Zechariah 14

Sotho 1951 (BIBELE)

← Chapter 13 Jump to:

1Tsebang, go tla tšatši la Morena, la go abaganya dithebola tšago mo motseng wa gago.

2Ke tlo rapa bantle bohle ba tla fa Jerusalema ba lwa; motse o tlo hulwa; nywako e tlo thopša; mme basadi ba tlo senywa, mphapa ka moka wa motse wa išwa bothopša; mme batho ba ba tlogo šala ba ka se fedišwe motseng.

3Mme Morena o tlo tšwela tšhaba tšeo dira ka mokgwa wa gagwe wa go tsena ntwa mohla wa tlhabano.

4Maoto a gagwe a tlo gata thaba ya mehlware mohla woo, thaba ya go okamela motse wa Jerusalema. Thaba yeo e tlo fatoga go tšwa bohlabela go ya bodikela, ya tlo ba moedi o mogologolo, hlakore le lengwe la thaba le ile leboa, le lengwe le ile thoko ya borwa.

5Ke mo le tlogo khuta moeding wa thaba tša ka, gobane moedi wa dithaba tšeo o tlo goma ka Atsele. Le tlo tšhaba wa mohla wa tšhišinyego yela ya mehleng ya Usia kgoši ya Juda. E tlo ba gona go tlago Morena, yena Modimo wa ka a na le bakgethwa bagwe bohle.

6Tša mohla woo šedi: Go ka se be le masa; le dietša tše botsana di tlo tima.

7E tlo ba tšatši le tee la go tsebja ke Morena, le se nago mosegare le bošego. Seetša se tlo ba gona ka mantšiboa.

8Mohla woo meetse a phelago a tlo ela a etšwa Jerusalema, a mangwe a fologela lewatleng la bohlabela, a mangwe a fologela lewatleng la bodikela; gwa tlo ba bjalo selemo le marega.

9Gomme Morena e tlo ba yena Kgoši ya lefase lohle. Mohla woo Morena e tlo ba yena o tee a nnoši, le leina lagwe e tlo ba le tee.

10Naga ka moka e tlo ba molala, go tloga ka Geba go fihla Rimoni thoko ya borwa bja Jerusalema. Motse wa Jerusalema o tlo phagamišwa wa dula felo ga wona, go tloga ka kgoro ya Benyamini, go fihla kgorong ya sekhutlo, go tloga ka sebo sa Hananiele go fihla bofotlelong bja mošate.

11Mme Jerusalema go tlo dulwa go se ne mahlolakotsi; go tlo dulwa go iketlilwe.

12Gomme kotlo ya ge Morena a otla ditšhaba tša go tšwela motse wa Jerusalema dira še: Mebele ya bona e tlo bola ba sa eme ka dinao; le mahlo a bona a tlo bola a sa le hlogong; le maleme a bona a tlo bola a sa le ganong.

13Mohla woo ba tlo ba le mpherefere o mogolo wo o tšwago go Morena; ba tlo swarana ka diatla, ba hlabana matsogo a akgilwe.

14Le Juda o tlo lwa a le mo Jerusalema, mme menono ya ditšhaba tša mathoko e tlo phuthwa, ya tshipi e khubedu le e tshehla, le bontši bjo bogolo bja dikobo.

15Kotlo yeo e tlo otla le dipitsi, le meila, le dikamela, le dipokolo, le diruiwa ka moka mešašeng ya bona.

16Mme mašalela ka moka a ditšhaba tšeo di bego di hlabana le Jerusalema, a tlo rotoga ka nywaga yohle, a tla go lotšha Morena, yena Kgoši ya mašaba, ba tla ba bina monyanya wa mešaša.

17Ge gare ga meloko ya lefase go ka ba le moloko o sa rotogelego fa Jerusalema, wa gana go loth ša Morena yena Kgoši ya mašaba, wona moloko woo o tlo hloka pula.

18Ge meloko ya kua Egipita e sa rotoge ya tla fa, le yona e tlo hloka, ya tlo ba ya go tlelwa ke dikotlo tša Morena tša go otla bantle ba sa rotogego, ba gana go tla fa monyanyeng wa mešaša.

19Sebe sa Baegipita e tlo ba sona seo; e tlo ba sona sebe sa bantle bohle, ge ba sa rotoge ba tla monyanyeng wa mešaša.

20Mohla woo le matsaka a dipitsi a tlo ngwalwa gwa thwe: Ke tše kgethwa tša Morena! Le dipitša tša Ntlong ya Morena di tlo ka meruswi ye e tlago aletareng.

21Dipitša ka moka tša motse wa Jerusalema le tša Juda e tlo ba tše kgethwa tša Morena wa mašaba; mme bohle ba go ipega ka didimo, ba tlo tla ba tšea tšona ba apee ka tšona. Mohla woo fa Ngwakong wa Morena wa mašaba go ka se hlwe go eba le wa Mokanana.

← Chapter 13 Jump to: