2 Kings 13

Sotho 2000 (BIBELE Taba yea Botse)

← Chapter 12 Jump to: Chapter 14 →

1Ngwageng wa masome a mabedi a metšo ye meraro wa ge Joase, morwa wa Ahasia, a buša Juda, Joahase, morwa wa Jehu, e ile ya ba kgoši ya Israele, gomme a buša a le Samaria mengwaga ye lesome le ye e šupago.

2Go no swana le Kgoši Jerobeamo o ile a dira dibe pele ga Morena, a diriša le Baisraele dibe, mme a fela a di kgomaretše.

3Ka gona Morena a tukela Baisraele bogale, gomme a ba gafela diatleng tša Kgoši Hasaele wa Siria le morwa wa gagwe, Benhadade, mehleng ya pušo ya Joahase.

4Eupša Joahase a kgopela kgaugelo go Morena, gomme Morena, ka ge a be a bona bošoro bjo kgoši ya Siria e bego e gateletše Baisraele ka bjona, a kwa thapelo ya gagwe.

5Morena a romela Baisraele mohlakodiši yo a ilego a ba lokolla go Basiria, gomme Baisraele ba phela ka khutšo go swana le pele.

6Eupša ba se ke ba tlogela dibe tšela Kgoši Jerobeamo a bego a ba diriša tšona, gomme ba no fela ba di dira; le gona kota ya borapedi ye e bego e le Samaria ba se ke ba e rema.

7Joahase o be a se na le madira ao a šetšego ntle le banamedi ba dipere ba masome a mahlano, le dikoloi tša ntwa tše lesome, le banna ba go sepela ka maoto ba dikete tše lesome, ka gobane kgoši ya Siria o be a bolaile ba bangwe, a ba gataketše fase bjalo ka lerole.

8Tše dingwe tše Joahase a di dirilego, gotee le ditiro tša bogale bja gagwe, di ngwadilwe mo go Ditaba tša magoši a Israele.

9O ile a ithobalela le botatagwe, mme a bolokwa Samaria, gomme morwa wa gagwe, Joase, a mo hlatlama bogošing.

10Ngwageng wa masome a mararo a metšo ye e šupago wa pušo ya Kgoši Joase wa Juda, Joase, morwa wa Joahase, e ile ya ba kgoši ya Israele, gomme a buša a le Samaria mengwaga ye lesome le ye e selelago.

11Le yena a dira dibe pele ga Morena go swana le Kgoši Jerobeamo yo a dirišitšego Baisraele dibe.

12Tše dingwe tše Joase a di dirilego, gotee le bogale bja gagwe ge a elwa le Kgoši Amatsia wa Juda, di ngwadilwe mo go Ditaba tša magoši a Israele.

13Joase o ile a ithobalela le botatagwe, mme a bolokwa mabitleng a mošate Samaria, gomme morwa wa gagwe, Jerobeamo, a mo hlatlama bogošing.

14Moprofeta Elisha o ile a swarwa ke bolwetši bjo bo bego bo tlile go mmolaya, gomme Kgoši Joase wa Israele a tla go mmona. A lla a re go yena: “Tate! Tate! O be o šireleditše Israele bjalo ka dikoloi tša ntwa le banamedi ba dipere!”

15Elisha a mmotša a re: “Tšea bora le mesebe.” Joase a di tšea

16gomme Elisha a mo laela gore a itokišetše go thunya. Kgoši a dira bjalo, gomme Elisha a bea diatla tša gagwe godimo ga diatla tša kgoši.

17Elisha a mo laela gore a bule lefasetere le le lebeletšego ka thoko ya Siria. Kgoši a le bula, gomme Elisha a re go yena: “Thunya mosebe woo!” Ge kgoši a seno o thunya, moprofeta a goa a re: “Ke wena mosebe wa Morena, woo ka wona a tlago fenya Siria. O swanetše go lwa le Basiria kua Afeke go fihlela o ba fediša.”

18Ke moka Elisha a botša kgoši gore a tšee mesebe yela ye mengwe a tie fase ka yona. Kgoši a tia fase ka yona gararo, gomme a lesa.

19Taba yeo ya befediša Elisha, gomme a re go yena: “O be o swanetše go ba o teile fase gahlano goba gatshela, ke moo o bego o tla fenyetša Basiria sa ruri; eupša bjale o tla ba fenya gararo fela.”

20Elisha a hwa gomme a bolokwa. Ngwaga wo mongwe le wo mongwe makoko a bahlakodi ba Bamoaba a be a šwahlela naga ya Israele.

21Ya re ka letšatši le lengwe batho ba bangwe ba Israele ba sa boloka mohu, ba bona le lengwe la makoko ao. Ba lahlela setopo sela ka lebitleng la Elisha gomme ba tšhaba. Ge setopo sela se seno kgwatha mašapo a Elisha, monna yola a boela a phela gomme a emelela.

22Kgoši Hasaele wa Siria o ile a gatelela Baisraele nakong ka moka ya pušo ya Joahase,

23eupša Morena a ba šokela mme a ba gaugela. A se ke a ba lesa ba fedišwa, gomme a ba thuša ka baka la kgwerano ya gagwe le Abrahama le Isaka le Jakobo. Ga se a ka a lahla setšhaba sa gagwe go fihlela le bjale.

24Ge Kgoši Hasaele wa Siria a hwile, morwa wa gagwe, Benhadade, a mo hlatlama bogošing.

25Ke moka Kgoši Joase wa Israele a fenya Benhadade gararo, gomme a thopolla metse yela e bego e thopilwe ke Benhadade nakong yela ya pušo ya Joahase, tatagoJoase.

← Chapter 12 Jump to: Chapter 14 →