2 Kings 18

Sotho 2000 (BIBELE Taba yea Botse)

← Chapter 17 Jump to: Chapter 19 →

1Ngwageng wa boraro wa ge Hosea, morwa wa Ela, e le kgoši ya Israele, Hiskia, morwa wa Ahase, ya ba kgoši ya Juda

2a na le mengwaga ye masome a mabedi a metšo ye e fetšago seatla, gomme a buša a le Jerusalema mengwaga ye masome a mabedi a metšo ye senyane. Mmagwe e be e le Abi, morwedi wa Sakaria.

3Hiskia a dira tše di kgahlago Morena, a swana le Kgoši Dafida, rakgolokhukhu wa gagwe.

4A phušola dintotoma tšeo go tšona go bego go khunamelwa medimo ya diswantšho, a kgereša dikokwane tša maswika tša borapedi, a rema le dikota tša borapedi. A pšhatlaganya le noga yela ya mphiri ye e bego e dirilwe ke Moshe e bitšwa Nehushtane. Go fihlela ka nako yeo setšhaba sa Israele se be se e hlompha ka go e tšhumela diorelo.

5Hiskia yena a bota Morena Modimo wa Israele; Juda e be e se ya ka ya ba le kgoši ye e swanago le yena pele ga gagwe, mme le ka morago ya se ke ya ba gona.

6Yena o ile a kgomarela Morena a se ke a mo tlogela le gatee, a phetha ditaelo ka moka tše Morena a bego a di file Moshe.

7Ka gona Morena a ba le yena, gomme a atlega go tšohle tše a di dirago. A tsogela kgoši ya Asiria maatla gomme a gana go ineela go yona.

8A fenya Bafilista gomme a šwahlela metsana ya bona ya ditora tša tlhapetšo le metse ye megolo ye e ageleditšwego ka merako, go ba go yo fihla le Gasa le tikologong ya yona.

9Ngwageng wa bone wa pušo ya Hiskia, wo e bego e le ngwaga wa bošupa wa ge Hosea e le kgoši ya Israele, Kgoši Salmanasere wa Asiria o ile a hlasela Israele gomme a dikanetša motse wa Samaria.

10Ngwageng wa boraro a o thopa; woo e be e le ngwaga wa boselela wa pušo ya Hiskia, e bile e le ngwaga wa senyane wa pušo ya Hosea.

11Kgoši ya Asiria ya thopa Baisraele ya ba iša Asiria, gomme ya dudiša ba bangwe ba bona motseng wa Halage, ba bangwe nokeng ya Habore, seleteng sa Gosane, gomme ba bangwe ya ba dudiša metseng ya Media.

12Motse wa Samaria o ile wa wa ka gobane Baisraele ba be ba sa theeletše Morena Modimo wa bona, eupša ba be ba lahla kgwerano ye a bego a e dirile le bona, gomme ba nyatša melao ka moka ye e bego e beilwe ke Moshe, mohlanka wa Morena. Ba be ba hlokomologile melao yeo, ba sa e phethe.

13Ngwageng wa lesome le metšo ye mene wa pušo ya Kgoši Hiskia, Sanheribe, kgoši ya Asiria, a hlasela metse ya Juda ye e ageleditšwego ka merako, gomme a e thopa.

14Hiskia a roma batseta go Sanheribe, yo a bego a le Lakishe, gore ba mmotše ba re: “Ke go phošeditše; hle, gomela morago, gomme ke tla go loba ka se o se nyakago.” Kgoši a ba fetola ka go re Hiskia a mo romele silibera ya dikilokramo tše dikete tše senyane, le gauta ya dikilokramo tše makgolo a senyane.

15Hiskia a mo romela silibera ka moka ya ka Tempeleng le ya polokelo ya mošate;

16a ba a gopa le gauta ya mamating a Tempele le gauta ye yena mong a bego a manegile dikota tša mejako ka yona, a e romela go Sanheribe.

17Kgoši ya Asiria ya romela madira a mantši a tloga Lakishe go yo hlasela Hiskia kua Jerusalema; a be a laolwa ke balaodi ba gagwe ba bararo ba bagologolo. Ge ba fihla Jerusalema ba dula tseleng ye e bapetšego le tšhemo ya mohlatswi wa mašela, kgauswi le mokero wo o tlišago meetse a a tšwago letshaneng la ka godimo.

18Ke moo ba romilego batho go yo bitša Kgoši Hiskia, gomme bahlankedi ba bararo ba gagwe ba tšwa go yo ba gahlanetša. Bona e be e le Eliakime, morwa wa Hilkia, yo a bego a hlokometše mošate, le Shebna, mongwaledi wa mošate, le Joage, morwa wa Asafo, mongwaledi wa mmušo.

