Zechariah 10

Sotho 1951 (BIBELE)

← Chapter 9 Jump to: Chapter 11 →

1Kgopelang Morena, a le fe dipula bakeng la kgogolamoko. Yena Morena motšweletša dikgadima a nee batho pula tša medupi le dibjalo tša mašemo.

2Gobane dipheko di bolela tša lefela, didupe di dupa tša maaka, di bolela tša diloro tša go fora; e fo ba go gokeletša batho. Ke ka tšona ba etša dinku ba timela, ba hlaka ba hloka modiši.

3Badiši ke bona ba ke tlogo ba galefela, gobane Morena wa mašaba o hlola mohlape wa gagwe, moloko wa Juda; o ba dira pitsi yagwe ya senatla tlhabanong.

4Go bona go tlo tšwa swika la motheo, thekgo ya ntlo, bora bja tlhabano, le baetapele bohle.

5Ba tlo ka bagale, bagataki ba maraga a mekgoba tlhabanong; ba tlo hlabana, gobane Morena o na le bona; ba tlo nyatšiša banamedi ba dipitsi.

6Ba ga Juda ke tlo ba fa maatla; ke tlo namolela ba moloko wa Josefa. Ke tlo ba goroša ka gobane ke ba gaugetše. Ba tlo ba ba sa kago ba lelekwa ke nna; ka gobane Modimo wa bona ke nna Morena; ke tlo ba kwa.

7Ke mo ba Efuraimi ba tlogo ba bagale, ba dipelo tša lethabo le kakago la morara; bana ba bona ba tlo di bona ba thaba, dipelo tša bona tša thaba Moreneng.

8Ke tlo ba bitša ka ba botha, ka gobane ke ba lopolotše; ba tlo ata boka mola ba sa atile.

9Ke tlo ba atlatša le ditšhaba. Le gona kua kgole ba tlo nkgopola; ba tlo phela le bana ba bona, ba ba ba boa.

10Ke tlo ba gomiša kua nageng ya Egipita; ke tlo ba kgobela ba etšwa Asuri, ka ba tliša fa nageng ya Gileada le ya Libanoni; mme e ka se ba lekane.

11O tlo sela watle la dikotsi, a tia maphoto a lewatleng; madiba ohle a dinoka a tlo pšhešwa; go tlo ba go kokobetše maikgogomošo a Asuri; mme molamo wa Egipita o tlo široga.

12Ke tlo ba fa maatla ka Morena, ba tšea ka tsela ya leina la gagwe. -- O realo Morena.

← Chapter 9 Jump to: Chapter 11 →