama Sabatha ya go šupa. Le bale matšatši a masome a mahlano; e be mo le tlišetšago Morena sebego sa tše mpsha.

17Le tliše magobe a tšwago nywakong ya lena, e be sebego sa seekaro, e be magobe a mabedi a a apeilwego ka bupi bjo bo tletšego leselwana, a apewe a omeletšwe. Ke tšona dithakangwaga tša Morena.

18Gotee le magobe ao le tliše dikwanyana tše di šupago, tše di se nago bosodi, tša ngwaga o tee; le dikgapana tše pedi; e be tša sehlabelo sa Morena. Di tle di na le dibego tša tšona tša dijo le tša dino, tša mello ya monko o bose wa Morena.

19Phoko e tee le e dire ya seloba; dikwanyana tše pedi e be tša sedimo sa seleboga.

20Moperisita a di ekare le magobe a dithakangwaga pele ga Morena; a a be tše kgethwa; a a be a moperisita gotee le dikwanyana tšeo.

21Ka lona tšatši leo le hlabe mokgoši wa go re go na le pitšokgethwa. Le se ke la ba la swara modiro. E be molao mo meagong ya lena mo go fela go iša ditlogolong tša lena.

22Ge le buna mašemo a lena, o šie mathoko a tšhemo ya gago, o se ke wa budutša, o šadišetše badiitšana le baeti. Ke nna Morena Modimo wa lena.

23Morena o boletše le Moshe a re:

24Bolela le Baisiraele o re: Ka la pele la kgwedi ya go šupa go be le Sabatha ya lena ya kgopotšo, ya meletšo ya phalafala, ya pitšokgethwa.

25Le se ke la ba la swara modiro; le batametše tša mello ya Morena.

26Morena o boletše le Moshe a re:

27Ka la lesome la kgwedi ya go šupa go be le letšatši la poelanyo, la pitšokgethwa; le ikokobetše meoyeng ya lena, le batametše tša mello ya Morena.

28Ka lona tšatši leo le se ke la ba la swara modiro; ka gobane ke letšatši la poelanyo, la gore le boelanywe le Modimo wa lena.

29Ka gobane e a sa ikokobetšego ka lona letšatši leo, o tlo ripiwa setšhabeng sa gabo.

30Motho e a kago swara modiro ka lona tšatši leo, ke tlo mo senyetša ruri setšhabeng sa gabo.

31Le se ke la ba la swara le modiro. A e be molao wa ka mehla go iša ditlogolong tša lena mo meagong ya lena mo go fela.

32E be Sabatha ya lena ya go khutša, le ya gore le ikokobetše meoyeng ya lena ka la senyane la kgwedi ka mantšiboa; e be Sabatha go tloga ka mantšiboa go fihla ka mantšiboa a la ka moswana.

33Morena o boletše le Moshe a re:

34Bolela le Baisiraele o re: Ka la lesome le metšo e mehlano la kgwedi ya go šupa go direlwe Morena monyanya wa mešaša matšatši a šupago.

35Ka la pele go be le pitšokgethwa. Le se ke la ba la swara modiro.

36Le fetše matšatši a šupago le batametša tša mello ya Morena; ka la seswai go be le pitšokgethwa ya lena; mme le batametše tša mello ya Morena; ke la mabothelele; le se ke la ba la swara modiro.

37Ke yona menyanya ye le tlogo e dira la re ke pitšokgethwa, ke ya go batametša tša mello ya Morena, dihlabelo le dibego, le didimo, le dinwewa, la di batametša ka lebaka la tšona.

38Ke tša ka ntle ga disabatha tša Morena, le ka ntle ga dineo tša lena tša keno tša lena ka moka, le ka ntle ga tša go ithapa, tše le di tlišetšago Morena.

39Le gona ka tšatši la lesome la metšo e mehlano la kgwedi ya go šupa, ge le kgobetše dienywa tša naga, le dire monyanya wa Morena wa matšatši a šupago. La pele ke la Sabatha, le la seswai e be la Sabatha.

40Ka la pele le tšee dienywa tša dihlare tše botse, le makala a melala, le a mehlware ya makala a teteanego, le a meretlwanokane, gore le ithabele pele ga Morena Modimo wa lena matšatši a šupago.

41Monyanya wo wa matšatši a šupago le o binele Morena ka ngwaga o mongwe le o mongwe; e be molao wa lena wa ka mehla go iša ditlogolong tša lena. Le bine monyanya wo ka kgwedi ya go šupa.

42Le fetše matšatši a šupago le dutše mešašeng; bohle ba setšhaba sa Isiraele ba dule mešašeng.

43E be gore ditlogolo tša lena di tsebe gore nkile ka dudiša Baisiraele mešašeng mola ke ba ntšhitše nageng ya Egipita. Ke nna Morena Modimo wa lena.

44Gomme Moshe a anegela Baisiraele tšona tše tša menyanya ya Morena.

← Chapter 22 Jump to: Chapter 24 →