Ezra 5

Sukuma 2019

← Chapter 4 Jump to: Chapter 6 →

1Hūna lūūlū a bahangi a ba Hagai na Zakalia ng'witūnja o ng'wa Ido, būbahangīla a Bayudaya abo baalī ū mu sī ya Yuda nū mu nzengo gwa Yelusalemu; būbahangīla mu lina lya ng'wa Mulungu wa Isilaeli ūyo alī nsugi wabo.

2Hūna ū Zelubabeli, ng'witūnja o ng'wa Salatieli, nū Yeshua ng'witūnja o ng'wa Yosadaki, bīmīīla bandya kwīzenga hangī numba ya ng'wa Mulungu īyo īlī mu Yelusalemu, na a bahangi ba ng'wa Mulungu baalī hamò nabo bakūbagunanhaga.

3Ū mu shikū jenījo ū Tatenai ūyo walī nsugi wa sī ya kū nkīlo gwa mongo, nū Sesabozenai na a bichabo, būbasanga būkandya kūbawīla balīhaya, “Nani ūyo wang'winhile ī shilagīlo sha kwīzenga ī hekalu yenīyī nū kūshimalīja ī shikolo shenīshi?”

4Būbabūūja na gīkī, “A banhū abo balībeeja ī nzenga yenīyī, banani a mina gabo?”

5Alīyo ū Mulungu walī abalolile mu welwa ng'holò no a banamhala ba Bayudaya, batabalekije hangī kūshisha ū mhayo gūūshika kūlī Dalio, n'ishosho lyūfunyiwa mu nzīla ya nyalūba, akwīhayaga ī mihayo yenīyo.

6Ī mihayo īyī ya mu nyalūba īyo Tetanai nsugi wa sī ya kū nkīlo gwa mongo akandīka, hamò na Shesabozenai na a basugi bichabo a ba kū sī ja kū nkīlo gwa mongo; bakang'wandīkīla ntemi Dalio.

7Būntwalīla būsombooji bo mihayo ūbo walī wandīkilwe, “Kūlī ntemi Dalio, Mhola no.

8Shiigelile amane ū ntemi gīkī twalī twajile ū kū sī ya Būyudaya, ū kū hekalu ya ng'wa Mulungu ntaale, īlīzengwa na mawe mataale no, hama ū mu ndugu jilīyūtūūlwa mbawa. Nīyo ū nīmo gwenūyū balīgwīta mu būgaliili būtaale no na makono gabo, hama gūlīja wangū wangū no.

9Hūna lūūlū, a banamhala benabo tūkalūngalūnga nabo tūbabūūja gīkī, ‘Nani ūyo wang'winhile ī shilagīlo sha kwīzenga ī hekalu yenīyī nū kūshimalīja ī shikolo shenīshi?’

10Tūbabūūja na a mina ga batongeeji babo gīkī tūbandīke tūkwenhele.”

11Ī lishosho īlo bakatwinha līīlī, “A bise tūlī batūmami ba ng'wa Mulungu w'igūlū na sī, hama ī hekalu īyo tūlīyīzenga yenīyī yalī yazengwa ī myaka ī ya kale; ntemi ntaale ūmò waho ū mu Isilaeli walī wīzenga wīmala.

12Alīyo īkī a bakūlūgenji bise bakampelanya ū Mulungu wa ng'wigūlū, ūbatūūla mu nkono go ng'wa Nebukadineza ntemi wa Babuloni, ū Nkalidayo. Ū ng'wenūyo h'ūyo akīkenaagūla ī hekalu yenīyī, na a banhū ūbasaamya abatwalile Babuloni.

13Alīyo ū mu ng'waka gwa kwandya gwa ntemi Koleshi wa Babuloni, ū ntemi Koleshi akafunya shilagīlo gīkī, ī numba ya ng'wa Mulungu yenīyī īzengwe hangī.

14Nī shiseme sha zahabu nī sha feza, ī sha mu hekalu ya ng'wa Mulungu, īsho walī washīnja Nebukadineza kūfuma ū mu hekalu īyo yalī Yelusalemu, ūshisaamīja mu hekalu ya Babuloni, ī shiseme shenīsho ū ntemi Koleshi akashīnja ū mu hekalu ya Babuloni, winhwa munhū ūmò, lina lyakwe Sheshibazali, ūyo walī wang'wīta kūbiza nsugi.

15Ūng'wīla gīkī, ‘Ī shiseme shenīshi shisolage ūje nasho ūkashitūūle ū mu hekalu īyo īlī Yelusalemu, nīyo ī numba ya ng'wa Mulungu īzengwe hangī a h'ipandī lyayo.’

16Na ng'hana ū Sheshibazali wiza kwandya kwītūūla ī misingi ya numba ya ng'wa Mulungu īyo īlī Yelusalemu, na lūūlū kwandīja ikanza lyenīlo kūshisha lelo īyī, īkūzengagwa; gwike ītaalī ū kūshila.”

17Alilūūlū, ūlū īlībeelela ū mu miso ga ntemi, ni wītagwe būgīsīlīja ū mu numba ja kūbīkīla mihayo ya kale ī ja ng'wikūlū lya Babuloni, ībonwe ūlū gīkī ng'hana ū ntemi Koleshi akafunya shilagīlo sha kwīzenga hangī ī numba ya ng'wa Mulungu yenīyī, ū mu nzengo gwa Yelusalemu. Tūlīnomba ū ntemi alatwinhe nise ū būlamuji bokwe ū mu mhayo gwenūyū.

← Chapter 4 Jump to: Chapter 6 →