Ezra 8

Sukuma 2019

← Chapter 7 Jump to: Chapter 9 →

1A banhū aba h'abo baalī batongeeji ba kaya ja bakūlūgenji babo, na a babo bakandīkwa hamò nabo. Hū bene abo bakīnga hamò nane ī Babuloni, mu shikū ja būsugi bo ntemi Atashasta:

2Ū mu shibyalīlwe sha ng'wa Finehasi walīho Gelishomu; ū mu shibyalīlwe sha ng'wa Itamaali walīho Danyeli; ū mu shibyalīlwe sha ng'wa Daūdi walīho Hatushi

3wa mu kaya ya ng'wa Shekania. Ū mu shibyalīlwe sha ng'wa Paloshi; Zakalia na banhū igana na makūmi atanò abo baalī bandīkwa hamò nang'hwe.

4A ba shibyalīlwe sha ng'wa Pahati-moabu; Eliehona ng'witūnja o ng'wa Zelahiya, walī na banhū magana abīlī

5A ba shibyalīlwe sha ng'wa Zatu; Shekania o ng'wa Yahazieli, walī na banhū magana adatū

6A ba shibyalīlwe sha ng'wa Adini; Ebedi o ng'wa Yonasani, walī na banhū makūmi atanò.

7A ba shibyalīlwe sha ng'wa Elamu; Yeshaya o ng'wa Asalia, walī na banhū makūmi mpungatī.

8A ba shibyalīlwe sha ng'wa Shefatia; Zebadia o ng'wa Mikaeli, walī na banhū makūmi anaane.

9A ba shibyalīlwe sha ng'wa Yoabu; Obadia o ng'wa Yehieli, walī na banhū magana abīlī n'ikūmi n'inaane.

10A ba shibyalīlwe sha ng'wa Bani; Shelomitī o ng'wa Yosifia, walī na banhū igana na makūmi atandatū.

11A ba shibyalīlwe sha ng'wa Bebai; Zakalia o ng'wa Bebai, walī na banhū makūmi abīlī na banaane.

12A ba shibyalīlwe sha ng'wa Azigadi; Yonasani o ng'wa Hakatani, walī na banhū igana n'ikūmi.

13A ba shibyalīlwe sha ng'wa Adonikamu; abo bakabiza ba kūmalīja, a mina gabo ba Elifeleti, Yeūli, na Shemaya hamò na banhū makūmi atandatū.

14A ba shibyalīlwe sha ng'wa Bigivai; Usai na Zakuli, hamò na banhū makūmi mpungatī.

15Hūna lūūlū a banhū benaba nakababilinga kū mongo ūyo gūkahūūmaga gūjile Ahava; a henaho twikala shikū idatū. Nahayūbalola chiza a banhū na a bagabīji, nūbona gīkī a Balawī baalī batīho hoi.

16Nūtūma bitanwe ba Eliezeli, Alieli, Shemaya, Elinasani, Yalibu, Elinasani, Nasani, Zakalia, na Meshulamu abo baalī batongeeji; bitanwa na ba Yoalibu na Elinasani, abo baalī banhū bitegeleja;

17hūna nūbatūma baje Kasifia kūlī Ido, ūyo walī ntongeeji wa kwenūko. Nūbalangīīla ī ya kūjūhaya ū kūlī Ido na a baana ba ng'wawe, a batūmami ba mu hekalu, abo bikalaga Kasifia; batūtūmīle banhū ba kūjūtūmama ū mu numba ya ng'wa Mulungu wise.

18Īkī ū nkono gwawiza ū go ng'wa Mulungu wise gwalī hamò nise, būtwenhela Selebia, munhū wa būdūla būtaale; ū wei walī wa kūfuma mu shibyalīlwe sha ng'wa Mahili ng'wana Lawī, ū ng'witūnja o ng'wa Isilaeli. Biza na bitūnja bakwe ū Selebia hamò na badūgū bakwe; a bose baalī banhū ikūmi na banaane.

19Na Hashabia wiza hamò na Yeshaya, wa kūfuma mu shibyalīlwe sha ng'wa Melali, hamò na baana ba ng'wawe na bitūnja babo; a bose banhū makūmi abīlī.

20Benha na batūmami magana abīlī na makūmi abīlī ba mu hekalu; banhū ba nīmo ūyo gwandiwa na Daūdi hamò na bagunanhi bakwe kūlwa kūbagunanha a Balawī. A banhū benaba pye baalī bandīkilwe a mina gabo.

21Hūna aho tūtaalī a ha mongo gwa Ahava, nūlagīla gīkī tūfunge kūlwa kwidohya kū būtongi bo ng'wa Mulungu wise, na kūnomba atwīlūkīle lūgendo lwawiza, a bise benekīlī na a baana bise, nī shose īsho twalī nasho.

22Nguno nakacha minala ū kūnomba ū ntemi kūtwinha bashilikale na badamhīji ba falasa, ba kūtūlang'hana tūtizūnyang'wa ū mu nzīla; nguno twalī twamala kūng'wīla ū ntemi, “Ū nkono gwawiza ū go ng'wa Mulungu wise gūlī hamò na būlī munhū ūyo akankoobaga wei, alīyo ū būpelanu bokwe būlī kū bose abo bakanekaga.”

23Hūna lūūlū tūfunga, tūnomba ū Mulungu wise ū mhayo gwenūyū, ūtwigwa ū kūlomba kwise.

24Hanuma ya henaho nūsolanya bagabīji ikūmi na babīlī abo baalī batongeeji; hamò na Shelebia, na Hashabia na badūgū babo ikūmi.

25Nūbapimīla ī shakwinha sha feza nī zahabu, nī shiseme īsho shalī shafunyiwa na ntemi, hamò na bagunanhi bakwe na a batūmami bakwe a bangī, na a Baisilaeli abo baalī kwenūko, abo baalī bafunya sabo jabo kūlwa nguno ya numba ya ng'wa Mulungu wise.

26Nūbapimīla, nūbinha tani makūmi abīlī n'ibīlī ja feza, shiseme igana līmò sha feza, sha būdito wa kūshika tani idatū na nusu; zahabu ja būdito bo tani idatū na nusu,

27mabakuli makūmi abīlī ga zahabu, būdito wago gītī kilo inaane na nusu; na shiseme shibīlī sha shaba īguusilwe yūteemagīla no no no, yūbiza na mpango ntaale gītī zahabu.

28Nūbawīla, “A bing'we mulī beela kūlwa ng'wa SEEBA, nī shiseme shilī sheela. Ī feza nī zahabu shilī shakwinha sha wiyaabī kūlī SEEBA Mulungu wa bakūlūgenji bing'we.

29Shilang'hanagi chiza ī shikolo shenīshi, kūshisha ikanza lya kūshipima mu chumba sha mu numba ya ng'wa SEEBA ī Yelusalemu, kū būtongi wa bagabīji a batongeeji, na a Balawī, na a batongeeji ba kaya ja Baisilaeli.

30Hūna a bagabīji benabo na a Balawī būjanukūla ī feza nī zahabu nī shiseme ī sheela īsho shikaping'wa ū būdito washo binhwa kūshitwala Yelusalemu kū numba ya ng'wa Mulungu wise.”

31Lūshikū lw'ikūmi na kabīlī ū mu ng'weji gwa kwandya twīnga a ha mongo gwa Ahava; tūbūka tūjile Yelusalemu. Ū nkono go ng'wa Mulungu wise gwalī hamò nise, ūtūlang'hana ū kū banishi na a biboneeji ū mu nzīla.

32Hūna tūshika ī Yelusalemu, twifuula shikū idatū.

33Ū mu lūshikū lwa kanè twingīla mu numba ya ng'wa Mulungu wise, tūkashipima ī shikolo, ī feza, zahabu, nī shiseme ī sheela, tūshitūūla mu makono ga ngabīji Melemosi ng'witūnja o ng'wa Ulia; baalī hamò nang'hwe ba Eliezeli, ng'witūnja o ng'wa Finehasi, na a Balawī baalīho, na Yozabadi ng'witūnja o ng'wa Yeshua, na Noadia ng'witūnja o ng'wa Binui.

34Pyī ī shikolo shikandya shūbalwa tame, hūna shūping'wa; ū būdito washo wandīkwa ī likanza lyenīlo.

35Ī likanza lyenīlo abo baalī bashoka kūfuma kū būding'wa būmfunīja ū Mulungu wa Isilaeli shitambò sha kūpemvwa, nzagamba ikūmi n'ibīlī kūlwa nguno ya Baisilaeli bose, ng'ondi makūmi kenda n'itandatū, na ng'ondi songi makūmi mpungatī na mpungatī. Na ngulyati ikūmi n'ibīlī shakwinha sha kweja shibi. Ī shose shenīshi shalī shitambò sha kūpemvwa kūlwa ng'wa SEEBA.

36Nī shilagīlo sha ntemi būshishisha ū kū batūmami ba ntemi na a basugi a ba sī ja kū nkīlo gwa mongo; nabo ng'hana būbagunanha a banhū, nū nīmo gwa numba ya ng'wa Mulungu wise.

← Chapter 7 Jump to: Chapter 9 →