2 Kings 1

Sotho 2000 (BIBELE Taba yea Botse)

Jump to: Chapter 2 →

1Ge Kgoši Ahaba wa Israele a hwile, naga ya Moaba e ile ya tsogela Israele maatla.

2Kgoši Ahasia wa Israele o ile a wa ka lefasetere la phapoši ya ka godimo ya mošate kua Samaria, gomme a gobala o šoro. Ka gona a roma batseta gore ba yo botšiša Baale-Sebubu, modimo wa motse wa Bafilista wa Ekrone, ge eba o tla fola.

3Eupša morongwa wa Morena a laela Eliya, moprofeta wa Tishbe, gore a ye a gahlanetše batseta ba Kgoši Ahasia, a re go bona: “Ke ka baka lang le yo botšiša Baale-Sebubu, modimo wa Ekrone? A ke ka gobane le gopola gore ga go Modimo mo Israele?

4Botšang kgoši gore Morena o re: ‘O ka se tsoge malaong a o robetšego go ona; ruri o tla hwa!’ ” Eliya a dira bjalo ka ge Morena a laetše,

5gomme batseta bale ba boela go kgoši. Kgoši a ba botšiša a re: “Le reng le goma?”

6Bona ba mo fetola ba re: “Re gahlaneditšwe ke monna yo mongwe, gomme a re botša gore re gome re tle re go botše gore Morena o re go wena: ‘Ke ka baka lang o roma batseta gore ba yo botšiša Baale-Sebubu, modimo wa Ekrone? A ke ka baka la gore o gopola gore ga go Modimo mo Israele? O ka se tsoge malaong a o robetšego go ona; ruri o tla hwa!’ ”

7Kgoši a ba botšiša a re: “Monna yoo e be e le motho wa mohuta mang?”

8Bona ba mo fetola ba re: “O be a apere seaparo sa matlalo a diphoofolo, a se tlemile lethekeng ka lerala.” Kgoši a kgotsa a re: “Ke Eliya!”

9Ke moo a romilego molaodi le bahlabani ba masome a a fetšago seatla gore ba yo tšea Eliya. Molaodi yoo a rotogela go yena moo a bego a dutše godimodimo ga thabana gomme a re go yena: “Monna wa Modimo, kgoši o re o theoge.”

10Eliya a mo fetola a re: “Ge eba ke nna monna wa Modimo, a mollo o theoge legodimong mme o go tšhume le banna ba gago!” Gomme mollo wa theoga wa tšhuma molaodi yola le banna ba gagwe.

11Kgoši a roma molaodi yo mongwe le banna ba gagwe ba masome a mahlano. Molaodi yoo a rotoga a fihla a re go Eliya: “Monna wa Modimo, kgoši o re o theoge ka pela!”

12Eliya a mo fetola a re: “Ge eba ke nna monna wa Modimo, a mollo o theoge legodimong mme o go tšhume le banna ba gago!” Gomme mollo wa Modimo wa theoga wa tšhuma molaodi le banna ba gagwe.

13Kgoši a roma molaodi yo mongwe le banna ba masome a mahlano gape. Molaodi yoo a namela thabana, a fihla a khunama pele ga Eliya, a mo kgopela a re: “Monna wa Modimo, hle, ntšhokele, o šokele le banna ba ba masome a mahlano, o se ke wa re bolaya!

14Balaodi bale ba bangwe ba babedi le banna ba bona ba bolailwe ka mollo wo o tšwago legodimong; fela hle, nna nke o nkgaugele!”

15Morongwa wa Morena a re go Eliya: “Theoga naye, o se ke wa mmoifa.” Ka gona Eliya a ya le molaodi yoo go kgoši

16mme a re go yena: “Morena o re: ‘Ka gobane o romile batseta gore ba yo botšiša Baale-Sebubu, modimo wa Ekrone, mo nkego ga go Modimo mo Israele yo o ka mmotšišago, o ka se tsoge malaong a o robetšego go ona; ruri o tla hwa!’ ”

17Ahasia o ile a hwa, bjalo ka ge Morena a be a boletše ka Eliya. O be a se na le morwa, ka gona Joramo, morwarragwe, a mo hlatlama bogošing ngwageng wa bobedi wa pušo ya Joramo, morwa wa Joshafate, kgoši ya Juda.

18Tše dingwe tše Kgoši Ahasia a di dirilego di ngwadilwe mo go Ditaba tša magoši a Israele.

Jump to: Chapter 2 →