19Yo mongwe wa balaodi ba Baasiria a ba botšiša a re: “Kgošikgolo, kgoši ya Asiria, o nyaka go tseba gore ke eng se se dirago gore Hiskia a itshephe ka mokgwa wo.

20A Hiskia o gopola gore a ka boledišana le rena mola a swanetše go loga maano a ntwa le go rapa madira a gagwe? A o be a gopola gore o tla thušwa ke mang ge a be a tsogela Asiria maatla?

21O tshephile Egepeta gore e tla mo thuša, eupša go bota Egepeta go bjalo ka ge motho a ka tšea lehlaka a hlotlela ka lona – le tla thokgega la mo hlaba seatla. Kgoši ya Egepeta e bjalo ge motho a e tshephile.”

22Molaodi yoo wa Moasiria a tšwela pele a re: “Kgane le nyaka go mpotša gore le tshephile Morena Modimo wa lena? A ga se tšona dintotoma tše a khunamelwago go tšona le dialetare tša gagwe tše yena Hiskia a di kgerešitšego ge a botša batho ba Juda le ba Jerusalema gore ba direle fela aletareng ye e lego Jerusalema?

23Ke nyaka gore a phegišane le mong wa ka, kgoši ya Asiria, ka tsela ye: Ke tla mo fa dipere tše dikete tše pedi ge a ka kgona go ba le banna ba bakao ba ba tlago di namela!

24A bjale a ka kgona bjang go fenya molaodi yo monnyannyane ka maemo wa Moasiria? Gomme le ge go le bjalo o sa botile Egepeta gore e mo romele dikoloi tša ntwa le banamedi ba dipere!

25A o gopola gore ke hlasetše motse wo go tlo o senya e se thato ya Morena? Ke Morena ka boyena yo a mpoditšego gore ke hlasele naga ye ke e senye.”

26Eliakime le Shebna le Joage ba re go molaodi yoo: “Hle, mong wa rena, bolela le rena ka Searamo. Re a se tseba. O se ke wa bolela Seheberu; batho ba ba lego godimo ga morako ba a go kwa.”

27Molaodi yoo a ba fetola a re: “A le gopola gore mong wa ka o nthomile go tlo botša lena le mong wa lena fela dilo tše? Aowaowaa, ke botša le batho bale ba dutšego godimo ga morako, bao, bjalo ka lena, ba tlago ba ba ja mantle a bona, ba nwa le mehlapologo ya bona.”

28Ke moo molaodi a emeletšego gomme a goeletša ka Seheberu a re: “Theetšang se kgošikgolo, kgoši ya Asiria, e le botšago sona!

29O le botša gore le se ke la lesa Hiskia a le lahletša. Hiskia a ka se le phološe.

30Le gona le se ke la mo lesa a le goketša gore le tshephe Morena ge a re: ‘Ruri, Morena o tla re phološa, le gona motse wo o ka se gafelwe diatleng tša kgoši ya Asiria.’

31Le se ke la theetša Hiskia. Kgoši ya Asiria e le laela gore le tšwe motseng gomme le ineele. Ka moka ga lena le tla dumelelwa go ja diterebe tše di tšwago merareng ya lena, le mago a mego ya lena, le go nwa meetse a didiba tša lena,

32go fihlela ge kgoši a le khudušetša nageng ye e swanago le ya lena kudu, moo go lego dirapa tša merara gore le be le beine, le mabele gore le be le bogobe; ke naga ya makhura a mohlware le todi ya dinose. Ge le ka dira se a se bolelago, le ka se hwe, le tla phela. Le se ke la theetša Hiskia ge a le fora a re: ‘Morena o tla re hlakodiša.’

33Na medimo ya dinaga tše dingwe yona e kile ya phološa dinaga tša yona go kgoši ya Asiria?

34A e kae bjale medimo ya Hamate le ya Arpade? E kae medimo ya Sefarabaime le ya Hena le ya Aba? A go na le medimo ye e kilego ya phološa motse wa Samaria?

35Ke ofe modimo wo o kilego a phološa naga ya wona go kgoši ya rena? Bjale go ka kgonega bjang gore Morena a phološe Jerusalema?”

36Batho ba no ikhomolela bjalo ka ge Kgoši Hiskia a be a ba boditše, ba se ke ba fetola.

37Ke moo Eliakime le Shebna le Joage ba gagotšego diaparo tša bona ba nyamile, gomme ba ya ba begela kgoši se molaodi yola wa Asiria a se boletšego.

← Chapter 17 Jump to: Chapter 19 →